رواية بكاء بلا دموع 2014 كاملة

[موكاتشينو]

الفصل الخامس الجزء 4


وصل ناصر للمطار وهو مشتت .. ما حب النظرة اللي كانت في عيون هدى شتقصد لما قالت له انها ضحت ؟؟ .. استرجع كلماتها في راسه مره ثانية

(( أنا ضحيت بحياتي وانت رافض تضحي بصديقك ؟؟ )) ..



ضحت بحياتها ؟؟ أي تضحية ؟ وكل هالضجة بسبب أنه رفض أنه يتخلى عن فايز في أكثر اللحظات اللي بيحتاجها فيه ؟ .. كل سنه يصيفون في اوروبا .. كل سنه !! .. يترك مصالحه ومشاغله عشانهم ويتقبل ثقل دم اخوانها وطلباتها المزعجة .. كل سنه !! .



كان فايز ينطره وابتسامه عريضه على وجهه .. سأل ناصر للمرة المليون

" قالت لك زوجتك أنهم قبلوا بي ؟؟ .. "

كان ناصر معصب فطلع صوت مبهم اكثر منه اجابه " هممم ..."

" انزين ماقالت لك متى العرس ؟؟ متى أشوفها ؟؟"

بطرف عيونه طالع ناصر لفايز وفجأة كل العصبية اختفت لما شاف نظرة غريبة على ملامح فايز .. شيء ماشافه من زمان .. الراحه !! .. ملامح فايز كانت مرتاحه ومبتسمه بطريقه ما يألفها .. قال بسخريه " لاتستعيل كأنك ياهل .. بس نوصل يصير خير .. "

ياهل .. بالضبط ملامح فايز في هاللحظة كأنه ياهل ناطر يروح الألعاب .. ورجع ناصر لأفكـاره أول ما جلس على مقعده في الطياره .. تذكر معجبه اللي قالت له عن موافقة أهل الريم المبدئية .. وسكرت التلفون بدون أي كلمة ثانية هل هو يظلمها ؟ ولا هي اللي تظلمه ؟



" شالسالفه ناصر من ييت المطار وانت في عالم ثاني في شيء ؟؟ "

حس ناصر أنه يخرب شعور فايز بالفرح فإبتسم وقال " أفكـر في قصة جديده نويت انشرها "



فجأة طق بيده على راسه " نسيت المقالات ! "



" أي مقالات ؟ "

" اللي كتبتها للجريده .. مب مشكله بذكر هدى تطرشهم فاكس لرئيس التحرير "



" اييه المقالات .. تدري .. أحيانا أنسى أنك كاتب لأنك ولامرة تكلمت معاي لا عن الكتب ولا عن الثقافة ولاحتى سألتني عن رأيي في كتاباتك "



حس ناصر بخيبه فايز وعتبه لكنه قال الحقيقة

" فايز .. أنا أهرب من كل شي لما أيي وأيلس معاك .. أهرب من الحروف والكتب والثقافة وكل شيء . ..أنت تعرف ان في مجالس ثقافية في بيتي كل شهر .. بس لما تتعب نفسيتي ما أفكر على طول اقص تذكره وانط هنا لعندك اغير جو أفضفض لك ..لاتظن أني مستعد أضيع معاك دقيقة في الكلام الخرابيط الل اكتبها .. ""



***********



كانت الريم طول اليوم منعزلة في الغرفة تفكـر .. هل بتتزوج ؟ معقولة ؟ .. شعور سيء لما الأنسان مايتوقع ابسط الحقوق لنفسه ..

دخلت البندري وهي متضايقه وعيونها حمرا

" وينج ؟"

طالعت لها الريم واستغربت النبرة المبحوحه

" أنا طول اليوم في غرفتي في شي ؟؟.. "



" انزين تعالي معاي للمستشفى .. أنا تعبانه "

" اوكي بس أغير ملابسي "



بدلت الريم ملابسها والبست نقابها وهي مستغربه من حالة البندري .. اسندت البندري وراحت مع جدها للمستشفى ،أول مرة تشفق الريم على البندري تقريبا هي وحيده ومحد يحبها !! .. حتى أبوها مب معطها أي اهتمام ..



بعد ساعتين من الانتظار طلعوا من المستشفى الريم وجدها بروحهم ..

قالت لجدها " الطبيب يقول اذا تحركت في خطر على حياة الجنين .. فإذا تبي هالحمل يثبت لازم تترقد .."

قال الجد مستغرب " لكنها في الشهر الثالث .. بتم ست شهور في المستشفى ؟"

" أعتقد أنها مابتتحمل .. "



قال الجد بلهجة آمرة " مالج شغل فيها .. بطرش الخدامة تجابلها .. لاتروحين لها وأذا حد قال لج غر هالحجي قولي لي "



" بس يا يدي حرام .. خل أكسب فيها ثواب "

" انتي وراج عرس إذا الله كتب .. أنا سألت عن الريال وعجبني اللي سمعته الكل يمدح بأخلاقه ..ورفيجي سأل عنه في مصر وسمعته هناك انه محترم وايد .. الله يكتب اللي فيه الخير يا بنيتي .. "



نزلت الريم راسها ..وتمت تفكر ف المجهول .. لكنها قررت في نفسها انها لازم تحفظ كرامتها قبل كل شي .. فكرت ف الشروط اللي وصلت لها .. مابتقول لحد غير الملا اللي بيجيبونه ..



" وين سرحت يالريم ؟ "



" سلامتك يدي ..بس أفكار لاتودي ولاتييب "



شغل جدها الراديو وكانت فيه اغنية لعبادي .. صكره جدها على طول لأنه مايحب الأغاني .. ..

" الله يقطع الزحمه .. بنتم ناطرين هنا لوقت طويل .."



طالعت الريم للسيارات عبر الدريشه مايهمها ان انطرت في الزحمة ..رغم انها بترتاح من ازعاج البندري لها في هالفترة لكنها آخر شي تبيه هو انه ترجع للبيت .. لأنها بترجع لوحدتها وحياتها الفاضية ..





*********



" يا حبيبي ..فديت عيونك ماما في المستشفى حبيبي .."

كانت شيخة تحاول كل جهدها أنها تهديء محمد اللي انتابته لحظة شوق لخلود .. شمس اوقفت بعيد تتفرج .. ببرود عجيب قهر شخه ونوير اللي يحاولون يهدون ف الولد .. وكل هالمأساة بدت بس لأن أمهم جوزة راحت الجمعية مع خالتهم معجبة وكان محمد نايم وماهان عليهم يصحونه ..

التفت نوير لشمس

" شمسه فديت روحج سوي شي .."

ردت ببرود

" آخذه لأمه ؟"



كان ردها صدمه لشيخه ونوير .. تموا يطالعونها مستغربين .. في هاللحظة دخلت جوزة ومعجبة وأول ماشافت جوزة حالة حمود اركضت ولمته متجاهله حالتها الصحية وعطته من الألعاب اللي يابتها وكأن جوزة بديل لخلود رضى محمد بشوفتها و نسى موال (( أبي أمي )) ,,





راحت شمس لغرفتها ودخلت معجبة لقسمها وتمت شيخه والنوري مع امهم علقت شيخه



" يمه شفيها هالمجنونه شمس ؟؟ و لا كأنه ولدها كأنه ولد الجيران !! ""



قالت جوزة بأبتسامه " بعد عرس الريم بتفرغ لها وأشوف شسالفتها "

صرخوا البنات (( عرس منو ؟))



" عرس الريم .. بنت خالتكم انخطبت أمس ويدها طلب مهله يفكر .. بس تقريبا هو موافق ماعنده مانع .. بس مجرد شكليات .."



ابتسمت شيخه ونوير .. قالت نوير " أخيرا !! .. عرس في بيتنا !! آخيرا بلبس فستان وأروح الصالون ؟ .. كنت أتمنى هالأشياء البسيطه ..خصوصا بعد مانبذونا اهلنا "



لكزت شيخه نوير بعد ماتغيرت ملامح جوزة .. مسكت جوزة محمد وخذته لغرفتها ونادت الخدامه تييب الأغراض التفت شيخه بسرعه للنوري " انت ماتستحين ؟؟ شالكلام اللي يضيق الخاطر ؟؟ امي ماصار لها أيام طلعت من المستشفى تبين تردينها له ؟ "

" اسم الله عليها بس انا ما قلت شي .."



طلعت شيخه لغرفتها وتمت نوير في الصالة مكتئبة جلست على السوفا وتمت تقلب في قنوات التلفزيون بدون تركيز ..



لنوير قصة خاصة فيها ... قصة ببساطه انتهت لما عرفت بنت جيرانهم ان اخوها يبي نوير زوجه له .. نوير ماكانت تحب أحد .. وبنت طريقها محدود من البيت للجامعه ..لكنها تفاجأت في يوم من الأيام ببنت جيرانهم ساره آل خليفه تدخل بيتهم وتهزأها وتطلب منها انها تبعد عن اخوها !! .. طبعا نوير كانت تحمد الله مية مرة ان محد كان في البيت في هذيك الحزة غيرها

(( هيه يا بنت الناس احترمي نفسك وابتعدي عن اخوي مانبي قربكم ولانبي نناسبكم .. احترمي عيوزكم و لاحنا من ثوبكم ولا انتم من ثوبنا .. ))



عصبت نوير وردت بقهر " ومن انتي ومن اخوج ومن سمح لج تدخلين هالبيت وتتطاولين علي بالحجي .. "



(( سحرت اخوي يالسحاره طيحتيه في حبالج من انتي ؟؟ انت ولاشيء !! لاتحلمين بـ خليفه آل خليفه !! تراه حلم شوفي لج حد من مستواج ولاتطالعين للعالي ترى بتنكسر رقبتج))



انقهرت نوير واغرورقت عيونها ولكنها قاومت دموعها وتنهدت وقالت بلهجه بارده (( اسمحي لي ..البيت يتعذرج ولاتحلمين في يوم اني بوافق على اخوج اذا طلبني بعد هالكلام اللي نطقتيه ,,ريحي قلبج والله يشهد اني لا اعرف اخوج ولاسحرته ..واسمحي لي مابقوم بواجب ضيافتك .. اعتقد انج تدلين الباب )) ..



تمت نوير واقفة مصدومه وطلعت البنت من هذي البنت ؟ ومن اخوها ؟ وليش تهجمت عليها في بيتها ؟؟ لكن نوير قررت انها تنسى ..لكن الأيام مارضت تنسيها لأن في الكورس اللي طاف انصدمت في أن هالبنت معاها في نفس المقرر فتجاهلتها نوير ..خليفه آل خليفه .. شتبي مني ؟؟ ومن وين تعرفني ؟ .. لكنها أسئله ماتحلم أنها بتلقى أجوبتها في يوم من الأيام ..



" وين أمي ؟"

صحت نوير من أفكارها على صوت ماجد " في الغرفه ..تبي شي ؟"

جلس ماجد جنبها وسألها " شفيج ؟"

حطت راسها في شليله

" الريم بنت خالتي انخطبت .."

ماعلق ماجد قرر يسكت وكملت نوير " وانا كنت فرحانه انه بتصير مناسبه نفرح فيها وقلت كلمه ضايقتها .."



مسح ماجد على شعرها بحنان وماعلق ..كان في داخله امواج من الافكار والمشاعر .. اكيد امه بتحقد عليه ..

"انزين يا حلوة ..اخوج يوعان شتحطين له ؟"

" الحين فديتك خسى الجوع .."

نطت نوير للمطبخ وتم ماجد يفكر ..يتمنى أنه سافر يبعد لين ينتهي موضوع الريم على خير ..لكن بيته كله حريم ..مايقدر يخليهم ويسافر وهالأيام الوضع صار يخرع يسمع من الشباب دايما عن مواقف عن عيال الحرام اللي يتهجمون على بنات خلق الله ويلحقونهم لين بيوتهم .. ابوه ترك له مسؤولية اربع بنات .. اللي تقدموا لهم لحد الحين مايناسبونهم ابدا ..خواته جامعيات وجميلات واخلاق .. كان مفتكر انه بزواج شمس ارتاح من همها لكنه للأسف ابتلش زياده .. صافية ونوير وشيخه الخطاب محدودين ..صج للحين خواته صغار .. بس الأيام تركض . لو عيال عمه مب مقاطعينه كان انحلت هالمشاكل .. باستثناء احمد اللي دايما معاه ..لكن عيال عمه نايف وسعد الكبار ولايعبرونه في كلمه ..بس هو مايرخص بخواته لأي كان .. نايف وسعد سمعتهم في المغازل والسفر معروفه مستحيل يبيع خواته برخيص علشان يرتاح من همهم لأشخاص مثل عيال عمه ..



