من يقول ان الشغل عيب .. ؟؟
بداية ..
من يقول ان الشغل عيب .. ؟
هذا ماعنـده ماعنـد جدتي - الله يرحمه -
وبعدين وش فيــه الشغل .. !! لا عيب ولا حـرام
والشغل احسـن من الطرارة عنــد الناس .. يعطونك او مايعطــونك.
(( تحسّون اني داخل بقوووه للموضوع اصبروا بفــك زرار ثوبي .. خانق رقبتي ))
السلام عليكم ورحمة الله
مساء/ صباح الخير للجميع .. كلّن بوقتــه
شلونكم .. عساكم بخيــر !!
الله يديم الخيـر والصحّـة على قلوب الجميع
ولا تنسون عصير الربيع " صحة للجميع " << دعاية ماهي ببــلاش
*
*
اخترت اليوم عنوان الموضوع هذا .. ( من يقول ان الشغل عيب ؟ )
وهالموضوع دايم اشوفه .. يتكلمون عنه في قناة المجد وخاصة في برنامج ( مهنتي )
وانا من محبي هالبرنامج .. ومن المؤيدين له << انت كل برنامج تحبّه . . الله يعين البرامج عليك
*
*
واللي خلانـي أأكد على كتابة الموضوع .. وارزّهـ هونــا في الدكـة الغالية << صوت تصفيق
ان شغالتنــا طسّــت .. من غير عودة ..
وتخبرون الواحـد لما يكون بيته مافيه شغاله ... ياخذ راحته بالمطبخ .. من احسن ما يكون
ولا كل شوي .. مرسل اخته .. تعالي روحـي .. ويلقــاه عذر ان الشغاله .. بالمطبخ (( هذا للي يستحي ))
*
*وعاد حنا في البيت
.. امي وابوي الله يحفظهم .. وخواتي واخواني الثنين .. وانا طبعا << بغيت انسى روحي
وجيت يوم الخميس وانا منطنخ وتوي صاحي الساعه 11.30 واروح المطبخ .. وافتح الثلاجة واطلع الخبز
واروح الميكرويف واسخنه .. واشب على البريدز واضبط الشاهي
واجي للصالة .. وشافتن امي .. قالت : الله واكبر وش عنده ابو الشباب (( ياحليل امي شبابية ))
قلت .. ابد يا ميمتي .. تخبرين الواحد لازم يخدم نفسه ..
قالت .. ايــه .. بس لا تنسى اذا خلصت ... تغسل المواعين حقات فطورك .. لانك حايس المطبخ حوس
قلت طيب ولا يهمّتس .. وانا يوم خلصت خذيت الفطور ونزلتـه بالمطبخ .. وصاروووخ لغرفتي
واطقطق شوي بالفوتوشوب .. بس ماطلعت بنتيجة زي العادة
وشوي .. الا يأذن الظهر واروح اصلي .. ويوم رجعت من الصلاة .. قالت امي .. : ماشاء الله خوش غسل للمواعين
ياربيـــه .. يا ميمتي نسيت .. وانا اصوت لـ أختي .. قالت .. انت غسّل ..
طيب الشكوى لله .. واجي يم المجــلا .. واخذ الســفنجة .. واحط فيـري ..
" على فكرة يا شباب .. الفيري حاقــة تانية خالص .. " جربوووهـ
ايـه .. واغسل المواعين .. وانا اغسل حسيت بنشاط زايـد << امحق من نشاط
لا من جد حسيت ان غسل المواعين مافيه شي ..
