الســـــــــــــــــــــــــــلام عليــــــــــــــــــــــــــــكم
السالفه طويله شوي .. وكلها صرررررررررررررقعه
في يوم الخميس الساعه عشر مساءًا رحنا لصالة الافراح ومعنا ناس واجدين
ركبت سياره فخمه وما ادري وش اسمه ، كان بجنبي ابوي .. واخوي الهدر يسوق
وصلنا للقاعه .. والانوار بكل مكان
وناس فضوليون يتجمعون قدام الصاله ، وناس شايلين مداخن وكتمونا بهالدخنه
فتحولي الباب .. ونزلت
وبشكل سريع وبدون محد يدري رفعت سروالي اللي كان بيطيح من شدة الجوع لاني من امس ماكلت شي
عدلت شماغي ومشلحي .. وبديت اسلم على الجمهور اللي حولي
مبروك .. بالرفاء والبنين
الله يرزقك الذريه الصالحه ، منك العيال ومنها البنات ، وشووو ؟؟؟ ( منك العيال ومنها البنات )
بشوف من اللي قالها .. وصار اخوي الهدر ، عطيته عين و بعدها ابعد عن الجمهور
اخوان العروس حاولوا يفرقون الناس وابوها امسك يدي وبسرعه سحبني
وصلت للمكان المخصص للعريس . . كرسي مميز كبير
وبعدين جو كل اللي بالصاله يباركون لي ويضحكون وكنهم مو مصدقين اني عريس
جلست وشربت كاس عصير ليمون طازج وبعده كاس عصير برتقال بارد
وبعدين كاس عصير كوكتيل ، كنت عطشان مررررررررررره
وانا كنت جالس اشرب قهوه .. ماشفت الا واخوي الهدر قدامي وبيده نعال
( قلت وبصوت واطي ) ليش جبت نعال الحمام هنا ياغبي
اخوي : هاذي نعالك اللي كنت لابسهن يوم يسحبك ذاك الرجال
انا : لا يكون انا لابسهن من يوم جيت هنا .. ؟؟
اخوي : ايه يالقروي
انا : انا قروي يا التيس .. مشكلتي اني معطيك وجه من بد اخواني .. طيب حطها وانقلع
اخوي : اوكي
لبست النعال ونزلت راسي عشان محد يشوفني وانا متفشل
بعد فترة نادوا ( اقلطوا يالربع .. حياكم الله .. ابشركم فيه سمبوسه مع العشاء )
سمبوسه سمعتها وماقدرت امسك نفسي .. قمت بسرعه
ابوي يمسك ثوبي ( التفت عليه وقلت ) يبه شف حاطين سمبوسه .. شف العرس والا بلاش
ابوي : كل تبن وانثبر
رحنا لصالة الطعام ، وقبل ابدأ بالاكل نغزني ابوي وقال : يالله نبي نروح
انا : نروح لوين ..