رجعت نوير بيدها صينيه فيها فطاير وسلطه ودجاج بمايونيز

" الصبح امي مسويه هالفطاير روعه . . يلا سم بأسم الله واقهر جوعك "



"تسلم ايدين الغالية اللي سوتها ويعطيج العافية يا اختي على هالوجبه السنعه "



************

الفصل الخامس الجزء 5




مر اسبوع تم فيه كل شيء حسب الأصول ..ورد الجد على فايز بالموافقة وتمت الخطبة وقرروا يملجون في الوقت نفسه .. قرروا البنات انهم يسوون حفله للريم فجهزوا كل شيء ومعجبة كانت تآخذهم بالمشاوير وحجزت المصورة والصالون ووصت على الفستان من دبي ..



تكتمت الريم على اللي في قلبها من اسبوع والكل كان يحس بتوترها ..

قبل الملجه بيوم في المجلس العود كان ماجد وناصر وفايز وعبدالهادي وأبوه وابو طلال جالسين يتكلمون عن كل الترتيبات .. العرس بيكون محدود خاص بالعايله بس خصوصا ان فايز تقريبا ماله حد بهالبلد غير اصدقاءه وجيرانه اللي بيحضرون عرس الرياييل بس ..



الجد عجبته وايد شخصية فايز كان يحس انه ريال فاهم وعاقل وذكي .وفكر بطلب الريم فخذه على جنب لداخل وقال له " ياولدي لك الحق بالشوفه الشرعية . انطر هنا دقيقة انادي لك خطيبتك تفضل لهالمقلط .. "



دخل الجد كانت الريم تجلس مع شمس وهي متخوفه كانت طلبت من جدها انها تكلم فايز بروحهم قبل الملجة بعد ما سألها جدها عن رأيها .. وقررت أنها تلبس بدله حلوة .. طبعا لافتقار الريم لبدله مماثله احتاجت تستلف من شمس وحطت لها شمس شوي مكياج خفيف والبست شيلتها وغطت شعرها ..



دخل الجد وكان اول مرة يشوف الريم بهالجمال واعجبه اكثر انها كانت محتشمة .. قال لشمس اللي تجلس جنبها " يا بنتي بدخل خطيبها يشوفها وانا ساحبه بالخش لأني عارف عيالي مجانين يعتبرون الشوفه الشرعيه حرام وعيب فدخلي لغرفة داخل .. "



وافقت شمس وانسحبت وتمت الريم قلبها يدق بقوة ودخل فايز بعد ماناداه جدها ..





تفاجأ فايز بهالملاك الي وقف جدامه هالملامح الجميله وهالهدوء ووالخجل اللي ارتسم في هالة غريبه حولها .. حتى ما تجرأت ورفعت عيونها له كله تطالع الأرض في خجل وارتباك .. طلع الجد شوي ونطر برا .. تقدم منها فايز واقترب وايد وهي ابعدت شوي من الخوف .. بسبابته ورفع راسها بحركه بسيطه وشاف عيونها اللي تحاول تهرب منه وانسحر بشفافيتها وهدبها الأسود وحواجبها .. كانت جدامه الأنسانه اللي بيقترن فيها آخر عمره .. قطعه من الجنه ..

همس لها

"طاالعي لي .. "

التقت نظراتهم حست الريم برجفه داخلها وهالانسان يطالع لها هالنظرات .. هاالغريب اللي ملامح ويهه سمحه فيها شيء غريب ونبرة صوته فيها رقة غريبه

وكان فايز حاس أن عندها كلام تقوله لأنه ما اقتنع بفكره أن الجد يبي له الشوفه الشرعيه .. فقال



"يالغالية اذا انتي مجبورة على شيء تكلمي .. واذا في خاطرج شي .. لاتستحين ..هذا زواج .. هل عندج شروط خاصه ؟"



ابتعدت الريم شوي عنه وخذت نفس علشان ترتب اللي تبي تقوله . ..

" يا أخوي .."

" أنا مب اخوج .. أنا بصير ريلج .. ناديني بإسمي فايز "



"أستاذ فايز .. "

"" بدون استاذ ..لاتحطين الكلفه بينا "



حست الريم يأرتباك غريب ..

" عندي شرطين .. أتمنى انك تراعيني فيهم . .أولهم مهم والثان حسب ظروفك وامكانياتك "



" لاتستحين مني يابنت الناس .. طلباتج أوامر .. "



كان فايز مسحور بهالكيان اللي جدامه ..بهالانسانه واللي دخلت قلبه من اول نظره .. وسكنته وحركت فيه شعور جميل ماحسه في حياته .. يبي يحميها ويبيها تكون بس له .. يشيل أحزانها ويكرمها ويحبها ..يحبها اي يحبها ..



قالت الريم بأرتباك رغم ان مشاعرها كانت متضاربه وكانت بعد ماعاملها بهالطريقه بتتراجع عن شروطها .. لكنها لازم تشرط عليه .. قالت بهمس

" ببدأ بالشرط الثاني .. أبي أسافر لأخوي .."

" أخوج ؟"

" أخوي عايض ..هاجر لأمريكا .. وانقطعت أخباره .. "



رغم احساس فايز ان الشرط الأول بيكون صعب .. لكن هالشرط كان تافه بالنسبة له ..فقال مبتسم " مثل ما تآمرين .. والشرط الأول ؟ "



سكتت الريم لفترة ..لكنها استجمعت شجاعتها وقالت

" اليوم اللي تعايرني فيه بأمي بكون محرمه عليك .."



انصدم فايز ماتوقع مثل هالشرط .. لكنه سكت شوي نزل عيونه وقال

" ماكون ريال اذا عايرتج بشيء مالج دخل فيه .. أنا شاريج انتي .. "



كلامه ريح الريم وايد وادمعت عيونها من شعور غريب احتل كيانها .. قالت

\" وانت ما عندك شروط خاصه ؟"

رفع عيونه من على الأرض وقال " ما أتجرأ أشرط عليج .. حياتي بتكون ملك لج .. وشاريج من دون شروط .. وكبرتي في عيني بهالشرطين اللي طلبتيهم . ..أذا في خاطرج شي لاتستحين . ما سألتيني عن اخلاقي ولا عن طباعي "

ابتسمت الريم بعفوية " الأطباع المكتوبه في قلوب اصحابها ماتنقال ..بس بنعرفها مع الأيام .. ونتعرف عليها .... والأخلاق أنا متأكده أنك سيد الناس بأخلاقك .. بس حبيت أعرف رأيك بشيء "



" شرط ثالث ؟"

هزت راسها " لاء .. بس ..رأيك .. "

" ممكن اعرف عن ايش ؟"



في حياتها كلها كانت الريم مترددة تطلب أي شيء لنفسها .. لكن هالرغبه كانت في نفسها من زمان ..

" هل بيزعجك اذا كملت دراستي ؟"

انصدم فايز .. دايما يسمع البنات يشترطون اكمال دراستهم قبل كل شي ..وهالانسانه ماتبي تشرط هالشي عله بالعكس تبي تعرف رايه بس .. يعني بتمشي حسب شوره ورغبته لا أكثر .. ابتسم بود وقال براحه



" طبعا ما أمانع .. بالعكس بيسعدني هالأمر "



ادمعت عيونها ..ولمح دمعتها وكان وده يمسحها بأصابعه .. بس احترم نفسه واستأذن وطلع بعد ما حس ان الوقت سرقهم وانه بيخذل الجد بأخلاقه أذا استغل انفراده فيها ... كان الجد يجلس في المقلط .حس فايز انه الجد يبي يعرف شصار بينهم . جلس فايز جنبه وقال له

" انا شاري بنتكم يا جدي .. وماشفت منها إلا كل زين وأخلاق .. "



قال الجد بتوتر " هل كانت لها شروط تضايقك .؟"



" بالعكس شروطها معقوله ولها الحق فيها .. "



" ممكن أسأل يا يبه شنو شروطها ؟"

سكت فايز شوي بس قال بعد فتره " بس تبينا نسافر لأخوها ..تبي تعرف وين أرضه .. "



ما اقتنع الجد .. لكنه قال " ترى بنتي الريم ماشافت من هالدنيا الا القليل .. انت بتفتح عيونها على كل شي ..على السفر واشياء وايد .. بس أنا مربيها وانا واثق من اخلاقها .. مهما كان الشرط اللي تخفيه أنت عني انا واثق انه ماراح يسيء لكرامتها .. "



دخل في نفس اللحظة عبدالهادي وابو طلال مستغربين ..لكنهم من شافوا فايز وابوهم يالسين ويتكلمون تغيرت نظرة الشك اللي في عيونهم فعرف فايز انه كان عنده حق انه ترك الريم وماطول الحجي معاها .وإلا كان سوا له سالفه ..



في الناحية الثانية ..ملامح فايز الأسمر بعارض خفيف وأنف طويل وعيون سودا في بالها .. طوله وعرض كتوفه و رقته معاها .. استغربت الريم هل ابتسمت لي الدنيا ؟؟ معقولة ؟؟ قالت لشمس عن خطيبها وافرحت شمس لها .. وعلقت " حبيتيه ؟؟ "

لكن الريم عقدت حواجبها " تعرفين اني احقد على هالمسمى .. ما أحب الحب .. انا ارتحت له لا أكثر .. "

قالت شمس " مصيرج تحبينه "

"لاتكونين متأكده من هالشيء "



ضحكت شمس وقالت " تراهنين ؟"



" أراهن .. كم تبين ؟؟ "

قالت شمس " ما أبي فلوس .. بس أبيج تعترفين لي أن الحب تمكن منج .. لا أكثر "



ضحكت الريم " انا واثقه من نفسي .. ماراح أحب .. أكره الحب .. فاعتبري نفسك خسرتي الرهان .. أنا أبي منج ساعه ""



" اوكي .. بعد سنه ؟"

" بعد سنه "



********



**********



كانت معجبة في قسمها حطت قناع الكيوكامبر بالأفاكادو تجهز أشياءها لحفلة بكره ..وصلها مسج . ." صاحية ؟ "

الرقم غريب .. أكيد ناصر ..متى غير رقمه ؟ .

دقت على الرقم ورد صوته وانعش شي من روحها رغم كل التهدجات الل فيها

" ناصر انت في البلد ؟"

" ايه فديتج .. اشتقت لج .. "



"أنا أكثر .. جيت مع فايز ؟ "



كان ناصر يتمشى على الكورنيش في هاللحظة الشارع اللي يحبه فالليل ويحب انه يتمشى فيه ويشتاق له رغم سفراته الكثيرة ..

" طبعا ما أقدر أطوف مناسبة مثل ذي "



" الله يبارك لهم "



" انزين حبي .. تعالي لي .."

ارتبشت معجبة وطالعت القناع الاخضر على ويهها والأغراض اللي ترست الغرفه وتحتاج منها لمسه ترتيب ..وبعدين طالعت الساعه 8 .. بس قالت في نفسها ليش لأ ..تطور من ناصر انه يبي يلتقي فيها في داخل هالبلد ..

" انت وين ؟"



" بروح بيتي ..تعالي لبيتي البيت فاضي .."



" بيتك ؟"

" ايه .. هدى والعيال مسافرين .."

انقهرت معجبة وانترست عيونها دموع

" انت شفاكر نفسك ؟؟ كل مرة اهاناتك تزيد عن حدها واطنش بس يوصل الامر لهالدرجه ؟معقولة ؟"



" شفيج معحبه ؟؟ شبلاج انتفضتي جي شاللي قلته ؟؟"



" صج لاقالوا ..أن كنت تعلم فتلك مصيبة ..وأن كنت لاتعلم فتلك مصيبة اكبر .. انا زوجتك على سنة الله ورسوله مب من خايسات هالشوارع اللي تهربهم لبيتك ..لي كراامه ولاتظن بدخل بيت هدى مثلي مثل اي وحده من الشارع .. خلاص يا ناصر تعبت منك .. "



صكت التلفون وبيأس مسحت بيدينها القناع اللي مالحق يجف على ويهه وهي تبجي ..





