[align=center]منذ نعومة اظفاري!!!! (يسمع بالنعمومه من طلع من بطن أمه وأظافره مخشبه)؟؟؟؟ :9:
بدأت حياتي وأنا أتقلب في عيش رغيد ولدت وفي خشتي معلقة من خشب <<< بحثت عن شخصيتي
فصدمت بحقيقة بدايتها أنه (وإليكم السالفه) :::
في يوم من الأيام طلعت أنا (9) سنوات وأخوي (11) سنه نسوسع وندج ونسربت طلعنا من الفجر إلى الساعه
(9) صباحاً وكنا مقدمين الباب (رادينه) يوم دخلنا إلى الوالده في استقبالنا وفي يدها اللي القديم حق المويه
(المخطط أصفر وأسود ربع البوصه) طوله نص متر ليه علشان تكون (اللسه باللي قويه)!!! وحنا أنواع المطامر :oops:
وأنا ورى أخوي لو ذيك الحزه دخل جحر نمل دخلت وراه أول لزخه من اللي في ظهري
وعيونك ما تشوف ألا الغبره دز أخوي للسطح وأنا وراه (طبعاً قدوتي ومثلي الأعلى)!!!
رقى الرجال وقف عند باب السطح يفكر وين يتوزى فيه (يتخبى) وأنا أطلطل بوجهه وش عنده (كرستوفر كولمبوس)
وش بيسوي توقعت ينتحر ويطب من فوق السطح على راسه (طبعاً أكيد أنا وراه ) لأنه قدوتي …
لا أشوى الرجال راح لصندقة الدجاج (العشه) وتوزى بكرتون جوا العشه طبعاً أنا ما لقيت كرتون أتوزى فيه
فكرت؟؟؟ (مشكله إذا الدلخ فكر تطلع حاجات غريبه)!!!!!!! قلت ما لي ألا أسوي نفسي كرتون؟؟
وأصنم ولا حركه؟؟ وأغمض عيوني؟؟ يمكن ما تشوفني طبعاً لو يمر أعمى شافني
بس تفكير (بزر) صغير ودلخ….. أخوي طلع من الكرتون ورجفني وصفقني قال وش عندك هنا قلت متوزي
قال الله ياخذك أذلف في أي مكان توز (تخبى) ورى أي شي لو ورى الديك …
يا ولد وش السالفه هذا قدوتي في الحياه يرجف ويصفق (أنصدمت بصراحه) :f166:
وصغرت الدنيا بعيني وأنا بين عزاء الدجاج لي في أخوي (بقيق بقيق) يعني (الله يخلف عليك في أخوك)
والديك معصب وقافله معه لأني أنتهكت حرمة بيته وأول ما شاف أمي في يدها (أداة الجريمة)
قال (بقوق بقاق) يعني (السمرمدي السلتوح ولدس الدلخ في العشه) :yikes1:
لا تقولون وشلون فهم بقبقة الدجاج والديك لأنه باين من عيونهم أنه هذا المعنى…
وتلتفت الوالده وأنا أشوفها من طرف عين طبعاً صعبه أتحرك (الأخ كرتون)!!!!
وأول ما شافت أنا طبعاً لأني كرتون ومغمض ودردب (اللي أداة الجريمة) بظهري :7ya:
قسم بالله أنها قويه الضربه ودردب (وطع وطز وطوع بعد) على ظهري
طبعاً دبغتني وطقتني طق (خمسطعش) سنه في خمس دقايق (الدجاج رحموني)
والديك يتشمت وأخوي سلم من الضرب وأنا منبخ ظهري وأدهن (بفكس)؟؟؟ :22:
لا أستهبل عليكم أما فكس لا (كريم زان) مكان الضربات والله يا أنها حاره (ومنها بدأت علاقتي مع الدجاج)
أفرح لفرحهم وأحزن لحزنهم وترعرعت معهم وكان لي معهم أجمل الذكريات …
(يتبع) ترقبوا قريباً علاقتي مع بنات المذن وخاصه الدلوعه (ريم) …..[/align]
مواقع النشر (المفضلة)