يا من لعيـنٍ فـي محاجيرهـا شـوك
والقلب بـه عـن لـذة النـوم تكـاك
لا دك فـي قلبـي مـن الهـم داكـوك
جاوبـت طربـان الحمايـم والاديـاك
عزي لحالك يـا عزيـز وانـا ابـوك
كان الزمـان اللـي وطانـي توطـاك
امشـي وكنـي يـا عزيـز بتـابـوك
في حبس جبارٍ تحـت حكـم الاتـراك
على عشيـرٍ دونـه البـاب مصكـوك
مـا غيـر امـره واتـعـداه مـنـاك
بابٍ وراه حروس مـا هـو بمفكـوك
ومبـرزٍ دونــه مكـايـن وشـبـاك
وبقيت انا في حضرة الوقـت مملـوك
دولـة زمـانٍ بيـن جـاك وتـعـداك
افهـم وصاتـي ياعزيـز وانـا بـوك
دامـك صغيـر وغايـة العلـم يقـراك
تـراه مـا ينفعـك خالـك ولا خـوك
لا صار مـا تقضـي لزومـك بيمنـاك
وربعك الى بان الخلـل فيـك عافـوك
اقرب قريبٍ لـك مـن النـاس يشنـاك
ان كثر مالك صدقـوا لـك وطاعـوك
وان قل مـا بيديـك شانـت سجايـاك
لو تطلب الما عندهم كان مـا اسقـوك
ابعد مـزارك عـن وطنهـم ومربـاك
ان جاد حظـك صدقـوا لـك وزاروك
وان بار كـلٍ مـا يبـي غيـر فرقـاك
والى اعترض لك من صروف النياصوك
كـلٍ تبـرا منـك مـا هـوب ويــاك
وهراجة المجلـس الـى جيـت وروك
منـازل تـطـرب نظـيـرك بدنـيـاك
والى قضـوا منـك اللـوازم وخلـوك
تفرقوا وانت احتمـل كـل مـا جـاك
كنـك سـراج البيـت للنـور شبـوك
والى قضى الوارد حدا الربـع طفـاك
والا كمـا ليمونـة الحمـض مصـوك
والى قضى منه الطعـم فرغـوا لـذاك
واللي يجي من رفقته ريـب وشكـوك
احـذر عنـه ليـاك تصـدق بمسـراك
والى جفوك اهل الوطـن واستخفـوك
قلّـع غريسـك منـه واهـدم ركايـاك
تراك لو تنجع علـى الرجـل صعلـوك
احسن من اللي تلتجـي لـه وياطـاك
عطهم وضيفهـم الـى منهـم جـوك
وغلّـق ضميـرك لا تعلـم بقصـيـاك
وخدمتك شيـخٍ كنـك العبـد مملـوك
يامرك فيمـا يشتهـي وانـت ينهـاك
اعرف تـراك مبرقـعٍ منـه مشبـوك
حدّرك في حبـل المهالـك ولا ارقـاك
واصحا لخـلان الرخـا لـو تغالـوك
اعرف ترى اطيبهم الى احتجت يجفـاك
كنك خوي مقيـط دهـووك واغـووك
وحقك عطاك رشـاك واقفـى وخـلاك
واحذر عن العيله ترى الحـق مـدروك
مثـل العمـل يـدرك مـا منـه فكـاك
وان كان عدوانك على الضيق حـدوك
اخصـم طلابتهـم بعجفـاك وقــداك
وان كانهم لمشـرّف الحـق ماشـوك
ناظـر مطاليـع الفـرج قبـل مبـداك
وان طوعوا شيطان الانفـس وهانـوك
فاصبر على البلـوى ودفنـت رزايـاك
زرهـم تـراك الـى توانـيـت زاروك
امـا بديـت بصاحـب السـو يبـداك
مادامهـم ماطاوعـوا لـك وعرفـوك
اضرب على الكايد الى عمسـت اريـاك
لو هذبـوك مـن المصايـب وضـدوك
مـا يذبحونـك قبـل تدنـي منـايـاك
واحلم عن الجاهل ترى الحلم مبـروك
وقم للضعيف اللي من الضيـم ينخـاك
وادمح خطا جيران بيتـك الـى اوذوك
ترى القصير وحرمـة الجـار بحمـاك
عطهم رواتـب حقهـم لـو تناسـوك
في كـل مـا يصلـح لدينـك ودنيـاك
وقم للضيوف الى عنوا لـك وضافـوك
اغلـى كرامتهـم حجاجـك وبشـراك
واعرف ترى ما لك من الضيف مشروك
لـولاه يطلـب حاجتـه فيـك ماجـاك
وقم للرجال ان ريعـوا لـك وحبـوك
واحشم خويك واكرمـه عنـد ملفـاك
والى اعتبرت بسيـرة النـاس كفـوك
مـا كثـر مـن شـي تعبتـه وعنـاك
ولا تبـات بهـم دنـيـاك مضـنـوك
ما طاب لـك مـادام لـك وافتهـم ذاك
لو يطلبون اخفايك الناس مـا اخفـوك
والرجل مثل النجم فـي كـل الافـلاك
وصلاة ربـي عـد الاوراق والشـوك
مـا نـاض بـراق ومـا هـل سفـاك
على الذي ما فيـه ريـب ولا شكـوك
محـمـد مــادك بالقـلـب دكــاك
مواقع النشر (المفضلة)