كان ناصر منصدم من شيئين .. شلون مافكر بهالشي ء ؟ ليش ماحط لها بيت ؟؟ شلون اهانها وطلب ان يلقاها مثل اي اثنين ماعندهم ذمة ؟؟ رجع يتصل فيها وهو مغمض عيونه ندم

ردت معجبة " نعم "

" أنا .. آسف .. انزين تعالي ابي اشوفج هنا على الكورنيش او مطعم .. "



نست معجبة كرامتها للمرة المليون ووافقت على انهم يلتقون في مطعم بيجننز ..



اغسلت وجهها وحطت مكياج والبست بدلتها وعباتها .. ونزلت تحت .. كانت شمس رجعت من بيت الريم

" طالعه يا خالتي "

" ايه .. تعالي متى تداومين ؟ اجازتج طويله ؟"



تنهدت شمس وقالت باستسلام " استقلت من الدوام من اسبوع وشيء "



" شنو ؟؟ ومتى ؟؟ وليش ماقلتي ؟؟"

" بسبب تحيزهم السخيف مثل هالعله ناصر اللي قلت لج عنه يغييب اسابيع مايتكلمون ..اطلب نقله مايتحركون ..لكن انا اغيب لان امي فالمستشفى سوى لي تحقيق ..طلعت بكرامتي .. خالتي لاتقولين لأمي .تعرفين صافية توها مستقيله .. فما حبيت امي تتكدر . روحي لطريقج .. أنا تعبانه من الصبح مع الريم وابي أرتاح "



طالعه معجبة ساعتها وقالت " مابتأخر عال11 برجع ... "



كانت الساعه 9 الا ربع .. تأخرت وايد .. ركبت سيارتها وتوجهت للمطعم .. الديكور كان عبارة عن صور وآلات الجاز .. كان مريح نوعا ما .. اخذوا طاولة عند قسم العائلات . ..



مسك يديها وقال " آسف .. ما أعتقد أني كنت أفكر .. "



قالت برجا " أرجوك ياناصر ..لاتفتكر أني بدون أخلاق وأني بنتهك حرمة بيت هدى لأي سبب من الأسباب "



" قطي النقاب ."

بهدوء شالت النقاب والتقت عيونهم .. فيها عتب وشوق

" شالجديد ؟ .. غر يبه انك طلبت تشوفني ... أعتقد أن زواجنا مبني على أساس انا مانشوف لبعض في الدوحه ."



دايما تخرب هاللحظات باستغرابها وسخريتها .. قال بعصبية

" انتي مصرة يعني تهزأين مني ؟؟ انتي تعرفين اني بسافر اوروبا ورى زوجتي واهلها ولابرجع لين شهر 9 .. يعني لازم تذليني وتذكريني ان سبب ابتعادنا هو خوفي من زوجتي واهلها ؟؟ لازم تسألبين هالأسئلة الماصخه ؟ .. ودي مرة أقولج شي ماتسأليني ليش أو غريبة .. اقول اشتقت لج تقولين مامداك ؟؟ .. معجبه أنا أحبج .. عندي ظروفي صحيح .. بس لاتكسريني بسخريتج . الكل يضغط علي . .ما احتاج لأي ضغط اضافي "



يا الويتر وحط لهم المنيو مسكتها معجبة وطلبت ستيك وناصر طلب سلطة وفاهيتا .. اول ماراح الويتر قالت معجبه بهدوء

" وأنا أبيك تعاملني كزوجه ..مب عشيقه ولا رفيجه ولا وحده تلعب معاها فالتلفون ..أبيك تتذكر ان لي كرامه .. سخريتي جزء من دفاعي عن نفسي .. دايما تكلمني بأنحطاط كأني أقل منك بدرجااات .. دايما تطلب مني أشياء لاعقل ولامنطق يرضى فيها .. أرجوك ناصر تذكر اني زوجتك ..بس أطلب منك انك تتذكر اني زوجتك .. عاملني بأحترام شوي .. انا رضيت بكل شروطك صحيح بس لاتحرمني من أبسط حقوقي أنك تعاملني كأني زوجتك .. ما أبيك تكون مسؤول عني في أي شيء .. بس على الأقل يوم تكلمني في التلفون ..تذكر اني شاريتك واني زوجتك ..وأن بينا عشرة وعيش وملح . وأني أحبك .. تذكر هالشيء .. لاتجرحني وتخليني اطفش منك .. اختي كانت في المستشفى بين الحياة والموت ومااتصلت فيني تقويني وتساندني مع اني طرشت لك مسج .طلعت اختي ماسمعت منك الحمدالله على السلامه .. "



قال ناصر " أنا طرشت بوكيه ورد "



" بدون اسم !! ... توقعته منك .. "



" عجووب .. خربتي مزاجي كله .. "



طالع الأطفال الي يلعبون في قاعه الألعاب اللي جنبه .. انزلت دموع معجبه

" كالعاده .. المهم انت ..مزاجك انت .. ومشاعرك انت .. وهلك انت .. وأنا .. طز .. "



وقفت لكنه مسك بيدها ومنعها " اجلسي "



اجلست وهي تبجي بقهر .. " أنا أحبج .. "



طالعت له معجبه منصدمه " انتي تفتكر اني مراهقة تنطر هالكلمة بلهفة ؟؟أنت متوقع اني بشفى وبنسى بس اسمعها ؟؟ تحبني ؟؟ لا يا ناصر ..أنا أحبك بس انت أصلا ماتعرف الحب ..خساره أنك مفكر ان الحب كلمه تنطق .. الحب التزام ..الحب احترام .. الحب اخلاص الحب ثقة .. .. اذا تحبني صحيح .. ما فكرت تذلني .. مافكرت تدفنني بالحياه يوم طلبت مني أسوي عمليه وأصكر انابيبي علشان ما أييب عيال ..ماوثقت فيني خفت أعلقك في ياهل .. لو تحبني صحيح .. ماتسببت بطرد شمس من شغلها .. لو تحبني صحيح .. كان قدرت مشاعري ولاكلمتني وزوجتك جنبك .. "



مسكت شنطتها وطلعت وهالمرة ماوقفها .. تم يطالع نقابها اللي نسته وبدون وعي مسكه وشمه .. كانت ريحتها فيه .. وبدون وعي فكر ان هذي آخر مرة بيشم هالريحه ..

هذي اول مرة تتكلم معاه معجبة بهالجبروت وهالقوة .. كانت دايما قنوعه وراضيه ..كانت دايما دايسه على كرامتها .. يمكن لأنها في بلاد غريبه وتخاف يرميها في الشارع او تضيع ؟؟ هل الوطن يعطي هالقوة للانسان ؟ ..

***********

في الموقف ماقدرت معجبه انها تسوق ..انهارت على السكان تبجي حست بذل مابعده ذل .. مسحت دموعها وشغلت السياره وهي تقول لنفسها

" أخيرا !! .. انتقمت لكرامتج وخسرتي حبج الوحيد ؟ "



تذكرت هذيك اللحظة لما أخذها للعيادة .. وطلب منها هالطلب .. كانت في نص القاهرة وشعور بالضيااع يتملكها .. وتو تزوجوا من شهر ..سوت العملية بعد ما أكد لها الطبيب بعيد عن ناصر انه في امكانيه انه تعكس العملية .. ما كرهت ناصر بالعكس .. انتابتها احاسيس كثيرة ..



شغلت الراديو .. وصوت عبدالمجيد يرن بأحساس





خلص حنانك مابقى إلا قسوتك ..

اقسى علي اقسى حلالك فدوتك ..

قبلك قست دنياي وأنت تمون ..

شفت السعاده يوم عيني شافتك

أسعدتني الله دايم يسعدك ..

لو سقت لي هم وحزن هالكون

شفت الحزن فيني فرح مخزون ..





صكرت معجبة الراديو .. امسحت دموعها وتذكرت انها بدون نقابها . تلثمت بشيلتها وساقت لين البيت ونفسيتها منهارة .. احبك ياناصر بس انا محتاجه افكر شوي .. اللي سويته عشانك وايد .. بس .. انت ماسويت شيء..





دخلت البيت كانت جوزة في الصالة .. من شافت دموع معجبة قالت

" في شي ؟"

" لا .. بس تهاوشت معاه .. قهرني وانفجرت في ويهه .. بس لاتخافين القطو يحب خناقه .. مالي إلا أني أرجع له وهو ما نطق كلمه كأنه واثق من هالشيء .." "



ما سألتها جوزة عن شي .. قالت بهدوء وهي تطالع الساعه " قومي نامي ..بكره الصبح لازم تروحين الصالون وبعدين ملجة الريم بكره .. لاتنسين ريحي اعصابج "

[موكاتشينو]

الفصل الخامس الجزء 6
***********


البنات في فرحه ماتوصف ,.. صوروا مع الريم حتى معجبة اللي كانت منبهرة في جمال الريم اللي كانت لابسة فستان أحمر بلون دم الغزال لايق على لون بشرتها الأبيض .. ومكياج راائع .. وفردت شعرها الأسود مع تكسيرات بسيطة على كتوفها ورفعت كم خصله .. واستغربت من اختفاء جوزة .. بالأخير لقتها تحضن محمد ويالسه في ركن بعيد .. ودموعها تغسل خدودها
" شفيج يا أم ماجد .. ليش تبجين ؟"

قالت جوزة " تذكرت مها .. شوفي الريم كأنها نسخه عنها .. تمنيت هالبنت تعيش في بيتي .. بس ولدي حرق قلبي وما طاع ..بتتغرب الحين مثل عايض .."

باست معجبه راس جوزة وقالت لها " هدي عمرج يالغالية .. افرحي لها نصيبها مع هالريال .. والظاهر انه اعجبها شوفي الفرحه بعيونها .. يلا قومي تصوري معاها .. "
كل البنات كانوا محتشرين عند الريم و يصورون معاها صور للذكرى كانت الريم مستغربه هالشعور لانها ماجربته من قبل ..هالالوان بالحفله والكيكه الكبيرة والهدايا ..

" شمس .. حلو فستانج "
" عيونج الحلوة حبيبتي ... انت احلى اليوم بوايد .. بتقولين للملا شروطج ؟"
سكتت الريم كانت طول الليل مرتبكه وتفكر بهالامر ..
" ما ادري .. متى بيملجون ؟"
" في أي دقيقه بيوصل الملاج .. "
" خايفه .."
" لاتخافين .. توكلي على الله .. ولاتخافين .."

اجلست الريم في في المنصه الصغيرة مع البنات يتصوورون . حتى معجبه صورت معاها
" بتكون دعايه ممتازه للصالون .."
" لايكون بتحطين صوري خالتي ؟"
" ايه بحطها بس على الدسك .. مب في بوسترات لاتخافين . .."
كانت معجبة مكتئبة لان ناصر ما اتصل فيها ولا عبرها .. طالعت الساعه كانت سبع وشي ..
همست الريم " ناصر هنا ؟"
" ما ادري .. ما ادري .."
وتنهدت غصب عنها كانت بين يدين الريم مسكه كريستال من الورد التوليب الأحمر .. تمت الريم بدون وعي تلمس اوراق الوردة المخملية لين اصطبخ اصبعها بلون احمر خفيف .. كانت الاغاني حولها كلها لراشد وحسين الجسمي .. تناوبت شيخه ونوير على الرقص .. شمس وصافيه اوقفوا يتفرجون .. ماكان في اي ضيووف .. بس بيت خالتها جوزة وخالتها معجبة ويدتها .. البندري في المستشفى مامرتها من اسبوع ..

دخل الجد و نادى الريم عشان توكل ابوها عنها .. وخلال دقايق تمت الملجه وبدوا البنات يببون ويباركون لها
" ألف مبروك يالريم "
" الله يبارك فيك يا شيخه عقبالج "
مادرت الريم انها بكلمتها هذه ذكرت شيخه بجروحها ..
" مبرووك غناتي منه المال ومنج العيال "
" الله يبارك فيج يالنوري عقبالج .. " احضنتها صافيه وباركت لها .. وشمس تمت تصيح بدون وعي في الزاويه لين راحت لها الريم واحضنتها وتموا لامين بعض وهم يصيحون .. ماكانت تدري الريم دموعها ودموع شمس دموع فرح ولاخوف ؟ ..
جدتها كانت تيبب لها بفرحه ما لمستها الريم فيها ابد .. ونفس الشي خالاتها الل كانوا يبجون ويببون ..
ضبطت لها معجبه المكياج .. كانت بتعزم صديقاتها على الملجه لكنهم آثروا انها تكون خاصه وفي العرس بيعزمونهم .. حتى الجده ماحبت تعزم الجيران عن لايزيدون في الكلام ويغثون البنيه في فرحتها ، لكنها اعزمت ام طلال.. وخلود واهلهم لكن محد منهم حضر ..

