بسم الله الرحمن الرحيم

طريقة العناية باليدين , معلومات شامله عن اليدين


اليدين :



اول شي بقولكم
معروف انها واجهة كل انثى
تلفتني وتعجبني اي بنت مهتمه بيديها واعرف من خلالها انها مهتمه بأنوثتها
اما الي تهملها لو مهما تهتم في باقي اجزاء بشرتها مايقنعني اهتمامها
لأن جمال اليدين أحد رموز الأنوثه المهمه

راح اعطيكم معلومه عن اليد
تدرون ان كل مساحة انش باليد مليانه بشبكه من الاف اطراف الاعصاب ومركزه بالغالب
في رؤوس الأصابع وهي الي تعطي اليد الأحساس الشديد
يسيطر على اليدين 2 من اوسع مناطق الدماغ حيث تتحول الموجات الدماغيه لحركه يدويه
ربع مجموع عظام الجسم موجوده باليدين لحالهم تخيلوا بس
وباطن اليد يحتوي على اعلى نسبة الغدد العرقيه ومايجيها تصبغات اذا تعرضت للشمس

بس يافرحه ماتمت ماله دخل يعني لأنها قابله لاظهار علامات الشيخوخه المبكره
والجفاف والتجاعيد ( معروف انها بعد الوجه في معرفة عمر الأنسان )
والتهيج وهذا الشي الي يخلينا ننتبه اشد الانتباه في العنايه فيها

ليش يدينا تجف وتبقع بسرعه ويظهر عليها التجاعيد والمشاكل قبل اي جزء بالجسم ؟

هذا نتيجة البيئه السيئه والرطوبه المنخفظه مثل جو الرياض مثلا جاف
والتعرض للشمس بكثره بدون استخدام للواقعي والغسيل المتكرر والمنظفات القاسيه او الكيماويه
او الكريمات الكيماويه وكثرة ماسكات الحوامض والمالحه والمرطبات المعطره ورش العطور مباشره عالبشره واهمال الترطيب

اول شي راح استعرض كذا شي مهم جدا استخدامه كـ وقايه ومحافظه ع جمال يدينا ؟

بالنسبه للبنات الي يضطرون لغسل المواعين والملابس وغيره
اليابانيات والكوريات مافي اجمل من بشراتهم وخاصه اليدين وهم يعتمدون على انفسهم
لكن حريصين اشد الحرص لاحظوا ذكرت هالجنسيتين لأنهم أكثر جنسيه
يهتمون في بشراتهم ولا تجيني وحده شاطحه وتقول من الله ماقلنا شي كل شي من الله
بس اذا اهملتها بتخرب المواد المنظفه والكيماويه قادره انها تشوه سطح حصاة
فمابالكم بشره رقيقه !


اهم شي يابنات تضمنين انها سميكه وماتدخل المواد ليدك وتكون طويله لين الكوع
تقريبا نفس الي بالصوره ابتعدي عن القصيره


ثاني شي غسول يدك ضروري تبتعدين عن اي صوابين وغسولات تحتوي على مادة الصابون المدمره للبشره
غسولك لازم يكون كريمي وخالي من الصابون والعطور والافضل يكون ماركه طبيه مثل غسولي الي فوق من ماركة DUCRAY كريمي
( اعذروني تصوير جوال من حمامي الله يكرمكم للفايده كاميرتي طافيه )
لو اغسل يدي عشر مرات ماتنشف ماشاءالله وريحته تجنن من عطور طبيعيه ماتضر مو كيماويه
او اي ماركه طبيه المهم يكون خالي من الصابون والعطور والكيماويات المهيجه مثل الزيوت المعدنيه
او الالوان واحرصي انه يكون كريمي عشان يكون فيه نسبة ترطيب يحميها من الجفاف اثناء الغسيل

الواقي مهم مهم مهم للصبح اليد مثل الوجه معرضه كثير للأشعه الفوق البنفسجيه انتبهي

ابتعدي عن الفرك القاسي والمقشرات الخشنه لأنه راح يسببلك خطوط وخدوش بيدك مشوهه
وبرضوا جفاف والتهاب

كل ماغسلتي يدك رطبيها لاتخلينها جافه ابد ولما تطلعين خذي مرطبك معك

ولاتغسلين يدك بالمويا الحاره الافضل تكون فاتره مايله للبروده العاديه
لا تطولين بالاستحمام حاولي قد ماتقدرين ماتعرضينها للمويا فترات طويله

التقشير مهم اسبوعيا لأزالة الخلايا الميته وبعدها قناع يشد ويعيد الحياة لها عن طريق تنبيه الدوره الدمويه وتبقى شباب ولينه ونضره علطول
المقشر يفضل يكون مكوناته طبيعيه من البابايا او دقيق اللوز وزيت حبوب القمح
والأقنعه تحتوي على فيتامين C مثل البرتقال والليمون وبالمعقول لاتكثرين والبروتين

المكونات الأكثر افاده في كريمات اليدين ؟

1- اثبت ان فيتامين E يضاف بكثره لكريمات العنايه باليدين لانه يحميها من اضرار وتأثيرات الاشعه الفوق البنفسجيه
2- فيتامين C واثبت انه يلعب دور كبير في تعزيز انتاج الكولاجين وبذلك يعطي البشره القوه والليونه والمرونه الضروريه لمنع ظهور التجاعيد وعلامات الشيخوخه
3- فيتامين A هو اكثر فيتامين البشره ذكاء لانه يدفع الخلايا الصحيه للنمو وممكن ان يمنع سماكة البشره وجفافها
4- الزيوت النباتيه مهمه جدا في كريمات اليد لانها مغذيه بنفس الوقت وترطيبها عالي
مثل ( زيت الافوكادو والجوجوبا وزيت الزيتون )
5- برضوا الاعشاب مثل الخزامى والبابونج تواجدها في مكونات مرطب يدك يزيدها جمال ومضاد للتهيج والالتهاب
6- زبدة الشيا انا جربت زمان حقت كنوز الطبيعه فعلا خام ورائعه للامانه ماجربت غيرها
7-زيت الورد كمعطر ومرطب جميييل اذا تواجد في مكونات مرطب يدك انتبهي تحطينه لوحده ومباشر لأنه حااار حتى الكميه لازم تكون قليله لو تبخلطينه مع شي

بعض الوصفات لجمال يدينك :
نقعي يدينك بالبانوج الدافي
وسويلك مرطب مكون من زبدة شيا وزيت جوز الهند وفيتامين E ( او جيبي كبسولة فيتامين ايه وحده وخذي الي بداخلها )
وعتمديه كمرطب رائع يحييلك جمال يديك

وبرضوا جربي طريقتي
اخذ شوية لوشن سيتافيل مع زيت جلسرين من وادي نحل
واخلطهم بيدي وادهنها بس مو دايم يعني كل اربع ايام اسويها عشان ماتكتم المسام
وتطلع الحبوب لان زيت الجلسرين ترطيبه قوي مره
بالنسبه للوشن سيتافيل مااستغنى عنه يوميا وكل مااغسل يدي ادهن منه

معلومه مهمه جدا : فائدة الترطيب رقم 1 لجمال اليدين ومو كل كريمات الترطيب علاجيه !
المرطب الدسم والثقيل راح يرطب لك سطح البشره فقط لان صعب جدا تمتصها البشره بس راح تحمي بشرتك من الجفاف والتجاعيد
زي الواقي راح يحبس الزيت والرطوبه لبعض الوقت
اذا تبين علاج اغمسي يديك لدقائق عديده في زيت الزيتون الدافي راح يعطيها طراوه ويقوي الأظافر بعد