بسم الله الرحمن الرحيم
السلام عليكـمـ ورحمه الله وبركاته
ناظرووني لحد يسوي نفسوه ذكي ثمن يبحث هالموضوع تراني كاتبته بمنتدى ثاني
اولاً الحمـد لله على نعمـه الأخوان و ماتحس الوحده بأخوهـا الا اذا راح عنهـا
الله يخليهُمـ لنا ويكثرهُمـ
أنا ببداء بالموضوع على طول لأنـــي مأعرف أكتب مقدمات>>كان قلتيها من زمان وخلصتينا
المُهمـ عنـدي مُشكله تقضُ مضجعي>>أول مره أقول هالكلمه أحس انـي مُهمه
واللــــي عنده الحل لايبخل علي الله يرزقكُمـ الجنه
أنا أخوي الثاني يدرس بأمـريكا من 6سنوات تقريباً
بس صدق اللي قال مايروح الا الطيب
لاوش طيب حنـون خفيف دمـ لوتبين القمـر مستعد يجيبه لكـ >>صيغه مبالغه
يعنـي بالعربي كـل الصفات الحلوه فيه>>كاني قاعده أخطبله im22
الزبده/ أن أختي عمرها7 سنوات متعلقه فيه مره من اطلعت على الدنيا
وهي ماتفارقه أبد سافر وهي عمرها سنتين بس مانسته ولاتنام الى تقول كمـ يوم ويجي
على فكره اهي حاطه ببالهـا أنه أبوها وأخوها وزوجهـا ولو ودها قالت أنا ....بنت يزيد
وياويل اللـــــي يحكي أنه بيتزوج طبعاُ لأنها زوجته >>ياكافي
حاطه ببالها أنها طول عمرها بتعيش معه
مألـومها من يجي من السفر وهي تنامـ وتأكل وتقومـ معه
حتى انها اذا جت تنوم تفصخ بلوزتها يقالها تقلده
لدرجه أن أصدقائه حفظـو شكلهـا
ولاتفـــارقه ياعالمـ
واهو لو وش تقول يسمع كلامهـا
تخلي يجي للبيت بدري عشان يقعد معهـا
ولالو تشوفونه من الصبح يرتز عشان يوديهـا لمدرسه ولايخلي أحد يوديهـا
ولمـا جاء هالصيفيه تقوله: لوتموت مارجعت لأمريكا والله أن تجيب ملفكـ هنـا ولاترى بدعي عليكـ أنكـ ماتنجح>>على بالها أنها أمه ودعائها مستجاب
بس صار اللي مانتوقعه
أهو اذا سافر لهناك تصيح يومين وتعتزل العالمـ وبعدين تنسى
لكـن قبل ثلاث أيامـ لما راح لامريكا أخوي الله يحفظه لـنا
راحت للمطار عشان تودعه وتشوفه لأخـر لحظه ماتبي تفوت فرصه تقعدهـا معه
وطـول الطريق واهو يترجـى فيهـا ماتبكي اذا بتودعه لأنه يقول : بنسى نفسي وببكـي
وسوت منـاحه بالمطار ماصارت ولااستوت
أبد ماتوقعنا هالبكي منهـا
تبكـي كأنه راح ولا عد بيرجع
رجعنـا البيت وكل واحد يحاول يلهي نفسه وشوي وتدخل علينا وعيوها متفخه من البكي تقول لبنت خالتي مرامووه تغطي!!
هنـا أحنا انصدمنا ماكان في البيت غير أخوي وسافر
سألتها أختي قالت من بيدخل ؟
قالت : يزيد
وشوي وتدخل علينا وهي شايله ثوبه بترتيب وتجلسه في الكنب وتقول شوي وأجيكـ >>يايمتي وش ذا
تخيلو قاعده تحاكـي ثوبه
وتروح تجيب الجلال لبنت خالتي وتغطيها غصب وتسبها تقول: حرام عليك
شوفيه قاعد ماتخافين من الله>>على فكره اللي يشوفها يقول مو بزر لأنها بالمعنى الصريح مطوعه صغيـره
صراحه عورني قلبي عليها خذتها بنت خالتي على قد عقلها
وتغطـت,,
وجلسنا عند التلفزيون وخذت الريموت وهي تقول: هاه يزيد وش تبي أي قنـاه
وطول الليـل وهي تسولف معه
وتقوم تجيبله مويه وعصير ومره تكتف الثوب ومره أسدحته
ونامت جنبه
وبنت أُومهـا توطى الثوب
أقصد يزيد في نظـرها
أنـا قلت هذي حاله وتعدي
ولمـاجا اليوم الثاني أقومهـا من النوم لقيتها نايمه بسريره وحاطه الثوب جنبها
ولما صحيتهـا قالت خلاص طفي النور لايقومـ يزيد خليه يكمـل نومه!!
ياناس ياعالمـ
وربـي أن أختي مو طبيعيه أبد ثلاث أيــــام على هالحاله
المشكله أنا كلنا صرنا معها في البدايه خذينا الأمور بمزح ؟وأعجبنا الوضع
لكـن ألحين لا وألف لا
توني جايه منهـا أسمعها تقوله أنت مرتاح كذا ولأأجيبلكـ مركـى!!
وشوي وتقوله: لأنمـ أحسن لكـ وتحطه على السرير وتروح كل شوي تتطمن عليه
والتلفزيون اربع وعشرين زفت ع المباره ع بالها انه يتابع وبتلعن خيرتس ان غيرتي
أنعزلت عن العالمـ صار عقلها مع هالثوب توديه في كـل مكان صارت تكلمه وتشربه
اللي يشوفهـا يقول مجنونه
ماكأن شكلها طفله تقولون عجوز من هالهمومـ اللي فيها النومـ هذا بس ثلاث ساعات باليومـ
ولاتأكـل بس حاطه حرتهـا في المشروبات
ولمارحنا السوق أختارت المطعمـ اللـي يحبه والوجبه اللــي يحبها
وحاست الدنيا علينا في صحارى الا تبغا الطاوله اللي جلسنـا عليها أخر مره معه!!
الخـــــــلاصه وش أسوي؟؟؟
من جد تعبت أروح أخبي الثوب وأصدمها وأقولهـا ندو.. يزيد راح ماراح تشوفينه الا عقب سنه
بس أنا خايفه أني أصدمها,,
أو نخليها تكمـل أحلام اليقظه حقتهـا؟؟
أنت /أنتي
صار لكُمـ هالموقف في بيتكمـ ولا بس هذي حاله أختي
لأنـي أول مره أشوف هالحاله
>>ياكثر بربرتتس يامره
مواقع النشر (المفضلة)