تجربه : [ العُمر بعدك يـآيٌمه .. ماني محتاااجه ]
بسم الله الرحمن الرحيم ..
صباحكم / مسائكم خير .. يا أهل الزين ...
بصراحه ترددت كثير قبل لا أعرض تجربتي عليكم ..
لانها راح تنقض جروح وهموووم علىآ قلبي ..
الا أني آبغى الكل يستفيد .. واللي ماعرف قيمه الام .. يتدارك نفسه من الحين ..
بالاضافه الىآ أن تجربتي تبين لكم ان الله مايخيب محتاج ولا يرد ضعيف ..
بدأت معانات والدتي ( رحمها الله ) مع المرض من 3 سنين + سنه ماكانوا الاطباء يدرون وش فيها ..
كانت تعاني من خمول وزياده كبيره بالوزن وآستفراغ
والتحاليل كانت تقول كل شي سليم
مره فيه تهيج بالمعده .. ومره آرتجاع في فم المعده ..
ومره جرثومه .. وعلى هالحال لمدهـ سنه ..
الا يوم من الايام الفجر .. تكلمها اختي ماترد عليها .. وهي على سريرها ..
ركضت مفجوعه لآبوي وكانت تبكي ..
يبه الحق على امي ماتتكلم ..
اتصل ابوي فورا علىآ الاسعاف وتم نقلها للمستشفىآ ..
بعد ثواني من دخولها لقسم الطوارئ ..
جاي الدكتور لآبوي وكان كلامه ..
[ وقع على العمليه .. زوجتك معها فشل كلوي ولازم نسوي لها القسطره للغسيل الدموي ]
كان الخبر مثل الصاعقه علىآ البيت كله ..
ومن اول جلسه غسيل .. تم سحب 15 لتر من الماء
فكرنا نشتري لها كليه لكن اكبر الدكاتره بالرياض مانصحونا بالسفر للخارج
وان الزراعه بالسعوديه متطوره لابعد الحدود ..
أقتنعنا بكلامهم وتمت عمليه التحاليل بـِ مستشفى الملك فيصل التخصصي ومركز الابحاث ..
بيني انا وبين اخوي اللي اكبر مني ..
وكلنا وقتها طابقنا للوالده رحمه الله عليها بالدم والفصيله والانسجه ..
كان الخيار من والدي ان اخوي اللي يتمم هالخطوه بدالي ..
لاني بنت والخوف علي اكثر ..
كملت التحاليل وطولت لفتره مو معقوله ..
تقريبا سنه ..!!
وأخيرا .. تم تحديد يوم العمليه ..
سافر اخوي وامي قبل العمليه بأسبوع للاجراءت الباقيه ..
بعدها بكم يوم طق الباب على ابوي وقالي :
جهزوا اغرضكم بنمشي الصبح ..
آستغربت كلام الوالد مع ان المفروض نلحق فيهم قبل العمليه بيوم ..
قلت ليش يبه عسىآ ماشر ..
قال : الغوا العمليه ..!!!
آكتشف الدكتور الجراح ان اخوك عنده عيب خلقي في عروق الكليه ..
يعني لو تم آستأصالها راح يكون هناك ضغط على الكليه الثانيه
وراح تفشل كليه اخوك ..
آحنا بنروح نشوف امك لانها مره تعبانه نفسيتها من الخبر ..
وهناك ربك يحلها ..
وقتها كلنا متفاجئين وكانت حالتنا مايعلم فيها الا رب العالمين ..
رحنا هناك وشفنا الوضع وكان حال امي مايطمن ..
كل ماقلت ولا يهمك يالغاليه انا بروح بكرا اكمل تحاليلي ..
انا مطابقه لك بكل شي يعني ماراح ياخذ وقت ان شاء الله ...
كانت تبكي بحرقه وتقولي لا خلاص مابي شي ..
زراعه مابي ارزع .. ولا والواحد يتعشم وبعدها يردونه ..
كانت معارضه فكره اني اكمل تحاليلي لانها خايفه علي كثير ..
اقنعها ابوي وقتها ورحت للمستشفىآ ..
كملت تحاليلي .. وتم رفضي 3 مرات ..
وكلها كان بسبب ارتفاع بالضغط .. خضعت لقياس الضغط 24 ساعه ...
وهو عباره عن جهاز ضغط يثبت باليد مع وصله صغيره يسجل قياسات الضغط طوال اليووم ..
