₪ ః بقلمي ,,, قصة الاربع بنات ,,, ₪ః

[نبضهـ وفا]

انا اليوم حبيت اعرض لكم بعض من كتاباتي ,, واتمنى فعلا انها تعجبكم ,,

واذا اعجبتكم ,, راح استمر في عرض المزيد من القصص الي كاتبتها ,,


اخليكم مع القصهـ ,,,








قلمي ها المرة حاب يكتب لكم قصه من نوع جديد (( قصه اجتماعيه ))

وأبطال ها القصة أربع بنات ممكن أنكم صادفتوهم خلال حياتكم .. يعني تقدرون تعتبرونها قصه واقعيه إلى حدا ما ..


وماراح أطول عليكم وابدأ بسرد القصة ..


بسم الله الرحمن الرحيم ..

أبطال القصة زي ماذكرت لكم أربع بنات راح أعرفكم عليهم ..

هديل... عمرها 24 سنه متزوجة لها سنه وبدون أطفال..

أشواق و نوره .. العمر 23 سنه .. وغير متزوجات ..

نوف ... عمرها 21 سنه .. وهي بعد مابعد تزوجت ..

وجميعهم طالبات بالمعهد ..

شخصية البنات بوجه عام ... مرحات يحبون الحياة .. ويدورون للوناسه بشتى الطرق .. جريئات ومغامرات وخصوصا هديل وأشواق ونوره ..



هديل وأشواق ونوره كانوا دائما بعد مايخلص دوام المعهد يطلعون يدوجون ....
احيانا يعزمون بعض على مطاعم ... واحيانا يتمشون على الكورنيش ... واحيانا يتسوقون .... المهم يدورون لهم طلعه يوسعون صدورهم فيها ... حتى لو لقوا وناستهم في ضرب المشاوير البعيدة .... يعني لو جا في بالهم يطقون مشوار للدمام او للخبر ماعندهم مانع يسونها ...

ومره جا في بالهم يروحون لمدينة الثلج في الدمام ... والله وخططوا للروحه وجمعو لهم كم قرش ودبروا لهم سواق .... وفعلا راحوا لمدينة الثلج ولعبوا فيها .. إلى أن فرغوا الطاقة إلي فيهم على قولة نوره ...



أكيد أنتم تتساءلون وتقولون هذولي وين اهلهم عنهم ...

بالنسبة لنوره وأشواق .. كانوا يعطون أمهاتهم خبر .. ولأن أمهاتهم واثقين فيهم يسمحون لهم يطلعون ويروحون بدون تأخير .. يعني الساعة 8:30 بالكثير 9 وهم في البيت ..
أما هديل فزوجها متفهم ومقدر أن زوجته تحب تطلع وتتمشى مع صديقاتها .. خصوصا أن نظام دوامه شفتات يعني مو موجود معها على طول بالبيت وتحس بالوحدة لحالها ..وكان دايم يقول أنا واثق فيك ومتأكد أنك ماراح تخونين هالثقة ...
وكانت هالعبارة في بال هديل على طول كل ماطلعت مع صديقاتها وتقول لازم أكون قد هالثقه الي عطاني زوجي ...



أما بالنسبة لنوف عندها شوية حركات .. وراعية استهبال ... كانت من إلي عندهم شريحة ثانيه وجهاز سبير >> أظنكم فهمتوني <<< بس كل هذا بالنسبة لها لعبه وتضييع وقت ... تخلص من واحد ... تستلم الثاني .. وزي كذا ... وماكانت جديه مع أي واحد فيهم ...



وفي يوم من الأيام بعد ماخلص الدوام طلعوا هديل ونوره وأشواق .. ولأن معهدهم كان قريب من الكورنيش ... قرروا يروحون له مشي ... وهم في الطريق وقفت قدامهم سيارة سوداء شبابيه .. صوت أغاني الدي جي فيها عاااالي... أنزلوا منها 2 شباب حركه ... اشكالهم فللله ..وقامو يرقصون سامبا قدام البنات .. ولأن البنات مرجج استانسوا عليهم .. كانت هديل ونوره يمشون قدام وأشواق ورآهم .. لمن قربوا منهم قامت نوره وهديل يمسكون أيدين بعض ويحركون أرجولهم على خفيف زي رقصة السامبا <<< امحق متزوجة... وهم قبلها ملتفتين على الرجة إلي ورآهم أشواق ومحذرينها لاترقص .. بس أشواق لمن قربت منهم .. لا شعوريا قامت تحرك أيدها لهم وتصفق وهي ماشيه بطريقها ...وقالها واحد منهم والله أن تجين ماراح نسوي فيك شي ... قالت : لااااااا مسسسسستحيل عيب .. >> وهي في قلبها تقول ودي ما أردك <<
بعد كذا كملوا البنات طريقهم بدون ما يعطون الشباب أي اهتمام... بس الشباب ألحقوهم بالسيارة وأصروا أنهم ياخذون الرقم .. وقفوا قدامهم ومدوا لهم الرقم .. وطبعا البنات رفضوا >> عقب وشوا الله يهديكم << قال الي يسوق :الله يلعن الي يستحي اليوم والله لأعطيكم الرقم ... راحوا البنات ومدوا زوليتهم الي محملينها معهم دايم .. وجلسوا .. شوي إلا نزل واحد منهم من السيارة وراح لهم وقعد معهم <<< هذي الحركة دايم يسونها الشباب للبنات إلي مامعهم محرم .. يحطونهم أمام الأمر الواقع ..

