المسيار ومادراك مالمسيار هع هع هع

[كحيــــلان]

السلام عليكم ورحمة الله وبركاته

مسائكم أشهب كلون الغبار المتناثر على بلاط حوشنا .

شوفوا أكره شي بالدنيا هو المقدمه يعني بصراحه مدري وش محلها من الإعراب

يعني اي حفل لازم تكون فيه مقدمه ؟؟ ليش ما يتكلمون في لب الموضوع على طول ؟؟

وحتى السوالف لازم تكون بمقدمات . كل شي بذا الدنيا لازم له مقدمات تقولون كيف أنا أقولكم

مثلا قمت بيوم من الأيام الصباح بتروح للجامعه وماكان معك فلوس وانت طالع حصلت الوالد في غرفته

يقرى جريدة الجزيره << عليها تخفيض >> فبالتأكيد ماراح تقوله يباااه عطني فلوس ما معي شي

لا لازم تنافق أول شيء فراح تقول هلا بأبوي الغالي هلا والله بأبو دحيم يحي هالطله وشلونك يالغالي ان شاء الله بخير

. طبعا أبوك بينزل الجريده وبيشوفك بطرف عينه وهو منزل نظارته على خشمه وبيقولك شف في جيبي 100 ريال خذها ولا تتأخر على كليتك .

عموما انا بأكسر هالروتين الممل وما راح اكتب مقدمه لذلك أبجي زاحف على جنبي الايمن ملازقاً خدي البلاط من قوي الزحف الى صلب الموضوع والله الهادي الى سواء السبيل

أخواني اخواناتي ( حلوه اخواناتي )

كان دحيم جالس بالحوش وهو عايش انواع القرف والملل مثله مثل أي سعودي ثاني ماعندهم أي شي يقضون وقتهم فيه

ومثل العاده معه عود وجالس يرسم به على الأرض إلى ان حس ان الدنيا ضاقت عليه فقرر انه

يروح يطلب أكل من المطعم لعل وعسى انه يوسع صدره << قد شفتوا احد يوسع صدره بالأكل

المهم اتجه إلى داخل البيت ...

لحظه لحظه أشوف فيه واحد ما انتبه مع القصه عن اذنكم دقيقه

تعال يا بطل تعال يتقدم احد الطلاب وهو حاط اصبعه في خشمه وقلت له ممكن تقولي وش اسمك ؟

قال انا اسمي حتروش قلت له عاشت الأسامي ممكن تقولي يا حتروشي ليش ما انتبهت معي وانا اشرح ؟

قال حتروش بسيطه لأنك يا استاذ ما قلت لنا منهو دحيم ذا ؟ فقلت له معك حق والله تستاهل درجه على سؤالك ذا

دحيم شاب متوسط بالعمر عمره 21 سنه وهو شاب مثل أي شاب سعودي دلخ فاهي ما يفرق بين ابوه وبين عمه منصور

قال حتروش ليش ما يفرق ؟ قلت وليش انت واقف عندي لين ألحين وراى ما رجعت لكرسيك ؟؟ يالله انقلع مخصوم منك 3 درجات

من المشاركه رجع حتروش وهو يتحلطم ويتبرطم وجلس بكرسيه وأكملت كلامي

وقلت دحيم كان ما يفرق بين ابوه وعمه لأنهم توأم ويتشابهون . المهم مالكم بالطويله

اتجه دحيم للتلفون يبي يكلم المطعم يطلب شي خفيف ياكله وأول مارفع السماعه سمع صوت وحده

تتكلم وتقول والله يا حياتي اني حاولت بس ماقدرت . قال دحيم في نفسه ياليل هذي اختي سوير

وصديقتها يسولفون مافيه امل ينتهون قبل ثلاث ساعات

وقبل ما يقفل السماعه سمع صوت على السماعه يقول وليه ياعمري ما تقدرين اصبري شوي بس

انتبه دحيم ان صوت اخته تغير وصار صوت ذكوري

وقال في نفسه الله ما أمدى اختي تبلغ في يوم وليله وقاطعه صوت البنت وهي تقول

صدقني يابو دحيم راح احاول هنا قام دحيم يفرك عيونه علشان يصدق << توه شايف افلام كرتون

فعلا هذا صوت ابوه معقوله ابوه يغازل معقوله !! اوكي يتهور بس مو لهالدرجه اقل شي يفحط في البدايه !

