لاتــطـلـع مــن بــــيـتــكـم الا مـعـكـ ســلاح يــحـمـيـكـ !!
[align=center]بسم الله الرحمن الرحيم
والسلام عليكم ورحمة الله وبركاته
اول شي هل اكتب الموضوع بلغتي العربية الفصحى واظهر مخزوني الثقافي===> مسوي فيها الفراهيدي
ولا اتكلم باللهجة العامية عشان تفهمون علي
اليوم صراحة حسيت ان عايشين بغابة وحوش وحراميه ومجرمين....الخ من الكلام اللي يخوف
وفكرت اشتري لي مسدس واحطه معاي وين مااروح :160[1]: بعد قصة صديقي اللي صارت معاه
البارحة وصلت للرياض كنت مسافر بالويك اند ((الاجازة الاسبوعية مشكلة الثقافة الانجليزية))
ورحت بالليل للاستراحة بشرق الرياض وهناك يكون تجمع الشباب والسهر ولعب الورقة والنت
مثل ماانتم عارفين واغلب الشباب بالاستراحة او كلهم معهم لاب توب يعني كل واحد يجي معاه جهازه
وبعد ماسهرنا ولعبنا بلوت كل واحد تيسر علي بيتهم حوالي الساعة 3 اخر الليل وصلت البيت وعلى
طول نمت وبعد ماصحيت للدوام الساعة 9 الصبح لقيت رقم متصل علي اكثر من مرة عن طريق موجود
اكسترا==> ابعلمكم اني عندي موجود
وقلت له هاه ياولد وش عندك متصل الفجر عسى ماشر قال ياولد ابيك تفصل جوالاتي انسرقت واانا
اللحين بالبيت وكنت بالمستشفى يوم اتصل عليك قلت انا افا وش فيك بالمستشفى قال لي السالفة طويلة
وانا تعبان اللحين ومالي خلق اقولها لك بالتليفون قلت له انا ياولد مسافة السكة وانا عندك ((متاثر
بالافلام المصرية))
وبوجهه كدمات حمراء قلت له الحمد لله على السلامة وش اللي صار ياولد قال ياطويل العمر السالفة
ومافيها: ((بدات القصة من اولى مقدمة بس
البارح بالليل يوم طلعت من استراحتنا (( بحي اليرموك)) ورحت للبيت ((بيته بحي اشبيليا)) "طبعا
جهازه اللاب توب معاه شايله على كتفه وهو طالع من الاستراحة" يقول الولد يوم وقفت عند باب
بيتنا ماطالعت الا فيه سيارة واقفة خلف سيارتي عند بيتنا وحاط الليت((انوار السيارة)) على العالي
يقول نزلت الا ثلاث شباب ينزلون من السيارة ومعهم عجاري (( عصا حديد وخشب كوكتيل))
يقول ما امداني اتكلم الا بدوا يضربوني ويقول حاولت اضربهم ماقدرت على طول ضربني اول واحد
بالعجرة على راسي ويقول والله كسروني من الضرب والتشويت وانا طايح على الارض يقول توقعت
انهم يبون يذبحوني ودمي قام يطشر من قوة ضربهم ويقول انا فقدت الوعي بعد مااضربوني وراحوا
للسيارة وافتحوا الشنطة واخذوا اللاب توب (( شفتم ان عينهم على اللاب توب ومراقبينه)) وجوالي
والفلوس اللي بمحفظتي وراحوا. بعدها بـ 10 دقايق وقف واحد بالشارع عليه واتصل على الهلال
الاحمر والشرطة وعلى صوتهم طلعوا اخوانه وابوه من البيت على اذان الفجر وعلى بالهم ولدهم
ميت يوم شافوا الدم يحسبونه مرمي في مسدس وراحو للمستشفى وتلقى العلاج وخيطوا راسه
وكم كدمة بالوجهه ورضوض بالكتف والصدر والظهر واليدين بس الحمد لله مرت سليمة وبسيطة
وجاء رجال الشرطة البواسل وفتح ملف التحقيق في الحادثة اللي معروف للجميع اسالتهم حتى الطفل
الصغير يعلمك وش بيقولون، قالوا له تعرف اللي ضربوك قال لا،قالوا تتهم احد قال لا، قالوا لك اعداء
من قبل او تلقيت تهديد من احد قال لا، قالوا له ماتشوف شر انشالله واذا قبضنا عليهم راح نعلمك
وبعدها طلع خوينا من المستشفى وراح لبيتهم ويقول اول ماشفت دمي عند البيت ماصدقت ان هذا دمي
انا بس قلت لابوي عشان اوريه ان ولده قوي هذا نصه دمهم يوم اضربهم يقول قال لي ابوي الحمد لله
على سلامتك بس وانا ابوك وادخل وخل عنك دمهم
صديقي. وبعدها طلعت منه للدوام وانا افكر كيف صار كذا وش هالوحشية اللي عندهم والجرأة غريبة
وقلت ياولد اللحين والله مافيها الا تحمي نفسك بنفسك ولا مااحد نافعك شف خويك كان بيموت عشان
لاب توب وجوال وصرت افكر اني اذا طلعت معاي اللاب توب احطه بكيس زباله عشان مااحد يشوفه
** انتشار السرقات بشكل كبير بالمجتمع هل السبب ضعف الجهات الامنية ؟؟
** هل الناس صاروا وحوش تذبح وتضرب عشان جهاز كمبيوتر وجوال الى هالدرجة وين التربية الاسرية عنهم والمجتمع كله مسؤل عن اللي يصير ومعقوله ماعاد يخافون من الله؟؟
** هل الفقر سبب بالسرقات ولا النزعة الشيطانية في بعض النفوس هي السبب الرئيسي؟؟
** الجرأة الغريبة والعجيبة عند الحراميه اللحين وش سببها هل هو أمن العقوبة ؟؟
((اذا حاب تعلق على الموضوع بدون الاجابة على الاسئلة لك مطلق الحرية الاجابة ليست ضرورية))
شرايكم اصلح اكتب روايات بس ترى انا احب اكتب بالفصحى اكثر بس عشانكم
الـهــوى الــغــايــب[/align]
المشاركة الأصلية كتبت بواسطة ..ღ..وداعاً للحب..ღ..
مواقع النشر (المفضلة)