وش فيها اذا الواحد يساعد امه .. او اخته او زوجتـه .. وخاصة لما يكون البيت
مافيه شغاله .. وطبعا فيه اشياء خاصة للحريـم .. لكن الشيء اللي يقدر عليه الرجل .. يسويه
وخير قدوة لنا .. حبيبنا محمد صلى الله عليه وسلم .. كان يقوم بالاشغال مع اهله
فكان يكنس ويغسل .. عليه الصلاة والسلام .. وحنّا وش اللي ينقصنا ؟
او بس اللي نعرف له اذا الواحد مطول شعره يقول ( الرسول صلى الله عليه وسلم شعره طويل )
وكأن الرسول عليه الصلاة والسلام .. ما فعل شيء الا انه طول شعره .. فداهـ ابي وامي ..
طيب .. انت يا اخي ياللي تقرأ .. وتنافخ اشوفك << ايه صح
وش فيــها .. اذا قمت ورحت صلحت لك شاهي .. ؟ بدل ماتقول : يا فلانه هاتي شاهي
يا فلانـه .. جيبي لي ماء .. يا فلانه هاتي سراويلي << مابقى الا يا فلانـه .. ( محظور ) (( خاص للمتزوجين ))
عيب عليكم .. << امسكووهـ لا يفقع بوهـ عردز
والشيء اللي اكبر من كذا .. ان الواحد يقعد يامر وينهى على امّـه .. بحكم انه حرمـه وهذا من اختصاص الحريم
ياخي عسى تحرم عيشتك .. وش اللي حريم وخرابيط .. هذي امّك .. المفروض انه ماتدخل المطبخ ابد
وانت اللي تخدمـه لو في البيت 1000 شغاله <<< لا يا حبيبي غازي القصيبي يقول بس شغاله وحده تكفي
نكمّل ..
مثل ماقلت لكم .. يا شباب .. الشغل مافيه عيب
والعيب ان الواحد يتكبّر على اهلــه .. ولا يساعدهم
والرسول صلى الله عليه وسلم يقول في الحديث ( خيركم خيركم لأهــله ) او كما قال صلى الله عليه وسلم.
وماهو منقص من رجولتـك .. ولا ذابحك الشغل بالبيت
يعني .. اذا شفت اختك تلف السفرة عقب الغداء او العشاء .. مافيهاش حاقـة انك تساعدها
او زوجتك .. او امّــك .. وحتى في تحضير العشاء او الغداء
تروح تجيب الماء او السفرة
يا حبي لكم يا شباب ..
والله ان ودي نسوي لنــا حملة نلعن به خيّر المنتديات ..
وتكون من الـزين .. ( من يقول ان الشغل عيب !! )
وش رايـكم .. ؟
تنفـع .. الحملــة هذي ؟
والا مصيرة الفشل ؟
طيب ياللي تقول انه بتفشل .. اذا طلعتوا مجموعة للبر او للاستراحة
من اللي يطبخ ؟ من اللي يغسل المواعين ؟ ومن اللي يرتب المجلس بالاستراحة ؟
اشياء نقول انه من اختصاص الحريم .. واذا صرنا لحالنا سويناه !!
يعني معناته .. ان الرجل يقدر يقول بالاشياء هذي بكل يسر وسهوله
اذا انه تخلّــى عن التكبّر شوي .. وتواضع ومن تواضع لله .. رفعه
وبعدين وشووله تتواضع .. ؟ غصب على خشمك تتواضع
هذولا اهلـك ... اذا ماخدمتهم انت .. من بيخدمهم ؟ ولد الجيران .. ؟
عاد مثل ماقلت لكم يا جماعتي وربعي ..
الموضوع . . ماهو طويل .. ولا هي عادتيا كتب مواضيع قصيرة
احس ان الموضوع ماعليه ثوب .. مادري ليـــــه ؟
ههههههههههههههههههههه << بس عيب !!
على العموم .. انا قلت اللي بخاطري
واذا عندكم اي اضافه او اي اقتراح
عندكم الايميل .. بالملف الشخصي
او رقم جـوالي للســلاتيــح اللي معهم رقم جوالي << خاص بالشباب
والسلام عليكم ورحمة الله وبركاته
مواقع النشر (المفضلة)