أو يدمن لكن يغازل واااعيباااه بس << فيس عجوز تصيح

قطع السالفه صوت حتروش وهو رافع يده ويقول استاذ استاذ قلت له نعم يا حتروش

وش تبي ؟ قال الحين وش دخل هالقصه بالدرس ؟؟ قلت ووش دخلك انت؟ انا المدرس والا انت ؟

قال لا انت قلت أجل أنثبر مكانك ومخصوم منك سبع درجات وبعدين يالدلخ انا اعرفكم قال لا قلت

انتم تعرفوني قال لا قلت هذا اسمه تقريب الطلاب من المدرسين باللين يعني اقص عليكم قصه

علشان نمون على بعض فهمت قال ايه قلت اجل انثبر ولا تقاطعني

المهم نكمل سالفتنا كان دحيم مازال ممسك بالسماعه ويسمع الي يدور بين ابوه والبنت وهو فاتح

اثمه وعيونه إلى ان سمع البنت تقول يأبو دحيم انت لك ثلاث سنوات متزوجني مسيار

وللحين مانت راضي تقول لأهلك اني زوجتك

قال ابوي يا حبيبتي والله لو الود ودي ان كان قلت لهم من زمان بس انتي عارفه ضروفي

خصوصا ان ام دحيم واطيه على غاربي

في هذي اللحظه فهم دحيم السالفه على غير عادته وعرف ان ابوه متزوج مسيار وقرر انه يستغل

الوضع في صالحه وبعد ما انتهت المكالمه راح دحيم لأبوه ...

قطع السالفه حتروش مره اخرى

وقال استاذ استاذ قلت وش تبي يا حتروش قال دحيم اتصل على المطعم والا لا ؟ قلت

له وانت وش يخصك قال لا بس حب استطلاع قلت ايه اتصل قال وش طلب ؟ قلت

ليه بتاكل معه ؟ قلا لا ما أبي احرم نفسي معرفة الطلب قلت على طاري الحرمان

تراك محروم من الإختبار بالعربي ساقط واسكت خلني اتم السالفه .

برب

[كحيــــلان]

راح دحيم لأبوه وقال يباااااااااه يبااااااااااااااه عطني فلوس قال ابوه انقلع شف ابوك بالمجلس انا عمك

منصور قال دحيم صدق اجل اسف على الإزعاج وبعدين الله يرحم والديكم علمونا بشي نفرق بينكم قال عمه خلاص هانت اليوم بنسكن بيتنا الجديد

قلت مبروك والله انا ما راح نفقدكم قال عمه اقول يا ورع اذلف لأبوك لأطب بطنك قال دحيم ورى الأخلاق شانت ؟

قال اقول يالله فارقني قال دحيم ان شاء الله وراح لأبوه بالمجلس الي كان للحين حط التلفون بحظنه

ومبتسم وكان يناظر سقف البيت قال دحيم مسيك بالخير ما رد ابوه قال دحيم ياهوووه

يابوالشباب يالشايب رد علي

التفت عليه ابوه وقال انت ما تستحي على وجهك تقول لأبوك ذا الكلام والله ان ما عقلت لأقطع ذا العقال على مقفاك

قال دحيم يبه فيه سؤال محيرني وابي جواب قال ابوه وش تبي وفلوس مانيب معطيك لو تحب سابع

سماء

قال دحيم إيه نشوف قال ابوه وش تقول قال دحيم ولا شي قال ابوه اشوى والحين وش تبي

خلصني قال دحيم منهي الي كنت تكلمها قبل شوي ؟

انقلب لون ابو دحيم لجميع الالوان لدرجة ان قوس قوزح طلع فيه وقال هـ... وشـ... مـ.. قال

دحيم وشو وش تقولقال ابوه و...وش دراك قال دحيم سمعت كل شي قال

ابوه تكفى يا دحيم لا تقول لأمك تكفى ياولدي قال دحيم وهو يناظر اظافره والله على حسب بتدلعني

سرك في بير مانتب مدلعني سرك بتلقاه في كل مكان وعلى كل لسان قال ابوه ابشر بالي

تبي بس تكفى لا تقول أحد قال دحيم وهو يفرك يديه هوى والله ما أقول لأحد بس ألحين ابي خمسين

ريال ماعندي بنزين قال ابوه خمسين بس خذ ميه بس انت بتسكت خذ دحيم الفلوس وراح عن ابوه

الي متورط وللحين ألوان قوس قزح بوجهه .

