مواضيعي ليش تحذف

**anaharedy** · 05-07-2008, 06:48 AM

مواضيعي تحذف يالربع,, وش السالفه؟؟ اللي يشوف ان فيه سبب لحذفها يعلمني تراني مادري والله عن شي واذا فيه حزازيات علي ولا شي ضربت الباب بكرامتي والرجال اهم لاعنده كرامته والله ماعاش من يهينني ولا يدعس لي على طرف واذا مشاركه بالمنتدى تخلي الواحد يذل عمره للناس الله لايرد المنتدى واقسم بجلال الله العظيم اني ماجيت ابي شي الا اني اتونس واضيع ساعه من يومي مع ربعي اللي فالنت
لكن الله لايعيدها من ساعه يتكبر علي الناس فيها ويستغلون مناصبهم ويصخرون حقدهم علي وانا يعلم الله ما اعرف عنهم الا اسمائهم ولا شلت عليهم في يوم

انا ادري ان موضوعي يمكن تجاهلونه ولاتردون عليه لكن والله مانيب قصير حبال عشان المساكين اللي يحقدون علي يفرضون سيطرتهم علي؟؟ ويحذفون مواضيعي وانا ادري ان لو طلعت من المنتدى ماراح تنقلب الدنيا لكن اقول:

يــاصــغــيـــر مـايــكــبــرنــي لــــقـــــب** ومـايـصـغـرنـي اذا انــكــرنــي صــغــيــر

ماخذيـنـا الصـيـت مــن جـمـع الـذهــب **ولانـسـابــه شــيـــخ او قــربـــة وزيـــــر

كاسبينـه مــن اهــل السـيـف الـحـدب** الـجـنـايــز كـــــان مـــاجـــاك الــنــذيــر

صيتـهـم نـجــم عـلــى راســـه ذهـــب **سمـعـوا الصقـهـان بــه وأجـهــر ضـريــر

بـالــوفــاء تــاريـــخ أبـــيـــض يـنـتــصــب** لاحــكــوا بـالـحــق حـيــيــن الـضـمـيــر

ضـيـغـمــي للـسـنـاعـيـس أنــتــســب** لابــــه طـلــنــا بــهـــا عـــــرش كـبــيــر

عــنــد حــــدك يـاكـثـيـر الــهــرج تــــب** ولاتـــمـــر الـــنـــار وثــيــابــك حـــريــــر

كــــان لــــك عـــــز بــذلـــي فـتـعـقــب** والله الا تــبــطــي وحــبــلــك قــصــيـــر

احـســب انـــك مـــن صـنـاديـد الـعــرب واثـــــر سـاتــرتــك عــبــاتــك يــاغــريــر

مـاحـســب لــســـوس زراع الـقــصــب** والــقــراده مـــــادرى عـنــهــا الـبـعـيــر

ولـــو حـسـبـنـا للـحـسـايـف والـتـعــب** مــابــذرنـــا يـالـعـصـافـيــر الــشــعــيــر

عــن هـلـك ابــرا الـــى الله واحـتـسـب** الــرجــال الــلــي مـجـاراهــم عـسـيــر

مــن قـريـش المصـطـفـى وابـــو لـهــب** والـدغـالـب مـاغـشـت عـــذب الـغـديــر

لـلـرجــال مــــن الـرجـاجـيـل الـعــتــب** والـزكــاه تـحــل فـــي حــــال الـفـقـيـر

لـعـن ابـــو وقـــت غـديـنـا بـــه حـطــب **تــحــرقـــه نـــــــار يــثــورهـــا أجـــيــــر

مــا الـومـك ذا الـزمـن ســوى الـعـجـب** هــو بـقـى غـيــر الـكـرامـه بالجـفـيـر؟؟

مــــا أذل وراســــي يــشــم الـمــهــب** لـوبـقـى مــــن شــمــر طــفــل غــريــر

ومــــا أهــــاب ولا يـزلـزلـنــي غــضـــب **الـشـجــاعــه ورث والــعــاقــل غـــزيـــر

يــاصــغـــيـــر مــايــكـــبـــر بـــالـــقــــب** غــيـــر مـــــن كـــــان دونـــــه صـغــيــر

**ALDAWSARI** · 05-07-2008, 05:51 PM

مسآء الخير .. ,

مواضيعكـ تحذف والآن أعلمكـ السالفة

أول موضوع لكـ

][ البشت الأسود ][

وانا من قام بحذفه , والسبب إن الموضوع مع إحترامي ما يستاهل يجلس بالقسم

والدليل بالردود .

ثاني موضوع لكـ

][ حتى المنتديات صار فيها واسطه ][

مشرفين النقاش اضافوا قانون جديد وهذا نصه

11/ مـنـع جميع المواضيـع التي تخـص الأعضاء ومشاكلهم أو المشرفين والإداريين.

ثالث موضوع لكـ

ما أحد حذفه .