ابوي : نبي ندخلك على زوجتك
انا : ليش
ابوي : بعدين اعلمك
انا : طيب
رحت انا وابوي وابو العروس من الباب الخلفي يوصلنا لقسم النساء
مشينا بين ممرات مظلمه طويله .. انا شكيت بنفسي .. قلت بيخطفوني
وصلنا ، دخلنا الغرفه وكانت روووعه ، مزينه بالورود وريحة البخور والعطور تفوح
رحت لاحد الكراسي المخصصه للعروسين
واحد منهم لونه ابيض والثاني احمر ، رحت وجلست
وبعدين سمعت صرخه مخنوقه من الكرسي .. اي اي
ابوي وعمي صرخوا علي بعد : قم اجلس على الكرسي الثاني
ليـــــــــــش
قالوا وهم يرفعوني من الكرسي : انت تجلس على زوجتك ياغبي
قلت : ايه يعني هي بكرا تبي تجلس على قلبي
قال ابوي وهو معصب ورافع يده وكنه يبي يعطيني ذاك الطراق : قم يالصتيمه
قمت من الكرسي وجلست على الكرسي الثاني
وبعدين قال ابو العروس وقفوا عشان نبارك لكم
وقفت انا والبقشه اللي بجنبي ، ابوي يشرلي براسه ويغمز بعينه
وبحكم اني لبيب - اسرعت ورفعت القماش عن وجه زوجتي
قلت لابوي و ابوها يالله سلموا عليها وبوسوها بسرعه قبل لايشوفكم احد
ابو العروس يناظر ابوي
ابوي صار يتلفت يمين ويسار وكنه يدور شي عشان يجدعه ( يرميه ) علي
المهم باركولنا وطلعوا
وبعد ماطلعوا انفتح الباب الثاني اللي على صالة النساء .. يا الله
انواااع الجماهير والعيون تناظر لنا .. صراخ و زحمه
وخلال ثواني امتلت الغرفه من الحريم ماعرفت منهم غير امي
مبروك ، الله يوفقكم ، الله يسعدكم ، وانا اقول شكرا عز الله مقامكم
بوست كل اللي في الغرفه تقريبا لين صرخت علي وحده انا ماقرب لك
قلت ليش جيتي هنا
قالت انا عمة زوجتك
صرخت على الحريم وقلت : محارمي يوقفون بالجهه هاذي عشان ما اخطي مره ثانيه
نص ساعه بها الزحمه والازعاج وانا تعبت وحالتي حاله
لين طلعوا كل الحريم ماعدا امي وامها وبعض خواتي و خواتها وعيالهم
اوووه تذكرت ذاك البزر الله يقطع خشته
جلس يضحك ويشر علي ويقول .. ماما .. ماما .. شوفي يهز ارجوله مثل البزران
تمنيت لو اشوفه الحين سويته كشنه
يضحك بصوت عالي وامه تحاول تسكته وماقدرت .. وصارت تضحك مع ولدها
وانا صرت احمد ربي انه ماشاف ( الزنوبا حقت الحمام ) ولا كان اعلوم
المهم قالت ام زوجتي : يالله ياعيالي نبي نزفكم
وشو .. تزفيننا .. ليش حنا جالسين على روسكم انا اللي ابزفكم
انا ماقصد اني اطردكم انا اقصد انكم تمشون بين الحريم وعلى صوت الموسيقى
طلعت انا وزوجتي ماسكين ايدين بعض
القاعه ظلما ، اصوات طبول ، اصوات صراخ اطفال ونساء
اصوات رعود ، دخان يملأ القاعه ، و اضاءات فلاشيه ( حشى فلم رعب مو عرس )
مشينا على خطى عسكريه بين الحريم
المهم وصلنا للمكان اللي يجلسون فيه العرسان وجلسنا
ورقصوا اهلي و اهل زوجتي قدامنا
بعدين رحنا لقاعه ثانيه دخلناها وجلسنا .. وشربنا عصير
وبعدين ودعناهم ولبست زوجتي عبايتها وانا شلت شناطها وركبنا السياره ومشينا
وحنا بالسياره جلست افكر وشلون ابدأ معها بالكلام ، وش اقول لها ؟
وبعد عدة محاولات لعصر بنات افكاري
لقيت موضوع ابدأ فيه .. ناظرتها وقلت : تعشيتي ؟
هزت راسها ( يعني ايه )
مافيه مانع نتعشى مره ثانيه وعلى حسابي بعد وش رايك اوقف عند هالمطعم واشتري لنا عشاء
هزت راسها بالموافقه وقلت انتي كذااااااااااااا
دخلت المطعم ( وقلت للمحاسب ) من فضلك ابي وجبة عرسان
المحاسب : وجبة عرسان ؟
انا : ايه وجبة عرسان
المحاسب : للأسف ماعندنا وجبة عرسان ولكن عندنا اكلات ثانيه وان شاء الله تعجبكم
واول لزوجتك هيدي هي وجبة العرسان شو بيعرفها
انا : موافق خلاص جهز لنا اثنين سندوتش بيض بالشطه واثنين بيبسي
المحاسب : سندوتش بيض وبالشطه .. ماعندنا
انا : طيب بلاش من البيض عطنا سندوتش جبن مع مربى
المحاسب : يامعلم ماعندنا سندوتشات بالمره انت مابتفهم
قلت وانا معصب : انا مابفهم .. انا صحيح مابفهم الدلوخه اللي زيك
طبعاً انا قلت الدلوخه علشان مايفهمها ولا تزيد حدة الخلاف >> سياسي محنك
المحاسب : ادلخوه كمان ماعندنا .. عندنا بس همبرجر ! بدك بدك مابدك الله معك
اوكيه عطنا همبرجر بيض بالشطه
المحاسب : ماشي ( وبصوت خافت قال ) ازا بيوم عرسك بدك تتعشى بيض لكان بعد كم شهر
شو رايح تتعشى .. عجه !
