هذا يا طويلين الأعمار والأشناب قصة حصلت لي وانا مستانس معي شهادة ثالث ثانوي وما صدقت على الله جايب 84 % وانقز لم أمي واقولها : يمه نجحت وتقولي : طيب وش صار<<يلعن ام التحطيم و( والله من زين العلوووم رايح عندها هي ما تعرف تبصم حتى ) واحتري ابوي بفارغ الصبر والحماس لين يرجع من الدوام وما صدقت جت الساعة 3 ونص الا والقاه يتغدا واقوله يبه ويطلع لي المحفظة يقاله كاش واقوله : مابي قروش الله يحفظك ويقولي وش تــ ــــ ـــــــبي أججججل ( قام يقطع تخبر واحد يتغدا) واقوله نجحت نجحت يقولي: اكيد ناجح ما فيها كلام اجل مدخلك مدرسة اهلية ليش اها بس اخلص كم نسبتك وافك عليه 95% واشوفه يغص ويقوم من محله ويقعد يخمخم بي ويحبحب بي وتشوف خدودي كلها زفر بس وش أسوي كلش الا رضا الوالدين<<مسوي اخلاق , ويقولي هاااه انشالله طب يا وليدي ( يا رجال اطلع من حياتي لو معي هالنسبة كان تلقاني استشاري نساء وولادة) واقوله لا يبه امزح معك نسبتي 84% ما دريت الا وفخذ دجاجة متلطخ بوجهي يحوول وهو اللي يدخل غرفته وانا الحقه واقعد اراضيه لين اقتنع وافاتحه بموضوع ...

أنا ... يبا

ابوي ... وش تبي

أنا ... أبي أغير سيارتي هالقرمبع طاق لي أكسنت وكل اللي كانوا بالمدرسة معي منقزين .... معهم وانا جالس لحالي محدن يبيني

أبوي خلاص باتسر نروح المعارض ونشوفلك موتر يمشيك ( وانا اللي طمووحي عالي قلت الحين ألتيما فل كامل)
والله واقعد احتري باتسر لين يجي واقعد اعلق صور بورشات وفياغرات على جدار غرفتي ألمح لأبوي , المهم اقوم الصبح افطر واقرا هالجرايد والقى ابوي ماسك جريدة وقاعد يحسب قلت بس الرجال شكله ناوي على شي زين وانا مسوي اخلاق ما ناظرت شوي ابوي يعطس وتطلع نخاريره ويقوم للحمام وانا انقز للجريدة والقى اعلان مازدا زووم ( أقول اطلع منها أخذ لي كوريلا ولا اخذ هالكسرة ) المهم رحت للمعارض ومعي ابوي واروح أدور لي على سيارات مستعملة وألقى لك يا طويل العمر كامري وقعدت أتفاوض مع ابو يمن يقول انها طلبية من امريكا استعمال بنت امريكية ( عز الطلب تحمست يمكن نلقى لنا كم صورة ناسيتها والله ولا في أمل أول بأول الجمارك ) واركبها واشم ريحة تتن وافتح الدرج والقى 17 مليون الف زقارة قلت يمكن هالامريكية ذي زاحفة والتفت يمنة والقى كتابات ( المستشار مهجد الكامري ) والتفت يسرة والقى ( أويلااااه يا حمووودي يالزين ) قلت بس اغسل يدك امريكية فقشها ابو يمن المهم قلت لبوي هالكلام قالي تبيها والا رح بالكسرة اللي معك وجلست أهوجس شوي تقل نفسية واتخذت القرار الحاسم واشتريت هالسيارة الزاحفة ما امداني شريتها الا على طول نقزت بها التحلية يقالي راعي بنات والقى لك راعي الحوت يلحقني وطال عمرك واصفط يمين واناظر من المراية وما ألقى بها احد ويطلع لي ذاك الخال اللي لابس ثريا بيتهم و يبربر عنقلش قلت ذا من خوال أمريكا وش جابه عندنا بالتحلية ويكلمني ويقولي : هل أنتي المستشار؟ وانا يقالي كابرن راسي : ايه أنا هو سم وش بغيت ( بالانجليزي طبعن) قالي : يا شيخة ( اغسل يدك لغة ) انتي فيه قيادة كريزي انتي فيه مشهووورة عندنا , وانااقوله ماشالله التفحيط وصل هناك لأمريكا يبوو ترااها من أيام الفراعنة ال( والخال يهز راسه ومايدري وشالسالفة ) المهم ويطلع من الحوت واحد ( واحد والا خمسة ) كنه رئيس المافيا ومعه شنطه ولابس هالنظارات الشمسية ويقولي هل أنتي المستشار؟ ياخي تراك طولتها وش تبي تراك زهقتني حتى شف بطاقة الاحوال ( وهم سبايك يهزون راسهم ) واقعد اهايط عليه شوي لين طلع لي الشيك وانا اللي يقمط العافية واقول الدعوة فيها قروش ارركد يا ولد ويصفط لي كم مليون و يقولي : يا هبيبي حنا نبيكي تفهط عندنا بواشنطن نبيكي تطربنا وانا اللي بغيت اطيح على الارض من هالترييش اللي يبي يجيني وانا اقول شكلي أباخذ هالشيك وأبسحب قلت لهم أفكر كم يوم وأرد عليك كم رقمك بالله 055581******* ( أرقام بالواسطة ) واخزن الرقم .

