-[ معاك ولا مع إللي تحت .. إيييه مَغرُوره ]-
بسم الله الرحمن الرحيم ..
السلام عليكم ورحمة الله وبركاته ..
.
.
.
فِي البِدايـه /
مثل ما كلنا عارف أن ما في بيت ما ينخلى من الدش والقنوات الفضائيـه ,
وعـارفين مضارهـا ومنافعهــا ..
وتكون مضارها على أطفالنا الصغار خوفنا عليهم من الأفلام ..
بعد فتره في قنوات أنشأت قنوات خاصه لأولادنـا الصغار
.. حلو حلو .. ومافي أي نقاش ,
.
.
ومره نخاف على عيـالنا المراهقين من كثرة هالحريم إللي يطلعون في قنوات المحرمه الله يكرمكم عنها ,
ولقينــا لها الحــل المناسب .. إللي هو التشفيــر أو الحـذف .. حلو حلو .. وزالت المشكله ,
.
.
ومـره والله فيه ناس مايبون هالأغاني حدنا نشوف مسلسلات في القنوات الخليجيه والمصريه بس ,
والحــل بعد كنســل .. حلو حلو .. وتطمنت القلوب ,
.
.
لكن بعد مده نكتشــف أن فيه مصيبــه تطل علينا في كل قناه مايمدينا نقفل هاذي تطلع لنا غيرها ولا بعد أزفت من اللي قبلهــا .. والله كنــي أشــوف .. وش إللي كني إلا إنـي متأكد من إللي أشــوفه ,
خلــع .. وحبني وماحبني .. تكفى لا تتركني أنا من بعدك أموت
<- يا فلانه ردي على جوالتس انا فلان ..
يمكن الكل عرف وش أنا أقصد ,
القنوات الشــاتيه موب قنوات فضائيه للآســف ,
يلعبــون على عقـول فئــة من الناس إللي من الخيل ياشقراء .. أرسل إسمك وأسم من تحب لتعرف مصيرك ,
طيب أنا برســل سطام - ميري ..
وش توافق الحب إللي بيننا !
<- سويتها وشف النصب بس ,
ميري مدري منهي .. و طلع ياااااعيني ,
قلت طآيب خلني آجرب لعبــة التفرقه مابين الناس
<- ركزو لي ,
نوعية هاللعبه ترسل اسمك واسم من تحب ويكشف لك سر حبه لك
<- والله ما عرفت استوعب هالنصبه ,
ومن كثر ما أدقق باللعبه .. أكتشفت ان هالكنترول النصـاب ..
يحط اللوم على الشبـاب أكثر شي ...
مثلآ
أحمد - مريم
مريم سيبي احمد دل وئتي دهوا بيخونك وهو مابيحبكشي كتير وبيلعب بمشاعري واحاسيسك
<- وين الدليل طيب ,
نصـب والله عيني عينك وهالنـاس غاافله الا والله كسـرانه الله لا تبلانـا .. ,
واللي والله اني أرحمهم كثر الرحم حقين هالشـات ..
أجل أترك النت يالله لك الحمد وش هالرخص اللي فيه الدقيقه 3 ريال وفله وتستفيد ويمديك تشبك خمس في يوم
رايح تمسك لي جوالك وترسل والرساله الوحده ماتتعدى 7 إلى 12 ريال ,
وحبني وما تحبنــي . . !
وش ذا اللي حبها من اول ما سجل نكه يا اميرة البنات دنتي هايله واللهي بحبك , والا الثاني عديم الاسلوب ,
أميرة البنات ممكن خـاص ,
آستحقرت نفسي وانا اشوفهم .. ,
هنــا نوصل لنـص الموضوع او تونى بعد باقي ,
.
.
اللي دفعني بقوه اني اناقشكم هالموضوع بذات ..
إنه في وحده من هالقنوات .. مريت عليها على اني بشوف باب الحاره .. واخطم من هالقناه .. ! !
الا وش مسـوين .. مقدم مدري وش يبي .. الفــن من هناك وهو من هناك .. ماسك لي هالعود مرسم فيه ,
آحرجته وحده قالت له غني لي اغنيه ....
قآل والله لهجة الاغنيه مااعرف اطبقها لازم اتدرب عليها واغنيها
<- مخررررج ,
وشـــف وقاحـة حقين الكنترول .. مايتلقون الا اتصـال بنات وقليل ماتسمع رجآل .. الله واكبر على بناتنا
اللي قــاهرني والله انهم كلهن سعوديــات وكل وحده فشلت ديرتها أكثر من اللي قبلهــا ..
زي وحده نكها آميرة البنات : تميعيت لين قالت امين .. وخذ لك بالشـات تحت ياهووه يا اميره صوتك جنان أميره ممكن برايفت .. اميره واميره وأميره .. ألخ الطلب ,
والثانيه كلي دلــع وغنج : بغيت اشيل الرسيفر من غرفتي يوم غنت وقبل لا تغني مستفزعه بصوتها وتتكســـر بصوتها تكسيـر موب صـاحي .. ,
ونوصل عند الاخيره وبعدها صفقت الريموت بالتلفزيون ,
مغروره وحبها صعب : غلطو بأسمها وكتبو وحبها فهد وبعدها وحبها سعد شف خبث الكنترول ,
واسمها واضح بالشـات وواضح وهي تنطقها .. ! !
المهم بعد ما عدلو .. طقتها سواليف مع المقدم كن مافي زين غيره مع انه ...
( لو توري صورته بزر مانام شهرين من الخوف ) ,
وآخر المكالمه خق الرجآل معها يوم سألها : دنتي موش مغروره وانتي بتئولي مغروره قالت :
شـوف معااااك مو مغروره ..
ومع اللي ( مع تضخيم الكلمه ) تحت واللي فوق راعين الحروف إيه مغروره
.
.
نوصل لنقاشـنا ,
هل هذا يسمى غزو فكري مقتصد لأولادنا وبناتنــا وخآصه السعوديين ؟
وش موقف الأهل مـع عيـالهم في هالموضوع ..
مع أن بعض الاهالي هم اللي يحثون عيـالهم يتصلون ؟
بعض القنوات وخاصه هالقناه الاخيره اللي تم ذكرها .. مرات تقوم بإستضافه حقين الشـات ويتحاورون معه بــــس عن الشـات وما سلم من المقدمه بعد هي تتمييع عليه .. هنــا بعض المستضافين أشكالهم متزوجين طيب وين حريمهم وإذا موب متزوجين ويــن أهاليهم عنهم .. وش بتكون صورتهم قدام أقاربهم يوم صار واحد من حقين هالفسـاد ؟
.
.
ما عندي أي سؤال ثـاني او اي نقاش بس البـاب مفتوح لكل سؤال يطرحـه غيري وياليــت مانقفل هالموضوع
إلا ومحصــلين جواب او جزء جـواب من هالخبث اللي صاير ينتشر علينا .. ,
.
.
سطام فيصل الشمري
مواقع النشر (المفضلة)