الليلة برد ترتعش جدران هالغرفة، غياب !
مرني سحاب.. خلني بـ مطر صوتك .. أبلل لهفتي
خل الصبر ينبت وسط صحرا انتظاري .. انتظار !
الليلة خوف .. السما صاحت ألم برق ورعد
مرني وعد.. خذني لـ عيونك بس .. أملّي ناظري
وافتح شبابيك الفرح في مبسمي
خل الحزن يسري مع همس الشفق لأبعد ديار !
الليلة حلم .. سافر لك بـ رفة جفن
طول المسافة.. هم .. واللحظة سكون
مرني جنون .. خذني على أسيافك أبي أركض حفا
أبني من ترابك عمر .. حضن ووفا
أرقص على ضوّك قمر .. نجمة.. وبدونك انكسر !
ما للوله عندي اختيار !
الليلة سهر .. واحساس مرهق .. منكسر
أكتب لك بـ دمع الشعر جمر الكلام
مرني منام .. وخلني على صدرك أنام .. هدنّي التعب !
لملم بقايا الليل في جفن وهدب
خلني قريبة لـ مبسمك أحسب دقايق غربتي
في نبض قلبك .. دنيتي !
يـ اللي هواك .. أنت حكاية حب وأشواق ومرار
الليلة غير عن كل ليلة فـ كل شي
إلا ارتعاشي .. وبرد أطرافي ..
وخوفي والأنين اللي ملا بـ الهم جوفي
والسهر .. لما يشق الصبح ويغريني بـ فجر
يشرق أمل في ناظري وينكسر !
الليلة غير عن كل ليلة، فـ كل شي..
إلا شرودي.. ودمع عيني والوله
يا أنت يا آخر حنيني وأوّله !
كل شي غير.. إلا جنوني ولهفتي
إلا أنيني .. وغربتي
لما يفز وجهك من أحلامي ويسرقني فرح
ولما اقوم ومنت قدامي وصدري ينذبح !
الليلة ماهي غير لكن .. كنت ابيك أكثر
تصوّر .. كنت أحبك حيل
تدري .. كان شوقي غير أكثر !
أو أنا كل ليلة أحبك ؟
وانت تدري شكثر أحبك..
وانت تدري... وما تقدّر !
الليلة غير، عن كل ليلة فـ كل شي..
إلا هواي .. وإحساسي انك مو معاي
أو أنت دايم مو معاي !
وهذا عناي في كل ليلة .. برد وجنون وغياب
شباك يفضح وحدتي للريح.. لـ دموع السحاب !
وأنزف صبر
وأنزف صبر
مرني على غفلة عمر .. خذني غرام
وخلني على صدرك أنام .. هدنّي التعب !
مواقع النشر (المفضلة)