رابع موضوع لكـ

][ القلب السهران تعال ابيكـ ][

زي ما تعرف إن اللي يبي يكتب بالصرقعه عن شخص لازم يستأذن منه وحتى لو انكـ ما استأذنت

انا ما راح ازعل , بس الموضوع نفسه مهب زين بحقي يا الغالي

والموضوع الخامس لكـ

هذا هو اللي بالشكاوي .

وحياكـ الله

الــقــلــب السهــران

**anaharedy** · 05-07-2008, 07:20 PM

يالقلب انت اول شي تدري ان انا دكتور مناحي اللي قبل وتدري اني تركت المنتدى اول شي وبعدها تبندت وانا اقسم بالله اني ماسويت الشي اللي في بالك ولاكان مقصدي كلامي مع بنت الزين فالخاص وطلبي لايميلهاشي الا لاني ما ابي الاداره تشوف اللي بيننا وانا ادري الادراه تقدر تشوف الرسايل الخاصه وانا كنت بنهي المشكله او سوء الفهم اللي صار فالمنتدى وانت تدري وعشان كذا انا تبندت المره الاولى عشانها اشتكت علي تقول د مناحي يغازلني وانا والله مانيب صغير عقل عشان اسوي هالحركات لكن اقول يالله يا مستجتيب دعوة المظلوم طلع الحقيقه وافضح الكذاب,,

ثاني شي مسألة الصرقعه,, ترى والله جايين نتونس والصرقعه ضحك في ضحك ولا تصدق كل اللي يصير فيها وينقال

وبعدين موضوع النقاش والله مانيب يم احد وكنت متحمس للموضوع,, واللي حذف الموضوع هذا يذكرني بالايه: يحسبون كل صيحة عليهم.

والله محد يمهم ولاحد تطرق لهم,, وانا اكبر من اني اروح واقط نغزات على ماقالت بنت الزين في شكواها الاخيره ضدي,, مع انها هي اللي تجي وتستفزنا وتهرج وانا اللي رجعت للمنتدى وناوي ابدي صفحه جديده هذا اذا كنت اذكر شي من اللي صار وانتهى ,, وقلت يارجال القلوب صافيه والخواطر طابت,,وتطلع لي هي بأول رد !!!! وتتريق؟؟ طيب وينكم عنها ياخي !! ولا انا مالي رب,, يالقلب والله لو الناس على مقاديرها في المنتديات مثل مالهم مع الناس لتخرب الدنيا ولو المنتديات تقدر الناس على مراجلهم ماكان لقيت المساكين يلحقونني مدري وش يبون فيني حتى نصهم ما اعرفهم زين ويقعدون لي في كل صغيره وكبيره

انا والله ماهو من طبعي اروح اتشكى للناس ويفلان شف علان تراه يقول لي ويفعل لي وهذي ماهي من طبوع الريجيل,,

لكن المسأله تعدت المعقول ,, الناس صارت تتهمني بحاجات مايعلم بها الا الله المشكله اني ما اعرفهم!!!

وغير كذا يالقلب انت اخرتها تقول استاذن مني عشان تكتب,, انا مانيب قايل ترى كنا زملاء فالمنتدى وضحكنا وسولفنا ..... لانك ماقصرت جحدتني ماكني اعرفك ولاتعرفني!!

ومسألة المزح اذا تزعل منها علمني والله ما امزح معك خير شر مع انك بتبقى عزيز وغالي

المهم وانا اخوك الزين صار فيه مشاكل انا ادري انها بدت تفلت من يدك,, لكن والله العظيم ومالك على يمين ولا اقولها مجامله انك من الريجيل اللي تمنيت خوتهم وتمنيت اني اكسبهم وانت بالذات لك تقدير واحترام غير هذول كلهم ومعزة ماهيب للمصلحه ولا للمنصب,,

اخوك

**ALDAWSARI** · 05-07-2008, 09:59 PM

هلا بكـ يا الغالي

احب اوضح نقطة إن الإدارهـ ما تطلع على الرسائل الخاصة

صحيح فيه هاكـ يسوي هالشئ , بس انت فكر فيها !

بنجلس نفتح كل رسائل العالم .. ! وشف كم عدد الاعضاء واذا تبي اعلمكـ آلية

مشاهدة الرسائل الخاصة وطريقتها عشان تعرف إننا ما نقدر نشوفها ما عندي مشكلة اقولها

لكـ .

بخصوص الباند

جاكـ من الإداري الإنسكاب , وباقي الإداريين ما لهم دخل فيه ابد

والأسباب لدى الإنسكاب , ولا انا كنت وقتها بدخل بالموضوع الا إن الانسكاب سبقني

ودام الإدارهـ تدري الآن إنكـ نفس العضو اللي سبق وتوقعت عضويته ولا وقفت عضويته

مرره ثانية , هذا يدل على إننا فاتحين صفحة جديدة معكـ ولا كأن صار بيننا شئ من قبل

وإن شاء الله ما صار الا كل خير

وانت بمنتداكـ دآمكـ على القوانين ملتزم

وبالتوفيق يا الغالي

الــقــلــب السهــران