اكتشف الدكتور ان ضغطي نفسي وليس مرضي .. يعني لما اتوتر واخاف يرتفع ..
المهم .. بعد ماطالت تحاليلي لمده سنه .. قبلوني كـ متبرعه ..
بعدها بفتره .. آتصل المستشفى على وقالوا ان المريض لازم يخضع لـ نوع من الغسيل وهذا الغسيل يكون مكثف قبل العمليه ..
لمده اسبوع كامل .. والجهاز هذا عطلان .. ولا راح تجي الصيانه الا بعد 5 شهور ..!!!
قلنا اوكي .. اللي صبرنا سنتين موب عجزان يصبرنا 5 شهور ..
بعد 3 شهور من هالكلام ..
تعبت والدتي وتم اكتشاف ان الكبد مصابه بفايروس C
بعد تعب عانته والدتي رحمها الله ..
الم في البطن وصفار مخيف في الجسم كل هذا يهون مع غيبوبه الكبد ..
بين فتره وفتره كانت تجيها هالغيبوبه وهي عباره عن فقدان السيطره على الاطراف + هذيان وكلام مو مفهوم + تشخيص مرعب في العيون ,,
مره جتها هالغيبوبه الساعه 9 باليل ..
حسيت بالاعراض على الخفيف وكان واحد من خواني عندي ..
ناديته برى وقعدت ابكي واقوله امي بدت تدخل الغيبوبه ..
طبعا ماكانت تدخلها على طول .. يعني ببدايه الموضوع تحس باللي حوالها وتدريجياً تبدا تخربط بالكلام .. وأي شي تمسكه يطيح من يدينها ..
او لما تكون واقفه تطيح بعدين تبدا عاد بالاغماء البسيط وشوي صاحيه وشوي موب صاحيه ..
اتصلت على ابوي كان وقتها معزوم برى البيت ..
قلت له تعال امي تعبانه ..
جاي ابوي ركض ولما شاف حالتها قال لازم تسوي الغسيل الكلوي قبل لا نسافر .. يعني ننتظر لين الساعه 7 الصبح والغسيل تخلص منه الساعه 11
لان الغسيل بالمستشفيات اللي بالرياض جداً صعب .. خصوصا لما يكون الشخص مو من اهل الرياض ..
صبرنا لين جت الساعه 11 الليل لكن حاله امي جدا ماتطمن ..
قررنا نمشي وربي راح يسهلها علينا ..
رحت انا واختي الكبيره معها وكان اخوي اللي يسوق فينا ..
وصلنا الرياض بعد ساعتين ونص والمفروض الوقت اللي نوصل فيه من 4 ساعات والا 4 ونص ...
دخلنا للمستشفى على طول .. وجلسنا بالانتظار الين الساعه 6 الصبح .. واحنا واصلين عندهم من الساعه 1 ونص ..
دخلنا قسم التحاليل وتم اخذ التحاليل وماشافنا الدكتور الا الساعه 3 الظهر ..!!!
بعد الواسطات وووو .....الخ ..
رضوا يغسلون لامي .. بعدها طلعنا لبيت خالتي .. وكانت امي معنا بـِ رُبع وعيها ..
تمت على هالحاله لمده اسبوع ..
مثل الطفل .. البسها وأأكلها واسوي لها كل شي ..
كنا نتناوب انا واختي .. وحده تنام ووحده تكون عندها والعكس ..
لين ربي عافاها لنا .. اكتشف الاطباء ان طريقه الغسيل اللي كانت تغسل فيها غير صحيه ..
يعني الدم مايصفى من الفضلات .. وهالشي مضر بصحتها ..
بعد هالكلام قرر ابوي ينقل امي للرياض تعيش هناك لين ماتتم عمليه الزراعه ..
خصوصا ان العمليه تأجلت لمده سنه حتى تتعالج من الفايروس اللي بالكبد ..
وجسلت هنالك لمده 6 شهور .. كانت تجي كل خميس وجمعه ..
هاليومن كانت بالنسبه لي انا وخواني احلى شي ..
من تجي لين تروح وحنا تحت رجولها ..
بعدها بفتره مو طويله .. تعبت عيونها وبعد المراجعات في مستشفى الملك خالد
قالوا ان العيون فيها مويه ولازم تسحب بعمليه ليزر ..
