[align=center]السلام عليكم ورحمة الله وبركاته
قصيده للتواصل بعد الغياب
اتمنى ان تحوز على رضاكم[/align]
[poem=font="Simplified Arabic,5,darkblue,bold,normal" bkcolor="transparent" bkimage="" border="none,5,gray" type=1 line=0 align=center use=ex num="0,black"]
يابر انا والليل والجيب والنار=ابرع رباعي نجتمع للبراعه
(انا )هِنا من لوعة الوقت محتار=و(الليل )معطي للمعاني بضاعه
و(الجيب) وافي للفيافي والأسرار=و(النار) تلسن للمسامع سماعه
احضن بنات الجن لازارني زار=فكري حضن تصويرهن بإنتزاعه
انزع من المعنى مباليش الافكار=فرعونة الخاطر ماتعرف مناعه
ابسئلك يالليل.؟؟ وش بالزمن صار=شفت الزمن عز الرخم بأرتفاعه
قلب الزمن خاين مخاليب الأحرار=يلعنك وقتٍ قاهر الحر باعه
وانا الذي من جمرة الوقت صبّار=صابر وصبري منصف الموت صاعه
احد(ن )سهر للويل والليل دوار=مايهتني بالنوم لو ريح ساعه
واحد(ن) سهر للدم والدين جبار=يطلب من الله حلها بالشفاعه
واحد(ن) سهر من المرض والمرض ضار=سيل الوساوس سايلٍ في ضياعه
وانا الذي من شدة الضيم ماسار=ماسار سري لو تقطع شراعه
من يدري ان الهم والضيق نقار=ينقر لحم جسمك مسمّن ذراعه
جسمي نحل من نقرة الهم منهار=مثل القصر لامن تهاير رفاعه
(فجئه) وانا بالبر شايش للأشعار=شفت القمر شعشع مشاعل شعاعه
بين الغيوم المرزمه فك الأزرار=الغيم ثوبٍ قد تمثل قِناعه
من ويقته تذكار للحب تذكار=ذكر الهنوف اللي قتلني وداعه
بحار انا في عالم التّيه بحار=كن الشقاء يصنع بقلبي صناعه
دارتبي الدنيا عواصيف واعصار=مابين لوعات الزمن وارتياعه
يابر انا والليل والجيب والنار=اصدق رباعي نجتمع للبراعه[/poem]
[align=center]خالص تحياتي واحترامي
اخوكم
يوسف عبدالله العبيد العتيبي[/align]
مواقع النشر (المفضلة)