وقال خذوا الرقم .. قامت هديل تصارخ عليه :قوم يالي ماتستحي وهي تلفت يمين ويسار ... بسرعة لاتفضحنا .. ونوره وأشواق يناظرون فيه ومفهين : قالت نوره : والله أن رقصكم جنااان ... أشواق : ايه كنتم روووعه .. الولد : يعني عجبناكم .. نوره وأشواق .: ايه تهبلووون ..بس يالله قوم لاتسبب لنا إحراج ... الولد : خلاص بقوم بس خذوا الرقم .. نوره خلاص بناخذه بس تقوم ولا تزعجنا أنت وخويك .. الولد : خلاص وعد .. دامكم بتاخذون الرقم ...

المهم هديل كان معها موعد في المستشفى .. ودقت على زوجها علشان يجي وياخذها ... ونوره وأشواق قعدوا بالكورنيش .. قالت أشواق لنوره : أنتي الحين من جدك بتاخذين الرقم .. ردت نوره : ياختي ماشفتي أشكالهم والله أنهم يونسون .. خلينا كل ماطلعنا للكورنيش ندق عليهم واخليهم يترقصون لنا .. قالت أشواق : حشا فرقه تحت الطلب شايفتهم ... وضحكوا ..

قربت الساعة تصير 9 قالت أشواق خلاص بدق على السواق يجي ياخذنا ... قالت نوره : اوكيشن << يقالها تعرف انجليزي .. بس صار لهم شي ماتوقعوه .. جاهم شاب جديد يتحرش فيهم .. وقال: على فكره أنا متابعكم من طلعتوا من المعهد يعني لازم تاخذون رقمي ولا بلحقكم إلى باب بيتكم ..وقبت الهوشه بينه وبينهم .. كلمه منه وخمس كلمات من أشواق ... وكلمه منه وعشر كلمات مع تهديد بالحجر من نوره .. لأن نوره كانت ملسونه وأقوى من أشواق.... وبالصدفة مروا الشباب إلي يترقصون وشافوا الهوشه ...وراح واحد منهم يسحب الولد من طريق البنات .. ويقوله عيب عليك تستقوي على البنات .. وبعدوه من طريق نوره وأشواق .. وقامت أشواق تدق على السواق على طول .. وجاء السواق وركبوا معه وهم ايدهم على قلوبهم من الولد إلي قام يهددهم .. والحمد لله عدت السالفة على خير ..وبعدها حرموا أنهم يروحون للكورنيش بدون أهلهم ..



لمن رجعت نوره البيت وغيرت ملابسها طاح منها الرقم إلي أخذته من الولد .. قالت والله لازم اشكرهم على شهامتهم >> بالله يا نوره <<
جلست تناظر في الرقم وتفكر .. قالت بينها وبين نفسها ..صعبه أدق عليه من جوالي فضيحة .. مافيه إلا أختي منيرة..(( أختها منيرة متزوجة وأم عيال .. بس أنها خبلة تحب تفلها مع البنات )) راحت نوره لأختها منيرة وقالت لها السالفة من طقطق لسلام عليكم .. قالت منيرة: خلاص كلميهم من جوالي بس قولي لهم لا يدقون عليه مرة ثانيه ..((بيني وبينكم أذا دقوا عليها والله لا يتحسفون قد شعر راسهم )) ..
ماعلينا .. خذت نوره الجوال وراحت دقت على الرقم إلي بالورقة الساعة وحده ..

نوره: الوو << منعمه الصوت أول مره تكلم شباب ودها تميلح ..

زياد ووليد : فتحوا السبيكر لمن شافوا رقم غريب .. وسمعوا صوت بنت .. بدوا يستهبلون .. واحد يستهبل بصوته ويكلم خويه .. ياخي هذي زوجتي دايما تدق بالأوقات الغلط .. .. الثاني :هلا والله بزوجته ويضحكون..

نوره تضحك: الله يرجكم .. صدق مجانين ..

وليد : اهلين مين معنا ..

نوره : أنا الي فزعتوا لها مع خويتي بالكورنيش ..

زياد : قصدك الي رقصنالكم اليوم ..

نوره تضحك : ايه .. الي رقصتولهم ..

وليد : ودنا نتعرف .. وش اسمك ..

نوره الخبله : أنا أسمي نوره .. وأنتم ؟

وليد : معك لؤي .. وش لؤي موب راكب .. اسمي وليد .. وخويي زياد ..

نوره : والنعم فيكم .. بس بصراحة أنا داقه علشان أشكركم على الموقف إلي سويتوه اليوم .. الولد نشب لنا وكنت ناويه أجيب العيد فيه ..

زياد ووليد : لا عااادي .. أصلا الموقف سخيف ولمن شفناه يتحرش ويفرد عضلاته عليكم قهرنا ..علشان كذا بعدناه عنكم ..

زياد : بس اش رايك فيني مو بطل لمن بعدته عنكم ..

نوره : إلا بطل مشاالله عليك ..وتضحك ..

وليد : أنا بعد بغيت افزع .. بس أنا يالله اربط حزام البنطلون ..

نوره: لا الله يعافيك الولد الخكري يطيح من عيني ..

وقاموا يغنون لها اغنيه مألفينها عنها وعن خويتها .. وهي تضحك على التأليف ..