ومرت الايام ودحيم ما زال مستغل ابوه لدرجة انه خذ سيارت ابوه الهايلكس وراح يدور هو واخوياه عليها

وبعد نصف ساعه من اخذ دحيم للهايلكس وصلت رساله لأبوه من ساهر تفيد ان عليه قسيمه ثم

تبعتها ثانيه وثالثه إلى ان مل الشايب وقرر انه يسوي شي يفكه من شر دحيم فراح لأبو عبيد صديقه

وقاله السالفه كلها وقال ابو عبيد ولله للأسف يابو دحيم ما أقدر أساعدك قال ابو دحيم وليه

ما تقدر تكفى انا طالبك يابو عبيد شفلي حل قال ابو عبيد والله ودي لكن الحل فيه ضرر لولدك دحيم

قال ابو دحيم تكفى لا تقول انك تبي تذبحه قال ابو عبيد فاضي لك انا يجيني اعدام بسبب ولدك الخايس

قال ابو دحيم اجل وش بتسوي به ؟ قال اسمع مالك الا حل واحد قال ابودحيم وشو تكفى

الحقني به

يا حتروش نزل يدك لأكسرها لك

قال حتروش استاذ تكفى استاذ قلت معصي ما ابيك تسألني قال موب سؤال بس طلب قلت وشو قال كفى خلني اختبر قلت معصي

ما فيه انطق واسمع السالفه المهم .
قال ابو عبيد مافيه الا تدخله مستشفى المجانين قال ابو دحيم كيف ؟ قال ابو عبيد بسيطه نتبلى عليه ونطلب من مستشفى شهار ياخذونه

قال ابو دحيم وشلون ؟ قال ابو عبيد انا اعلمك قاطعهم صوت رساله فطلع ابو عبيد جواله وناظره شوي وقال الرساله مهيب عندي

أكيد انها عندك قال ابو دحيم غريبه من الي مرسلي فتح الرساله وحصلها من ساهر وفال الله لا يبارك فيك من ولد رابع قسيمه تاخذها اليوم

قال ابوعبيد ماعليك انا اتصرف اخذ التلفون واتصل على رقم ولما رد قال الو مستشفى شهار ؟ الله

يحيك . اخوي بس حبيت ابلغ على مجنون عندنا بالحاره بهذلنا يدخل على بيوتنا ويكسر قزاز

سياراتنا وذاك اليوم شاب في بقالة الحاره

رفع ابودحيم عيونه وهو منهبل ولما شافه ابو عبيد طلع لسانه وغمز بعيونه ثم قال

ولازم نجي نتم هالإجراءات . ايه ايه ابوه يبي يدخله عندكم . وشلون . خلاص خلاص جاينكم بكره ان شاء الله

وسكر السماعه وقال يالله يابو دحيم تولم بكره بنروح لمستشفى شهار علشان نتم الإجراءات قال ابو دحيم ان شاء الله والله يستر

في الصباح ركب ابو دحيم مع ابو عبيد لأن سيارته للحين مع دحيم ولما شغل جواله وصلته ثلاث رسايل من ساهر

وانطلق ابو عبيد لمستشفى شهار وكملوا الإجراءات ورجعوا ولما دخل ابو دحيم البيت حصل دحيم متشقق من الفرحه وهو يقول قسم اني خليتك مشهور

قال ابوه وشلون قال دحيم امس لقيت راعي باص يصور ومريت من عنده سبع مرات وصورني بس للأسف ما أدري على أي قناة بيعرضونها لأن الباص كان بدون طبعه

قال ابوه هذا ساهر الله يا... يهديك قال دحيم والله ما دريت انك تعرفه والا ان كان وقفت وعزمته ولزمت عليه

