السلام عليكم
قصيده لـ الشاعر بديوي الوقداني العتيبي رحمة الله عليه
[poem=font="simplified arabic,5,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
دنياك هَـذي كلها هَـز قاووق = ما تعرف الصاحـب من اللي معاديك
واكثر كلام الناس بالمكر والبوق = يهرج معك و ليا تِقَفيت يرميك
المال دايم صاحبه مرتفع فوق = والقل خايب لو تَرَفَّعْت يـرْخِيك
عزِّي لمن دَوَّر لها عند مخلوق = إما بخل ولاّ مَنَن يوم يعطيك
أوصيك بالطيِّب إن كان لك ذوق = إرمه وراك ولازم إنه يلاقيك
يا عبد هوِّن كل مطرُود ملحُوق = لا تِشْتَحِن لك رَب ما هُـو مخليك
أللي جعلِّك رُوح جاعلك مرزُوق = كما تَكفَّل بك من الخلق كافيك
يعطي وباب الرِّزق ما هُو بمغلوق = وليا طلبته وانت محتاج يعطيك
الرِّزق له حبسه وله وقت مطلُوق = وإن مت ظلا عند قبرك يناديك
والموت جايك لو تقع جوف صندُوق = دع عنك ما بك من حذر لا يعنيك
لا تنشغل بالمال ترى المال ممحُوق = ما مالك إلاّ ما تمده أياديك
إن كان مالك يا فتى ضيق السـوق = تراه عند الموت ما هـو منجيك
الجار والعاني لهُم شرط وحقُوق = والضيف واجب تكرمه يوم يلاقيك
وان كان تبي تاخـذ المدح مطبُوق = خلك مشمر دُون ضيفك وعانيك
صُـون الأمانة واظهر الهرج بصـدُوق = ولا تعاشـر صاحب البوق يعديك
لا تصحب الخاين ولا تامن النُّوق = وان لاح براق الحيا عَذَّرَت فيك
والدرب لا تامنه لو كنت مرفُوق = إلا بِحدٍّ في يمينك يباريك
أترك طريقة كل عاشِـق ومعشُـوق = ترمي برُوحك في الشَرَك ثُم يرميك
والكلب ما يتبعك لو تلبسـه طوق = ولا خلاخيل الذهـب ما يراعيك
وبالصبر تغلب صاحب العزم يا شوق = والعزم طيب مَيْر حزات يرميك
وافرح ليا منك عن الشـر مدروق = واحذر صديقك واحذر اللي يُواليك
هذا كلام الصدق ما هُو بمسـروق = وابيات يا قلبي بناَهَا يسَلِّيك
من هاجسٍ يطمي كما بحر صافوق = احذر على القلب الشقي يوم يطْرِيك
ويا رَب تجعلني من النار معتوق = واجعل ختامي طيبا يوم الاقيك
[/poem]
وسلامتكم
حيران
مواقع النشر (المفضلة)