^_^اعـــــــــــجبتني^_^

[فرزاتشـــي]

يالله واناطالبك تغفر لي ذنوبي ياغفور
ارجيك والجالك واناسالك واعيدالمسأله

لو ماتطهرني بعفوك ماتطهرني البحور
جيتك وذنبي قد تعلاّ غاربي يامثقله

أنامن الطين انخلقت,أخطي ولانيب امعذور
قامت علي الحجّه بدعوة رسلك المرسله

مؤمن بتوراتك وإنجيلك و مؤمن بالزبور
و بسنّة محمد وآيات الكتاب المنزله

لكن خُدعت بزخرف الدنيا وزادتني غرور
أبدت مفاتنها وورتني من العمر اجمله

طبعاً بماإني بني آدم حصل منّي قصور
واذنبت يامولاي ذنبٍ بالخفا ما تجهله

أسألك تغفر لي وتستر موقفي يوم النشور
الياالقفت خلقك صحايفها وهي مستذهله

من يستلمهابالشمال افلس وهويدعو ثبور
ومن يستلمهاباليمين افلح لخير المنزله

واسألك ياربي تعاونّي على نيل الأجور
أحيا حياةٍ مكسبي فيهامن البر افضله

واسألك جاهٍ مع هل الدنيا وحظٍ مايبور
أيضاً وعرفٍ مع هل الحكمه ورزقٍ تكفله

من لا تهيّا له مقامٍ مع طويلين الشبور
يبكي على ماضاع من عمره وخيبات عمله

وان شاب راسه لاترجّى فيه تجبير الكسور
لا خير في تالي زمانٍ ما تغانمـت اوّله
مانيب ناسي قصةٍ صارت واناازورالقبور
لازلت افكر في غرابتها وبالي تشغله

ساعة ظهر لي شايبٍ له حول قرنين محجور
في جوف قبرٍ عن هل الدنيا طواه ويعزله

سلّم وجا يمّي يقول:ابنشدك ياللي تزور
عن حالةالدنياوعن وضع الزمان وعن هله

أنا مضى وقتي ومرّت بي طويلات الدهور
والباقي بعمري بعيشه بينكم واستكمله

قلت:الزمان اللي يباريناعلى خبرك يدور
الوقت نفسه ما تغيّر ماشيٍ ٍفي جدوله

أماالبشر , لا والله الاّ غير من حدالجذور
صارانتقالٍ من يمين الى يسار المنقله

استغرب الشايب من اللي قلت وبليّا شعور
حط اليمين اعلى الشمال وخاطره فيه اسئله

قال:افتني عن حالةالشيبان والشيخ الوقور
أهل الخبروالراي والحكمه وضرب الأمثله

القدوةاصحاب الأموراللي تطاع بكل شور
اللي يفضّون النزاع ويحكمون المشكله

قلت:البعض منهم على ماقلت في وصفك وقور
قدوه ولكن رايهم ماينفرض في مسأله

الطاعه العميا بقي منها مجاملةالحضور
اللي تلاقيها مع اوّل فرصةٍ متنصّله

والبعض لا عبدٍ يخاف الله ولا عبدٍ شكور
لا زهّده شيبه من الدنياولاهو جمّله

بهيمةٍ يرجع على منحاه الاوّل ومحصور
في لعب بيلوته وريح زقارته ومعسّله

والبعض الآخرشابت رموشه على درب الفجور
ينقل جوازه للسفر من مزبله لامزبله

أشيمطٍ زاني قضا عمره بحانات الخمـور
والعايله ورعٍ يغرّر به وبنت مهمّله

قال:افتني عن حالةالخفرات ربّات الخدور
اللي تصان ببيـت عايلهاوبابه تقفله

شيهانةٍ تشمخ عفاف وتصقل فروخ الصقور
بين الفريق ببشتها الضافي وثوبٍ تسبله

قلت:العذارى في زمنّا ببغاوات الطيور
تقليد هرج وعرض ريشٍ خلفها تستخمله

تلبس عباةٍ ضيّقت حول الردايف والخصور
فضيحةٍ تكشف جسدها من علوّه لاسفله

وموضةشيالٍ تكشف الوجنةوالوان الشعور
والمحرم تبدّل بـجوالٍ بيـدهـا تحمله

لا فوّحت صفرالدلال ولاعرفت غـش القدور
تطبـخ لها خدّامةٍ بالعايله متوكـله

وشلون يتربّى عيال ام التبرّج والسفور
الاّ خنازيرٍ دماها بارده ومغـفّله

قال:افتني بحال الشباب الصلب صيّادالنمور
الفارس اللي ينطح خصومه بزندٍ يفتله

الوافي الشهم الغيوراللي لعرض الجار سور
البار عندامّه وابوه وعلم ربعه يشغله

قلت:الشباب بوقتناوجهه مثل بدرالبدور
والجسم من زودالرخا ماتنفتل فيه اعضله

قصّة شعورٍ صيّرتهـم لا إناث ولا ذكـور
والثوب راح ولابقى الاّ عالمٍ متبنطله

ناسٍ (فلنتينو)وناسٍ تلبس( كرستانديـور)
صار التنافس بينهم في لبسهـم والجنتله

من كان يشرب من قرارالبير مشروبه(....)
والابل راعيهاغدا يشرب حليب (النستلـه)

مامنهم اللي قام دون اعراض جيرانه غيور
من قام قالو , وشـ ملقّف حضرته؟وشـ دخّله

والوالدين حقوقهم ضاعت وعنهم في نفور
ان غاب عنهم لا تذكرهم ولا جاه الوله

بدّا عليهم شلّةٍ تهوى الوطا بين الجحـور
لوتعزله عنهم تبي له شان كنّـك تقتله

ماراح يوم يشارك ربوعه بحزن ولا سرور
حتى ابن عمّه يعرفه بالوجه واسمه يجهله

بدّل حكاه وضيّع سلومه وحاله في دبور
وان شاف ضيف يخش حتى انّه يفارق منزله

ناظرلي الشايب بعينٍ تجمع السبع البحور
يقول :انالا يمكن ادخل مجتمعكم واقبله

انتم لكم وقتٍ تصدّع من بلاويه الصخور
مايقعد الجمّال به ساعه ولـو ضاع جمله
للشاعر ظافر القحطاني

[ظميان غدير]

فرزاتشي رائعة وجميلة


دامها منقول

اسمح لي انقلها لقسم القصائد المنقولة

حيث ستجد الترحيب .

فقسم همس القوافي هو للقصائد التي تكون من كتابة شعراء الزين


تحية لك

ظميان غدير

[ذرب المعاني]

منقول جميل

دمتِ بخير

[آحوال]

فرزاتشي


مميزة القصيدة تسلم يد قايلهاء ويمين ناقلتهاء


وفيهاء روحانية وتدكير لمحاسبة النفس


الف شكر على النقل


وننتظر جديدك

[الحوراء بنت نجد]

$$فرزاتشي$$

اشكر لك رقي الانتقاء

كلمات معبره وهادفه-

لك تقديري