وارجع البيت والقى أبوي يقولي هاااه يا ولدي وش فكرت تدخل أي كلية ( أقول روقنا والله لو تدري وش اللي في جيبي كان تتمصلح معي ) وادخل غرفتي واقعد اهوجس شوي قبل ما أنام واقول : ياخي ليش اسحب عليهم خلني اسحب لهم كم جلنط وهم من جنبها ما يدرون وش الاستفهام أصلن , والله ويجي الصبح وأقول لأبوي يبه برووح أكشت مع أخوياي بواشنطن قالي نعم ؟ قلتله بالنعيريه يعني بس ندلعها واشنطن قال : إيييه رح ولا تبطي .

واروح اشحن الكامري وادق على الرقم وانا مرسم بدلة وقلق ورايح للمطار ويرد علي الخال واقوله يله يا جوهر هذاني بالطريق وهو يرد علي يقول أوكي , وأنقز يا طويلين العمر بطيارة خاصة مكتبين على الشبابيك ( الطارة المستشار - خصوصي), وطال عمركم ما دريت إلا وانا بمطار واشنطن الدولي ويوم طلعت من الطيارة وألقى ألاف مؤلفة كلهم بنات ويقعدون يصارخون (مو- ستا – شار ... مو – ستا – شار ) والله لو اني محمد علي كلاي وأدهر بهم تواقيع ويوم دخلت المطار والقى الرئيس بوش مستقبلني ووراه رؤساء الدول المجاورة ( ساحل العاج وطقتها ) ويجدعون علي هالورود كني سامي الجابر معه كاس دورة الصداقة , وما بقى احد ما جا والـ ( سي ان ان ) حاضر حتى التلفزيون السعودي له فرع هناك بس صراحة بيني وبينكم تهيضت وينقزون بي فندق 7 نجووم وبالمطاقق دخلت غرفتي بعد هالزحمة وبعد ساعة يدق الباب وافتح ويطلع لي واحد متلطم وشعره اشقر ويناظر تحت تقل واحد يشحت بمسجد وويناظرني واناظره ويفصخ اللطمة ويطلعلي ايمينم ( ياهوووووووه ما يحتاج شريط اغاني وانا افحط ) وقلتله اقلط قال لا والله شبعانو خلها مرة ثانيتو واجي اطلع معه واقعد افرفر معه شوي بهوليوود( التحلية حقتهم ) بعدين جدعته شقته <<ايمينم عنده شقه خخخ وانا رحت الفندق.

ويوم جا الصبح واقوم من النوم والتفت ويمنة ويسرة والقا درزن بنات يبون يركبون معي اثناء التفحوط نسأل الله العافية وانقزهم كلهم بالكامري وانقز ايمينم معي للتهييض , ويوم جت الساعة 12 ظهرا تهجد واشطن كنها فاظية والدوريات مصكرة الشوارع والكامرات من كل زاوية ( تخبرون بطل فلم السرعة والغضب ) حتى تصوير بالهليكوبتر وقلت يا ولد خلنا نسوي بروفا وألعن أم الدوسة وأصك جلنط وأشوف الماصورة مقبلة لمي و ....

دربوووووووب أنتف أم الماصورة وايمنيم يحوول مستانس يحسبها صحيحة والبنات يزاعقن يحسبون التفحيط كذا وانا قافلة معي بس أهم شي انها جت سليمة اللهم الجنب راح بس<<<والله من زين العلوم .


ويجي الشوط الرسمي قدام البيت الأبيض وصافق طبلون الكامري وايمينم غنا كل أغانيه لين قلب رابح صقر ( تشبيه بلييغ جدا ) والبنات يحوول متمسكات ببعض وأهز الأولى وجت صح واستانست وأهز الثانية وأشوف البيت الأبيض كل ماله يقرب يقرب يقرب .....

ما دريت عن نفسي الا وأمي تقومن تبيني اروح المدرسة اناظر امي وتقولي : هو؟ وش بلاك يا ولدي ما قمت قم يله الحق على حصة المطالعة (أثري بالمتوسطة ) واركب الباص وارح للمدرسة ولا كنه صار شي .

ما يستفاد من الموضوع:
1) التفحيط دمار شباب هالايام كل ما طق احد موتره فحط فيه نسأل الله العافية
2) انا كتبت هالقصة وانا زهقان ودي اسولف مع احد بس كلن نايم فقلت ادخل المنتدى واكتب لي هالقصة
3) ما تحسون ايمينم ماله دخل بالموضوع
4) المستشار:من كبار المفحطين في الشرق الاوسط ولا احد يحسبني أحش فيه والا شي


النهــــــــايـــة



مــع أجــمــل تــحــيــاتــي
الـــمـــحـــامـــي