وقامت تسولف معهم بس ماطولت معهم ..لأن منيرة اختها دخلت عليها وقامت تسويلها حركات تهديد من بعيد .. لأن حضرة الآنسه نوره متميلحه مع الشباب .. ومسويه فيها رومنسيه .. وأنها جميله .. و.. الخ .. وأختها تقول والله لافضحك اذا ماسكرتي .. بسرعه الرصيد لا يخلص ....
وبعد ماخلصت نوره وقربت تسكر .. قالت وليد .. وليد: يالــــــبيه .. نوره: قول أنك بطل وشهم .. > تستهبل عليه <
قال لها: اش دعوه مصدقه أنتي .. قالت : لا بس اقرفتني بسالفة الحزام ..
وليد وهو يضحك: لا أنا اقوى واحد بالدنيا .. أصلا كنت خايف على الولد مني لا أضحي فيه ..

نوره : يالله مع السلامه مقدر أطول .. الشباب: مع السلامة ..

نوره : لحظه .. قبل لاتقفلون ..
الشباب: خير ..
نوره: لاتدقون على الرقم ترى رقم أختي وبتفضحني اذا دقيتوا عليه مره ثانيه ..
الشباب: حساااافه .. بس ولا يهمك ..

ومن بين السوالف اكتشفت نوره أن الشباب مو من سكان منطقتهم .. وأنهم جايين من الدمام يبون يمرون واحد من اخوياهم ..



وجاء من بكره وتسولف نوره لشله القصة ..

أشواق : اخسس يالجريئه .. بس لاتعيدينها .. موب حنا الي ندور لذا السوالف .. نوف مو مقصره ..

نوف : خير انشالله .. أنا الي صرت راعية هالسوالف بينكم .. هذي نوره ماقصرت ..

نوره: لا انشالله .. بس حبيت اصير سنعه واشكرهم ..

هديل: ايه طيب .. موب لازم تصيرين سنعه دايم ..



ومرت الأيام والأسابيع ..وخلصوا البنات دراسة بالمعهد وتخرجوا بدرجات حلوه .. وجا على بال هديل ونوره وأشواق طلعه للدمام .. مشتهين هالمره يروحون لملاهي الحكير وبعدها يتسوقون ..

وفعلا خططوا كالعادة للروحه .. واهم شي موافقة الأمهات والسواق ..وهديل طبعا موافقة زوجها ..


وفعلا حركوا للدمام .. والطريق للدمام ساعة كاملة .. وكانت أشواق جالسه بالنص بين هديل ونوره .. وتلتفت نوره على أشواق وتقول وهي تهمس : تدرين وش جا في بالي ..
أشواق: وش ..
نوره: زياد ووليد .. مو ساكنين بالدمام ..
أشواق : ايه صح قلتيلي .. ياحليلهم .. تخيلي لو نقابلهم هناك ..
نوره : وش رايك ..
أشواق : هييي بنت ..
نوره: وش علينا ماراح نسوي شي غلط.. بنوسع صدرونا معهم بالملاهي .. وبعدها كلن يشوف طريقه ..
أشواق : تهقين بتضبط معنا .. بصراحة بتصير وناسه معهم .. بس هديل ماراح ترضى..
نوره: ماراح نبين لها . واذا قابلناهم بنقول صدفه.. بسسس وشلووون ..
أشواق فكرت شوي وقالت:أرسلي مسج .. لأنك لو دقيتي ماراح تقدرين تتكلمين .. لأن هديل راح تسمع صوتك ..
نوره : فكره بس وش اكتب ..
أشواق : اكتبي لهم أنا نوره ورايحه مع خوياتي للحكير الحين .. ودنا نشوفكم هناك ..واذا شفناكم هناك راح نبين أنها بالصدفه .. لأن خويتنا المتزوجة ماراح ترضى أننا نتواعد ....
قالت نوره:طيب . بس أنا خايفه ....
أشواق: من وش ...
نوره: لهجة واحد فيهم تشبه لهجتنا .. واحس أنهم اخويا خواني .. وش رايك نرسل من جوالك ..
أشواق . اوكيه .. بس على مسئوليتك ...
نوره : ولا يهمك ...
أشواق: نصيه ..ولا وسائط .. هههههههههه
نوره: هي انتي مع وجهك .. وش وسائطه ..
أشواق: الوسائط اوفر راح ترسل بصفحه وحده هههههههههههههه...
نوره:وش رايك ترسلين كول مي .. من طول الرسالة الحين.. اخلصي نصيه وتخب بعد...
هديل: اش عندكم.. وش تبربرون فيه..
أشواق: لا ابد نوره مدري اش عندها ..
نوره: ايه أختي منيرة مرسله مسج.. وأبي أرد عليها .. وأقولها إنا حنا لسى بالطريق..
وفعلا ارسلوا المسج من جوال أشواق ..ومرت ساعة ونص .. ووصلوا للحكير ....
بس الشباب ماردوا لهم خبر....
أشواق: أحسن يا نوره تصدقين يمكن خيره ....حنا بعد والله مجازفات ندخلهم معنا .. نوره : صادقه والله ....
أشواق : برسل لهم مسج وأقولهم خلاص .. هونا .. لاتجون ...
نوره: براحتك ... أحسن بعد ..>>> مدري وش تفكيرهم هالبنات <<<

ودخلوا الملاهي .. وجلسوا يلعبون فيها بس ما طولوا لأن الألعاب إلي فيها مو مره <<< ودها تشكي حال الملاهي خخخخ .... وطلعوا بعدها يتسوقون ..

