,, تلاحقني ذنوبي ,,
تلاحقنـي ذنوبـي فـي طريـق العمـر
ولا آعـرف السنيـن اللـي بتبقالـي !!
يدينـي غارقـة بأشيـاء غيـر الحبـر
وأبأكتب .. عل يبقى لـي صـدر خالـي
كأن الأرض تحتي من لضاها .. جمـر
عجزت أوقف أشوف شصار فـي حالـي
وأنا .. عبد ٍ ضعيف إحتاج يبكي .. كثـر
هواجيـس الغيـاب لصاحـب ٍ غالـي
ولا اجمل من حنين القلب .. غير الصبـر
يعيشنـي " أمـل " لـو مــا تهيـالـي
يحاصرني الشتاء .. وأرجي بصيص الفجر
أبطرد وحدتـي .. وأبقـى مـع ظلالـي
تذكرت الحنين .. وفاض صدري شعـر
تفقـدت المكـان .. إلا أنــا لحـالـي
بقى عندي قلم " .. بينـي وبينـه شبـر
وأنا عم المسافـة وقـت يطـرى لـي
تجر إيدي قصيدة .. ليـن بـاب السطـر
وأنا أوراقـي قصـور ٍ صرحهـا عالـي
وأهيجن .. بالزمـان الممتلـي بالطهـر
وأسمّـع صوتـي المبحـوح .. عذالـي
على .. من ودعتني .. وإتركت لي عطر
أشمّـه لا طـرى موتـي علـى بـالـي
يخالفها الهواء وتطير خصلة شعـر
تقـل يـد ٍ .. تودعنـي علـى فالـي
خطاويها يقين إن الجفـا لـه عـذر
وهـي بنـت الوطـن ورمالهـا رمالـي
وأراقبها .. تراعـي للسمـاء والبـدر
وعلى قد الحزن .. كانـت تحالـى لـي
يبس غصن المـلام .. ولا تجـرّا ثغـر
يتمـتـم بالظـنـون وخيـبـة آمـالـي
وراحـت .. لليـال المجهمـات السمـر
ورى ظـروف ٍ كثيـرة مالهـا والـي
مع إنـي بأفتقدهـا .. بـس تامـر أمـر
لـو إنهـا طالبتنـي روحـي أشـوالـي
وش الأرض اليباس .. إلا حـدود البحـر
وش البحر الغزير .. إلا ( صدر غالي )
وأنا ما ادري .. لو أهرب من ذنوب العمر
أبهرب مـن طواريهـا علـى بالـي ؟!
::::
قصيده أعجبتني للشاعر : عبد الله البكر
لكم كل الود والتقدير :25ar:
مواقع النشر (المفضلة)