مشهد طابور المدرسة الصباحي الطلاب صافين
عاد تكفون شوفوا اشكالهم:
واحد يتثاوب ... والثاني مدخل اصبعه بخشمه ( مدري ليش؟).... والثالث عاد يتأكد امه حاطه له سندويشه بالبيض والجبن ولا لا : ....... والمدرسين الله يكون بعونهم ... والمدير مبقق عيونه ...... مسوي شخصيه
حسني (المشرف) ماسك الميكرفون: والان الإزاعة المدرسيه لهزا اليوم مع ...تالت قيــــم
المدير مستغرب ويقول للاستاذ فاروق: والله اللي تفشلنا
فاروق باستغراب:" تالت جيــــم, العمــي" ويروح للاذاعة بسرعة
طلاب الطابورضحك واستغراب يلتفتون على بعض وهم يقولون ثالث جيم... ثالث جيم. !!بيجيبون العيد بس الدوافير اللي صافين قدام يلتفتون للي يتكلمون ويناضرونهم باستحقار ,,,,,,,,,,,,,,,,,,,,,,,,,, (انا والله ماذابحي الا الدوافير ذولا يفشلوووووني )
حسني يعطي الميكرفون لعلي الدب . ويقول لهم ياولاد زي مااتفقنا, وروهم انكو أد المسئولية
الإذاعـة المـدرسـية
على الدب يجرب الميكرفون: الو الو ..اخوه سعد المعصقل من وراه "حول حول........"
علي الدب :" مدير المدرسة الفاضل, أبائي المدرسين, إخواني العيال: سعد ابوعصاقيل سليمان العربجي, وممدوح القرد وابو ريحه و راشد ابو كشه .. الاستاذ فاروق يضرب علي الدب .... طااااخ ........,إحكي ولاه
على الدب: السلام عليكم ورحمة الله وبركاته , أسـعد الله صباحكم باليـمن والبركات, خير ما نستهل به اذاعتنا لهذا اليوم ايات عطرة من القران الكريم يتلوها على مسامعكم الطالب : حمود المطوع .....
يجى حمود المطوع ويقرا سورة قصيرة بصوت رخيم
علي الدب: اما الان مع فقرة هل تعلم للطالب حميدان أبو ريحة
حميدان بصوت عالي: هل تدري
1)هل تدري إن للذبابة ستة عيون
هل تدري وإلا ماتدري إن الفار يصيب بمرض الطاعون(2
3)هل تدري وإلا ماتدري أن اذا قطعت شوارب الصرصور يقعد يخبط في الجدران ,, (وعاد سعد ابو عصاقيل يردد وراه مسوي حافظها.)..
4)هل تدري وإلا ماتدري أن لكل قطو برميل زبالة مخصص يسكن فيه..
علي الدب : هل تدري ان بيت حميدان جنب البلدية ...........
أما الان مع حكمة اليوم والطالب سلوم المفهي
سلوم المفهي يقرب.. يمسك الميكرفون بيد واليد الثانية في مخباه تحوس يدور الورقة اللي فيها حكمة اليوم.....
يطلع الورقه ويقول: "حكمة اليوم " ويفتح الورقة ويقرا بصوت عالي " البضاعة المباعة لاترد ولاتسبدل" يسكت شوي ويناظر الورقة ويكمل "طاقيتين, شراب العايلة , ثلاث فنايل علاق, , سروال سنة, زبيرية .." وهو جالس يقرا ألا وذاك الكف على دمجته من الاستاذ فاروق وهو يقول" العمى شو حمااار...ولاه طلع الورأه ياللي فيها حكمة اليوم مو فاتورة ملابســاك" سلوم المفهي: طيب طيب يدخل فاتورة ملابسة بمخباه وقعد يدور ويدور
بعدين جاء علي الدب عطاه كتف وقال :والله ماعندك سالفه وخر وخر وموعدنا بالطلعة انشاء الله.
علي الدب :"الاَن مع موضوع الصباح للطالب:" أخوي سعد أبوعصاقيل"
سعد يفتح ملف أخضر ويقرا,
"اعزائي المشاهدين , موضوع حلقة اليوم العطلة الصيفية))
"لقد رحنا في العطلة الصيفية أنا وأهلي إلي بلدي الثاني لبنان"
علي الدب: تراه تسـذوب, بالعـطلة رحنا لخـوالي بالزلفي.....