وهم في السوق .. دق جوال أشواق.. أشواق: رقم غريب ماراح أرد .. ويدق مره ثانيه..ولا ردت .. والمره الثالثة ... مسج ... ( ردي أنا وليد ) ...
راحت أشواق لنوره : نوره وليد يدق ..
نوره: وش عنده ....
أشواق : وش يدريني أنا .. مارديت عليه ..
نوره: هاتي الجوال برد عليه ..
نوره: الوو......
وليد: هلا نوره.. أنتم أرسلتم مسج لخويي تقولون أنكم في الحكير ..كنت نايم توني صحيت ....
نوره: ايه صح بس خلاص طلعنا منها .. حنا نتسوق بالمول الحين لاتعب نفسك وتروح ..
وليد: بأي مول ......
ووصفتله نوره المول الي هم فيه ..
وليد: اها .. عرفته .. خلاص جايكم بالطريق..اذا وصلت بدق عليكم. . وسكر الخط..
أشواق : ها وش صار..
نوره: بالطريق.....
أشواق: أي طريق.. نوره:جاينا للمول..
أشواق: خييييييييير .. نوره: الله يستر ...
ويدق وليد ردت نوره وقال: أنا الحين عند البوابة رقم1 يالله اطلعيلي بشوفك ...
نوره: بطلع بس لاتحاول .. مستحيل تشوفني .. ولمن نوره كانت تكلم وليد ..
أشواق راحت تفهم هديل السالفة ....هديل: وش ناوين عليه ...
أشواق : بنطلع نشوفه ...وماراح نسوي شي ثاني ..
هديل: الله يلعنكم .. ابتلشت فيكم .. يالله قدامي ..

وطلعوا البنات عند البوابة رقم 1 واقفين ينتظرونه... ومرت سيارته .. وعلى طول اعرفوها .. وهو شاف 3 بنات واقفين وعرفهم ...ووقف قدامهم ..
راحت له نوره وأشواق لحقتها بس أنها استحت ووقفت بالنص(( حقت خير الامور اوسطها بالسياره بالنص وهنا واقفه بالنص )) وهديل واقفه قريب من البوابة ومكتفه يدها ومتوترة .. نوره راحت لوليد تسلم عليه .. قالها: اركبي .... قالت: عسى ماشر .. ماراح اركب ...
وليد :اذا خايفه هاتي خوياتك معك .. وافحط معكم في العزيزية..
نوره : ونااااسه. .بس لا لا .. مانقدر أنت الي اصريت تجي ....
وليد: طيب اركبي بشوف وجهك بس
نوره: شوف وجهك بالمرايه.. اشبهك... وتضحك..
وليد:والله لو تشبهيني لا سحب عليك... يلتفت وليد على أشواق ويدق لها التحيه.. وهي تردها له ... قالت نوره لأشواق :بالله ماشبهه....
أشواق تكلم وليد: الا تشبها .. وعادك احلا منها شوي...
ضحك وليد: لو تشبهني لا سحب عليها ....
أشواق: الله واكبر الي بتفرق معها...
وليد يلتفت لنوره: يالله اركبي .. لاتخافين..
نوره: طير.. والله ماركب..
وليد: توني متغدي وماراح أسوي شي .....
ضحكت نوره وقالت:غدا هالوقت.. بالعافيه... بس مستحيل اسويها... بعد كذا ودع البنات وراح بطريقة
ورجعوا البنات لهديل... قالت هديل: دقوا على السواق ابي ارجع للبيت...
البنات ...خلاص ولا يهمك .. ولا يصير خاطرك إلا طيب ...
وراحوا يتعشون .. وبعدها دقوا على السواق علشان يجي ياخذهم .. ورجعوا للبيت بالسلامه ..



ولمن صارت الساعة وحده ةونص في الليل ..دق جوال أشواق..شافت أشواق الجوال لقت نفس الرقم الي ارسلوا عليه مسج....
أشواق: الوو.... رد عليها واحد فيهم بس ماعرفته..قال: هلا والله ..

أشواق: اهلين.. مين وليد.. رد عليها: لا خويه زياد ...
أشواق: خير وش عندك.... زياد : لو سمحتي ابي اكلم نوره....
أشواق:ماهي موجوده في بيتها ... زياد: اجل عطيني رقمها...
أشواق:خير انشالله .. لاطبعا ماراح اعطيك رقمها... زياد : ليش ابيها ودي اكلمها بشغله..
أشواق:قول وش عندك .. أنا بقولها .. زياد: لا أنا ابي اكلمها .. ابيها تعطيني رقم خويتها..(( اثرهم مخططين وليد ياخذ نوره وزياد لأشواق))
خافت أشواق قالت: لا مقدر أعطيك رقمها .. وبعدين البنات مو راعين مكالمات ..
زياد: أنتي وش خسرانه...سكت زياد شوي و قال: بعدين أنتي مين فيهم الحين...خافت أشواق وقالت: أنا المتزوجة . وعيب عليك تدق علي ... بس زياد ماقتنع..
زياد: خلاص أنتي عطيني رقمها .. وماراح تشوفين رقمي مره ثانيه ...
قالت أشواق: خلاص بدق عليها اذا رضت عطيتك رقمها .. واذا مارضت أنسى ..
زياد : اوكيه.. بس راح أدق اخذ الرقم .. وسكر الخط..


