البارحة ليلي عسـى الله يعوده
قصيدة غزلية للشاعر ابراهيم بن جعيثن رحمه الله من أهل سدير
قصيدة قوية من القصائد النادرة اللتي تردد وتكرر بلا ملل
[poem=font="simplified arabic,4,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
البارحة ليلي عسـى الله يعوده=يازين وصل الليل من بين الأحباب
جيت الحبيب اللي وفت لي وعوده=ماصار لى منبوز الارداف كذاب
والى مكـانه خالي من حسـوده=وبدا التحية لي على هجة الباب
خليت به يوم الزواهـر شهوده=في ساعة عنا هل الشر غياب
مرن يوسدني مفاتن عضوده=ويحطني ما بين جلده والأسلاب
ومرن يفرشني مجامع نهوده=وانا له انهض والتوي كني الداب
عنده الين الصبح بانت عموده=نادى المصلي بالجماعة والاجناب
خلي على راعي الهوى وش كوده=عليه من هرج العرب ستر وحجاب
شوفه دواي وعلتي من صدوده=ودواه شوفي والمودة لها اسباب
الله يديمه لي ويبقي سعوده=والبيض عقبه لوصفن قلت ما اناب
قالـوا عشيرك يا ولد وش زوده=وش نفله بالزين عن تلع الارقاب
من قولهم تو النظر به نعوده=لقيت مابه شي من الشين ينعاب
تسمعوا وصفه وهذا وجوده=ياطا بحدب منهن الروح تنذاب
والساق دملوج سقنه مدوده=في منبته ما هزعه كل هباب
وانف قسم صافي خدوده وسوده=وخرس بلا كحل مضاليل واهداب
جيده ونهده محفياته جعوده=وغـر مناظيم عذيات وعذاب
لا طول لا قصر بمشيه ركوده=لا دق لا عبج مثانيه ورغاب
وتالي وصـوفه ماحصينا عدوده=للقلب نهاب وبالناس لعاب
الشف يمـه كل خيط يقـوده=ويلويه عن غيره لواليب دولاب
هني من مثلي لمثله يفوده=هذا الوكاد وكثرة الهرج ماجاب
ما دام جسمي مالجا في لحوده=ما انساه وهروجه عجاريف وعجاب
وصلاة ربي عد ما رزم رعوده=على النبي ما طقوا البدو منساب[/poem]
رد مع اقتباس
مواقع النشر (المفضلة)