الولد: يمه ليش قرانديزر قوي ودايما يهزم جنود فيقا ..
الأم: علشان قرانديزر يشرب حليب وفيقا يشرب فيمتو
الولد: يمه ليش بشار مضيع أمه وجالس يدورها لحاله ..
الأم: علشان بشار يوم راح مع أمه لاسواق العويس ماسمع كلامها
راح يتفرج على الالعاب وضيعها


وتروح الأيام ويكبر الولد ويكتشف ان قرانديزر ماكان يشرب حليب وان حده زيت فرامل ويخب عليه بعد .. ويكتشف ان ام
بشار نحله وجايبتن غيره ألفين بيضه ولاطقت له خبر يوم هاجموهم الدبابير نحاشت وتركته .

الأم: صليت العصر ياولدي ..
الولد : ايه صليت يمه
الأم: طيب وش قرا الامام في الركعه الاولى (بعض الامهات ماودكم انها تستذيب ابد)
الولد: صلاة العصر مو جهريه يمه
الأم(وهي تلقط ماتبقى من تقاسيم وجهها) : ايه عارفه بس كنت باختبرك (عااش مصرف)

طبعا الولد كذب على امه كذبه بيضا
.
.
.
.
الكذب بشكل عام صفة سيئة.. فليش احنا نزرع هذي الصفة في أطفالنا (من غير قصد طبعا)
صح أن بزراننا بثرين وان ماهنا اغث منهم بس الصدق مطلب .. وبغض النظر عن شرعيته، الكذب على الاطفال له اثار
نفسيه سلبيه على الطفل ، سواء وهو صغير والا بعد مايكبر ويكتشف الحقيقه .. طبعا الكلام ذا مانيب جايبته من طحانة
جدتي ، هذي خلاصة مقال قاريته قبل فتره .
حتى لو سأل الطفل سؤال محرج أو سؤال اكبر من سنه المفروض أننا مانكذب عليه.
يعني حاول تصرف السؤال بطريقه حلوه مثلا فررره بكف وقوله ورى ماحليت واجبك (امحق تصريفه)
في النهاية الكلام اللي فوق كله يثير سؤالين يلعبون كيرم مع نفسهم (بسوي مثل اللي يقولون سؤال يطرح نفسه ولخبطت )

1-هل فعلا الكذب على الاطفال له تبعات نفسيه سيئه على الطفل .. وهل يمكن انها تأثر على سلوكه مستقبلا ؟؟

2-ليش سالي صارت شغاله وليش الانسه منشن تحب أم شعر اصفر اكثر منها ؟؟

السؤال الأول هو صلب موضوعنا ولان فيه ناس يمكن يكون عندهم معلومات اكثر مني
فياليت يتحفوننا باللي عندهم

أما السؤال الثاني للي وده يتميلح مثلي (قولي الحلقه الاخيره فاتتني وباعرف وش صار وريحينا )