وش تقول
المحاسب : باؤول حسابك 12 ريال
وآخر كلام .. راعينا انت تدري اني عريس جديد وش رايك بس تشيل هالريالين
وتخلي الحساب 10 ريال
المحاسب : ولو تكرم على حسابك انا ما راح اخد منك شي .. بس توعدني انك مابتدخل هون مره تانيه
موافق .. ابشر غالي والطلب رخيص
شلت العشاء المجاني وركبت السياره
وعطيت البيبسي لزوجتي وقلت : هيه انتي خذي امسكيهم زين لا ينكبون
>> حاضر
مشينا بعدها وانا جلست ادور عن موضوع لكسر حاجز الصمت بيننا
إلا على فكره وش اسم اخوك خالد ..
ناظرتني بعين >> ودها تقوم وتشوتني
حاولت اني اهديها .. وقلت : انا ماحب اني اتلقف وادخل خشمي في شي مايخصني
انا حبيت بس اني اتعرف وعلى العموم انتي حره لاتقولين شي ، بس راح اعرف الحين وإلا بعدين
وقبل لا انهي كلامي وصلنا البيت
نزلت من السياره فتحت شنطت السياره ونزلت الشناط وفتحت باب البيت
ناظرت ورا ، مانزلت من السياره .. اشرت لها بيدي عشان تنزل واشرت لي هي على قفل الباب
حطيت الشناط و فتحت السياره بالمفتاح
انا مادري وش اللي طيحني فيكم ياعيال الفقر ، ماتعرفون تفتحون الباب العادي
اجل لو كان تماتيك وش راح تسوين .. بالمره الجايه كل اللي تسوينه هو
ارفعي هاذي فوق - وأشرت باصبعي على القفل - ثم اسحبي يد الباب .. مفهوم
يالله جربي .. صكيت الباب ورحت للبيت .. فتحت هي باب السياره
وقالت انا اعرف كيف افتحه ولكن المفروض انك انت اللي تفتح الباب خصوصاً اليوم
وانا شغال عند ابوك ، انا اللي دافع الفلوس والا انتي ، المفروض بعد انك
انتي اللي تفتحين لي الباب .. عضت على شفتها بقوه
قلت لها : لا تقطعين براطمك اذا مو عاجبك بالطقاق ، وعقاباً لك وردعاً لأمثالك شيلي شناطك بنفسك
دخلت البيت وتذكرت العشاء رجعت وشلت العشاء
وكانت هي قد دخلت شناطها وحطتهم في غرفة النوم وبدلت ملابسها
جلسنا على العشاء .. ليش البيبسي حقي ناقص ها .. انت شاربه منه ؟
والله ماشربت بس انكب شوي منه في الطريق
استغليت هالفرصه عشان اتغزل فيها ... هع هع
يا احلى من رغوة الكبتشينو كان ودي انك انت اللي شاربته
عشان اقولك هني وعافيه وعشان آخذ اللي معك هع هع
اكلت الهمبرجر ياله من لذيذ ليش ما تاكلين يا اختاه اقصد يازوجتاه .. ماتبينه .. طيب
اكلت عشاها وقمت بسرعه وقلت : آخر واحد هو اللي يغسل الصحون ( هاذي معروفه عند العزوبيه )
قامت تشيل العشاء و جلست انا على الكنب و جلست هي على كرسي بعيد عني
قلت : ليش ماتجلسين بجنبي .. والا صح اتارينا ( كمبيوترنا ) متزاعلين
