( القلـــــــوب الطيبــــــــه )
مابين قلوب فُطرت على الشعور فتجردت منه.. وعقول جُبلت على التفكير فانسلّت منه..
مساحةٌ من تساؤلات ثائِرة , لابد فيها من وقفة الضمير للإجابة عليها..!
بعد أن رأيت , وأيقنت أن أكثر من يعاني في هذا الزمن ( الطيّبون )!
ليه (نزعـل) لاتميّـز غيــرنا وأصبح كبير؟
وليه (نفـرح) لاتعثّر شخـص بدروب الشتات!
:
وليه (نضحك) لاتعثّر بالخُطا شخـص ٍ ضرير؟
نجرح احسـاسه وننسـى من خلق هالكائنات!
:
وليه في بعض المواقـف (مايحركّنـا) ضمير!
وليه في بعض السوالف (نحترف) كذب اللُغات؟
:
وليه (نتبـع) كـل خطـوة ترمي انسان ٍ قدير
(كنّهـا) متعـةولـذة .. يـوم ينهار الثبات!!
:
وين تأثيـر الضماير .. في زمن صاير خطير!
وين إحساس المشاعر .. عن عيون ٍ ماتبات؟
:
وين وقفـات البرايـا .. عن نـداءات الكثير؟
ووين توجيه الخلايق .. ليه صاير في سُبات؟
:
لامتى والنـور غايب .. كـنّ مابالناس خير!
نحتـرق والعمر (ماضي) .. والنهاية للممات!
* * *
ياهـم! أشوفـك (معتلـي) راس (القلـوب الطيّبة)
هو مالقيـت بـ هالزمن لك بيـت غيـر الطيبين؟!
رح للقلـوب اللـي (مباديهـا) غَـدت .. (متسيّبة)
(يمكـن) تحـس بقسـوتك ياهـمْ وبلحـظة تلين!
إرحـل .. تـرى كل ٍ شكـى همـك .. وكل ٍ غيّبة
والمشكلـة .. مهما تغيـب بـدون مانـدري تبين
ضيّقتنـا .. ليـن الوجـع شـبّ الخفـوق و شيّبة
والضيـق .. ياكـوده ليا مـنه دخـل وسط الحنين
وأشقيتـنا .. ليـن التعب .. هـاب العـذاب وهيّبة
وحنا (بشـر) ما نحتمـل .. قسـوة ولاحتـى أنين
وش ذنـب هـاك (الطيّب) اللـي زود طـيبه عيّبه؟
ووش ذنب هاك المخلص اللي مارضى زيف السنين!
(حتى انت) مـاتبغى سـوى هـاك القلـوب الطيّبة
تـدري بهـم حتى (بعـزّ الجـرح) دايـم صادقين!
* * *
أخيراً:
ياقلوب ٍ(ما) سكنهـا من عـذاب الوقت ساكن
لاتلوميـن المشـاعر .. لوشكت من همّ طال!
:
افتحي بإسـم (الصفـاوة) داخلك كـل الأماكن
واشعـري بقلـوب ذابت فـي متـاهات الليال
:
خلي إحساسـك يسابـق خطوتك بالطيب لكن!
لاتخليـن الرديّـة .. تسبقـك (لـو) بالخيال!
:
وإن غدى لون الليالي من ظروف الوقت داكن
الأوادم (للأوادم) .. والوفــا سِيـد الخصال
رد مع اقتباس
المشاركة الأصلية كتبت بواسطة **سمــا**
مواقع النشر (المفضلة)