" صدقيني يا النوري .. لو حاطين اناشيد احسن بوايد .."
" أناشيد؟.. سؤال صافيه انت ترقصين ؟؟ أقصد كنت ناويه ترقصين ؟"
عصبت صافيه " طبعا لاء .."

" عيل لاتعلقين "

دخلت نوير ترقص مع شيخه للمره العاشره .. مافي غيرهم شمس ماتعرف وصافيه تستحرم . .

كانت جوزة مستانسه بالجو ومعجبه تراقب حشره البنات و كلامهم ..
" أقول عجووب دشي معانا .."
" وين ؟"
" ارقصي هزي كتوفج شوي .. اغاني الجسمي ربشه .. "
" فديتج شيوخ ما ارقص .."
" ليش ؟؟ "
" ليش يعني ؟؟ بذمتج من كثر اخواني ولا الاعراس اللي نرقص فيها .؟ "

" صدقت "

راحت قرب نوير " تصدقين نوير ..طاحت ريولي .. والمصيبه محد يبي يتحرك يدة الريم مسكينه يلا تقوم من مكان لمكان وامي توها مسويه عمليه قلب وخالتج وخواتج الباقيين مايعرفون ... ويستحرمون .. "
ضحكت نوير " تبين يدة الريم ترقص ؟؟ الله يهداج بس زين توقف على ريولها الحرمه .. "
غيرت شيخه الموضوع
" تدرين اللي حطت لنا المكياج كانت مبهوورة في الريم "
" ومقهورة من صافيه ههههههههههه "
ضحكت شيخه وهي تطالع صافيه اللي ماحطت الا كريم اساس بسيط وبودر بسيط وكحل بس !! .. بس طالعه حلوة رغم الالوان اللي اختفت من وجهها .. تذكرت لما اللي تحط مكياج حطت على شفايفها كريم اساس عصبت وتمت تمسح .. وبالاخير اكتفت بملمع بسيط ..

" شمس شفيها يا شيخه ؟؟ .. احسها مكتئبه شنو لهالدرجه ماتبي الولد ؟"
طالعت شمس اللي كانت تتكلم مع الريم بهمس
" بالعكس هي تبيه بس ما ادري شسبب هالبرود .. يمكن هي في صدمه . أحيانا احس انها ماكانت تتوقع ان الولد يكون بهالكبر أحسها تتوقع ان الولد للحين عمره كم ساعه .لما تمسك الصور اللي عندها تمسك اللي يكون فيها حمود في المهاد .. وتعاف الباقي اللي فيها لما يمشي أو يلعب . ."

قالت نوير بهمس " عيل هي مينونه ؟"
" لا . بس .. مصدومه "

" تعالي "
قالت معجبه لشيخه " تعالي ابيج في موضوع "

اتبعتها شيخه مستغربه " خير خالتي؟"
" تعالي خذي مفتاح سيارتي وييبي لي الكيسه اللي على الكرسي اللي جدام .. نسيت فيها هديا الريم بسرعه لأن بأي لحظة بيدخل فايز "
البست شيخه عباتها وشيلتها وطلعت لسيارة خالتها وكانت خالتها ناسية جوالها جنب الكيسه لانها اول ما نزلت نزلت الفستان والكيك فنست هالاغراض ..

وهي في طريقها استغربت ان في مس كول ومسجين بس هي ماتحب تتدخل في حياة خالتها ..
دخلت وعطت الكيسه لمعجبه اللي قالت لها بعد ما اخذت التلفون
راقبت شيخه لا اردايا ملامح خالتها وهي تقرأ المسجات .. استغربت من هالمشاعر اللي ارتسمت على ملامحها هالزعل والدمعه اللي اطلعت لاااراديا من عيونها ..

معجبة ماكانت تقدر تتماسك .. تنفست شوي وفكرت (( ليش جروحك تزيد يا قلبي وكل اللي تبيه شوي احترام ؟" )) . قرت المسجين مرة ثانية .كانت متوترة
(( معجبه انتي تغيرتي .. اللي مثلج المفروض تفرح اذا طلبت منها انها تقابلني )) ..

(( بروح المطار الحين طيارتي الساعه عشر .. ))
تمنت لو انه بارك لها بملجة الريم .. تمنت لو قال لها كلمة طيبه يطيب خاطرها .. لكن يعايرها ؟؟ ..
كان المس كول من الصالون.. لكنها طنشت .. راحت للريم
" الريم هذي هدية بسيطة مني .."
" هديه ؟؟ خالتي ليش كلفتي على عمرج يكفيني هالحفله والفستان والصالون ..صراحه هذا وايد "
" الريم .. طول عمري مقصرة في حقج .. وهذي هديتي لج ..وهذي هدية خالتج جوزة .. وهذي من البنات تحاططوا ويابوها لج .. "

انصدمت الريم بالهديه .. كانت هدية خالتها جوزة هو طقم لازوردي رووعه يشبه اللي تطلع فيه اليسا فالتلفزيون .. وهديه خالتها معجبة ساعه رولكس أصليه .. والبنات يابوا لها خاتم الماس رووعه فيه احجار كريمه وحجر ألماس .. ادمعت عيونها وكانت مفتشله منهم انها في حياتها ما يابت شي لهم يجي عشر قيمه هالأشياء .. لبستها خالتها الهدايا وتصوروا مع بعض .. في نفس اللحظة دخل الجد وطق الباب يخبرهم انه فايز بيدخل يلبسها الشبكه ..

تغطوا البنات وابتعدوا واقتربت الجده ببطولتها هي وجوزة ومعجبة اللي تنقبت من الريم .يقوون أعصابها ..





دخل فايز جلس ووقف جنب الريم ودخل جدها وابوها عبدالهادي باس راسها ابوها و تصور جنبها ونفس الشيء جدها اللي كان مستانس للريم وفرحان لها .. يابت معجبه الشبكه ولبسها فايز اللي كان منبهر بالريم .. والفستان اللي مطلعها تجنن ..

كانت الشبكه من ألماس في تصميم جميل والدبله من ذهب ابيض فيه ألماس بسيط .. وساعه غاليه وروعه ..

" مبروك "
" الله يبارك فيك .."
ماقدرت تنطق بغير هالكلمات .. جلست وتصوروا مع بعض .. طلع ابوها وتم جدها .. فايز احترم جدها وقاوم انه يمسك يدها ..لكن لها تأثير غريب فيه ..
همست شيخه
" وسيم .."
قالت نوير بهمس
" يشبه سلمان خان .."

كان ملاحظة نوير مزعجه لشيخه اللي قالت بهمس " ريال وفيه النعم .. المفروض حنا آخر من يحكم على الناس بسبة امهم .."

سكتت نوير وانحرجت وقالت تعتذر "صدقت والله .. احنا آخر ناس نتكلم .. بس ماقصدت اني احط من قدره .. بس طلعت الكلمه جي .. "

قالت شيخه بغضب مكتوم " كثر الحجي اللي يطلع منج بدون ادراك .. وزني الكلمه يا نوير والا بتندمين بعدين بتخسرين الكل بسخريتج "

حست نوير انها اصغر من شيخه بسنين رغم ان العكس صحيح .. طالعت لفايز .. صج هو وسيم .. بس الريم مب قاصره طالعه جنبه جميـله جدا .. وفاتنه . قالت اخيرا تحاول ترقع زلة لسانها " الله يهنينهم في حياتهم"
قالت شيخه وهي تطالع نوير بقلق " آمين "

اللي ماكانوا يدركونه ان جوزة سمعت كلامهم كله .. كانت وراهم تعطي محمد شوكلاته .. وانحبست الدمعه في عيونها ولما خلصت مسحت محمد ووقفت جنب بناتهم وقالت بهمس " أنتوا تستحون فيني يا بنات ثامر ؟؟ تستحون فيني ؟؟ "
شهقت شيخه ونوير ولكن جوزة دخلت داخل الغرفه والبنات الحقوها حست معجبة بشي لحقتهم .. كانوا البنات يطقون باب الغرفه بهدوء ويهمسون
" يمه فديتج محشومه انتي تاج على راسنا .. يماا .."
بدت شيخه تصيح لاااراديا وخافت على امها من نوبه قلبيه ثانية ..
" شفيكم وشفيها وجوزة ؟"

الفصل الخامس الجزء 7

كانت نظرات معجبه تنتقل بين نوير وشيخه اللي ماتكلموا ..
" ليش تبجين شيخه ؟"
همست شيخه
" أمي سمعت كلام بيني وبين نوير ..وزعلت .. أخاف عليها يا خالتي أخاف عليها "
" كلام عن شنو ؟"
قالت نوير بعبره " مب عن شيء بس .. هي على بالها انا نستحي فيها .. والله يا خالتي انها على راسنا تاج ونفتخر فيها .."

غمضت معجبه عيونها تكتم انفعالاتها وشدت يدها بقوة ورصت على اسنانها وهي تقول بصوت واطي " وقتكم يالحقيرات ؟ ؟؟ تخربون فرحتها اليوم ؟؟ توها طلعت من المستشفى يالحوش .. ماتستحون ؟؟ ارجعوا الحفله وما ابي اي صوت لكم ولاتخربون شي . .وان صار شي لجوزة مابتلومون الا نفسكم .. اذلفوا "

كانت اول مرة في حياتهم تتكلم معاهم معجبة بهالأزدراء وهالألفاظ ؟؟
اطلعت نوير وتمت شيخه تبجي
" اذلفي .. "
" بس . "
" قلت لج انقلعي برا "
طلعت شيخه وتغشت وتمت تبجي بقهر وبصوت مكتوم ..

طقت معجبه الباب على خفيف " جوزة أنا معجبه .. افتحي الباب "
فتحت جوزة الباب وكان واضح الكدر على ملامحها .. باستها معجبه على راسها " بتزعلين من كلام بزارين الله يهداج ؟"
" بناتي مفتشلين فيني يا معجبه "
" بذمتج هذا حجي ؟ومن بناتج ؟ أنت نور عيونهم ويفتخرون فيج أكثر من اي حد ثاني .. .. والله انهم قطعوا عمرهم من الصياح عند الباب .. يهال جوزة يهال لاتكدرين عمرج عليهم وهم مايوزنون الكلمه "

نزلت جوزة راسها بذل لكن معجبه ارفعته وقالت " لاتنزلين راسج لحد .. مهما صار انا وانتي عارفين انه في شي غلط .. .واليوم فرحه الريم لاتشيلين في خاطرج .. .ترى والله اني هزأتهم هالغبيات .. خصوصا شيخه اللي خايفه عليج .. "

مسحت جوزة دموعها .. قالت " روحي وانا الحين بيي بشرب دواي وايي .."

" لج دقيقتين مب اكثر .. وخلي الباب مفتوح "


طلعت معجبه واتجهت جوزة للمنظرة وضبطت كحلها اللي ساح .. تنفست بقوة وشربت دواها وبعدين طلعت ..


معجبه من شافت جوزة ايلست قرب الريم وباركت لفايز ارتاحت شوي .. طالعت جوالها ..وقررت انها تتصل في ناصر انسحبت من الصالة ومسكت جوالها وراحت لسيارتها . .

اتبعتها شيخه ولكنها قبل لا تنبها بوجودها سمعت كلام معجبه في التلفون

" هذي آخرتها ؟؟تعايرني ؟؟ تعايرني ؟؟ وصل فيك الامر تعايرني ؟؟ "
" معجبه هدي شتقولين انتي ؟؟ "
" شقصدك في اللي مثلي ؟؟ شقصدك ؟؟ اللي بسمعتي ؟؟ تدري ناصر خلاص ..أنا مليت .. "
صكت الجوال وتمت تصيح بقوة وشيخه حطت يدها على حلجها تكتم شهقتها .. وبعدين انسحبت بدون ماتحس فيها معجبه اللي انهارت تبجي فيها كل حزن هالدنيا في هاليوم اللي مفروض يكون فرح لهم ..

كان ناصر في المطار مستغرب شتقصد هالمجنونة ؟؟ وليش يعايرها ؟؟ طالع الرسائل المرسله ولما قرى المسج مرة ثانية فهم انها فهمت غلط .. كنسل تذكرته ورجع اخذ تاكسي لبيت ابو عايض ..