تعذبت امي الله يرحمها بهالعمليات .. كانت عيونها تألمها ..
وبعد ماتمت الحمد لله العمليه بالثنتين .. جاي هم الاهتمام فيها .. التعقيم والقطرات لازم بوقتها ووووو....الخ ..
جلست الاحوال مستقره تقريبا 3 شهور .. كانت صحتها عالي العال .. ومرتاحه ..
الا ان بعدها عن عيالها وبيتها مسبب لها تعب نفسي ..
كانت لما تجي ترجع نوقف كلنا علىآ الباب نودعها ... ننتظر يوم الاربعاء عشان نشوفها ثاني مرهـ ..
كنت حاطه لها وضع بجوالي لما تتصل علي بأي وقت يكون هزاز حتىآ لو كنت نايمه ..
وللحين هالوضع موجود بجوالي .. ومستحيل احذفه او افكر احذف رقمها ..
كانت نغمتها .. ( آعيديني الى حضنك .. وضميني الىآ صدرك .. سأبقىآ ان تمادىآ الوقت .. طفلاً نام في حِجرك .. )
آنشوده أسامه السلمان ..
كانت آمي طفلتي من مرضت .. آحس داايم انها بنتي مو انا اللي بنتها ..
حنوونه وطيبه .. وكل الناس عندها مثل بعض .. تحبهم ولا تصدق فيهم ..
بعد هـ 3 شهور .. اللي هي قبل وفاتها بـِ آسبوعين ...
طلع فيها ناسور في مكان حرج جداً ...
ماكانت تقدر تتحرك ولا تجلس ولا شي .. كان همها كيف تركب السياره لما تجي تروح لمركز الغسيل ..
كنت معاها .. تبكي هي من الالم .. وانا ابكي من قله الحيله ..
لين ماكملت أسبوع وبعدها ماقدرت تتحمل الالم .. كلمت ابوي وقلت له كل اللي صار ..
وصل فوورا على الرياض وكان وجه امي مرره تعبان .. وصلت لمرحله مو قادره تتحرك من الالم ..
وقفت ادويتها والملينات حتىآ ماتحتاج تروح لدورات المياه ( عزكم الله ) ...
دبر ابوي اموره حتىآ يتم نقلها للمستشفىآ بأقرب وقت ..
والحمد لله تسهلت الامور وتم نقلها بسياره الاسعاف لمسستشفىآ قوىآ الامن ..
جلسنا في قسم الطوارئ يوم كاامل .. لكن وقتها حطوا لها مسكن بالوريد ونااااامت مثل الطفل ..
كنت اناظر فيها واحمد لله لاني من اسبوع ماشفت هالنومه ..
نمت علىآ الكرسي جنبها وكنت كل شوي اتنبه لها اخاف تحتاج شي ..
وهي يااعمري مو حااسه باللي حولها .. ماصدقت يخف الالم وقدرت تنام مرتاحه ..
من بكرا .. نقلونا علىآ قسم الجراحه وقرروا عمليه علىآ طووول .. صوموها عشان العمليه ..
جا الصبح وقالوا انتظروا لين الظهر .. وانتظرنا ليييين ماجا المغرب .. واخذوها لغرفه العمليات ..
كنت برىآ الغرفه وانتظر على احر من الجمر .. بعد ساعه ونص .. نادتني الممرضه وقالت تعالي ..
خلاص ماما صحت .. ركضت وانا ما ادري عن نفسي وجلست ابوس راسها ..
قالت لي : ياأمي رجولي ما احس فيها .. قلت : عادي يالغاليه من البنج ..
جسلت اسوي لها مساج لين ما انتهت فتره الافاقه وطلعنا لقسم التنويم ..
كان على بالي انها بس هالعمليه .. وخلاص .. اثاري ابوي موصي الدكاتره مايقولون لي شي ..
لان معاي انخفاض بالضغط وممكن يصير لي شي وانا لحالي ..بعد هالعمليه بيوم اخذوها لغرفه العمليات مره ثانيه ..!!
استغربت .. كنت اصبر روحي واقول ان امي بخير ومافيها شي ..
بعد العمليه الثانيه .. كانت شبه غيبوبه ..
ولما سألت الدكتور قالي : هذي أثر أبره الظهر حقت البنج .. لان والدلتك ماراح تتحمل الالم ..
من بعدها وانا قلبي معورني .. وكنت اكلم اختي الكبيره وهي بعيده عني وابكي ..