سعد يلتفت إلى علي الدب بزعل ويكمل" ولكن علي الدب لم يكن معنا"
رحنا بالطيارة و كانت امي خايفه جدا جدا لانها اول مرة تركب طيارة , بس انا اصلا دايما اركبها, وفي الطيارة جت شغالة الطيارة وجابت لنا القهوه والشاهي ثم جت وقالت اقلطوا على العشاء , وقلطنا بس قالولنا حطوا عفكم بمجلس الضيوف, وكان الطيار واقف على روسنا ماسك اللبن وقال سموا على العشاء,,,يالله إن تحييكم, وكان مفطحا شهيا. وخلصنا وغسلنا, وكان مساعد الطيار ماسكن الفوطة وأعواد الاسنان وبرا المقلط كانوا حاطين طاوله بها علك لبان الله يجزاهم خير قايمين بالواجب.............
وعندما وصلنا لمـطار المـلك خـالد حقهم, ذهبت انا لتختيم الجوازات والرخصة والاستمارة وذهبت امي للتطبيق , وكنت اتحدث لغتهم بطلاقة لان امي وابي مامعهم لغة. وقال لي العسكري : جواز مين هيدا ؟.. فقلت له" بييَ (ابوي باللبناني) , وقال: "وهيدا؟" قلت: مييَ (أمي) . وهيدا ؟ قلت" خييَ (أخوي " ) وقال " وهيدا؟" قلت : نييَ (أنا) " وكان جوازي
وقال لي ابوي ماشاالله عليك ياوليدي إنك بلبل سداح في اللغة اللبنانية الفصحى, التفت عليه وقلته, أي لا كــان , ثم التفت للبـنـانـي وقلت له تـرى أنا سـعودي مانيب زيكم, . وشكله كان مستغرب يحسبني لبناني.......
وفي لبنان نمنا في مدينة بيروت وكانت مدينة جميله فيها مـزارع بكل مكان, ولم اشوف عندهم تـراب, علشان كـذا مافيهم شهبان لهبان, وتمشينا فيها ....
ورأيت دولا كثـيرا, وشفت دولة وماعرفتها, يوم دققت مكتوب عليها, بورسعيـد, وشفت المملكة العربية السـعودية الشـقيـقة (وش عنده اللبناني). وكانت حـدودها كثيـرة عرفتها من الخـط المتقـطع. ولكن للأسـف لم تـكن لبنان تـحدنا , وأنا أقترح نضمهم معنا في دول الخليج ونـدف اليـمن بـدالها......
ثم ذهبنا الي الاهرامات وكل واحد مننا ركب له على واحد,,والله يونس مره بس فيه عيب انه عليه سرى وزحمه لازم تحتري دورك عشان تركب....
" وكانت رحلة سعيدة, ورجعنا بالسيارة ومررنا على تونس الخضراء, والسودان السوداء في الـطريق عبينا بنزين بعشرة , وكملنا الـطريق الي أن وصلنا بالرفـاء والبنيـن.
وإلي اللقـاء في حـلقـة القـادمـة.
علي الدب " أما الان ....."ويقاطعه صوت جوال يدق من مخبا علي الدب ويطلع الجوال والميكرفون بيده وطبعا صوت المتصل واضح لان قريب من الميكرفون وكل الطابور يسمعونه
صوت حرمه: " ألو .."
علي الدب: " هـلا بهـالصـوت , ممكن نتعرف
الحرمة: " وجع يمصع ضلوعك .. أنا أمك حصيصة!!"
علي بصوت مرتبك " اميمتي...؟؟؟؟
طلاب ثالث جيم اللي وراه" اسم امه حصيصة ...اسم امه حصيصه ( بما فيهم اخوه سعيد ابوعصاقيل))
علي الدب: يمـه شغلى الرادو, بتشوفينا انا وابوعصاقيل طالعين ولا تنسين سجليها بالفيديو عشان نوريها خالتي هيا...
حصيصة: الرادو مايشتغل, إنت ناسي إن دشنا خربان ,علي, وراك سارقن جوال ابوووك, أنا زاهمتن عليه وطلعت لي إنت
علي الدب: "مهوب أنا, أنا أصلا صار لي اسبوع ماشفت جوال ابوي
حصيصة: اجل اللي تكلم منه وشو ؟؟!!" هـذا مهوب أنا, أنا أخـوي سعـد
حصيصة: اشـوى احسبه إنت
علي الدب يلتفت على سعد المعصقل : " إنت معلم إمي أن الجـوال مـعي يالحروش"
سعد يحاول يكلم امه في الجوال:" يمه يمه, حنا الحين في الاذاعة وإنتي على الهوا ..عندك مداخلة ؟؟؟؟
علي الدب , والان مع الوالده : أمي
حصـيصـة:وش اقول عسى بس مهوب على الهواء؟؟؟؟
ويصك علي الخط... علي: معليش انأطع الخط
الاستاذ فاروق يمسك راس علي الدب وسعد المعصقل ويصكهم ببعض . طرااخ وياخذ الجوال. ولاه فورت لي دمـي.