أول ماوصل كان فايز توه بيطلع ..
"ناصر شرجعك ؟"
" تكنسلت الرحله .. بتروح ؟"

" ايه انا من الصبح على ريولي ..انت تعشيت ؟"
" لا .".مد راسه وطالع كان سيارة معجبة مب موجوده داخل البيت ..

قال فايز بابتسامه " عيل تعال بآخذك الفندق معاي وتعشى هناك ..بيني وبينك ماكان لي نفس آكل مع ان ماشاء الله السفره عامره .. ماحبيت نظرة ابوها وعمها لي "

"ما أقول لاء .. يلا سرينا "

ركب سيارة فايز الجي اكس .. وراحوا للفندق مع ان بيت فايز موجود لكنه مصكر من زمان ومافيه أحد ..

" ليش ماتجي بيتي .. أنا أنام بروحي هناك حتى الخدم أخذوا اجازتهم السنويه وسافروا .. "

" لا ,, خليني في الفندق أسهل .. يغسلون ثيابي ويجهزون لي الأكل ويرتبون الغرفه .. صكر بيتك وتعال احجز غرفه "

" اهد غرفتي وبيت شكبره واحشر عمري في غرف الفنادق ؟؟ .. لايبه ..انا مب مطول كلها يوم او اثنين واسافر "

"اوه نسيت .. "
" خير ؟"
" نسيت أعطيها جوالها وخطها اليديد "
"منو هذي ؟"
" زوجتي الريم "
ضحك ناصر واستغرب هالكلمتين على لسان فايز اللي نفسه ابتسم وفهم ليش خويه ضحك ..
رجع فايز ودخل شايل الكيسه اللي فها الجوال وعطاها للجد اللي كان داخل الديوانيه بروحه ..
" عن اذنك ياجدي هذي للريم .. جوال ابي اكلمها فيه "
ضحك الجد على ملامح وجه فايز المنحرج وقال " ياولدي مابمنعك الريم صارت زوجتك ومافيها شي إذا كلمتها "
" تسلم ياجدي "
طلع فايز عن لايتأخر على ناصر اللي كان داخل السيارة ينتظره ..
دخلوا الانتر كونتينتال وتوجهوا لجناح فايز وطلب الاكل هناك وطلع مبتسم بعد ما أخذ دش سريع ..
كان ناصر ينتظره في الصالة وهو يطالع جواله مكتئب ..

" شفيك ؟"
" معجبه زعلانه .. طرشت لها مسج وفهمته غلط .."

" قول لها الحقيقة عيل "

"ما أعتقد بتسامحني "

سكت فايز وهو يطالع لجوال ناصر اللي قال " الموضوع حساس " ..
بعد دقايق قال فايز " انت قلت انك مابتكلمها في الدوحه شغير الحال ؟"

" ظنيت انه بسفر زوجتي الاولى بستغل الفرصه .. لكن على مايبدو ان الامر زاد من مشاكلنا ..تعال وانت شلون بتكون حياتك مع الريم ؟"

استغرب فايز " مافهمت السؤال ..بنعيش مثل اي اثنين متزوجين "

قال ناصر بحذر " بتوثق فيها ؟"
حس فايز بعصبية " شقصدك ؟"
" اهدى .. أنا اللي قصدته انه اهلها ما وثقوا فيها و .."

تنهد فايز " ياناصر انت ماتعرف شي في هالحياه .. ماتعرف انه اللي تلدغه الحيه يخاف من الحبال .. الريم انلدغت من هالحيه .. ومابتوقع البنت بتكون على شاكله امها لانها جربت الاهانه اللي خلفتها فضيحه امها .. انا الحين شايل هم شلون البنت بتتعود علي .. وهل بتحبني ؟؟ الريم بتكون محاره مغلقه على نفسها .. وأتوقع بتكره الحب وتكره الرجال ..بتكون مثل الصباره .. كلها شوك .. بتحاول تحمي نفسها ضدي اللي شفته الليله مب عيون فرحانه ..لا .. عيون تخاف بكره .. تخاف مني أكثر من انها ترحب فيني .. "


استغرب ناصر تحليل فايز لكن اللي مايفهمه ناصر ان فايز كان طوال حياته في مكان الريم .. يعاني مثلها .. وانه كان لسنوات في نفس موقف الريم ..متخوف من الحريم ومن انه يرتبط في انسانه تكرر فعله امه وتهجره وتترك اولاده عرضه لكلام الناس والعار ويردونه الناس دايما لي تقدم لبناتهم .. لين سمع من ناصر عن الريم بالصدفه .. وحس انها هي اللي بتغير حياته لانها عاشت نفس ظروفه تقريبا .. وعانت من نفس الظلم ..

**********

كانت شيخه في الصاله مكتئبه امها من جت ادخلت غرفتها مع محمد وطنشتها هي ونوير ومعجبه بكآبتها كانت بتسوي فيهم حادث اكثر من مرة لين صرخت عليها جوزة تنبهها ..

دخل ماجد الصاله " وين الكل ؟"
قالت شيخه بكآبه " في غرفهم "
" وشمس مايات ؟"
" بلى لكنها في غرفتها .. "
" شلون الحفله ؟"
ابتسمت شيخه " واايد حلوة .."

" شخبار الجامعه ؟"
" الحمدالله .. شفيك ماجد متوتر ؟"

ارتبك ماجد " مافيني شي يا حلوة .. اوه شيخه تذكرين ايام قبل يوم كنت اناديج خيشه ؟"
ضحكت شيخه " اياني واياك تعيدها كنت تسبب لي اضطهادات نفسيه .. "
رد بخبث " بس فادت معاج وتعصقلتي شوي هههه "
" شوي ؟؟ حرام عليك إلا اختفيت كنت مليانه وايد المصيبه انك ماتركت هالعاده لين دخلت الجامعه حزتها انشغلت ونسيت .. من زمان ماقعدنا مع بعض "
طالعها مبتسم " دامج بعباتج قومي خل نطلع "

" وين ؟"
" بآخذج نتعشى أنا يوعان "
ابتسمت شيخه " كأنك حاس فيني ..أنا ماتعشيت .."

وقفت وطرشت مسج لجوال امها
" يمه فديتج سامحيني والله انا ماقصدنا .. أنا بطلع مع ماجد ومابنتأخر "

فجأة انفتح باب الغرفه " شيخه "
افرحت شيخه وابتسمت " لبيه يمه .."
وكانت بتروح تتسامح منها لكن جوزة قالت بسرعه وهي بتصكر الباب " ييبي حليب مراعي كامل الدسم معاج .. محمد مايتريق الا حليب طازج "

وصكت الباب بعصبيه ..خنقت شيخه العبره والحقت بماجد اللي راح يشغل السيارة ..

**********

رن الجوال لأول مرة وكان نغمة راشد الماجد

(( مجنون بك واعترف لك صرت مجنونك
لا الذنب ذنبي ولا ذنب الهوى ذنبك
لو كل هالناس بعيوني يشوفونك
ان كان ذاب بغلاك العالم وحبك ..
غمض عيونك حبيبي غمض عيونك
بقولك شي بس اسمعني في قلبك .. )) كان اسم فايز .الظاهر انه مضبط الجوا وحاط فيه نغمات وارقام جواله .. . ردت بتوتر
" السلام عليكم .."
" وعليكم السلام .."
كانت متوترة وايد ..
" شلونج الريم ؟"
"الحمدالله .. مشكور على الجهاز .."
" العفو .. شلونج ؟"
" الحمدالله وانت شخبارك ؟"
" الحمدالله .. مبروك ..."
استحت الريم وكانت صج منحرجه ..
" الله يبارك فيك .. ممكن أسألك شي ؟"
" تفضلي عيوني كلها لج "
ترددت شوي لكنها قالت " ناصر كان موجود في الملجه اليوم ؟"

استغرب فايز " أنتي تعرفين بناصر ؟"
قالت مستحيه " ايه .. خبرتني خالتي يوم تقدمت لخطبتي وطلبت مني اسألك هالسؤال ان كلمتني الليلة .. "

" ايه كان موجود وهو الشاهد الثاني مع عمج ابو طلال على عقد الزواج ..بس الظاهر صاير بينهم مشكله "

" اعتقد هالشي لان عيونها كانت مثل الجمر لما طلبت مني "

سكتوا شوي لكن فايز قال " كنت رووعه الليله . .. "

ابتسمت الريم لكنها ماعلقت ..
حس فايز بتوترها وهو يسمع صوت نفسها وقال " ما أطول عليج يالغلا ..بكلمج بكره بإذن الله .. "
" ان شاء الله .. "

" الله يحفظج .. "
" في حفظ الرحمـن .."

صكت الجوال ال n95 .. وهي تطالعه مستغربه .. أخيرا صار عندها جوال .. معقوله ؟ .. بس تكلم من ؟؟ .. حطته على التسريحه وفتحت التسريحه وراقبت شعرها اللي امتد على طول ظهرها بفرح .. امسكت تلفون البيت واتصلت بخالتها معجبه
" ألو .."
" هلا خالتي .."

" الريم .؟ .. اعذريني كنت دايخه شوي .."
همست الريم " لايكون حامل ؟"
" لا مستحيل طبعا .. كلمج فايز ؟"
ردت الريم " ايه .. طرش لي جوال وخط وضبط نغمه خاصه له وحط ارقامه .. وسألته عن ناصر قال انه كان موجود وانه الشاهد الثاني "
حست معجبه باحباط
" لايكون يالخبله كلمتيه عن ناصر اول شيء ؟"
" ايه والله .. شسوي ماعندي اي موضوع .."
" انزين متى العرس ؟"
" يوم 15-8 .. بعد شهر وشي .. .. "
" سلموج المهر ؟"
" ايه سلمني ابوي ميتين ألف .."
" انزين بنتقضى اغراضج بحدود الميه والميه الثانية خليها في البنك "
" أغراضي بميه ؟؟ ليش ؟؟ عشره تكفيني وزياده .."
ضحكت معجبه " ليش تشترين فيها خلاقين سود ؟؟ صج انج على نياتج .. با حبيبتي انتي بتتزوجين رجل اعمال ريال هاي هاي .. لازم كل مشترياتج تكون شي عليه القيمه وماركات .. وبعدين مابنكثر من الملابس ..مع ان خزانتج فاضيه تقريبا مافيها الا الاسود . بس كم بدله على الموضه ..ولاتنسين الموضه تتغير .. بس الاساسيات الكلاسيكيات ..بس انتي تحتاجين ميزانية ضخمه لاني بييب لج كله ماركات لان اللي فهمته من ناصر ان فايز كله في حفلات رجال اعمال ..يعني بيقارن أكيد شايف وايد .. .. وبعدين حطي في حسابج بآخذج دبي ..استأذني من فايز .. "
قالت الريم متردده " أبوي مابيرضى "

ردت معجبه بعصبية " اذا زوجج راضي بيرضى ..خلاص انتي الحين متزوجه .. وتحتاجين اشياء واايد .. ودامه زوجج انتي طلعتي من مسؤوليته "

صكرت الريم من خالتها وهي مستغربه من كلامها .. هل بتطلع من شور ابوها دامها تزوجت ؟؟ اتصلت على شمس وخبرتها بكل اللي صار بينهم واكدت لها شمس كلام معجبه انها لي تزوجت استقلت بحياتها ..



كانت معجبه في الغرفه مكتئبة والدموع في عيونها حاسه بذل وقهر .. جلست على مكتبها تراجع شوي فواتير لكنها ماقدرت تركز .. اللي صار لجوزة واللي صار لها يجلط صراحه .. تنهدت
" كنت موجود في الملجه ولا باركت لي .؟ كأني مااستاهل ؟ .. يا ربي شآخر هالحال التعبان .. "


في الفندق كان ناصر نايم على الكرسي وفايز دخل للغرفه ينام .. كان مبتسم .. حس ان له عايله ..وهالشعور نساه من زماان ..

