قصيدة انتهينااا
لعنبووو قصـة غـرام كـل ابوهـا كلمتيـن
ابتدينـا عنـد احبـك وانتهينـا عنـد بــاي
تـونـا مامشيـنـا فالـهـوى لوخطوتـيـن
وانتها الموضوع كله حتى مااعرف وش خطاي
وانتهت قصّة حياتي بكـل سهولـه تحكميـن
وين احبك؟وين اريدك؟وين ساكن في حشـاي
يمكن انـك ماوفيتـي يـوم جيتـي تعشقيـن
ويمكن انك تحسبينـي بتبعـك مـن دون راي
ويمكن اصلا ماعشقتـي بـس كنتـي تلعبيـن
ويمكن انك ماوصلتي فـي هـواك لمستـواي
ويمكن انـي ماعرفتـك فالحقيقـه وش تبيـن
ويمكن اني خنت نفسي..يوم اعطيتـك وفـاي
علمينـي فالهـوى ياجاهلـه وش تعرفـيـن
تعرفين انك غديتي (شي) يجـري فـي دمـاي
علمينـي فالعطـاء والتضحيـه وش تفهميـن
لعنبو.. حيك عشانـك بعـت اقـرب اقربـاي
كنت احطك في عيونـي تسرحيـن وتمرحيـن
كنت اشيل هموم قلبك وارمـي همومـي وراي
كنت اطير من السعاده يوم اشوفـك تضحكيـن
كنت ذايب في هواكي مثل سكر وسـط مـاي
كنت نايم فالعسل وارسم مـن الفرحـه سنيـن
كنت اظنك قلب عاشق ماسكن وسطـه سـواي
ماوعيت إلا و انتـي فـي خفوقـي تطعنيـن
ما وعيت إلا وسيفك بالحشا....رايـح وجـاي
وردة ايه والله ورده بـس عرفتـي تجرحيـن
كل شـي فينـي جريـح إلا فخامـة كبريـاي
ما تأثرت بغيابـك ويـش يعنـي دمعتيـن ؟
بكره انسى صدقيني .وارجـع بكامـل قـواي
ادري ان حنا افترقنـا بـس ابفهـم حاجتيـن
علميني وش كسبتـي وعلمينـي وش خطـاي
اصلا الموضـوع كلـه مـا تعـدى كلمتيـن
التقينـا عنـد احبـك وافترقنـا عنـد بــاي
رد مع اقتباس
مواقع النشر (المفضلة)