بسم الله الرحمن الرحيم

قصيدة تركي 2000 سلطان يعطي شي , اشعار تركي 2000 , شعر سلطان يعطي شي , ابيات من كلمات الشاعر تركي 2000


كريم يانو(ن)هبوبه تقوده
لي مدة(ن)وانا عيوني تراعيه
اكبر من الغربي ترازم رعوده
سيله حقاق والمخايل تباريه
اللي وطا حزم البلاد ونفوده
عقب المحل ماناش من عرق يحييه
ايام وسمه ماتجيك معدوده
ثابت على طول السنه من مناشيه
هتان ودان ذعاذيع نوده
تجلا هموم القلب والجرح تبريه
وليا سمك وبله وخيم ركوده
تفرح به البيدا وتروا ضواميه
فوق البسيطه ماتحدد حدوده
مافيه وادي غير تجري مجاريه
والعشب انواعه تلاعب وروده
طلعه سوا من مدلهم(ن)يساقيه
هذي هماليله وهذي شهوده
كل(ن)يرحب به وكل(ن)يحييه
هذاك سلطان السعد من جدوده
غيث(ن)على غيث(ن)يعافيه
ياراح قلنا الله علينا يعوده
من كثر حبه ود شعبه يخاويه
وليا رجع تباشروا في وجوده
شيخ(ن)وحنا برض البلاد لمواطيه
حنا تحت رايه وحنا جنوده
واعمارنا في ساحة الحرب تفديه
القايد اللي منبع الجود جوده
صار الكرم صرح(ن)للأمجاد بانيه
((خلو كرم حاتم))وماضي عهوده
سلطان يعطي شي حاتم مايعطيه
خيره على العالم عسا الله يزوده
لو جيت ابذكر ماتعدد حسانيه
وفاه وصلة لكل دوله وفوده
من مد كفه مايبا احد(ن)يكافيه
وليا قدح من نار فكره زنوده
رايه سديد وكل تايه يقديه
وليا بطش ضاعت روابع حسوده
من سطوته خصمه يضيع هقاويه
هداج تيماء اللي يصدر وروده
ياحي ابو خالد وياحي طاريه
كنت اتمنى وقفتي في وجوده
واليوم انا موجود مابين اياديه


::
:
:
:
وهذا هو رد شاعرنا الكبير مرزوق بن محمد الرمالي الشمري :

كريم ياقاف(ن)خذته البروده
وعلى صفا سلمى تحطم معانيه
قدام اجا غصب يتبخر صموده
ويصبح سراب(ن)بأوله لين تاليه
اصغر من اللي عن سمانا يذوده
يقفي وذعذاع الشمال متقفيه
ماينثني لأطماع نفس(ن)حقوده
ياصار راعيها الخطا من مباديه
نفسه عن الكايد عزوم(ن)شروده
والا على الذمه كبار(ن)هقاويه
حايل غنيه عن نفوس(ن)جحوده
وتركي يبي سب الاجاويد يغنيه
سيرة سجاح اليوم منه معيوده
متفرش(ن)نهجه ونهجه مغطيه
لو كان مسلم ماسجد مع سجوده
فرض الصلاة اللي نصلي يصليه
شرهاتنا بالطيب نثبت بنوده
والا الردي ماله علينا مشاريه
وتركي عطا الله قام يشعب قعوده

يبي كرم حاتم يشيله ويمحيه
اكرم رجل يوم الحبال معقوده
واطلق شنب يجري كرم مايجاريه
تركي جحد والا النبي جاب جوده
تركي طعن والمصطفى اللي مزكيه
يمكن يشيل جبال حايل لسوده
وطويق للصمان يرسي مراسيه
دامه لحاتم طي جند جنوده
ويمكن فرس حاتم هو اللي مذكيه
دام الكلام بلاش يبذل جهوده
شاعر وطن يالله عسا الله يخليه
شاعر وطن يبغى المشاعر يسوده
وعلى حساب الغير يبني مبانيه
نعم(ن)بحكام الجزيره واسوده
حكام تاخذ حق وافي وتعطيه
حكام عدو للمعالي سنوده
والكل منهم مانزل عن معاليه
الهرج ياجاهم تقيد قيوده
يطيب هرج الطيب بلسان راعيه
ال سعود احرار جو مهدوده
وسلطان منهم ماتردا مداليه
والسرد مايغني رجال(ن)سروده
لو مانسرد يعجبه سرده بشافيه


: