يابوي .. جعلك للبقا والمكاسيب .. عمري بدونك يالذرا ويش أبيبه

[انشودة المطر]

كنت دايم لاتضايقت .. عرضت نفسي لهبوب الشمال
وأغمض عيوني .. وأطلق العنان لجروحي ولدموعي
ولاخلصت .. عدت أدراجي ..


وكنت أحب أقرى القصايد اللي شعارها جاهم ماجاني ..
وعانوا اللي عانيته .. ولاقريت وخلصت
قلت :: شفتي ياجواهر مهوب أنتي لحالك اللي يصير لها كذا..
غيرك واجد ..

ومن طبعي .. لا أخطى علي الصديق وأقول الصديق لأن غيره مالتفت لخطاه ..
أعطيه فرصه وثنتين .. اذا ماشفت طبعه ماتغير ..
على طول بلوك همن ديليت ..
أشلعه من حياتي ..
أريحه وأرتاح ..

وعلى قد اللي يصير معي .. ماعمري قلت يالمخطي تراك أخطيت ..
أو ليش سويت كذا ..

ولاعمري رديت الإساءه بالإساءه .. بس أكيد مانيب أردها بالإحسان
أطلعه من حياتي بدون ماأغلط عليه بكلمه ..


ولامرت السنين .. وجاله طاري .. أقول في نفسي الحمدالله
أنا الفايزه .. لاهنته ولاجرحته
يعني ضميري دايم مستريح ..



وبعد لاعصبت .. ماأحب أتكلم ولا أتخذ أية قرارات .. لأني أدري اني بندم عليها تالي ..

كنت أكظم الغيظ .. وليتني ماأكتمه .. والله اني لاعصبت أحس بالدم وهو يمشي بعروقي
كنه حمم بركان .. مهوب دم
أحسه لامر مع عروقي يحرقها ..
ومايبرد دمي .. الا روحي وحيلي باردتن معه ..
وهمن لاهديت .. أشوف وش الأفضل وأسويه



البلا .. انه مهوب دايم ينفع اسلوبي اللي ذكرته..
البارح .. وآه ياثقل البارح

والله ان نفسي كن عليها جبال لاذكرتها .. وأنا أشهد مانيب ناسيتها

البارح .. وأول مره أحس اني ودي أقول كل كلمه شينه
وبذيئه ووصخه ..
كنت أحس بلساني من كثر ماوده يقول زي هالكلام صار ثقيل
وأنا أشهد ان ذا الكلام ثقيل ..
كنت أقول في نفسي .. لاتستحين ولاتترددين
تبين تلعنين .. لعنيهم ياجواهر
تبين تسبين .. سبيهم ياجواهر
لاتسكتين ياجواهر ..

وآه .. كل كلامي لنفسي راح هباءً منثوراً .. لاني اللي سبيت ولاني اللي لعنت ..

صديت بوجهي .. ورحت للهبوووب
ومهوب بس دمي وقتها اللي حرقني ..
حتى دموعي حرقت ووجهي من حرارتها ..


وبصوت مكتوم .. قلت آآآآه يا (( يبه )) ..
ليتني ماطلعت عليك
ليتك يا (( يبه )) ماربيتني زين ..
آآآآه يا (( يبه )) ..
ليتني قشرا .. ليتني ملسونه
ليتني وصخه .. ليتني قليلة أدب
آآآآه يا (( أبو جواهر )) ..
ليتني ماغديت لك

ليتني طلعت على أردى واحد بعايلتنا ..
ليتني طلعت رديه .. ومخزيه
ليتهم ماقالوا ماطلع لأبوها الا هي ..
ليتك يا (( ابو جواهر )) ماربيت (( جواهر )) ..



وتذكرته لاضحك همن قالي ::
ماحبيت من عيالي وبناتي كثرتس ..
والله اني أنبسط ويزين بالي لاقالوا ذا البنيه غاديتن لك ..


وبعد ماتذكرت كلامه ..
قلت في نفسي :: من قال انك مهوب رديه ياجواهر
الا مابه أردى منك .. ومابه أرخم منك
والا فيه بنت تقول ليتني ماطلعت لأبوي
ليت أبوي مارباني
أنا أشهد انه مارباك .. دامك تقولين هالكلام


وبدا بعدها الضمير .. اللي ياهني من ضميره نايم
بدا ضميري .. يوريني الهوايل
وفوق هم البارح .. زادني هم

وجلست طول الوقت بغرفتي .. عشان بس ماأشوف أبوي
والله اني مستحيه منه ..
وهو مايدري وش أنا قايله ..


المشكله .. اني ماأدري الى متى أنا بصد عنه ..
والله ان بداخلي ندم ع الكلام اللي قلته

ودي .. لو أجيه وأقول ::
أبو عبدالله
أشهد ان بنتك مافيها خير .. مير أنت أحسن منها
وعشانك أحسن منها.. بتسامحها




ليتني .. أجيه وأحب راسه
وأقول اطلب اللي تبي ..
ان بغيت عمري .. بس سامحني


ودي .. وودي .. وودي





(( أبو جواهر )) ..
أنا أشهد انك ربيتني .. مير ماجيت في زماني يا يبه

[غزال ومـا يصيدونـه]

قوولي الحمد لله يالغاليه


الله يطول بعمر ابوك ويحفظه لكم يارب


تقدرين تروحين له تتسامحين منه مااشوف فيها شيء


ودائماً في تعاملك مع الناس إخذيها قاعده


( عامل الناس بأخلاقك لا بأخلاقهـم )


ولاتحسبين أن الصمت في بعض المواقف ضعف بالعكس صمتك عن الرد عليهم قووه


لإن فيه ناس اخلاقنا وتربيتنا تمنعنا اننا نزلنا لـ مستواهم عشان كذا الصمت هنا حكمه


التزام الصمت قــوه لـ استفزوك الصغــار ... وإن خذلني طول صمتي معتبـر روحي كبيـر

[أميـ الورد ـرة]

حبيبتي جواهر
الله يديم أبوك و يطول بعمره و تصيرين مثله أكثر و أكثر
كلامك ان دل على شي دل على تربيتك و صلاحك
روحي للوالد و حبي راسه و شكيله اللي بخاطرك
وباللي همك
و الكلام اللي فكرتي فيه ضعف القوي طيريه مع هبوب الشمال
و صدقيني يالغلا انتي كسبانة في جميع الاحوال
رضا ربك و رضا والدينك
ولا الناس مهما علوا ولا وطوا مايملا عينهم الا التراب
بلوك ودليت

الله يهنيك بأبوك و يمده بالعافية و طولة العمر

[حيران في عالم النسيان]

جواهر عز الله انتس لحستي مخنا







إلا ان شاء الله انتس فيتس خير وبركه



كلمت ياليت ماتبني بيت






الواحد يكون طموحه للأعلى واحمدي ربتس ان لسانتس ماهوب وصخ


ولا كان تشوفين الناس يكرهونتس وان جت سيرتك عندهم قالو قطعا بذاك الذكر


ومن ناحيت الزعل صح ان الواحد إذا زعل او ضاق خاطرهـ يقول شي ماينقال


ويتحسف على اللي قاله او اللي سوااهـ


انا من ناحيتي ان زعلت الصارحه احس اني منكتم ما اقدر اتنفس

ودقات قلبي تسرع واحب اسكت واتنهت ابي مع التنفس ان الضيقه تروح

وبعد اغلب الاحيان ان جيت انام


قمت اغني غصب ما انام إلا لين اقوم اقصد اقول لي كم بيت

إذا قلتها خلاص نمت بس من المستحيلات اني انام ما اقصد

والله اني احس بعض الاحيان اني موسوس من تفاكيري

واغلب الاحيان اغني اقعد اشعر وانا اسوق الموتر ولا انا امشي ولا انا جالس لحالي








وابوتس الله يخليه لتس والله يعطيه طولة العمر


والله يوفقتس ويسعدتس




بس تراء انا اعتبر ان فيتس غلطه وحدهـ اللي هذي

يوم تقولين ان الخوي إذا اخطاء ما اقوله بالعكس

المفروض انتس تقولين ياجواهر انا ياخويك انت اخطيت علي بالغلطه الفلانيه
وانا زعلان عليك مافيها شي ان علمتيه بغلطته

عشان منها انه يتأسف ويعرف غلطته ومنها يعدل وضعه معاد يخطي





والإ معروف ان اللي ماهوب خوي انه مهما قال كلامه مايهم ولا يجي في الخاطر

منه شي لأنه ماهوب في العين اعتبار








وان شاء الله تبدلين ضيقتك بالفرح وتنبسطين وتوسعين صدرتس






تحيتي لتس




حيران

[ظميان غدير]

(( أبو جواهر )) ..
أنا أشهد انك ربيتني .. مير ماجيت في زماني يا يبه


جواهر والنعم في ابو جواهر

هو فعلا رباك وما قصر ....

والمسالة مثل ما قلت ربما الاشياء التي تربيت ِ عليها ما عاد تنفع في هذا الزمن

فابوك الله يغفر له ويرحمه رباك على الطيبة وعلى المعاملة الطيبة وهذا هوالطبيعي والمفروض

لا تحزني ولا تندمي على ذلك


أغلب الطيبين هم كذلك يحسون بالغربة من زمنهم الردي

ويحسون انهم أتوا في زمن ليس زمانهم


ولا تنسى أن الرسول بشر الغرباء

وقال ( طوبى للغرباء )

وأيضا لا تنسى أن الغربة هي من صفة العظماء

فقد قال المتنبي :

[poem=font="simplified arabic,6,darkblue,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
أنا في أمة تداركها الله = غريب كصالح ٍ في ثمود[/poem] ِ


أخيرا



أعلمي أن غضبك من أخلاقك الحسنة ماهي إلا بادرة من بوادر النضوج في شخصيتك وفي فكرك

فمثل هذه الاشياء تتعلمينها من زمنك ومن مدرسة الحياة بنفسك

ولا يستطيع ربما أبوك ان يعلمك اياها ..حتى لو كان يعرفها ..أو حتى لوكان اختبرها ..

وربما هو لم يختبرها بحكم انه عاش في زمن الطيبة وزمن الاخلاق الحسنة


تحية لك وللمشاعر الطيبة الموجودة في صفحتك الرائعة



ظميان غدير