وش عيارتِك

[nothing]

السلام عليكم والرحمه

إن شاء الله تكونون بخير ..

( أبو شكيم , نقار , بقره , جملات , أبو إدريس , حجاب , محمود بياع الكوسه , سنفور ............< سدحت ربع عيارات أخوانها


موضوعي لايشارك فيه إلا اللي عنده عياره < ليش في أحد ماعنده

أصلاً أول ماننولد ( أبواي < متعوب على أبواي يفكرون وش يسموني

والناس الوحشين الباقي يفكرون في العياره

أنا أول ما أنولدت جلسوا أهلي يفكرون في إسمي شهر وسموني أريج وغيروه لأسماء
ولاّ عيارتي ماشاء الله عليهم أطلقوها علي من أول يوم ولاتغيرت وإستمرت ملازمتني لهاليوم

مع أن الصفه الي عيروني فيها راحت إلا أنهم مُصرّيين يعيروني فيها ليوم الدين

أذكر مِن أول خواتي الكبار رحت معهم زياره لمدرستهم وأنا توني مادرست

(فيس أخت شريره يسحب أذني) لو تقولين لصديقاتي وش عيارتي ,, أقفل عليك السرداب
(فيس يتذكر هالغرفه وكان يتخيلها مليانه ثعابين وضفادع

لهاليوم مانسيت شلون ماسكيني صديقاتها (يووومآآآ منهم يخوفون جلفات وهمج

وسادحين لي إغرائات الي علك والي بسكوت الظاهر أنه أبو ميزان < عصر أمي معد هوب عصري

وأنا أقاوم بين العروض وبين الضفادع إلين قلبي قال خذي العلك وماصار صار im1

تصفيق جاني ,, وفضّحت فيني مابقى واحد من الجيران ماعرف عيارتي هذاك اليوم ,, الله يقطع العلك ومن صنعه ووردّه وباعه

/

أنا رحت لأمي وأنبطحت عندها قلت أنا أكرهكم ليش عيرتوني im22

قالت أمي مو أنا معيرتِك ,, مرت أبوك يالفالحه أهي أطلقت عليكِ أنتي وأخوانِك الباقين عيارات

أنا أنصدمت مرت أبوي أموت فيها وأهي تحبني وأسميها ماما

تسوي فيني كِذا (فيس رجع ينبطح ويتعاسم

صدق أني كنت غبيه

أكبر همّي يوم توني صغيره عيارتي

أخواني إذا بغوا منّي شي قالوا ترى بنقول لأستاذتِك عيارتِك

أقوم أنا أنتف شوشتي وأصيح < قسم بالله طفوله مظلومه

حتى أبوي ماسلم من سالفة العياره

مدرسته الي كان مدير فيها كاتبين بالبخاخ العريض ( فلان دب) < شرير

قد له 13 سنه متقاعد وتو الجمله ما أنشطبت

...

اللحين خواتي إذا جيت أناديهم مايردّون

أعيرهم طووالي : نعم

أنا حتّى يقولون خواتي نناديك بأسمِك ماتردّين إذا عيرناك رديتي

أذكر أختي أخر العنقود كان شكلها يذكرني في عبسي

كشه وكرشه وأمي كانت تربط شعرها قرن من فوق :24ar:

عاد أطلقت عليها عيارة عبسي

قسم بالله أنها كرهت عدنان ولينا وكرهتني :8ar:

/

بس تدرون عاد وش البلا فيه ؟!

إذا عائله إشتهرت في عياره أو جدهم إنعرف بعياره

وصاروا الناس مايعرفونهم إلا بعيارتهم

خالتي قبل ثلاث شهور لمّا جت تكتب أسماء المدعوات على البطاقات بزواج بنتها

راحت وأكتبت نوره الـ (عيارتهم ,, على وجهها ماتدري

يوووه وش سوت فضحتنا ,, قالت تسموني (...) ما أحترمتيني ووو........

إنصفق وجه خالتي < إحرآآج

< بلا هذره زايده

اللحين دوركم كل واحد يقول عيارته بكِل مصداقيه < أي هين :8ar:

والي يستحي يسدح عيارته بالتقيم < تفكييييييييير :8ar:

الي مضطهد بطفولته من العياره يجي ويفضفض هون

:25ar:

[alzen57184]

ياعمري رونق

وقسم حزنتيني

لاعبه بحسبتك العيارة ..وذكريات وحالة

شوفي كل واحد مننا يالعايلة الكريمه كان له عيارة محترمة

بس من كبرنا كل واحد احترم نفسه وماعاد قالها ..

صحيح يتذكرونها الحين ويضحكون عليها ..

لكن ..ماعاد ننادي بعض بها ..>> مدري ليش حنا كذا

هل العالم كلهم مثلنا والا السعوديين بس


عيارتي كنت ابكي من قلب لقالوها بوجهي او سمعها احد ما يعرف عيارتي

وعقب ما كبرت إكتشفت انها ..مدح مو ذم

لكن كنت متعقده منها جداا ومسببه لي أزمه

لأنهم كانوا ينسبوني الى أحد الدول العربيه الشقيقة im22

الشاطر يطلع عيارتي :5ar:

عموما كنت اكرهها لأن وحده من هالجنسية كانت ..تزور امي وحنا صغار وكانت ضخمه مره

وانا اخاف من الناس الدببه

كنت اتخيل اذا نادوني بذاك الاسم ان شكلي مثلها

الى الان..يتذكرونها ويضحكون عليها ..لكن حرصت ان الجيل الجديد مايعرفها

من عيال اخواني ..لكن للأسف عرفوها ..

أكرهم أخواني



موضوعك حلووو يابت :24ar:

لك:25ar:

ع فكره موقف خالتك لا تحسد عليه

[أبعـــاد]

من جد موضوع ع الجرح

ألحين يارونق إنتِ وزمونه ماسدحتوا عيارتكم





أنا عيارتي ملازمتني لين بكره

أم دميعــه

وش أسوي مرهفه من أيام الطفوله

وهـ ياملحي

كل واحدمن أخواني وعيالهم له عياره


والأغلبيه أنا حاطتها فيهم شكلهم يكرهوني

يسلمو يالغلا لاهنتِ

[القلب المرجوج]

السلام بنت خالتووووووو الصراحه عيارتي كل ما تعيروني اصير رزه ما ادري ليه ايه والله ماما مو صاحيه كاتبه في زواج اختي عيارة وحده ما جت الا لانها تغلي امي اقولكم عيارتي ونعم العيارات انا قطوه لانو احب الدجاج امووت فيه وعند صديقاتي بسه لانو دلوعه وعيد ميلادي ميوووووووووو ولد اختي يقولي انتي قطوه متوحشه عشان اظافري طويله وامشخ بنت خالتي رونق واحلى بنت خاله فديتها اقول قلت العياره وبغت تموتني اشكرك على الموضوع الرائع اتمنى المزيد ياروحي

[القلب المرجوج]

اسفه اخطاء املائيه متحمسه وانا اكتب يوم شفت رونق انعميت احوووووووووبك ياناس ياعالم فديتها