المسلم الوحيد في الكون
وهم يشاهدون الأخبار.. تجاذب كل من بوراشد وبوصالح الحديث:
- وش قاعد تفكر فيه يا بو صالح؟
- أفكر بهالدين العظيم اللي انتشر من أقصى الأرض إلى أقصاها. ناظر هالمسلمين الصينيين تبارك الله.
- والله إنك صادق يا أبو صالح.
- بس ترى هذول ما يعرفون من الدين إلا القشور. طبايعهم زي الأجانب، بس يصلون. المسلمين الصدق هم العرب اللي يفهمون القرآن والأحاديث.
- والله أنك صادق يا أبو صالح.
- وبعد ترى موب كل العرب مسلمين صحيحين. عندك هالشوام والمصاروه والمغاربه والله حتى ما يصلون صلاة ربي. إن بغيت المسلمين الصدق تراهم أهل الجزيرة والخليج.
- والله إنك صادق يا أبو صالح.
- وموب بعد كل الخليج. تراهم يسمحون بالخمر وبالكنايس، الدين الصدق هو ديننا حنا يا أهل السعودية.
- والله أنك صادق يا أبو صالح.
- بس عندك بعد أهل الشرقية فيهم شيعة وحريمهم ما يغطون وجوهم، وأهل الغربية حريمهم بعد ما يتغطون ويشيشون، وأهل الشمال حريمهم يجلسون مع الرجاجيل ويضيفوهم. وأهل الجنوب مثلك خابر عندهم بدع واجد. الدين الصدق موجود هنيه عندنا في الوسطى والقصيم.
- والله أنك صادق يا أبو صالح.
- بس ترى عندك هنا في الوسطى الناس يتتنون (يدخنون) ويسمعون موسيقى والعياذ بالله. الدين الصدق هنيه ببريدة.
- والله أنك صادق يا أبو صالح.
- بس بعد بريدة موب كل حارة زي الثانية، ترى أكثر أهل بريدة مركبين دشوش ويشوفون القنوات الماجنة. ما فيه إلا حارتنا طاهرة ما فيها ولا دش واحد.
- والله أنك صادق يا أبو صالح.
- بس الله يهديهم جيراننا موب دايم تشوف عيالهم في المسجد، ولا تشوفهم دايم في صلاة الفجر. الصراحة يا بو راشد ما فيه في الحارة يصلون الفجر دايم في المسجد إلا أنا وأنت.
- والله أنك صادق يا أبو صالح.
- بس والله يا بو راشد أشوفك هالأيام ما تخشع في صلاة الفجر زين!!!
من خلال الحوار القصير
ربما نستنتج امور كثيره هي واقع مجتمعاتنا العربيه
ولا نستطيع التنصل منها
وسؤالي لكم
هل تصنف الناس بمزاجيتك ام بماذا ؟؟
وهل تعتبر ان ذلك حقك في تنصيف ما تجهل؟؟
هل تعتقد ان لك الحق في نفي الاخر؟
وهل انت المسلم الوحيد في الكون؟؟
مواقع النشر (المفضلة)