راحت أشواق تدق على هديل وتفهمها إلي صار... قالت هديل خلاص حولي المكالمة علي .. وأنا بتفاهم معه.. أشواق: انشالله..
راحت أشواق لجوالها .. ضبط المكالمات .. تحويل .. وحطت رقم هديل..
شوي الا زياد متصل وتحولت المكالمه لهديل..
هديل : الوو.. زياد استغرب الصوت: الو مين نوره..
هديل : لا خويتهم المتزوجه .... وقامت هديل تفهمه السالفه وأن خوياتها تجيهم هفات بعقولهم .. بس مو من النوع الي يكلمون شباب... زياد تفهم الموضوع
وسكر الخط.. بعدها أرسل مسج .. طبعا المسج وصل حق أشواق....
المسج كان رومنسي وحزين ... قرت أشواق المسج وقالت: ياحرام ...
بس مشكلتهم ..


وجا من بكره وصارت الساعة 12 في الليل ودق جوالها نفس الرقم الي امس ..
أشواق ردت : وبعدييين ماقلت خلاص لاتدق .. الايرد عليها صوت يختلف عن صوت زياد.... قال: وش الي خلاص ....قالت أشواق:مو أنت الي دقيت امس....
رد عليها: لا مو أنا .. عصبت أشواق: تستهبل أنت ... قال: لا هذاك زياد الي كلمك امس...
أشواق: وأنت وليد انشالله.... قال : مشالله طلعت مشهووور وأنا مدري...
أشواق: خير وش عندك أنت بعد .... وليد : اشفيك معصبه ..
أشواق: وش رايك ... وحده تقول لا تدقون عليها ولا تزعجونها وحضرتكم ماتفهمون... وليد : مالي شغل هالكلام لزياد ..أنا مدري عنه .. اخذت جواله ودقيت ...
أشواق: اخلص وش عندك.... وليد : أنتي خوية نوره الي دقيت لها تحيه صح ..
أشواق:وش رايك ....قال: لا ابد .. عاجبتني وودي اكلمك ...(( خلاص نوره مايقدر يوصلها ومافيه الاأشواق يعرف رقمها))لأنه طلع اللعاب فيهم ووده يشبك أي وحده ..
أشواق: وأنا ماابي اسولف .. وسكرت بوجهه ... وقعد يدق عليها وهي ماردت ..


وجا من بكره وفي نفس الوقت الساعة12 دق جوالها... بس هالمره الرقم يختلف مو نفس الرقم الي يدقون منه... أشواق قالت مافيه غيرهم يعرفون رقمي ماراح ارد..وظل يدق عليها وهي ماترد.. بعدها ارسل مسج ((أنا وليد وهذا رقمي ))
ردت أشواق: لاحووول..حنا وش اتفقنا عليه ..
وليد : ماذكر أننا اتفقنا على شي ..الا ماقلتيلي وش اسمك وش أناديك فيه ..
أشواق: ماعندي اسم..
وليد: يالله قولي أي اسم أناديك فيك ماتفرق معي ..
أشواق:مو لازم تناديني..
وليد : تذكرت منتي طويله واجد ... بناديك شبر ونص ..
أشواق: ياسخفك .. اش دعوه أنت طويل عاد..
وليد: على الاقل الناس لامروا جنبي يشوفوني ..
أشواق : لايكثر .. بس تدري عاد .. اكبر غلطه أني خليت نوره ترسل مسج من جوالي..
وليد: والله ياشبر ونص.. هذي احلى غلطه بالنسبة لي.. وبعدين أنتم الي كلمتونا وارسلتم المسج محد غصبكم ..
أشواق: ايه صح.... بس صدقني احنا استناسنا عليكم بالكورنيش .. وبعدها غلطنا لمن ارسلنا المسج .. بس والله ماكان في بالنا شي ثاني ..
وليد:وأنا بعد عجبتوني .. واستانست عليكم ....
وخذتهم السوالف ... بعدها قالت : هالمره عطيتك وجهه.. بس تكفى .. قاطعها..وقال: وجع لاتقولين تكفى ...
قالت: لا بجد.. تكفى ..أبيك توعدني ما تدق مره ثانيه ... قال : أفكر..
قالت: لا .. الله يخليك لهلك ..لا تدق مره ثانيه... قال: مقدر أوعدك ..بس أحاول ..


وصار له كم أسبوع يدق .. بس أشواق هالمره صارت صارمه .. ولا ردت عليه ...
لاكن صارت خايفه لأن امها لاحظت أنها خايفه أن احد ياخذ جوالها .. وكل مادق تروح تشيك بسرعة .. يعني تصرفاتها صايره متغيره ...(( لأن أشواق اول جوالها تحطه بأي مكان ماهي مهتمه.. وتخلي أخوانها الصغار يردون على المكالمات عادي عندها.. بس بعد إلي صار.. صارت تخاف .. وخصوصا أنها مره خلت جوالها ونست عنه.. ودق وليد .. وردت عليه اختها الي برابع ابتدائي .. وراحت اختها لامها وأشواق عندها.. قالت اختها :يمه رقم غريب دق على جوال أشواق ورديت وسمعت صوت واحد بس سكر على طول لمن سمع صوتي ... قامت أشواق .. وقالت : أنا ماقلت لاتردين على ارقام غريبه .... )) وبعدها الام مو مقتنعه ..راحت أشواق تحط الرقم باسم .. ظنها أنها راح تبعد الشبهه عنها ...



وصارت أشواق تشتكي لخوياتها الي قاعد يصير معها ... وأكثرهم يقولون خليه ولاتردين عليه ..بعدها راح يبطل ..


بس الولد ما تاب وظل يدق عليها ..



