بسم الله الرحمن الرحيم

قصيدة غايب ولكن في الخافق مسجل حضور ٢٠١٤

غايب .. ولكن في الخافق مسجل حضور

معذور ياللي عن اسبابك حكى لي الغياب

عودتني ما تغيب وصرت عندي معذور

وصدق الاحساس خبرني بعذرك وصاب

مير البلا صاب قلبي في غيابك فتور

وصرت مثل الغريب اللي خذله السراب

أدري تدور الليالي .. في زمان .. يدور

وادري السعادة لها باب.. وللهم .. باب

ما كن ذيك الليالي.. اللي سقتني سرور

هي نفسها.. تملأ أكوابي.. بمر وعذاب

وما كن الايام ذيك اللي اسرعت في العبور

هي نفسها اللي تباطى في ثقل واكتئاب

وما كن حظي اللي اقفى في يدينه زهور

هو حظي اللي معي هالحين رث الثياب

يا من غيابه يحول لي الثواني شهور

وفي حضوره.. سنين تمر مر السحاب

طهور يا نور عيني من سقامك طهور

ولا عاد تبطي علينا.. يالغزال اللعوب

تاهت حروفي بغيابك وانكرتها السطور

وانا اللي اقدر ادون من حروفي كتاب

الله يجازي حنين .. هز قلبي الصبور

والله يجازيك ياقلبي الصبور الثواب

والله يسامحك.. يا ونة علينا.. تجور

والله يعينك على فرقاه .. يا بو الشباب

ياهاجسي هات ما عندك من اي البحور

اخرجني من الحزن والهم والاضطراب

واخمد براكين في قلبي من اجله تثور

ورجع البسمة اللي .. اقفت بزاد .. وشراب

تراني ارقب رجوع اللي مسجل حضور

بالرغم من غيبته .. وانا عدوي الغياب



صدى