[موكاتشينو]

الفصل السادس الجزء 1


الفصل السادس

___





دخل ناصر للقسم وابتسم لربعه اللي نسا اشكالهم

" ناصر هلا والله بو يوسف "

قام عبدالعزيز وسلم على ناصر وجا سلطان وسلم عليه وقال

" ناصر تدري اقول اليوم المكتب منور عبدالعزيز قال لي انك في لندن "

قال عبدالعزيز " قريت في الجريدة انك تقضي اجازتك في اوربا .. ماتوقعتك ترجع بسرعه "

قال ناصر وهو ييلس على مكتبه " برجع اسافر بس ييت عشان واحد من الربع ها عبدالعزيز اخبار السد ؟ "

قال مبتسم " يسجل انتصاراته بجدارة "

طالع ناصر المكاتب " شالفوضى شالملفات ؟"

قال سلطان بصدق " من استقالت شمس والقسم من سيء لأسوأ مديرنا طارق متوهق برئيس القسم اللي حطه بدل شمس مب شي .. بس يحذف علينا هالملفات ويضيعها "

قال عبدالعزيز " بس انا من ناحيتي ارتحت .. ماعادت تزعجني بصوتها ووجودها "



قاطعه سلطان " بس كانت مشية شغل المكتب بحياتي كلها ماتعبت من الشغل مثل ما اتعب الحين .. رئيس القسم بو محمد كله مسطح ونايم والشغل شيء جدا "

قال عبدالعزيز " بس القاضي راضي انت شعليك ؟"

علق ناصر " لا يا عبدالعزيز ..بعدين الاهمال هذي بيخلي المسؤولين يطردونكم وبدون توصيات .. بيحطون السبب فيكم وهذا بو محمد مابينوبه شي بالعكس بينتقل لوظيفه اسهل "



" انزين انت راجع تداوم يا بو يوسف ؟"



هز ناصر راسه بلا " لا ما اعتقد اصلا هالشغل مب نازل لي من زور شكلي بستقيل .. بس ييت اشوف طارق شوي "

قال عبدالعزيز وهو يأشر على سلطان " مادريت سلطان دخ القفص الذهبي "

" صج مبروك يا سلطان .. "

قال سلطان معصب " يكذب عليك مسرع ماصدقته "

ضحك عبدالعزيز وطالعه ناصر بعتاب

" مقصه عندك يا رجال؟"

" محشوم يا بو يوسف ..بس شوف .. انا افكر اخطب له .. يكسر خاطري .. ماتزوج .في حد حواليك ؟ "

اشر ناصر بلا ووقف وقال "يستاهل سلطان بس للاسف ماعرف لهالسوالف .. بروح لطارق اشوفه "

قال سلطان مبتسم " بس عود يا خوي ماشبعنا من سوالفك "

" راجع لكم "



توجه ناصر لمكتب طارق وطق الباب ..

" السلام عليكم .. وين سكرتيرتك ؟"

" هلا والله وعليكم السلام حياك تفضل "

جلس ناصر وطلب له طارق قهوة " استقالت السكرتيرة طفشها عبدالعزيز .. ما أدري شفيه هالريال يطفش المواطنات .. "



" على الطاري ..قالوا لي الشباب ان شمس انطردت ؟"

"ما انطردت .. استقالت .. يا أخي من طلعت من القسم والقسم متبهدل كانت مرتبه كل شي الحين تيينا شكاوي وايد "

" اتصل عليها ورجعها "

" بس هي استقالت "

" طارق كلمتين اعتذار وكلام منمق وتقنعها "

نزع طارق نظاراته وقال " بس هي تبي تمشي كلمتها هنا على كيفها "



" شلون ؟"

" ناصر تبي تنقلك و وتبي موظفين بديلين "

هز ناصر كتوفه بلا مبالاة " أنا أصلا ما أداوم وقلت لك من قبل اني بستقيل ولا فارقه معاي .. وصراحه ان شفت الفوضى على مكاتب الشباب اقول الحق عمرك قبل لاينتبه المسؤولين لهالفوضى .. بخلص اوراق استقالتي وبخلي محامي يمرك .. "



تردد طارق " بس اسمك تشتغل معانا هذا فخر لنا "



ابتسم ناصر " انا هنا بالاسم .. لكن بيني وبينك ما اسمي اللي اسويه شغل .. لاتخسر البنية ترى خبرتها ممتازة .. "



وطبعا لما شخصية لها واسطتها وسمعتها مثل ناصر تنصح فهذا يعتبر امر اكثر منه طلب اقتنع طارق بكلام ناصر واخذه كأمر مسلم به ..



بعد عشر دقايق رجع للشباب وهو يطالع عبدالعزيز " شفيك انت مطفش الحريم ؟"

ضحك عبدالعزيز " يا أخي انقهر من منظر المواطنات الي يشتغلن .. ودي اقول لهن انثبرن في بيوتكن احسن لكن "

قال ناصر مب عاجبه تصريح عبدالعزيز " شوف يا خوي .. لاتقطع الارزاق ..قطع الاعناق ولا قطع الارزاق .اللي تسويه غلط انا بستقيل وشمس بترجع وافضل انك تنتقل لقسم كله رجال دامك تسلك هالسلوك "

قال عبدالعزيز " تعرف قسم كله رياييل هاليومين "

قال سلطان مبتسم " ايه الجيش !!":



ضحك ناصر وعصب عبدالعزيز " بترد لنا شمس وبتتركنا يا بويوسف الظاهر مالنا معزة عندك "



قال ناصر ببساطه " الفوضى اللي صايره مب زينه لسجلكم الوظيفي .. والبنية طفشت بسبتي وبسبتك .. وطارق بيحتاجها لان خبرتها كبيرة في هالمجال .. "

قال عبدالعزيز " عيل بنتقل بترافجني يا سلطان ؟"

هز سلطان راسه وقال " بنتقل وياك واسمح للموظفات بهالقسم .. لاني مابرضى اتم بروحي هنا .. و بعدين في كم بنت توسطت لهم وبيتوظفون هنا .. مابرضى اني اكون معاهن في نفس القسم عن كلام الناس "

" خير ان شاء الله .. تعالوا نكلم طارق بهالخطة "

قاموا معاه ودخلوا لمكتب طارق .. كانت هذي اول خطوات ناصر في كسب ود معجبه ويبن لها انه مابيكرهها ولايقلل من احترامها ..





**



كانت شمس في الغرفه تقرى الرسالة وهي تمتم

"

شمس مابتصدقيين ينابيع الشوق اللي تتفجر في قلبي .. ان قلت احبج ماتوصف احساسي ..ان قلت اعشقج العشق ولا شي جنب احاسيسي توجتي حياتي بوجودج توجتي قلبي بحبج .. وتوجتي عمري بعيونج .. تصدقين افكر فيج كل لحظة .. كل دقيقة .. قبل لا انام ولما انام ولما اصحى .وانا في الدوام .. احس عقلي لوحه بيضا انطبعت فيها صورتج ,, اشكر الله اني عرفتج .. واشكر الله انج بتكونين لي .. ناطر اليوم اللي بحتويج فيه في بيتي ردي علي مع الريم .. ابوج مايرضى اشوفج ولا اكلمج مع انا مالجين ...هانت يا عمري هانت اسبوعين ..احبج ღ



حبيبج اللي وهب حياته لج ..

طلال ..

ملاحظة/باقة الورد والعطر يذكروني فيج .."





رن جوالها طالعت الاسم (المدير )

استغربت .. هل بترد ؟؟ ولا لا ؟ طالعت الجوال واخيرا ردت

" السلام عليكم "

"وعليكم السلام نعم استاذ طارق "

حست بارتباكه لما قال " آنسة شمس اتمنى انج تقبلين عرضي انا موافق اعوضج بموظفين جدد بس ترجعين للدوام "

" استاذ طارق اعذرني لكني تعرضت لاهانه كبيرة "



" آنسة شمس اعتذر شخصيا عن كل اذى وكل تعليق تسببت فيه ..مانقدر نخسر انسانه بخبرتج وقدرتج .. نتمنى عودتك .."

قالت شمس بعد تردد " مايكفي "



حتى لو قلت لج ان عبدالعزيز وسلطان انتقلوا وناصر استقال ؟"

" انتقال واستقالة ؟ "



" اي نعم آنسة شمس اذا تبين تنقذين عملج في القسم للسنوات اللي طافت يفضل انج ترجعين بسرعه .. والا بيستلم القسم طاقم جديد وبيخرب كل شيء ."

" برجع اداوم الاسبوع اللي ياي "



قال طارق بسرعه " أتمنى بكره ؟"



" خلاص ..بكره "



صكت التلفون وحست ان في شيء جديد غريب شسبب الانتقال وشسبب استقالة ناصر ؟؟ ناصر اللي كان عثرة في شغلها ؟ بس بتخسر سلطان .. اللي كان مجتهد دائما ..



نزلت تحت بعد ما دست الرسالة في الدرج .. وانتبهت لظرف ثاني لونه ازرق كان في الدرج اول مرة تشوفه بس الرسالة بصمغها مب مفتوحه ..افتحتها وبدت تقرأ



((غرورج يعيش في داخلي انسان ...

يا شمس حياتي يا نجمة الأكوان ..

سأرحل

لكنك سترحلين معي ذكرى في قلبي .

. سأعبر المحيطات لأنسى .

. وستبقين في عيني الذكرى ..

سأنسى امسي وحاضري ..

لكن لا اعرف كيف سأنساك ..

تألمت كثيرا لمجرد التفكير بك .

انت حلمي الدائم سأبقى أحلم بك طوال حياتي ..

سأحلم بلقائك وبإبتسامتك ..

لن تفهمي ابدا ماتعنين لي لن تفهمي ضياعي وصدماتي .

.ولن تفهمي ابدا حبي لك ..

فأن أعرف ان هناك شمسا سكنت الارض

وأنني أحبها .. أحبها لقلبها .. لرقتها وعاطفتها ..

لذكائها وكلماتها .. لدمها الذي يسري في عروقها ..

يمنحني سببا للتنفس بعد ان انعدمت الأسباب ..

لن انسى ابدا رغم استحالة علاقتنا ..

تذكري يا شمسي .. تذكري اني في اكثر لحظتي ألما ..أسلي قلبي بذكراك ..

يا وردة ياسمين عطرت آلامي .. )))



انصدمت شمس .. هالكلام مستحيل يكون من طلال .. بدون وعي امسكت جوال واتصلت في الريم ..



" هلا شمسه . شذكرج فيني من الصبح ؟"

شمس ـ " الريم . اليوم وانا ارتب اغراضي لقيت شي .."

ضحكت الريم "شالشي العجيب اللي لقيته وذكرج فيني ؟؟ "

قالت شمس في كلمات مختصرة " ظرف ازرق .."

قالت الريم " و.. وبعدين ظرف شاللي في هالظرف ؟؟"

قالت شمس وهي تقلب الظرف " هو باين انه قديم بس ولا مرة لاحظته .. بس من كم يوم كسرت الدرج و..اعتقد انه كان منحشر في زاويتة .."



قالت الريم باستغراب " الخلاصة شمسوه شاللي في الظرف ؟"

قالت شمس بتردد " خاطره .. سأرحل .."

سكتت الريم وحست شمس انها تعرف شي قالت لها تترجاها

" انتي تعرفين شيء عنها ؟؟ قولي "



" اذكر اني انا حطيتها من وقت طويل .. من سنين طويلة ."

اشهقت شمس " من من ؟ .. من طلال ؟؟"

ردت الريم " لا طبعا .. من .. عايض "

بح صوت شمس " عايض ؟"

هالاسم اللي ماسمعته من زمان ولافكرت في صاحبه .. قالت مب مصدقة

" مستحيــل .. "

" تدرين انه كان يحبج "

" مستحيل .. بالعكس كان يحتقرني "

" شمس شفيج ينيتي ولا زهايمر ؟ عايض طلبج بس ابوج طرده !! قصدي رده "

"عايض ؟ليش ما قلتي لي ؟"

قالت الريم بيأس " شتفرق ؟؟ وبعدين الرسالة حطيتها بعد سفره .. هل كنت بتنتظرينه ومابتتزوجين طلال ؟؟ أصلا انتي ماكنتي تحبينه .. كنت دايما مغرورة معاه .. "

" مغرورة ؟"

" ايه ..قال لي انج قلتي له مرة ان دربكم مب واحد .. "

" ايه لأنج ماشفتي شلون كان يعاملني .. كانت طريقته غريبه وأنانية .. كل كلامه كان عن بنات عمج .. ما أدري شيقصد بس كان يقهرني وايد .. هو صراحه استحق اني اتجاهله بكل جدارة .. بعد هالسنين ايي وألقى هالـ..الأكتشاف ؟؟ كان يحبني ؟ مستحيل ريموه ليش ؟ .."