وكالعادة كانت أشواق تسولف مع نوف على الثابت .. وهي تسولف دق وليد على أشواق.. قالت أشواق:نوف وش اسوي فيه .. ذا جاب لي الشبهه .. أزعجني في حياتي ..
نوف:أنا عندي الحل .. أنتي عطيني رقمه.. وأنا راح اتصرف معه..
أشواق: اخاف اوهقك معه..
نوف: لاتنسين أنا عندي شريحه ثانيه .. ممكن ارميها في أي وقت .. مافيه مجال اتورط معه...
أشواق: خلاص أهم شي تفكيني منه..



خذت نوف الرقم ودقت عليه...

نوف: الو... أموله .. وليد:سمع أموله وقام يقلد صوت بنت ... اهلييين ..

نوف: اشفيك.. بنت ليش صوتك كذا.. وليد: ابد توني متسبحه واخذت برد ..

نوف بعدت السماعة و تضحك بينها وبين نفسها ..وبعدها رجعت ترد:يؤ شكلي غلطانه .. مو أمل ..

وليد: أصير لك أمل إذا تبين ...

نوف : لا اخوي .. آسفة على الإزعاج .. وسكرت الخط...وهي عارفه أنه راح يدق ..

وطبعا الولد مستحيل يفوت على نفسه هالصيدة الجديدة ...دق عليها بعد ماسكرت على طول ..
نوف : الوووو ...... وليد مقلد صوت بنت ويستهبل: معك امل ......

نوف: هييي ولد .. أثقل وأنت تكلميني ولا اسكر بوجهك ... أنا كنت غلطانة وشوله تدق علي ..
وليد : مشكلتك أن رقمك طلع عندي ... قالت:اييييه صح .. مو مصدق .. ذبحوك البنات..
وليد: اخس تعرفيني ... لايكون وحده من خوياتي ..
قالت: وعععع.. مابقى الا أنت ...المهم بقولك ليش دقيت عليك ...
قال: اها .. السالفه فيها أنا .. سمي ليش داقه ..
قالت: أنت مزعج وحده من صديقاتي وسببت لها إحراج مع أهلها ..
قال: امممممممم أول شي اهنيك على سالفة أمل.. ثانيا .. منهي البنت الي تقولين عنها..
نوف: البنت الي تتصل عليها على الرقم........ 050123.. وليد: اها .. خير وش صار..
نوف:تدري أن هذا رقم امها وأنك سويت لها مشكله معها .. والبنت متوهقه الحين..
وليد: افا ...والله ماكنت اقصد..
نوف: المهم.. لاعاد تدق عليها ... كافي الي سويته...
وليد: لا خلاص مستحيل ادق عليها..وش شايفتني ... بس هي لو قايلتلي من البداية . ما كان صار الي صار ...>> مايدري أن السالفه من تاليف نوف<<
نوف :اوكيه .. خلاص .. بس ياويلك أن دريت أنك دقيت عليها ..
وليد : ليه وش بتسوين يعني ...
نوف: ماتعرفني .. أنت جرب وشف وش بيصير لك .. بس اكتب وصيتك قبل لاتدق ..
ضحك وليد: اصلا ماراح ادق .. بس ودي اشوف وش ناويه عليه يالفزعه ..
نوف: دامك ماراح تدق مو لازم تعرف ... يالله باااي..
وليد: مع السلامة وفرصه سعيدة ..



المهم أن وليد صار يعرف رقم نوف.. وصار يدق عليها ..وطبعا نوف ماهي خسارنه شي .. وخصوصا أنها عرفته من كلام أشواق ونوره عنه ... واضافة رقمه
بالقائمة الي عندها بالشريحة الثانية .. قائمة نوف كانت((الصيدلية – اتصالات –هايبر بنده – الراجحي – راعي البل – النشبه – الورع – فاطمة الخياطة >> مدري وش جابها ذي<< ...الخ – والحين اضافة السامبا تقصد وليد )) وحاطه اسمائهم كذا علشان تفرق بينهم .. وترد عليهم وقت ماتبي ..

وصارت تكلمه ... وليد كان شخص عفوي ومرح وسوالفه كانت تعجب نوف...
خصوصا أن نوف ماقد تعرفت على شخص زي كذا .. وأعجبها ...

وصارت تكلم أشواق عنه ...
أشواق: صادقه .. الولد ينحب .. بس أنتبهي تراه لعاب
كذا حسيته..
نوف: لاتخافين علي.. أشواق: صادقه لازم اخاف عليه ...
نوف: أوصفي لي شكله ... أشواق: نوووو .. اخاف تعلقين فيه ..
نوف:معناته أنه حلو... أشواق: وسيم يعجبك ..
نوف: حسيت من صوته .. أشواق: وعععع من زين صوته ...
نوف: الي صوته حلو .. اعرفي أنه شين ..واللي صوته مش ولابد .. اعرفي أنه وسيم ..
أشواق: اخس يالخبره .. مدري أنتي افهم مني..
نوف: هذا الي استنتجته ..




المهم تطورت العلاقة بين نوف ووليد ...مع أن علاقتهم مالها إلا أسابيع .. بس إلي يشوفهم يقول لهم سنين يعرفون بعض .. وصارت مكالماتهم يوميه ..
وكانوا صريحين مع بعض .. بس أنها حاطه في بالها أنه مستحيل تستمر هالعلاقة
... وخصوصا أن وليد اول مابدى يتعرف عليها ... قالها أنه شخص حق سوالف وطق حنك يعني لاتنتظرين بكره اجي واقولك تتزوجيني .. وهي نفس الشي ..
يعني وافق شناً طبقه ...



