ياوقتنا اللي صار فيه الذنب راس
هذه من اجمل قصائد الشاعر ناصر الفراعنه وهي مسندها لشاعرين من قبيلة شمر موجود اسمائهم في القصيدة
[poem=font="simplified arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
ياوقتنا اللي صار فيه الذنب راس=مواخر الأذناب تسجد لها روس
البوم ياطى في بطن كل قرناس=والذيب عدنه عن الجمة تيوس
ياوقت ياثالم شبا كل عباس=ياخالقٍ روس الأسنة من الخوس
خليتنا فرعٍ وخليتهم ساس=خليتهم ركبٍ وحنا لهم عوس
ناسٍ ترمم عظمها من لحم ناس=وكوسٍ تصافق خمرها من ورى كوس
ياوقت أباري لك على قب الأفراس=لاشك ماتشفق على قلب فاعوس
وأنا الذي مابين مجهم ومغلاس=مابين أرضٍ وأرض هايم وناطوس
لاقاضمٍ حبه ولاشاربٍ كاس=ولانيب من عفريتة الجن ممسوس
لاشك همٍ يودع الراس يحتاس=كنه يبرشم ناظر العين دانوس
مبطي لاجاء الطيب نتنومس تنوماس=واليوم لاجانا تقل قاطعٍ روس
وكل السبب وضحاً على عنقها فاس=والسر لاواضح ولاهوب مدسوس
ماننشد الوجه المعفن ليا خاس=ونشره على الطيب إلى صار داسوس
ياحيف يالباسة الجوخ والطاس=شرابكم من علقم الذل محيوس
ومن رام له مجدٍ على ربط الأسياس=والله ان يمر القبر صيرٍ ومغموس
المجد مايصلح على الرخم الأنجاس=الا على غمرٍ ينوس الخطر نوس
وماكل من يدلج على اليم غطاس=ولاكل من ركب على الخيل سنعوس
والله يالولا إختلافٍ بالأجناس=ماعاد نفرق بين فارس ومفروس
وياللي حقرت النفس والمكسب طفاس=لعن الله آبو محجر النفس بطفوس
ومن رضي لأجل القرش عيشته منخاس=يناك عرضه لو يبوس القدم بوس
سواة ناسٍٍ بالشرف مالها أمراس=تسحب مشالحها على غير ناموس
والله يالعيشة منظف وكناس=آخير بالعيشة بها الذل متروس
وياغرفةٍ فالسطح فيران وبساس=ولاقصرٍ أساسه مدوخل ومنخوس
وسهري على سطحٍ من الشوك محساس=أخير من نومي على القطن مدعوس
وياهملجة عيني على الموت بنعاس=و لافتحت عيوني على كل دعبوس
ولو هو ضحك لي وسنه أبيض من الماس=قلبه كما حبٍّ رعاه أسود السوس
نذلٍ لو آسودس له الطيب سوداس=مايذكره لو بين أذانيه ناقوس
ف ياللي تمردس طيبها فيه مرداس=ماتطلع الصبخة ثمر كل مغروس
أكبر شبه للي بها صار غراس=خبلٍ يشد السرج من فوق جاموس
فيالله يالمعبود ياجالي الباس=إفرج لمنهو تالي الوقت مدعوس
عقب المعزة تحت الأقدام ينداس=كنه عن العالم نقص كف وضروس
إن قلت أببعد وش عليَّه من الناس=تحرشوا بي لو ورى حد غرطوس
وإن قلت أبقرب مثل عنتر وجساس=مامعي مايفتكني لو طرف موس
إرجع ياسيفي خلاف وإطلع ياقرطاس=هذا زمانٍ للقراطيس مدروس
أقفى زمان إخوان شامه وعرواس=وأقبل زمان إخوان سوسن وفردوس
راحوا عيال المشمشه والأناناس=بالرزق والا إنَّا نقوس الفقر قوس
فياراكبٍ من نقوة الهجن عرماس=من دار سلطان السواحيل قابوس
ماكنه إلا الزين مدقوق الألعاس=يبرى لها ذيلٍ تقل ريش طاووس
أم العيون اللي تقل لون مدباس=حمرٍ تخاتل كنها عين جاسوس
والخشم منحول الرواقين مدماس=كنه ليا رد النسم حامي جموس
والإذن لاقامت تمهلس تمهلاس=بيرق عقيد ومقدم الخيل كردوس
قصيرة الواحد ولاهيب معباس=طويلة الإثنين ذيلٍ ونسنوس
تلقى مواطي خفها فوق الأطعاس=تشبه لسمراً علمت فوقها الفوس
وخفٍّ ليا قام يتطعمس تطعماس=كنه بمرهوفٍ من الشلف محسوس
