من اجـــــمل قصايد الأمير سعود بن بندر الله يرحمه عدة قصايد منوعه
قالـانتي ملاذي
انتي الفرج دايم الى صابني ضيـق
وانتي السند لا كشرت سود الايـام
وانتي ملاذي بين كـل المخاليـق
ان كان لي حـظ فعمـرك لنـا دام
أجيك وهمومي كبر هضبة طويـق
واروح منك وكـل الامـال قـدام
ومشيت في درب العمر دون توفيق
لامال ..لاراحه .. ولا ارضيت الانام
عمري ثلاثين مضت كلهـا ضيـق
وماعمري استريت فيهـا ولاعـام
عانيت تكذيب وعايشـت تصديـق
ورضيت تشكيك وسامحت مـن لام
هذا ولا نـي دون كـل المطاليـق
ايضا ولا مني حصل قطع الارحـام
ولا هيب غاياتـي خـداع وتلفيـق
ولا هوب حب للمكاسب والارقـام
ايضا ولاني من عـداد المغاليـق
العابدين نفوسهـم مثـل الاصنـام
وا تحبـــه
قالوا تحبـه قلـت ماهـوب بالحيـل
بس إنه أغلى شوي من نـور عينـي
يسوى جميع الجيـل الأول وهالجيـل
أحبـابـي الماضـيـن والمقبليـنـي
شوقي له أعظم من ظما الأرض للسيل
وأشفق عليه أكثـر مـن أم الجنينـي
وأحتاج له حاجة ثرى مصـر للنيـل
وعليه أغـار ولـو مـن الوالدينـي
أشتـاق لـه شـوق المحبيـن لليـل
وأرتاح لـه راحـة دمـوع الحزينـي
لا صار جنبي لو سنـه وقتـي بخيـل
ولا غاب لو لحظات صـارت سنينـي
قالوا يحبك قلـت هـذا هـو الويـل
ما ودي أنشـد ثـم رفضـه يجينـي
وأهدم رجاي بدبرتي مثـل مـا قيـل
والأفضل أحيـا بالأمـل لـو لحينـي
يا حبكـم يـا نـاس للقـال والقيـل
والأمر لو هو سهـل يصبـح مهينـي
خلوني أحيا في الوهـم يـا عواذيـل
وش دخلكـم والأمـر بينـه وبينـي
يا مـلاكـي ليــه
يا ملاكي ليه نقضت الجـروح
الله يسامحـك لـو لوعتـنـي
يا خفيف الروح يالوجه الصبوح
للهوى غصب علـي رجعتنـي
قبلك احساسي تجمد مثل لـوح
وعقب نظرات الخجل طوعتنـي
شفت في عينك وعد سعد يلوح
ومن طويلات الهدب شجعتنـي
انبعث في قلبي اللي مات روح
ولو نطق بيقول ليه أوجعتنـي
فاض حبي لك مثل طوفان نوح
ومثل مـا فرّحتنـي روّعتنـي
دعني مع الأحلام
دعني مع الأحـلام بالله دعنـي
عن واقعي فضّلت دنيـا خيالـي
أشوف بعدي عن وجودي نفعني
على الأقل أرتاح يا صـاح بالـي
كثر التأمل يا عزيـزي رفعنـي
عن مستوى التفكير باللي جرا لي
اللي عطيته كل حبـي صفعنـي
بالغدر يالله ويـن ذيـك الليالـي
هاوي عذابي دون رحمة دفعنـي
ياللخسـارة فالبقـا وش بقالـي
تاريخ حظي يوم خبري خدعنـي
واليوم حالي كافي عـن سؤالـي
فراق وفراق
ما كلف الله نفـس مـا لا تطيقـه
البعد والحرمان مـا عـاد ينطـاق
ما كنت أفكـر فـي فراقـك دقيقـه
لولا ان عقلي من سبات الهوى فاق
وشفت ان جمع الشمل ما له طريقه
ولا صار لي قدرة على قهر الأشواق
تسر الليالي السود مثـل الحريقـه
تحرق من أيام العمر خضر الأوراق
ونور الأمل في الوصل يفقد بريقـه
ودايم وحنا بالاسـم بـس عشـاق
أظهر لـي الواقـع ومـر الحقيقـه
كلش يقول فـراق وفـراق وفـراق
كرهني بنفسك
كأنك على قولك تمنى لـي الخيـر
ساعدني أنسى حبك اللـي خذانـي
خلي حياتـي تنقلـب كلهـا غيـر
وانسى الحبايب والزمن والمكانـي
حبي لك أبلغ مـن كـل الأساطيـر
ما له بقاموس الهوى وصف ثانـي
لا شك أنا أشعر بالنهاية وش تصير
واحسب حساب فراقنـا بالثوانـي
بيني وبينك واقـع الحـال تحذيـر
وعند الموادع مـا تفيـد الأمانـي
عندك خبر مثلـي بحكـم المقاديـر
على هوانـا صـادر الحكـم ثانـي
كرهني بنفسك ولو بذنـب صغيـر
القى به اعذاري واعـود لزمانـي
المشكل انه ما بدى منـك تقصيـر
وهذا يـزود واقعـك فـي كيانـي
حـاول وأحـاول
حاول وأحاول يصير فراقنا عـادي
الله عطانـا العقـل حتـى يعنينـا
خل المقادير تمشي مشيها العـادي
في عمرنا يفعل الله ما نـوى فينـا
ما فادتك دمعتك ولا فادك عنـادي
لا صار ربي حرمنا مـن بيعطينـا
فرقا وصارت ولا تحزن على بعادي
وأنا بحاول على نسيـان ماضينـا
ونبدا حيـاة جديـدة كـل بـوادي
يا حسرتي يا غرام عشتـه سنينـا
يا وحشة الليل في بعدك بلا رقادي
ويا طول اليوم ما شفتك ولو حينـا
الشاعر الأمير: سعود بن بندر .. رحمه الله
((((اللهم ارحم موتنا وموتا المسلمين .......واسكنهم فسيح جناااااااتك))))
م / ن
تحيتي لكم
حيران
رد مع اقتباس
مواقع النشر (المفضلة)