قال ابوه الجايات اكثر وبهالحظه سمعوا صوت اسعاف وقال ابو دحيم لولده ياولدي انت متغير علي ماش منتب دحيم الي اعرفه


قال دحيم لا متغير ولا شي انا هو انا قال ابوه ايه يمكن من الثوب افصخه خلني اشوف فصخ دحيم الثوب وقال ابوه لا ماش وسمعوا صوت الجرس وقال ابودحيم لولده افصخ فنيلتك وصروالك إلين ارجعلك فصخ دحيم ملابسه وما باقي يستره الا السناوي رجع عليه ابوه وهو ضايق صدره وقال دحيم تكفى ياولدي شف الإسعاف عند الباب رح دلهم على بيت ابو عبيد ...

حتروش شايفك رافع يدك بس ما ابيك تتكلم المهم

قال دحيم لبوه رح انت يباه انا ماعلي ملابس قال ابوه ياولدي انا توني جاي وتعبان رح

انت قال دحيم طيب خلاص بلبس ملابسي قال ابوه ما يحتاج ياولدي اهم شي رح انقذ

الرجال وبعدها فكر بلبسك وبعدين هم بيعطونك لبس من عندهم قال دحيم صدق اجل يالله انا

بروح طلع دحيم وقال ابوه في الي ما يحفظك

طلع دحيم بالسناوي

ومسكهوه اثنين ولبسوه لبس المجانين وقال دحيم يا حبيلكم تبون تستروني بس على الأقل عدلو البالطو ليش قالبينه

ثم قال يالله يارفيق امش سيده ولف مع اول لفه يمين انا ادلك على بيت ابو عبيد مشى السواق لكن للأسف ماراحت لبيت ابوعبيد راحت لشهار .

انتهت القصه والحين الي عنده سؤال يتفضل كلكم اسألوا الا حتروش ما رفع احد يده وقلت ممتاز يعني فاهمين الدرس

يالله الحين كل واحد يكتب لي الي استفاده من القصه في ورقه ويعطينيها .

وبعد خمس دقايق جتني مجموعه من الأوراق وفتحت الأولى وحصلت مكتوب :

1- إذا كان ضايق صدرك وحاس بملل لا تفكر انك تطلب من المطعم لأن يمكن يصير لك مثل الي صار لدحيم وتروح لمستشفى شهار

(( هذا متحمس مع القصه بقوه ))

فتحت الورقه الثانيه وحصلت مكتوب :

2- إذا حصلت باص يصور في الشارع وقف عنده وقله اقلط عند ابو دحيم لأنه يقول انه يعرفك
(( اكتشفت ان الورقه هذي جايه من عربجي الفصل ))

فتحت الورقه الثالثه وحصلت مكتوب :

3- استاذ اروح للحمام (( حتروش ))

رميت الورقه وفتحت الورقه الي بعدها وحصلت مكتوب :

4- اذا مسكت على ابوك شي فأول شي تسويه تعرف على اصدقاء ابوك وان كان فيهم احد اسمه ابو عبيد خله يقطع علاقته معه

(( منقهر من ابو عبيد ))

فتحت الورقه الأخيره وحصلت مكتوب :

5- الزواج موب عيب والمسيار هذا دخيل على المجتمع وصدقني المره ماراح تزعل إذا تزوجت عليها بس بشرط تكون عادل في كل شيء
(( الورقه هذي من مطوع الفصل ))

نزلت الورقه وانا اضحك ثم سمعت صوت الباب يطق وقلت تفضل فتح المدير الباب وقال لإثنين معه هذا هو قال واحد منهم دحيم

وش مطلعك من المستشفى هاه يالله تعال بنرجع لمستشفى شهار

تمت

[طـحـطـوح]

ههههههههههههه

والله قصه حلوه اما النشبه حترووش فله im22
لاهنت يا كحيلان مبدع

[كحيــــلان]

حرك تبلش


دومات الضحكه يالبى العرب بس لاتزعج امي <<<وراه امك نايمه بالموضوع هههههههههههههه



ايه نشبه حتروش هع هع



منورني

[طـحـطـوح]

^
^
^
لا تزعج امك ثم تسوقك بالفنجال im22