السلام عليكم ورحمة الله وبركاته
هذا اول موضوع لي بالقسم هنا
بصراحه حبيت اطرح مشكلة نعاني منها في جامعتنا
او بالاصح في معظم جامعاتنا في السعودية
...
مثل ما تشوفوا في العنوان
حنا كطلاب نعاني من مستوى سيء في دراستنا الجامعيه
يعني تخيلوا ان الطالب يدرس خمس او اربع سنوات
وفي الاخير قليل هم اللي يطلعون بفايدهـ من دراستهم !
هذا الشئ له اسباب كثيرهـ ويبي له سنوات
الى ان تتم حل المشكله هذي
بس المشكله الاكبر والاهم
انوو عندنا مدرسين [دكاترهـ] اعمارهم فوق الـ 60 سنه
يعني تخيلوووا تعدووا السن القانوني
وما زالوا في جامعتنا وهذا بفضل الواسطه طبعا
للاسف دكاترهـ ما عندهم لا اسلوب ولا تفاهم
كل ما حاولنا نشارك قالوا احنا كنا اول ...... الخ
يعني تخيلوا واحد من دكاترتنا طبعا معدي الـ 60 سنة
الى الان شرحه هوا هوا من قبل عشر سنين ما يغيرهـ
انا درست مادهـ معاهـ وحملتها ودرستها معاهـ مره ثانيه
تصدقون اني اتابع معاه من مذكرة االترم الاول
مع ان المقرر يحتاج لتطوير
وفيه مدرس ثاني عنده اسلوب من العصر الحجري
اللي ما يكتب ما يدخل المحاضره
اللي ما يضبط دفتره بالوان ما يدخل المحاضره !!
اللي يغيب يومين 3 ايام حرمان !! << يعني ما عليه في الـ25% الرسمية
يتلفظ بالفاظ مسيئة والله ما تنقال في الشارع بعد
دكتور ثالث عمره في الـ 55 ما شغلته الا التحطيم
يدخل المحاضره ويحطم ويتكلم عن الطلاب اننا سيئين
واننا ما نستاهل اننا ندخل هالكلية !!
وانهم اول كانوا يتعبون في الدرااسه !!
واننا مدلعين مره !!
يعني انا ما ادري وش يبي هالدكتور !
يبيني اروح ابيع جح وادرس في نفس الوقت عشان ينبسط مني !
يعني من جد حاله ما يعلم فيها الا الله
وعندي مثال عن جامعة الملك عبدالعزيز
يقول لي ولد خالي اللي يدرس انتساب
وهو متزوج وعتده عيال
طبعا هو مستشار في شركة بريطانية
وحب انه يكمل دراسته البكالوريوس في جامعة الملك عبدالعزيز
في قسم ادارة الاعمال
يقول الترم الماضي يوم رحنا نختبر
دخل علينا دكتور قال فصخوا شمغكم وطواقيكم ياللي لابسين ..
وارفعوا اكمام يديكم الى مرافقكم !!!!!
تخيلوا طلاب انتساب
يعني اقل طالب عمره يتعدى الـ 30 سنة
يعني ولد خالي عمره حوالي 37 سنة
ويجي واحد يقولهم هالكلام !!
عشاان ايش عشاان اذا في براشيم يشوفها !!!!
بالله عليكم هذا كلام !.
طبعا بعد ما رفضوا الطلاب انهم ينفذون
هو رفض انه يختبرهم
واستمر الحال الى ان تدخل المشرف !
اختبروا الطلاب ونجح 2 بس
باختصار شديد لا تلوومووو الطالب لما يتخرج
من الجامعه بعد فترهـ طويلة وهو مش فاهم اي حاجه !
لاننا نمتلك مدرسين على مستوى عالمي في الدنـآءهـ ..
لكم المــآآيـك للنقــآآش ولابــدآ الرأي ,,
بيــــــس
مواقع النشر (المفضلة)