ووركٍ تحذف به تقل ورك إيناس=لاسمع اله قبلٍ غدى تقل منكوس
والبطن مهيافٍ تقل مابه أرماس=والظهر صلبٍ منحني كنه القوس
والجلد من لكز العراقيب حساس=ومن وشة العصفور فالجو محسوس
خطرٍ لو إنه هبها ريح نسناس=تدفي كما تدفي من الظله شموس
إليا نست عرقوب ركابها أوناس=راغت تقل غافي سمع حس نادوس
تكرم عن اللي زينوها بالأطياس=ولادوروا في هلال وتروس
اليا اسهلت يازين هاك التمرياس=كنها على ثلجٍ وفي خفها لبوس
واليا أوعرت عبدٍ سمع حس مرواس=قام يتخشع مومي الراس منكوس
تلفي على لباسة الحمر الأدقاس=شمر هل العادات ريس ومريوس
ياماثنوا عن نايد الدار نكاس=وياماحدوا من صفوة القوم ناكوس
منصى حلو في مجلسه طرب الإحساس=ماهوب قفرٍ مدبر القاع ميبوس
وانصى لنا برجس على كور مقواس=راعي الشداد اللي للأجناب مركوس
أشكي لهم وقتٍ على شذب الأضراس=فصَّل عليَّه دبرة الشين ملبوس
وأنا اللذي ماشاقني درب الأدناس=وأشوم عن طعمة عسل كل نخسوس
كم دايسٍ ماداس شيٍ إلا داس=وغيره يدوس ولو ماوده يدوس
مالوم أهل جوخٍ تمدوس تمدواس=كلٍ حفر له تالي الوقت دهلوس
ومن لايحط لمقضب الباب ترباس=يصبر على ماجاه حيه ولسلوس
للجب حفارٍ وللحب مهراس=ومن شد عقب شوي تلقاه مهروس
واحالي اللي ماعثت فيه الأرماس=ياكود مما شاف حاضر وراموس
ماأقول كن قلبي على الضو محماس=متعدي قولت على الضو محموس
كني ليا حل أسود الليل عساس=بين أنجمٍ بيضٍ تخافق تقل طوس
أهيم فالدنيا وأنا مفلس إفلاس=من عالية حايل إلى نازل سدوس
وترى الفضا لو هو وسيعٍ ومشواس=أضيق على الملتاع من خرم دبوس
ملتاع مالوعه أبو عود مياس=ملتاع من جور الليالي ومطسوس
ماعاد يطربني مع القوم مجلاس=ولاعاد يقضبني عن الهمله جلوس
لو صابني ماصاب ابودباس بدباس=مابت ليلٍ ساهر الطرف منحوس
روابعٍ فالقلب جندٍ وحراس=توقد بقلبي قاد نارٍ بفانوس
وكشف الروابع قبل توليع الأكباس=راعيه لاشب أشهب الصبح مكبوس
ياقوم ياقولة شجيعٍ وعنطاس=ياماغدى في جمة البير عنطوس
عشرين أقيسها على كل مقياس=من بعد عشرينٍ على العمر كابوس
ماخذت تعليم الليالي بكراس=أخذت من سود الدهر جملة دروس
كيف الوفاء شان الوهد ماله أمساس=وكيف المراجل تشترى اليوم بفلوس
من كثر ماشفت الوزا قطع أنفاس=أصبحت بايح سد والمخ ملحوس
صبيت لي في مضرب العاج بقياس=ذن أشقحٍ بالضارب الصلب منسوس
أبيه يجلي لي عن الخاطر إعماس=لاشك من مرٍ على مر مكبوس
أغضيت عيني ساعةٍ وأرجس إرجاس=قلبٍ ورى حدب المعاليق مرجوس
في خايعٍ صبحه تخرمس تخرماس=وليله كما حم الغرابيب خرموس
ياوي حلم أضرب له أخماس بأسداس=أقلبه مثلوثٍ وألاقيه مسدوس
فزيت مثل اللي لمس سلك من ماس=به كهرباء من ضغط عالي ومحسوس
فزيت واللي فزني فز هوجاس=وعزي لمن رده عن النوم هاجوس
وكل السبب زولٍ لفاني بلا راس=شفته ومن خلفه رجالٍ بلا روس
يحمل معاه كتيِّبٍ تقل نبراس=أوله واضح مير تاليه مطموس
في عينه اليمنى رجاً يشبه الياس=وفي عينه اليسرى للأحزان قاموس
يلحس ذراعه بأسفل الريع لحاس=ويمسح حذاه بعالي الريع دنفوس
له ملةٍ تجهل نبي الله الياس=الصبح مسلم وآخر الليل هندوس
وعجزت أفسر غامض الحلم ياناس=تصغر له نفوسٍ وتكبر له نفوس[/poem]
رد مع اقتباس
مواقع النشر (المفضلة)