بسم الله الرحمن الرحيم

قصيدة سعيد بن مانع البراقع , اشعار سعيد بن مانع , شعر البراقع , ابيات من كلمات سعيد بن مانع القحطاني


البراقع عمرها ماغطت القلب وحنينه
والليالي عمرها ما غطت بروق السحايب
يا كثر ما جر صوت القلب بلحون الغبينة
وأنطرب دمعي وحوّل مع لحون القلب ذايب
خيّل الحظ وتركني يا الله انك لا تهينه
للظروف القاسية والوقت ويدين النشايب
يا العيون الناعسة يا أم المراميش السنينة
والله إن وقعك علي أشد من وقع الحدايب
لا تصدين النظر عني وتبدين السكينة
دامني أشوف في نظراتك أطراف اللهايب
ما قدرتي يا الحزينة.. في الهوى لا تظهرينه
دمعة المشتاق.. ما هي مثل دمعة عين تايب
لاحت الذكرى بعيني من لمحتك يالحزينة
وأبتسم من حيرتي وأقول: يا دنيا العجايب
كيف كنا نلتقي.. والسعد يرعانا بعينه؟
وكيف صرنا نلتقي.. وجروحنا حمر عطايب؟!
اختلف وجه الزمن واشحب وعقّد حاجبينه
كنت اشوفك حاضر وذا اليوم اشوفك بس غايب
ما نسيت العهد الأول لو بغيتي تنقضينه
حافظه حفظ الحواجب للعيون وللهدايب
تذكرين أيامنا والحب باقي تذكرينه؟
والبراءة يوم نسأل بعض وش معنى مصايب؟
وطبعة السجادة برسمات مكة والمدينة
وضحكنا وسط الركوع وهمسنا من خلف شايب
والشغب والبرقع اللي تلبسينه قبل حينه
يوم نضحك ما درينا أنه لفرقانا سبايب
لا تنسيك البراقع طاري الحب وسنينه
غطوة للوجه ما هي غطوة لشوق الحبايب