كنت اقولها انا تعبت نفسياً ابي احد معي ما اقدر لحالي .. كوني اصغر البنات ولا اقدر اتخيل اني اتحمل المسؤليه هالكثر ..
كلمت اختي ابوي وقالت له لازم اخوي يجي ياخذ وحده منهم ..
ومن صلااه العِشاء بعد ما انتهت الزياره سافر هناك .. ولما جا من بكرا المغرب وهو موجود بالمستشفىآ مع اختي اللي اكبر مني ..
كنت جداً مرهقه وتعبانه خصوصاً ان تأجلت العمليه الثالثه لامي لان جاها نزيف واحتاجت نقل دم .. رحت وتبرعت انا واخوي ..
سلمت على امي وكأني حاسه اني ماراح اشوفها مره ثانيه ..
دمعت عيوني وانا عيني في عينها .. قلت : تدرين انك اغلىآ ماخلق ربي .. الله لا يحرميني منك ..
بستها مع راسها واخذت جوالها عشان اشحنه لان بطاريته فاضيه ..
قلت اشوفك بكرا ان شاء الله .. سلمت على اختي وطلعت .. رحت لبيت خالتي وكان وقتها تقريبا 8 ونص ..
سلمت عليها وعلى بنت خالتي .. قلت عن اذنكم انا بروح انام لاني جداً تعبانه .. طلعت للغرفه وحطيت جوال امي بالشاحن ونمت ..
ماصحيت والا واختي تقومني الساعه 3 الفجر .. طالعت فيها ووجها احمر من البكىآ ..
قالت قومي عشان تروحين لامي .. آمي تعبت ودخلوها العنايه المركزهـ ..
آستغربت كلامه خصوصا ان العنايه مافيها مرافق .. رجعت حطيت راسي ع المخده وانا افكر بكلامها ..
قالت قومي ابوي يبيك ..!!! بدلت ملابسي ودخل ابوي علي وانا بغرفه بنت خالتي ..
قال : جهزوا اغراضكم عشان نمشي بعد شوي .......
قلت وامي ..!!! ..
قال يعني مافهمتيها ..
قلت : يبه قول انك تكذب .. صح يبه تكذب ..
قال : امك تطلبك الحل .. راحت للي ابرك من هالدنيا ..
وقتها انخفض الضغط عندي وأغمىآ علي .. صحيت واختي تبكي فوق راسي .. تقولي تكفين قووومي ما اقدر على هالتعب لحالي ..
جلست ابكي من الصدمه واحس اني للحين مو مصدقه ..
امي راحت ..! امي ماعاد اشوفها بهالدنيا ..
سرحت شوي باللي صار ولا طاحت عيني الا علىآ جوالها .. بكييييت بحرقه وانا اشاور لجوالها ..
قامت بنت خالتي وشالته عني .. وبعدها ابوي جلس بالرياض عشان ينقل الجنازه بالاسعاف ..
وانا واختي رحنا مع خالتي واخوي اخذ خالتي الثانيه بسيارته ..
وصلنا عند خواتي هناك وانا طول الطريق افكر بخواتي اللي للحين مادروا .. واخوي الصغير من يقوله ..!!
كنت بين الوعي واللا وعي .. وبعد ماوصلنا الا اهل ابوي مجتمعين والكل داري الا اخوي الصغير كان نايم ..
قامت الناس تعزي وانا مشخصه عيوني ولا دمعه نزلت مني من الموقف واحس انه ابشع حلم ..
وصل ابوي بعد ماوصلنا بنص ساعه وقامت الناس تعزيه .. دخل علىآ اخوي الصغير وقام يمهد له لين ماوصل له الخبر ..
قام وركض برىآ البيت وهو مايشوف من الدموع اللي بعيونه .. لحقه اخوي ومسكه وحاول يهديه ..
لما جت الساعه 11ونص قالوا اللي بيروح يسلم عليها بالمغسله يجي ..
قمت وركبت اول وحده .. اقول بنفسي يمكن لا شفتها اصدق شوي ..
يمكن تطيب نفسي منها .. كان كل همي اني ابي اصدق .. استغفر الله .. احسه كذب ..
رحنا هناك ع المغسله وكنت ارجف واحس قلبي بيوقف من الخوف ..
انتظرنا شوي لانهم ماخلصوا .. نادونا انا واختي اللي كانت معاها وبنات عمي وخالتي الكبيره
قالوا تعالوا سلموا عليها ..
