بسم الله الرحمن الرحيم
السلام عليكم ورحمة الله وبركاته
شطحات بـ المعنى العاميّ : ) ،، يعني طلعات ،، يعني كل شطحة مالها دخل بـ الأولى ويمكن يكون لها دخل مدري ،،
حبيت أغير من نمط كتابتي شوي ،، وأكتب بـ العامّي ولا أقعد أتفلفس بـ الفصحى im3
ونبدأ ....
الشــطــحـة الأولـــى
اليـوم ليلة 27 من رمضان ،، وباقي ليلتين أو ثلاث من هـ الشهر الفضيل ،، والرسول صلى الله عليه وسلم قال : (( رغـم أنف من أدركـ رمضان ولم يغفر له )) أو في مامعناه ،،
ناس ضيعت رمضان في مسلسلات ،، وناس في سهر الليل ونوم النهار ،، وناس عاشوا رمضان مثله مثل غيره من الشهور وما أعطوه حقّه ،، لـ درجة اني أحياناً بعد ما أطلع من صلاة المغرب ألقى ناس عند الإشارة مشغلين أغاني على آآآآآخر شي وردح ورديـح ،،
رمضان شهر عبادة ليله ونهاره ،، مو صوم عن الأكل والشرب وبس !!
الواحد يصوم النهار ويقرأ قرآن وفي الليل يضيع أجر النهار بـ الخرابيط الي مالها داعي : (
الي مالحق نفسه في أول الشهر ولا وسـطـه باقي ليلتين من الشهر المبارك يلحق فيها نفسه ،، جعلني الله وإياكم واخواني المسلمين من عتقائه من نيرانه ومن الفائزين بـ رضوانه $222
الشــطــحـة الــثــانـيــة
باقي على العيد يومين أو ثلاثة ،، والأسواق زحمة ،، والشوارع زحمة ،، والناس تبي تلحق على مقاضيها الي ماتخلص أبد : (
يصرفون فيها مئات وآلاف ،، ومن ناحية ثانية كبار السن يدورون فكّـة خمسمية عشرات وخمسينات حق عيديات الصغار ،، وفكّـة خمسمية أو ألف كلها ميات حق الكبار شوي ،، ولكن لازالوا صغار ويفرحون بـ العيدية : )
وياليت كل واحد فينا يطلع عيدية عشرة ريال بس لـ رابطة العالم الإسلامي أو جمعية خادم الحرمين الشريفين الخيرية ،، الي تسوي فيها مشاريع لـ العيد لـ اخواننا الفقراء والمساكين في السعودية وخارجها ،، أو عشرة ريال في مشروعها سنابل الخير الي بـ العشرة ريال هذي يسوون فيها سبع مشاريع أو أكثر أجرها بـ إذن الله يعود لـ المتبرع ،، ويعتبره صدقة جارية لـ وجه الله في ختام هـ الشهر الفضيل ،، يختـم فيه أعماله في رمضان ،،
وأنتبهوا تعطون المتسولين ريال واحد !!
لأنهم من وجهة نظر مشايخ كثيـر يعتبرونهم غير مستحقين ،، لأن غالبيتهم أخذوا التسول عادة و وظيـفة خصوصاً في مثل هـ الأيام ،، والجمعيات الخيرية أعرف بـ مستحقي الصدقة وأعرف بـ المحتاجيـن : )
الشــطــحـة الــثـــالـــثـــة
العيـد جاي ،، والناس فرحانة بـ قدومه ،، وزعلانة على وداعها لـ رمضان ،، نسـأل الله أن يعيده علينا أعواماً عديدة ،، ويتقبل منا واخواننا المسلمين الصيام والقيام وخير الأعمال ،، أرجو أن لايكون في فرحة العيد لـ الشيطان فرصة انه يضيع علينا أجر رمضان وحنا لاهين بـ فرحتنا بـ العيد وغافلين عن أعمالنا ،، وما الله بغافل عما نعمل ...
الشــطــحـة الـــرابــعــة
عنوان رابطة العالم الإسلامي
الرياض - الدائري الشرقي - مخرج 12 - تتجه شرقاً - بعد أول إشارة تاخذ أول لفة يمين بـ حارة وتمشي سيدة تلقاها قدامك ....
وكل عــام وأنــتــوا بـ ألف خير وصحّة وسـعــــادة
مواقع النشر (المفضلة)