يا أخوي أن بوصيك
ياخوي أنا بوصيك ياراعي الطيب
بعض الوصايا اللي تجيرك من العيب
الأوله صل الفرايض بترتيب
وأحذر تخليها ترى الترك خسران
والثانية بنصحك في بر الأثنين
أمك وأبوك أحرص على برهم زين
حيث النبي وصى عليهم واصاتين
والله ذكر مجمله فآيات قرآن
والثالثة بوصيك في ضيف بيتك
أكرم يمينه بالشحم وأعل صيتك
خله إذا قفى ينادي يليتك
دايم تضيفني على طول الأزمان
والرابعة بوصيك باللي يخاويك
خويك اللي خطوته مع خطاويك
اللي يعزك من فؤاده ويغليك
لاتتركه لو كان تبعده الأوطان
والخامسة ورع الردي لاتخاويه
أياك تقرب منه وأياك تطريه
أبوه دايم بالرخامه يوصيه
ومن صحبته ياخوي منته بكسبان
والسادسة بوصيك بالجار لو جار
ترى النبي وصى على سابع الجار
والناس قالوا جارك أولى من الدار
حتى لون الجار ماهو بشبعان
والسابعة فالحرب أثبت وجودك
ترى الشجاعة من علامة جدودك
خلك شجاع ولاتعدى حدودك
ماكل مجرم صار من ناس شجعان
هذي الوصايا كلها تجلب الخير
أترك دروب الشر وأقبل على الخير
أعمل بها وأقوللك أبشر بخير
أخذ الوصايا من مجرب وفهمان
وأختامها كل الشكر والتحيه
تنصى جميع اللي أستمع للوصيه
وتنصى هل الوقفات وأهل الحميه
ربعي هل الطالات ذربين الأيمان
رد مع اقتباس
مواقع النشر (المفضلة)