[align=center]../
السـلآم عليكم ورحمة الله وبركاته
مسآئكم شغـب / صبآحكم شقاوهـ
بـ صراحه هـ الموضوع في بالي من زمـااان
وكل مرهـ اقول بكرهـ انزل الموضوع لحد ماعفن بـ عقلي
وتنازلت وقلت يـلآ أنزله الحين وبس . .
المهم
موضوعي هـو عن مواقف صارت لنا في طفولتنا :24ar:
مع اخوك - اختك - ولد الجيران - بنت الجيران - بزر يقرب لك
اللي هو المهم ابي كل واحد فيكم يحكي لي عن مواقف صارت له في طفولته
او صارت لـ طفل يعرفـه . .
يعني مواقف محرجـه - أو شقاوتك بـ حارتكم اول - والا كبيت عشا احد ماخليته يكمل كذبته
راح ابدأ أنا اقول المواقـف :-
[ يستاهل إللي جـاهـ ]
زمان انا واخوي جنون إنسان ماكنا نطيق بعض ولا نجلس في مكان
الا وقالبينه فوق تحـت , المهم هذاك اليوم امي فقدت الامل انها تخلينا هاديين
فـ طردتنا بـ الحوش
وكان فيه خيمـه والاعمدهـ حقتها بـ الحوش لأن ابوي كان بيكشت مع ناس
المهم , إن جنون شراني ماانطحن الحب اللي براسـه وكمل يحارشني
وانا اسبه واطاردهـ بـ الحوش ولا قدرت اوصل له واطقه
انا طفشت منه وقمت العب وهو يناقز عندي ويستفزني اخر شي عصبت منه
والف على الخيمـه واخذ منها عامود مدري كيف شلته والله
واجلس اطارد جنون فيه الولد تغير لونه وهج داخل البيت
وانا اركض والشرار يطير من عيوني ويدخل غرفة الضيوف ويقفل الباب على نفسه
واجلس اضرب بالعامود على الباب لحد ماتكسر وجا ابوي وجلد جنون
وبرد قليبي im3 :24ar:
المهم اني اخذت حقي وطلعت منها
[ عواقـب الكـلآم المكسـر ]
قبل كم سنـه اخوي وعمي كانوا يتعشون مع بعض
المهم جا لهم ولد عمتي الصغير توهـ بادي يتكلم وكلآمـه مكسر وحالته حاله
وبعد ماتعشوا راحوا جلسوا بـ المجلس يسولفون
وماكان في البيت احـد غيرهم
جا ولد عمتـي عند عمي قال ابي عشا , قال عمي توك متعشي
قال ولد عمتي لا لا ابي عشاااااااا
قال عمي لا تصارخ وجع توني معشيك من برا وش تبي بعد
قال ولد عمتي لا لا لا مابي عشا ابي عشاااااا
المهم عصب عمي منه وجلس يجلدهـ لحد ماعض الارض
في الاخير ولد عمتي يأس قال ابي عشا عشا خيزلانـه مابي عشا
طلع ولد عمتي يبي عصا [ عشا على قولته ]
بس ياهو تكفخ تكفيخ هذاك اليوم
[ لقافـة بزر ]
مرهـ كانوا اهلي مجتمعين وزوجة عمي تأخرت ماجت الا بعدين
وكانت مو ناويه تجي مسويه نفسها ماتدري انو حنا عزمناها
وكانت تقول زوجة عمي ماقلتوا لي من اول عشان اتجهز واجيكم من بدري
توكم تعلموني اليوم قالت جدتي لآ انا دقيت على بيتكم وردت بنتك وقلت لها تقول لك
وبنتها كانت جالسه معنا , قالت زوجـة عمي لا والله بنتي ماقالت لي شـي
شوي نقزت بنت عمي وقال الا ياماما انا قلت لك وقلتي بكيفهم
هنا تغير وجـه زوجة عمي
[ جنون أطفـال ]
هالموقف صار لي انا وولد عمتي واختـه كنا سارقين 500 ريال من الشغاله
ورايحين السوبر ماركت وشرينا بـ الـ 500 كلها
ولما سألنا اللي يبيع من وين جبتوها نقزت في وجهه وقلت هذي ابوي عطانا اياها عشان ناجحين
[ الحمدلله يارب كانت عطله صيفيه ومشت عليه الكذبـه]
المهم عمي درا وجلد عياله وانا قال لي بعلم ابوك عليك im3
وعقاب لنا حبسنا بـ غرفتنا هذاك اليوم
عاد انا ماتعودت على هالحركات عقاب وحبسـه
اهلي ماكانوا قادرين علي يجي هذا يحبسني
المهم قلت لـ ولد عمتي واخته خلونا نطب في بيت الجيران ونطلع من بابهم لـ الشارع ونلعب
هم خافوا بس اقنعتهم , شباك الغرفه ماكان عليه شبك
المهم فتحت الشبـاك ونزلنا من الشباك ع الشينكو ومن الشينكو على جدار كان قصيـر شوي
تعلقنا فيه ونزلنا بـ حوش الجيران . .
جينا بنطلـع قال ولد عمتي خلينا نتمشى في بيتهم شوي قلت يلا وش ورانا
ودخلنا بيت الجيران هو لـ عمي ومأجرهـ عليهم فـ عارفين تصميمه نفس تصميم بيت عمي تقريبا ً
دخلنا ورحنا المطبخ والصاله جينا بنطلع فوق < [mark=999999]بجاحه مثل كذا ماشفت [/mark]
شافنا ولدهم الاسمر السميييييييين
وقام يصرخ علينا ويسب هنا انحشنـا وطبعا حنا بـ عصاقيلنا مو مثلـه
فـ قدرنا نهرب منه ولا دخلنا بيتنا مامعنا مفتاح وخفنا يحدنا ويخبزنا بـ يدهـ
انحشنـا لـ حد السوبر ماركت وتخبينا هناك وبعدها بوقت رجعنا البيت وسطرنا عمي
وخلاني اروح لـ بيتنا im3
هذي المواقف اللي اتذكرها , لو تذكرت شي برجع اقوله لكم
وابيكم تكثرون لي مواقف لو سمحتوا
بـ إنتظاركم :25ar:
[mark=999999]إعذروني على ركاكـة الإسلوب كتبت الموضوع على طول ونزلته [/mark]
../
سـ ح ـووبـهـ[/align]
مواقع النشر (المفضلة)