علي الدب:" اما االان مع نشيدة الصباح وسليمان العربجي بعنوان "عصـفوري الصغير""
علي :سليمان وش عندك لابس بدلـة حمرا
سليمان: لأني أول مرة بمسك ميكرفون قدام الجماهير
سليمان ياخذ المكرفون ويقول " أحـلي تحية لشباب ثالث جيم اللي على البيست, و أحلـى تحيـة للمدير وأحلى تحية للوكيل بغيابـه, وياشباب اللي يبغى إغنية يكتبها على منديل ويعطيها المدرسين يوصلونها لي ...اوكي؟؟
سليمان العربجي:"أويــــــــلي, أويلـي , أويـلي أويـللللي "
" سـود العيــووووووون إكبـــــــــار ....,والشــامــة حـلــوووووة
" شـــــــايل جـمــال الكـووووون ...وباليــني بــلـوى "
يحط الميكرفون تحت ابـطة , ويقول" يلا كلنا سـوى.. ياثالث جيم"
طلاب المدرسـة كلهم يرددون وراه ويغنون وتنقلب المدرسة مرقص وهيصة
المدير بعصبية:" ماني قايلكم.. فشلتونا كله منك يا حصني (يقصد حسني) خلاص ضف وجهك انت وطلابك .....ويوم راحوا للفصل
ويدخل عليهم شاب سعودي في مقتبل العمر"أنا المشرف الطلابي الجديد" جايكم من ادراة التعليم لحل مشاكل بعض الطلاب اللي عندكم...
المدير : يعني ماجاء معك قرار فصل . طرد.حرمان
المشرف بإبتسامة: "لا ..وليه كل هذا, المسألة ومافيها ان الطلاب عندهم امكانيات وطاقة مهدره ماعرفنا كيف نستغلها في صالحهم, , بس يحتاجون بعض الاهتمام والوقت,الا هم ماعندهم مواهب أو هوايات معينة؟؟؟؟؟؟
الاستاذ فاروق: " أيه بلا, عندن مواهب في اللعانة والاجرام"
المشرف: "لا, انا ابغى الاشياء المميزه فيهم ماحاولتوا تستغلونها في صالحهم وصالح المدرسة ومجتمعهم ووطنهم"
حسني شمعة: دول أبالسة
لمشرف: "كل أنسان فينا لازم يكون مبدع في شي مهما كان,بس يبغي مين يكتشف هالعملاق اللي في داخله ويصقله, حتى لو ماكان ماهو مميز اكيد بيكون عنده هوايه لشي بتفيده وتشغل وقته اذا عرفنا نستغلها"
المدير يرد وشكله تأثر بكلام المشرف:" كلامك منطقي
.........بعدها...........
المشرف مع الاستاذ حسني يراقبون طلاب ثالث جيم وهم يهربون من المدرسة , علي الدب, ياخذ الشناط والكتب , ويحذفهامن الدريشة ويوصلها لبرى المدرسة من قوة الحذفة. سعد ابوعصاقيل يركض وينط على السور المرتفع ويجمع الكتب, ويقرب السيارة لهم. سلوم المفهي, هرب وجلس يرسم على الجدران صوركاريكاتيرية للمدير والمدرسين وعياراتهم.
حسني للمشرف: زي مانت شايف سعاتك...حئولك إيه وإلا ايـه دول مجرمين محترفين.
المشرف: ماشاءالله ابـداع, قمة في المهارات.
شباب المستـقبل
وبـعـد كـم سنة وبعـد أن اصبح المشرف السـعودي مسـئولا عنهم. . صار سعد ابوعصاقيل اللي ينط السـور بـطل المملكة في الوثب العالي. الدب اللي يحذف الكتب من الدرايش بطـل اسيا في رمي الجلة, وسلوم اللي يرسم على الجدران اخذ جائزة المركز الأول في الفن التشكيلي على مستوى الخليج.
مواقع النشر (المفضلة)