قالت الريم بهمس " يمكن كان يبيج تنطرينه .. "

" ما اعتقد ما أعتقد ...... نسيت اقولج ترى برجع وظيفتي بكره بعدين بقولج التفاصيل .. بروح الحين واقول لمعجبة .باي . "

"باي "

نزلت شمس ونست الرسالة في يدها .. معقوله هالاكتشاف اللي تأخر ؟؟ قبل لا يدخل طلال في حياتها كانت في مراهقتها تحب عايض .. هالسر اللي ما كشفته لأحد أبدا .. لأن الكل كان ينظر له بنقص .. بس كان يغيضها وايد كان يمدح بنات أعمامه ويقول انه يبتزوج فلانه أو يمكن فلانه .. كانت تغار بجنون بس قررت انها تعامله بغرور .. وتطنشه .. بس كانت دايما تبجي في الغرفه اذا رجعت من بيت الريم .. كم كان عمرها ؟؟ 16 او 15 .. بس قالت لها الريم انه هاجر امريكا حست ان حياتها انتهت ..واستمرت في مرحلة كآبة لين في يوم التقت بطلال في بيت جد الريم .. وسحرها طلال بمعاملته لها . كان يعاملها كأنها أميرة .. رغم انها كانت تروح للريم في اوقات عشوائية بسبب دوامها لكنها لقته دايم هناك .. يلتقيها عند الباب .. وأحيانا تناديها الجدة تيلس معاها وكانت ماتردها وكان ييلس مع اليده كانت شمس تستحي وايد فما تتكلم .. حبت طلال بكل جوارحها .. رغم كل جروحها الحالية لكنها كان ساكن قلبها .. لكن عايض .. حست انه شيء ققديم مدفون تحت اكوام من النكران والكبرياء .. لكن رسالته وهالخاطرة اللي بدون وعي تمت تقرأها بخط يده أكثر من مرة .. ليش خط اليد مميز ؟؟ كأنه بصمه لصاحبه ؟ .. يحمل ذكرياته وشخصيته ..

" شمس شتسوين ؟"

كانت شيخه يايه لابسه بيجاما وردية ورافعه شعرها وبيدها كوب نسكافيه ..

" أسترجع الماضي "

أعطت الرسالة لشيخه اللي تم تقرأها منبهرة .قالت برومانسية وعيون حالمة

" طلال .؟؟"

" لا .. "

افتحت عيونها بوسع وقالت مستغربة " عيل منو ؟"

ابتسمت شمس وقالت " تذكرين الغثيث ؟"

اضحكت شيخه " هاللقب ما استحقه الا عايض الله يذكره بالخير .. تذكرين كان يغثنا .. صج كنت صغيرة بس .. كنت انقهر وايد منه .. لحظة .."

وتغيرت ملامح شيخه " منه ؟؟ "

هزت شمس راسها بأي .. وقالت " اكتشفتها اليوم .. أفكر لو اكتشفتها من قبل قبل اكثر من عشر سنوات .. هل كانت حياتي بتتغير ؟"

" ما أدري يا شمس .. هل بتعتقدين كان بيتغير شي ؟ هو ماطلب منج تنتظرينه ولا حيرج له .. وبعدين محد سمع عنه من زمان .. وبعدين لو قارنتي بين اسلوب طلال الله يرحمه واسلوب عايض كان طلال بيغلب بالراحه .. "

ابتسمت شمس " صدقتي .. طلال كان غير .. وعايض كان غير .. لو تفتح عمل الشيطان .. خل ننسى هالامر .. "

وصكرت الرسالة وشربت من كوب شيخه شوي وقالت " ترى برجع بكره الدوام .. بيغيرون الستاف والمدير اعتذر "

ابتسمت شيخه " صدق عالبركه الله يوفقج .."



" متى بترجعين الجامعه ؟"

" ما أدري .. يمكن اروح بكره اشوف نتايجي .. اذا رسبت ابي منج واسطه اشتغل معاج .."

ابتسمت شمس " لاتفاولين الله يوفقج .. "





نقلت شمس خبر رجعتها للشغل لمعجبة وطلبت منها انها ماتقول لأمها اي شيء .. بعدين طالعت غرفة امها كان محمد يلعب سوني مع نوير .. طلت من بعيد وابتعدت ..

[موكاتشينو]

الفصل السادس الجزء 2___



انصدمت شيخه .. قالت لها عليا " انتي الوحيده اللي اخذت اي في مادته .. مبروك .."

ماقدرت شيخه انها تبتسم .. " الله يبارك لج .. خذتي صيفي ؟"

" ايه .. أبي أخلص .. تعبت . بروح اشرب كوفي تيين معاي ؟"

قالت شيخه " لا .. عندي مشوار .. بشوف وحده من البنات .."



بدون وعي توجهت لمكتبه طقت الباب

" تفضل "

ماكان حد في الغرفه غيره .. قالت بلهجة باردة وتعمدت انها ماتطالع له

" لاتفتكر انك بالدرجه اللي اعطيتني اياها بتشتريني .. انا المفروض ارسب في هالمادة .. "

" شيخه .."

" لاتحاول .. لاتفتكر اني برضى بال a "

" شيخه اسمعيني "

" ما أبي أسمعك ..أنا ماييت عشان أسمعك .. أنا ييت أقول لك "

" بس خلاص انتي نجحتي شبتسوين تشتكين .؟ "

" ايه ..."

وقف وقال وهو يرتكز على مكتبه " شيخه .. اسمعيني .. انا غلطت .. وسببت لج وايد اذى .. والاي مجرد تعويض ما ابي منج شي ولا ابي اساومج على شي ..وانا آسف أني عرضت دراستك لمساومات رخيصة اقبلي اعتذاري "



طلعت شيخه من عنده وماتعرف بتشتكي ولا بتنسى الموضوع .. طلعت وهي ترتجف .. حس بغلطته شي زين لكن تسامحه ؟؟ .. لا وألف لاء ..



انضمت لعليا وشربت كوفي بعدين رجعت البيت وقالت لشمس فالتلفون كل شيء .. كان شمس تحاول انها تنظم الشغل بس تعبت لان الفوضى لاتطاق .. واستغلت مكالمة شيخه انها تستريح شوي ..

"انت تحبينه ؟ "

سكتت شيخه شوي بعدين قالت " هو جرحني قبل لا أحبه .. اهان كرامتي قبل لا اعرفه .. مامداني احلم ... كنت معجبه فيه جدا .. وحسيت باعجابه ..لكنه قتل كل الفرص باللي سواه .. لو خطبني كنت بتعرف عليه واحبه اكثر بس للأسف .. قتل حبي وهو وليد "



شمس " فديتج لا تزعلين عليه "

شيخه " المسألة أني حسيت اني خسرت الثقة في كل اللي حولي .. فيه في فجر في نوير وصافيه .. اللي بسبب واللي بدون سبب .. بسببه تحطمت فيني آمال واحلام .. ماتتصورين يا شمس انه حطم فيني ثقتي بنفسي وحبي لكم .. صرت اشك في كل شيء بدون سبب تولدت كراهيه في دااخلي لظروفنا وحياتنا .. والحين احس اني قاعده اخسر امي .. امي ابتعدت عني من ملجة الريم .. حتى صباح الخير ماتتقبلها مني .. وكل السبب هالأستاذ... استغفر الله .. شمس تعبت من الكلام بسكر الحين .. ردي لدوامج "



شمس " شيخه .. لاتعتقدين اني ما افهمج .. انا مريت في هاللحظة اللي انتي فيها الحين .. لاتستسلمين لحزنج وعصيبتج ..وصدقيني ..بتمر هاللحظات بصعوبه لكن المهم انها بتمر "



مرت الساعات وشمس تحاول انها ترجع القسم مثل ماكان سوت فرز لكل الملفات والمعاملات وخلال وقت قياسي نظمت اغلبها ..كانت مجهدة وتعبانه لدرجه انها رجعت البيت نامت على طول ..





*********



" ديده .. ابي اشوف امي "

ردت عليه جوزة " حبيبي امك نايمه .."

" لا مب هذيك .. ابي امي خلود .. "

جوزة ـ فديتك ماما شمس طيبه وتحبك .. وماما خلود سافرت بترجع بعدين ..

حست جوزة بذنب كبير انها تكذب على الولد .. اللي قال بنبرة حزينه " متى بترجع ؟"

حاولت جوزة انه تنسيه " شرايك حبيبي نروح مدينه الالعاب ؟ زين تبي سناء ولا جنغل مدري شنو ولا الاند مارك ؟"



سكت محمد واللي لاحظته جوزة انه طفل مب متطلب مثل باقي الاطفال دايما تحاول ان تغريه بالشوكلاته والالعاب لكن مايجذبونه وايد .. حتى مرة خرقت قوانين شيخه في الاكل الصحي وشرت له بيبسي لكنه ما قرب له ولا كأنه طفل صغير همه لعبته واكله . .



" خالتي نوير موجوده ؟ "

هزت جوزة راسها " اناديها تلعب معاك سوني ؟"

هز راسه موافق .. كابرت جوزة على نفسها رغم انها ماتكلم نوير فنادتها تلعب مع محمد وتمت تراقبه من بعيد .



ماكان يلعب بحماس ..كأن في شي منطفي في هالطفل.. الطفوله ..



دخلت معجبه وكان ويهها شاحب وتوها راده من الصالون .. والهالات تحت عيونها بشعه

" شفيج ؟ ..ويهج كأنج مب نايمه من اسبوع ؟"

" جوزة تعبت .. الارق ذابحني والتفكير اليوم غلطت في الحسابات عشر مرات زين دليت الطريق في السواقه زين مادخلت لي في عمود .."



ماعلقت جوزة ماتبي تزيد معجبه هموم وتحسسها بانها غلطانه .. ..

" روحي نامي عجوب ريحي عمرج ويهج شاحب مافيه دم . "

توجهت معجبه لقسمها ..وكانت ناسيه جوالها في القسم كانت مس كولات من ناصر وايد لكنها طنشتها ..

رمت بنفسها على السرير وقلبت في قنوات التلفزيون .. وبعد لحظات رن الجوال .

ردت بدون ماتشوف من متصل لانها كانت واثقه انه ناصر " ألو "

ناصر ـ وينج ؟

معجبه ـ موجوده ..

ناصر ـ معجبه المسج فهمتيه غلط

معجبه ـ امم .. زين خذ منك يومين يلا فكرت في سبب مقنع ؟

ناصر ـ قصدت أنه مانشوف بعض وايد فزوجه مثلج بعيده عن زوجها لازم مايكون عندها هالبرود ورده الفعل هذي .

معجبه ـ والمطلوب اصدق هاللي قلته ؟

ناصر ـ ليش تحسين انه مب منطقي ؟

معجبه ـ لا اسمح لي .. من انا علشان اكذبك .

كان واضح ان سخريتها ممزوجه بدموع ..تمنى ناصر انه يشوفها في هاللحظه .. يحبها لكنها للاسف ماراضيه بتسوية



ناصر ـ تبين اسافر معاج امريكا ولا اقطع تذكره والحق العيال وامهم .



معجبة ـ امريكا . ؟



ناصر ـ ايه انا وفايز توصلنا لخطه تجمعنا .. .

معجبة ـ اي خطه ؟



************

[موكاتشينو]

الفصل السادس الجزء 3

كانت الريم مب مصدقه هالاشعار والمسجات اللي يطرشها لها فايز .. كانت متحفظه تجاه .. يكلمها ترد عليه برسميه تلوع الجبد . .



قرأت المسج للمرة الثانية وهي عاقده حياتها

"

اذا شفت البشر تكبر وتنسى الحب وايامه

ترى حبي

طفل يحلم وانت

كل احلامه

ابد لايشغلك بعدي

ولاتجرحك ساعاته

ترى عمري فدا ايامك وروحي دوم ولهانه

حبيبي

ماقصدت ابعد وربي ماقصدت ابعد

عسى ربك يعدم البعد ويمحي كل ايامه



ردت ( ( شكـرا لهذه الكلمات الطيبه والمشاعر الاخوية ))



فايز على الطرف الثاني انقهر .. بس بعد لحظات مات من الضحك ..كان ناصر جنبه توه مسكر من معجبة ومبتسم ..

" أخيرا بديت اجذب انتباهها شوي تعبتني والله كل الفترة اللي طافت وحنا في مجادلات مستمرة .. يوه نسيت اتصل بالجريده قلت لأم يوسف تطرش المقالات لرئيس التحرير قبل لاتسافر بالفاكس "



كان ناصر يكلم نفسه لان فايز كان يطالع الجوال وعيونه مركزة يكتب مسج

(( مشاعر اخوية ؟ .. الريم .. مشاعري تجاهج مافيها اي شي اخوي ))

بعدين رفع عيونه لناصر ـ شكنت تقول ؟

ضحك ناصر ـ لا الظاهر الريم ماكله عقلك كله ..