طيب وش رايك نتابع اقوال الصحف حقت بكرا .. كالعاده ما اعجبها كلامي
قامت تناظر يمين ويسار انواع ( السيفون ) علي
وعشان اشيل الفكره السيئه عني اللي تكونت خلال الفتره الماضيه قررت اني اراضيها واصالحها
قلت يازوجتي العزيزه يا ام عيالي المستقبليه - صوت ناي حزين - تكفين لا تزعلين مني
تراني ما كنت اقصد ، انا مسكين .. ضعيف الحيله ممكن تسلفيني 15 ريال
اقصد ممكن تسامحيني وتخلينا نفتح صفحه بيضاء بالدفتر اللي مابعد شريناه
خلاص لا تصيح لا تصيح انا مسامحتك
بعدها سمعت الاذان لصلاة الفجر وسمعت صوت يصحيني من غفوتي
حبيبي .. حبيبي قم صل .. اذن الفجر قم صل .. يالله حبيبي لاتصير كذا
انا كنت صاحي من اول كلمه وكنت مسوي نفسي نايم عشان اسمع الكلام الحلو
صحيت .. جلست .. شفتها وش تقولين
اقولك قم صل اذن الفجر
لالا مو هاذي اللي اسألك عنه فيه كلمه ثانيه كنتي تقولينها
ابتسمت وقالت ( بصوت خافت يالله ينسمع ) كنت اقول ياحبيبي
صرخت وقلت : وش تقولين .. ياحبيبي .. حبيبي مره وحده حبك برص ان شاء الله
انا ماعرفتك الا قبل كم ساعه وبالسرعه هاذي بديتي تمونين
الحين تقولين ياحبيبي اجل بعد شوي وش تبين تقولين عطني خمسه ريال حق الدخان
والا عشره ابي اعبي بنزين .. اي والله عالم ماتستحي .. غطت وجهها بيديها وقامت تصيح
ومادري وش سبب صياحها .. توضيت ولبست ملابسي وطلعت
وقبل لا اوصل باب الغرفه التفت عليها وقلت : ارجع من الصلاة واحصل القهوه والتمر جاهزين سمعتي
رجعت من المسجد .. ولقيتها مجهزه القهوه
وجلست بجنبها .. وسلمت عليها .. شفت القهوه و التمر
وقلت وش هاذا ، قهوه وتمر بعد الفجر ، شايفتنا شيبان والا فلاليح ؟
صرخت علي وعفست الدنيا ( الظاهر انفجر صمام الامان عندها )
وقالت بصوت قوي : شايفني مسخره عندك ، شايفني لعبه بيدك ، شايفني ضحكه في حلقك
انت اللي طلبت القهوه ، فيه احد دازك لمي ، انت ناوي تجنني
خلاص يا بنت الحلال هدي نفسك ، صحيح انا اللي قايل لك وانا اسف
( إذا ماتبي قهوه ليش تطلبها مني قولي ليش )
نذاله ، اول مره القى واحد يطيع اوامري .. هع هع
وش رايك ننسى الموضوع ونروح نفطر برا في احد المطاعم العائليه
والله يانا اعرف فوال عنده قسم عوايل يجنن يحبه قلبك .
وانتهت القصه وان شاء الله تكون اعجبتكم
بصراحه انا راعي طويله ويبيلي مجلد عشان اكمل
كذااااااااااااااااااااااااااااااا
منقــــــــــــــــــــول
المشاركة الأصلية كتبت بواسطة عصبية بس حنونة
مواقع النشر (المفضلة)