وصار الولد يتكلم عن علاقاته القديمة .. وأنه ماعمره تعرف على وحده مثلها ...
بس نوف ماكانت تبين له أن هالكلام يأثر فيها ((و بصراحة البنت متأثره بس ماكانت تقول لأحد))


وطبعا كالعادة نوف تكلم أشواق عن آخر التطورات لأنها اقرب وحده لها من الشلة..
أشواق تعرف خويتها زين ... وتعرف أنها قويه بها المواقف ....
بس حست أن نوف تخفي مشاعرها الحقيقيه عنها ... وحست أنها تعلقت في وليد صدق مو لعب ...
ولا من متى نوف تعجب في شخص كذا ومالهم إلا أسابيع ... نوف علشان يعجبها الواحد يبيلها شهور مو أسابيع .... خافت أشواق وقامت تنبه نوف وتقول: يابنت أنتبهي .. لاتتوهقين معه ... نوف: اش دعوه لاتخافين ..
بس أشواق قلبها قارصها .. ومومرتاحه ..




وكبرت العلاقه بين نوف ووليد .. وصارت الثقة قويه بينهم ..
وصار وليد يقول لها : ادري أنك دبه وشينه .. وحتى الصوت مو ذاك الزود مع أن بحتك حلوه ... بس والله تنحبين ... نوف : لا والله .. صحيح مو ملكة جمال بس حلوه ..وكان دايما يعايرها .. مره خشمها مدري كيف.. ومره شعرها <<< يستدرجها طبعا..
وطبعا أنقهرت البنت .. ومسكت الجوال وصورت نفسها وخلت الصورة ابيض واسود >يقالها مآخذه احتياطها<وأرسلتها له ...( وكانت أول مره تسويها نوف)

ودق وليد أول ما وصلت له الصورة.. أول ماردت نوف .. وليد: نصااااااابه هذي أنتي ..
نوف: ها وش رايك..
قال: والله أن الصورة حلوه .. بس مسسسستحيل تكون صورتك ...
قالت: والله العظيم صورتي ..
قال: تبين الصراحة ..
ردت: وفيه احلى من الصراحة..
قال:صحيح على قولتك مو ملكة جمال.. بس فيك برائه موطبيعيه .. عيونك خطيره ..
ولاتفهميني غلط بس عليك شفه خطيررره .. صوتك كان ظااااالمك...
البنت حست بالذنب قالت بينها وبين نفسها ... أنا وش سويت ..
قالت: وليد لاتفهم غلط أنا مارسلتها عشان تمدحني او شي ثاني في بالك ... بس حبيت ابين لك أني موشينه زي ماكنت تقول ..
وليد: والله أنك خبله الحين أنا لو ماعرفك زين كان قلت عنك كذا ....
ونوف عادها متفشله قالت: ايه ادري بس بغيت ابين لك أني صادقه ...
قال : خلاص صدقت وهو يضحك ...



وبعدها كالعادة كلمت نوف أشواق... وقالت لها الي صار ... أشواق أنصدمت ..
قالت: نوووف أنتي في وعيك.... وش الي سويتيه ...
نوف: ادري أني غلطانه..بس مدري وش الي جاني وخلاني أرسل له الصورة ...
أشواق: ماخفتي يفضحك وينشر الصورة ...
نوف: لا طبعا .. صورته وصور ابوه واخوانه عندي مايقدر ماخذه احتياطي ههههه.. امزح.. بس مدري ياأشواق ماتوقع وليد يسويها ..
أشواق: ولو .. ماترسلين له صورتك .. خبله أنتي .. تخيلي بكره يشوفها واحد بجهازه وطلع يعرفك وش بتسوين وحتى لو كانت ابيض واسود على قولتك واضح أنها صورتك ...
نوف: مدري وش اقولك بس هذا الي صار...وخلصت المكالمه..

أشواق جلست بينها وبين نفسها ... وحست بالذنب وتقول... لولاي ماكان تعرفت نوف على وليد .. صحيح أنه مو أول شخص تعرفه .. بس أحس أنها تعلقت فيه واجد وواثقه فيه ثقه عميا ... أنا لازم اتصرف..



بعد اسبوع اتصلت أشواق على نوف...
أشواق: الو.. نوف شخبارك...
نوف: طيبه الحمدلله .. وأنتي..
أشواق: الحمدلله ماعلي .. بس بصراحه ضميري يأنبني..
نوف: عسى ماشر ..
أشواق:نوف أنتي صديقتي وعزيزة وغالية علي وأول ماعرفت أنك تكلمين شباب سكت .. لأني عارفه أنها لعب في لعب .. بس الحين بديت أخاف عليك .. وخصوصا بعد التطورات إلي صارت بينك وبين وليد الفترة الأخيرة ..
نوف: والله حتى أنا مو مرتاحة وخصوصا أن الولد تعلق فيني ويقول أنه ماينام الا اذا شاف صورتي .. صرت ياأشواق ما أنام الي بعد مااغرق مخدتي دموع..
أشواق: شفتي أنك مو مرتاحه .. نوف ليش ماتتركين هالطريق أنتي وش مستفيدة منه.. مايجي منه إلا عوار الراس .. والذنب الي اخذتيه لمن ارسلتي الصورة .. وبيني وبينك حنا مو ناقصين ذنوب .."وقامت أشواق تاخذ دور الواعظه .. وتبين لنوف العواقب الي بتصيرمن ورى هالطريق" بالاخيرقالت أشواق : أنا ماقلت كذا.. الا الأنك صديقتي وتهميني .. ولا كان خليتك ويصير الي يصير وش علي أنا ..
قامت نوف تصيح وتقول : والله ياأشواق فاهمه وادري أني كنت غلطانه .. وأني ياما تندمت .. بس خلاص انشالله اذا شفتك قريب راح اخليك تكسرين الشريحة ..
ردت أشواق: مو الشريحة المشكلة .. لازم أنتي تكونين مقتنعة بالي تسوينه .. اذا ماقتنعتي وش الفايده .. اليوم تكسرينها وبكره تطلعين غيرها ..
نوف: اقوول .. والله لأروح اكسرها .. وأنهي كل شي..وخلصت المكالمة ..


