[poem=font="simplified arabic,5,darkred,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
كئيب من الشقا ولا جريح من الجفا ياليل=دخيل النجمتين إللي بصدرك لا تعنيٌني
دخيلك ما دخلت ألا لغيرك والدخيل دخيل=وأنا ما عاد إللي غيرك في هالدنيا يخاويني
يكفيني من الدنيا أشوفك للظلام تميل=معك ضو القمر ولا النجوم إللي تكفيني
عقب هاك الوليف إللي تركني للعنا والويل=ياليته ما تركني للغثا والليل ممسيني
ألا ياليل لا منك نويت مع الظلام تخيل=أخذني من تحت جنح الظلام ولا تخليني
تراني ما تحملت العقايب من كثر ما أشيل=عذابي مع عذابك يا عذابي لي عذابيني
علامك يابعد حيّ القوافي والقمر وسهيل=علامك كل ما شفتك تقول أنك تعزيٌني !
علامك تترك العبره من عيون السحاب تسيل=تنٌشدني عن الغايب ويردفها دمع عيني
إذا غيابه مّكدر خاطرك يا صاحبي بالحيل=ترى غيابه مخلي صاحبك مثل المجانيني
مغير أسولف لحالي تقول إني غديت أخبيل=وأقول إن السوالف ما تزين إلا مع الزيني
أنشهد ما هقيت إنه عن ربوع الخفوق يحيل=عزاي لقلبي إللي ماخذه من صدري سنيني
ياليت أنه يقدر ما أقوله مّير صار بخيل=أمدله اليدين ويقصٌر إيدينه عن يديني
أمانه لا تشٌره لا عدمتك من بعض هالقيل=تجٌمل وأترك الشرهات للي ما يدانيني
ما دام أني خليل(ن) ما تخلا عن عيون الخيل=أجل تستاهل الفنجال لا سقته باليميني
يذكرني سوادك في عيون مجدلات الذيل=عساني ما أعدمك يا هالعيون إللي تناديني
نعم دوك القوافي ثم تذٌوقها بطعم الهيل=إلين إنك تقول أرجوك تكفى لا تبكيني
كريم(ن) وأنت تستاهل ولا من عٌودت حلحيل=وأظنك عارف ٍ طبعي قبل لا جيك وتجيني
ياليت إني عرفتك في زمان ٍ غير عن هالجيل=ما دام إنك تحس بلوعتي والهم طاويني
خلاص أرجوك لا تبكي وأنا عنيت لي منديل=خلاص أرجوك خل الحزن من بينك ومن بيني
توكلنا على الله وحسبنا الله ونعم الوكيل=سبع مرات أرددها وأقول آمين آميني ![/poem]
سطام الشمري
مواقع النشر (المفضلة)