قبل لا ادخل سميت بالله .. ودخلت .. وقفت عندها وسلمت عليها .. بوست راسها وشفتها بالكفن الابيض ..
بعدنا دخلوا خواني وابوي وخالي وعيال خالي وعيال خالتي ...
بعضهم تمالك نفسه والاغلب ماقدروا .. كنت اسمع بكاهم من اول مادخلوا ..
اخر من سلم عليها ابوي .. وكانت كلمته ..
(( اللهم اني راضيٍ عنها فأرضىآ عنها يالله ))
بعدها نقلوها للمسجد وصلوا عليها وتم الدفن .. وخلصت ايام العزاء ..
من صدمتي .. مابكيت غير اول يوم .. وشهر كامل مانزلت دمعتي ..
حسيت اني متبلده .. ما احس بالي حولي .. خصوصا اني من اكثر خواني متعلقه فيها ( الله يرحمها )
من بعد هالشهر .. حسيت صدق بالفقدهـ .. بديت اتعب من كل النواحي ..
نفسياً وجسدياً .. وهالشي مستمر معاي للحظه هذي ..
حتىآ بعد مامر على هالموقف سنه و4 شهور ..
تجيني فترات اقول لنفسي لا امي ماماتت ..!!!
اختي تقول ياليت القيامه تقوم عشان نشوف امي ..
احس حياتي صارت هامش .. مافي شي يستاهل اني اتعب عشانه ..
راحت الاهم من هالدنيا كلها .. وش لي بالمهم ..
كل مناسبه تصير في بُعدها تقلب المواجع ..
لا العيد مثل عيد باقي الناس .. يوم شبكه اختي قلبنا الفرح بكىآ ..
نقول ياليت هي معنا ....
واللي زود هالهم هم ..
قبل اسبوع بالضبط .. اتصل رقم غريب علىآ اخوي اللي كان بـِ يتبرع لأمي الله يرحمها ..
وكان الحوار كـ التالي ...
الو ..
اخوي : هلا .. من معي ..
معاك منسق العمليات في مستشفىآ الملك فيصل التخصصي .. حبيت اقول ان المريضه / ......... تمت فتره علاجها من الفايروس ..
ياليت تجي عشان تكمل أجراءت الزراعه ...
أخوي : انا ولدها .. وآمي توفت الله يرحمها ..
المنسق : لا حول ولا قوه الا بالله .. انا اسف هذا الموجود بالكمبيوتر .. أعذرني وانا اخوك ..
أخوي : لا وش دعوه .. مشكور ماتقصر ..
المنسق : مع السلامه ..
اخوي : فمان الله ...
///
استغفر الله العلي العظيم .. اللهم لا اعتراض .. اللهم لا اعتراض ....
هالمكالمه مازادت احد بخير ..
صحيح ان مكانها فاضي الىآ يووم الدين .. ولا احد يقدر يعوض لو جزء بسيط من مكانها ..
الا ان هالشي كشف لنا ناس كانت قلوبهم على قلوبنا .. وهمهم من همنا ..
وناس بس جايه تسكت الموجودين بحضورها .. واسم اني سويت الواجب ..
اكيد ماراح انسىآ امي .. واللي يصبرني بهالشي .. انها ماتخليني بحلمي ..
لما اصحىآ من النوم وانا حلمانه فيها احس بفرحه طول اليوم ..
والحمد لله .. انا راضيه باللي كتبه ربي لها ..
وحزنها بيكون موجود طول ما انا موجوده علىآ قيد الحياهـ .....
::
اللـهـم اجعلها في بطن القبر مطمئنه ..وعند قيام الاشهاد أمنه ..
وبجود رضوانك واثقه وإلى أعلى درجاتك سابقه ...
اللـهـم إحمها تحت الارض واسترها يوم العرض ولا تخزها يوم يبعثون
"يوم لا ينفع مال ولا بنون إالا من أتي الله بقلب سليم"
اللـهـم املئ قبرها بالرضا والنور والفسحة والسرور ... اللـهـم اّنسها في وحدتها وفي وحشتها
وفي غربتها ... يارب العالمين ..
........ آنتهىآ ,,
..+
رد: تجربه : [ العُمر بعدك يـآيٌمه .. ماني محتاااجه ]
مواقع النشر (المفضلة)