راحت نوف لجوالها السبير.. ولقت اكثرمن مكالمه لم يرد عليها لوليد...
دقت عليه ولأنها كانت تعزه ماتبي تبين له شي...
نوف: الو وليد..
وليد:هلا والله .. وينك لك يومين مالك حس..
نوف: وليد.. خلاص ملكتي الاسبوع الجاي .. وياليت تنساني ..<< عذر البنات اذا بينهون العلاقات
وليد:لااااا. وش تقولين ...
نوف: بصراحة أمي درت بسالفة الشريحة الثانية .. وبهذلتني ..
وليد: والله اذا تبين اجيك واخطبك من اهلك..
نوف خربتها ولاشعورياً قامت تضحك ضحك مو طبيعي ..قالت حنا ماناخذ من برا ..بعدها ارجعت لطبيعتها .. وقالت: وليد خير تخطبني .. اخبرك مو جدي بالعلاقات ..
قال: والله أني صادق .. وقال لها .. معك وليد بن فلان ال فلاني .. وأنا من منطقة (...) وحنا من قبيلة معروفه.. احببببببببك يانوف .. تفهمين وش قاعد اقول ..
خافت نوف وقالت: وليد.. صدقني ماينفع الكلام الي تقوله ... الله يخليك افهمني ..
وليد بنبرة حزن : براحتك يانوف.. بس أتمنى أن كل إلي كان بينا يكون ذكرى حلوه ...
نوف: أكيد... وسكرت الخط .. وطلعت الشريحة من الجوال.. وكسرتها .. وأنهت كل علاقاتها القديمة ...هايبر بنده وطقته .. بس للحين أموت واعرف فاطمة الخياطة وش جابها بشريحتها..




ومرت الشهوررررررر..

هديل .... الله رزقها بولد يجنن وملى عليها وقت فراغها اذا غاب زوجها ....

نوره .... تزوجت .... بس ماتبعد من أختها منيرة ..

أشواق .... استلمت وظيفتها الجديدة بالبنك .. ما كان طموحها .. بس شي يشغلها ..ولاتقعد فاضيه..

نوف .... كملت دراستها الجامعية .. وهي مخطوبة الحين .. وعسى يملى الفراغ العاطفي الي عندها ..





أنا ماسويت اكشن بالقصة ... وماخليتها مأساويه ... بس حبيت أبين .. اذا الله ستر على هديل وأشواق ونوره في كثير من المواقف .. ونوف طاحت على شباب مايدورون الفضيحة للبنات .. مو معناته الي كانوا يسونه صح ...بالعكس كان ممكن أنهم يتورطون في مشاكل كثيرة ومالها نهاية ..

ياليت أن كل البنات .. قبل لايفكرون يسلكون هالطريق.. يفكرون مليوووون مره ..
يفكرون في أهلهم إلي واثقين فيهم وعطوهم الحرية بالروحات والجيات .. يفكرون وش راح يصير اذا أنفضحوا ... سمعتهم وسمعت أهلهم كيف راح تصير .. بيرفعونها ولا ينزولنها للحضيض..الناس وش راح تقول .. البنت على نياتها وماكانت تقصد .. بالعكس بيقولون فلتانه وأهلها ماعرفوا يربونها ..ويشوهون سمعتها وسمعة اهلها.. وغير هذا كله وش بيكون عذرها لربها يوم الحساب..

بالنهايه اقول..."اللهم اهدي جميع شباب المسلمين و بنات المسلمين الى ما تحبه و ترضاه. و تب عليهم واهدهم الى خير العمل, اللهم اعطهم السعادة في الدنيا و اعطهم الجنة في الاخره, آمين "






images6$222images6

[غـزالـة نـجـد]

مشكوووووووورهـ ،،،

ويعطيكـ العافيهـ ياربــ ،،،

ننتظر جديدكـ وإبداعكـ ،،،

تحيتيــ ،،،
غزالة نجد

[بنت شيووخ]

يعطيك العاافيه

[ذكريآت الأمس]

نبضهـ وفا

الزين يفخر باحتضان الأقلام النابضة

كروعة قلمك الزاخر بالروعة

سنكون بالمتابعة و ننتظر منكِ التكملة

كل الشكر لك

[نبضهـ وفا]

مشكوووووووورهـ ،،،

ويعطيكـ العافيهـ ياربــ ،،،

ننتظر جديدكـ وإبداعكـ ،،،

تحيتيــ ،،،
غزالة نجد

حياااك اختي غزالة نجد ,,


وانشالله اكون عند حسن ظنكم ’’