بسم الله الرحمن الرحيم

قصيدة ناصر القحطاني الحدود , اشعار محمد الاحمد السديري , شعر الحدود , ابيات من كلمات الشاعر ناصر القحطاني



(الحدود)

مع كل نسمه يا وطنّا تحيّه
و الله نحبك حب ما فيه قدّه
يا تاجنا اللي روسنا به قويّه
يا نبضنا اللي دمّنا دون حدّه
نستاهلك نورٍ ملا العين ضيّه
و نبنيك صرحٍ ما انخلق من يهدّه
لو عنك نحّتنا الليالي نحيّه
جيناك كلٍ زود شوقه يحدّه
كلّك دفا يا حضن نجد العذيّه
هي بس نجد اللي تزّف المودّه ؟
شف ثغر حايل شف هوا أبها البهيّه
شف غرّة الدمام شف كف جدّه
شف بيرقك و البرق و السامريّه
مجدٍ يلوح و لوحةٍ مستجدّه
شف حكمة الراعي و صدق الرعيّه
و الخير مقبل و الضغاين مصدّه
بحبوحةٍ من سلسبيلك هنيّه
يفرق بها التاريخ هزله و جدّه
يكفيك بيت الله و منزل نبيّه
و شرعٍ من كتاب الولي نستمدّه
أطعمك من جوع معبود البريّه
و أمنّك من خوف و فجيعه و شدّه
النفط من قبله يدينا ثريّه
من ينشد التاريخ يقنع بردّه
حنّا الوفا حنّا الكرم و الحميّه
حنّا هل التوحيد صدقٍ نعدّه
قربك و بعدك يا وطنّا قضيّه
و أنا من اللي قصّروا فيك مدّه
مناخك لحافي و رمضاك فيّه
و أقسى تضاريسك فراش و مخدّه
يا كم نشدت و رد ظنّي عليّه
عودٍ يَمَال الجنه أذكر مردّه
كان يحكي لي عن زمانه و غيّه
و يقول قلبك يا أبيض القلب لدّه
أيامكم يا بوك خضرٍ نديّه
ما عشتوا أيام الشقا و المكدّه
كنّا نمر الصايبه و الخطيّه
نزايعٍ ما بين روحه و ردّه
كنّا الى من دارت الشاذليّه
كلٍ يدوّر شرب فنجال ضدّه
كنّا نسوق الروح يم المنيّه
لأجل الرغيف اللي ضرينا بمدّه
و اللي خذينا الصبح يوخذ عشيّه
و لا نمسي إلا عقب ما نستردّه
نسمع من الهودج صياح الصبيّه
أم الجديل اللي لها من يكدّه
تنخى و نخوتها شبب كل هيّه
و تمنّي الصنديد باللي يودّه
لا نشف رمح و لا استراحت مطيّه
و لا تركنا سهلةٍ مجرهدّه
و اليوم أمان و شمس عزٍ جليّه
و الدار بين المبغضه و المودّه
بقى يوصّيني عليها و صيّه
لين جرحتني دمعته فوق خدّه
قلت اذكر الله و الحدود محميّه
ورث الفطين اللي حفظ ورث جدّه
حنّا لها ما دامت الروس حيّه
حنّا لها لو بيّح الموت سدّه
أي و الله طوال اليدين معصيّه
و أقصر يد اللي تهقويه يدّه
لعّل مالي غير داري هويّه
الورده اللي بالحشا مستبدّه
من يوم أنا طفلٍ عظامه طريّه
و أنا أرخي الحلم الطفولي و أشدّه
صغير ألوّح بالعلم في يديّه
حتى (نشيد بلادي) أمشي و أردّه
و الى لمحت البدلة العسكريّه
أقبض يدي و أرفع بهامي و أمدّه
و اليوم أغنّي للوطن سامريّه
و الروح تارك علمها دون حدّه