فايز ـ ايه ..الريم .. لاء هذي قصة ثانية خلها على جنب ..

ناصر ـ كلمتها عن الخطه ؟

فايز ـ لا ..بروح لها بعد شوي واتفاهم معاها فيس تو فيس ..

ناصر ـ انزين شنو عشانا ؟

طالع فايز الساعه كانت ست ونص ـ بناكل برا .. قوم ..

ناصر ـ يا اخي ملان من اكل المطاعم صار غذانا وريوقنا وعشانا .. ابي اكل بيت ..

فايز مبتسم ـ عيل تعال بيت الريم .. بطرش لها مسج اني بتعشى عندهم .

ناصر ـ شالسالفه الساعه ست بتبلشها بالطباخ هالحزة ؟؟ مب عدله ؟

رفع فايز التلفون واتصل فيها





ـ السلام عليكم



الريم كانت متفاجئة من مسجه الاخير .. .مابيعاملها كنها اخته صج ابتلشت .

ـوعليكم السلام ..

فايز ـ شلونج الريم ؟

الريم ـ الحمدالله بخير .. شلونك اخـ.. فايز ..

فايز ـ زين ماكملتيها كان عصبت عليج وزعلت ..

سكتت الريم ماعلقت ..

فايز ـ الريم بسألج .. تعرفين تطبخين ؟

الريم ـ هيه .. اعرف ..

فايز ـ ادري في كلافه عليج لكن انا وخويي ناصر ملينا اكل المطاعم ..

الريم ـ حياكم تفضلوا ...

فايز ـ بنيي الساعه سبع ونص .. لان في موضوع ابي اكلمج فيه .. انزين الريم ابيج انتي اللي تطبخين مشتهي آكل من يدج ..



الريم ـ ان شاء الله .

فايز ـ عيل اخليج في امان الرحمن واشوفج بعد شوي.

الريم ـ مع السلامه ..



صكر فايز من عندها ولف على ناصر ـ وافقت .

ناصر ـ صج انك مجنون ..

فايز ـ مافيها شي آكل من يد خطيبتي ...

ناصر ـ بس انا اذكر المدام هي اللي تعزم مب الريال يرز وجهه ويعزم نفسه مثلك .

فايز ـ مافيها شي .. بعدين انا كلمت ابوها وافق مبدئيا على الخطة بشرط ان خالتها تكون معاها .. كنت بطلب خالتها جوزة بس .. انت كسرت خاطري فقلت اسبوعين تغير فيها جو وتصفي هالمشاحنات اللي بينكم ..

ناصر ـ ماراح تصفى هالمشاحنات أبدا .. انت ماتفهم معجبة .. كنت اتوفعها سهله .. لكنها يا إما صعبة جدا وكبريائها قوي . أو .. شهر العسل خلص ..





طالع فايز الساعه وقال ـ يلا .. قوم بدل ملابسك ..



*****



في الناحية الثانية كانت الريم في المطبخ تجهز العشا وكان هالشي بسيط بالنسبه لها .. ساعه ويجي هو وناصر تقدر تسوي فها اشياء وايد .. جهزت كل اشياءها وبدأت تطبخ باستمتاع .. لكنها تذكرت ان فايز قال لها ان في موضوع يبي يكلمها فيه .. استغربت شالموضوع ؟ كانت المغرب طابخه مكبوس اللحم على اساس تعزم شمس تييها لكن شمس حتى ماترد على التلفون .. بسرعه سوت سندويشات ديك رومي مدخن بالجبن ووحمصتها بالتوستر وسلطه معكرونه بمايونيز وسلطة ماش بوتيتو بالماسترد وصلصة الكاري بالدجاج الحار وسلطه يونانية وشوربة فطر .. وفرحت انها اليوم كانت مخططه تعزم شمس فسوت لها شيزكيك بالاناناس ..



رتبت غرفة الطعام وجهزت االطاولة وجهزت العصاير .. تمنت لو ان كان عندها وقت اكثر كان سوت لهم ورق عنب وتبوله اللي الكل يمدحها ..



حطت الشاي والقهوة وحلو القهوة اللي كانت مسويته الصبح في المجلس .. طالعت الساعه كانت سبع ونص بأي لحظة يدخل فايز وه مبهدله بمريلتها وريجه الطباخ .. طقت الباب على جدها وخبرته بجيه فايز ورفيجه ..

عيسى ـ ماقالوا لج ليش يايين ؟

الريم ـ لا يا يدي كلمني وقال انه ياي عنده موضوع يبي يكلمني فيه .. .. جهزت العشا والسفرة زين اني كنت مجهزة اني اعزم شمس .. ولا كان الحين تفشلت ..

عيسى ـ انزين انا اسمع صوت سيارة . .على مانتعشى روحي غيري ملابسج وتعدلي .. طالعه كأنج خدامه بمسلسل مدبلج مع هالمريول ..

ضحكت الريم على مزح جدها معاها وقالت بخبث ـ وانت شعرفك بالمدبلج يدي ؟ وين يدتي عنك ؟

ضحك عيسى ـ يبه التلفزيون يعلمنا كل شيء .ويدتج في بيت عمج .. . روحي الحين يلا ريلج وصل ومب حلوة توكم مالجين من ايام ويشوفج مبهدله ..عيل شبتسوين بعد عشر سنوات ..

ضحكت الريم واركضت لغرفتها خذت شور سريع وتركت شعرها المبلل مفرود حطت شوي بودر وكحل من شنطة المكياج الصغيرة الي اعطتها اياها شمس بعدين استشورت شعرها تجفيف عالماشي .. تعطرت والبست لها بدي ابيض وتنورة سودا وصندل اسود .. . حست ان شفايفها شاحبه .. طلعت قلوس وردي وحطته طالعت التسريحه كانت حاطه دبلتها عليها وساعتها اللي اعطاها اياها فايز البستهم.. حطت لها شيله على راسها ونزلت تحت للصالة اجلست تطالع التلفزيون كانت الساعه صارت ثمان وشي ..









في غرفة الطعام اللي بين الصالة والمجلس كان فايز ياكل مستمتع وهو يطالع ناصر بانتصار .. خلصو الحلو وشكروا الجد على الضيافه ودخلوا للشاي والقهوة وتم يتكللمون عن اشياء كثير .. بعدين طالع فايز الساعه كانت ثمان ونص حك حواجبه وقال منحرج ـ يدي الريم موجوده ؟

الجد ـ اي يبه ادخل لها .. البيت محد اتصل لها خل تطلع لك ..

فايز استأذن ودخل الصاله بعد ما طق الباب ..



وقفت له فجأة منصدمه قال مبتسم " مب قلت لج ابيج تطبخين لي ؟ "

الريم ـ انزين انا طبخت .. كله شغل ايدي ..

فايز ـ على جيه بيزيد وزني في الشهور اليايه ؟

انحرجت الريم وفكرت يعني بيبلشني بالطبخ من اول الشهور ؟



فايز ـ تسلم يدج على الطباخ .. نفسج في الاكل روعه .. أبي أعرف شلون محافظة على وزنج وعندج هالموهبه الروعه ؟

الريم ـ الله يسلمك انا ما اطبخ دايم .. وفي الصيف ما اكل الا عسكريم .. يدي ويدتي اكلهم كله خفايف مايقدرون على الدسم عندهم كليسترول .وابوي ما يتم في البيت وايد .. . "



فايز ـ عسكريم ؟

الريم ـ ايه . ..

فايز ـ انزين الريم .. شلونج ؟

ابتسمت الريم ـ الحمدالله . ..

فايز ـ انا وناصر خذنا الموافقة ..

الريم باستغراب ـ موافقة ؟



فايز ـ فكرت بعد ماطلبتي مني انج تسافرين دبي .. ليش ما نضرب عصفورين بحجر ونسافر امريكا ندور على اخوج عايض ونخليه يحضر العرس .. وسياحه ..وتجهزين اغراضج من هناك .. بالمرة ..

كانت الفرحه واضحه على ملامح الريم " صج ؟ ..



فايز ـ ابوج وافق .. ومعجبة وافقت ..

الريم ـ معجبة ؟

فايز ـ ايه .. بتروح مع ناصر .. ها شرايج ؟

الريم ـ موافقة .. موافقة اي شيء بس اشوف عايض .مشكور فايز مشكور ..

وبدون وعي تمت تبجي طالعها مستغرب ـ كل هذا علشان تشوفين عايض ؟

الريم ـ ايه .. ماسمعت عنه من أكثر من عشر سنوات .. احس اني نسيت ملامحه .

فايز ـ لكن هو ليش ما سأل ؟ ليش ما اتصل ؟

الريم ـ هو ما هاجر إلا عشان ينسى كل شيء .. وكان جاد لدرجه انه قطعنا كأنه بينسانا اول شيء .

حس فايز بشعور عايض .. كان مكانه من ست طعش سنه كان بس يبي ينتشل نفسه من كل اللي حوله ..وسافر مصر درس هناك واستثمر فلوسه وصار من انجح رجال الاعمال رغم عمره الصغير .. عكس ناصر اللي ابتعد عن هالجو .. وبمجرد وفاة ابوه السنه اللي طافة صفى كل شيء وتم على اعمال بسيطة توفر له دخل ممتاز .. بغض النظر عن الثروة اللي حطها في البنوك الخارجية .

الريم ـ متى السفر ؟

فايز ـ بعد اسبوع .. جهزي نفسج يا عمري ..

حس ان الكلمة اطلعت لا اراديا منه . كانه تعود عليها .. ووجه الريم شحب اكثر حتى القلوس اللي حاطته وماكانت حاطته ببراعه مجرد لطخه مافاد كان وجهها شاحب ..

الريم ـ فايز .. ممكن اطلب منك طلب ؟

فايز ـ آمري.

الريم ـ لاتستخدم هالكلمات وهاللهجة معاي ..

فايز ـ مافهمت ؟

االريم ـ انا انسانه غير عاطفية دفنت المشاعر واسماءها من انولدت في دفتر موصوم بالعار .. لما اسمع هالكلمات انجرح وانحرج ..

فايز ـ الحب ؟ لج حق مثل كل انسان في انج تحبين وتنحبين ..

الريم ـ لا .. هالحق انا تنازلت عنه ...

فايز ـ لكن انا ماراح اتنازل عنه .. اللي احسه تجاهج اكبر من اني اسكت عنه ..

الريم ـ فايز ارجوك ..

فايز ـ لا .. انت ارجوج .. احنا بدينا حياة جديدة مع بعض .. وانا مرتاح ..لاتخليني ابتعد عنج افضل اكون واضح معاج ..هذا حق من حقوقج علي ...اني اعاملج بـ ..

الريم ـ لا .. لا تكمل .. فايز على الاقل مبالحين .. الوضع جديد علي تماما .. وما بتأقلم بين يوم وليله .. جنبني هالعبارات..... .............وهالمشاعر على الاقل خلال هالسفر اللي اذا انكتب بأذن الله.



حس فايز بحزن .. تمنى لو يعيش معاها قصة حب .. لكنها بدأت ترفض وهو كان مقرر انه يداويها مايزيد جروحها ..بس في تقدم .. الريم بدأت تكلمه وترتاح له .. لازم ينطر عليها .. وعنده الصبر الازم لازم مايستعجل .



ـ انزين . .. بحاول ..عن اذنج ..

التفت يبي يطلع لكنها قالت ـ لاتزعل مني ..

فايز ـ لا ما بزعل ..جهزي نفسج للسفر ..

طلع ورجع للمجلس كان ناصرتكلم مع الجد عن جده اللي كان يعرفه الجد من قبل .. وبدون شعور تم فايز سرحان يفكر لين وقف ناصر واستأذن واستأذن معاه فايز ..



ـ ماوافقت ؟

ـ بلى .. وافقت ..

ـ عيل شفيك ؟؟

ـ لا .. بس افكر ف الشغل ..



كان فايز دايما اذا يبي يخبي على ناصر ارتباكه ولا مشاكله يقول شغل وبطريقه لاشعوريه يغير ناصر السالفه لانه مايحب الشغل اللي يهلك فايز نفسه فيه ولا يحب خرابيط التجار ..تعقد كفاية من ايام ابوه .



************