رواية كلن بقدره يحدد مقامه يا ولد الناس كاملة 2014

[موكاتشينو]

البارت التاسع عشر


قراءة ممتعه



& صباح يوم جديد &


* الوليد فتح عينه وحس بصداع تحرك من السرير وراح الى اخذ مسكن لمى جاء بيقفل الدرج حصل اوراق تحت علبة الادويه اخذ الاورق وكان الخط غريب مو خطه وجلس على السرير يقراء ويتعمق ببالكلام وفجاء تذكر الوليد حلا خاف انها لسى بالسياره واختنقت من الكتمه نزل بسرعه وفتح السياره ما حصل احد راح يدور لها ما حصلها *


& عند العرسان &


* فتحت بيسان عيونها وشافت الغرفه فاضيه قامت وكانت بتطلع تشوف وين عزام بس لمى شافت شكلها اخترعت وعلى طول دخلت الحمام وواخذت شور ورتبت شكلها ولبست لقن تايقر اسود ورمادي و بلوزه اسود كمها قصير ووسيعه وفكت شعرها وحطت مكياج وطلعت حصلت عزام جالس يطقطق بالجوال *

عزام ببتسامه : صباح الورد
بيسان بخجل : صباح النور
عزام يلطف الجو : تراك جوعتيني صار لي ساعه انتظرك
بيسان تمسك بطنها : وانا ميته من الجوع
عزام ابتسم وقام لعندها : يخسي الجوع وانا موجود تعالي طلبت اكل بس انتظرتك تجين



& عند روان &

* صحت من النوم وهي لسى على وضعها فجاءة دخل ثلاث رجال الاول طويل ومعضل ومملوح الثاني جسمه وسط ومو طويل مره ومزيون والثالث تقريبا كبير في السن *


3 : ي كثر ماتعبتينا لعد ما حصلناك
روان بعصبيه : وش تبون مني ي كلاب
2 بخبث: هدي ي حلوه هدي عشان نتفاهم
روان : يحقير فكني
2 ببخبث : هدي وافكك
روان تسايرهم : هديت قول وش تبي
3 ببرود : شوفي احنا عندنا بضاعه ونبيك تكونين معنا عشان تسلمين البضاعه
روان بصدمه : نعم
2 بضحكه عاليه : شفتي كيف الامر سهل ومايحتاج صراخ
روان : ليه انا اللي اخترتوني بالذات
3 : لان ولا واحد بيشك انك بتهربين بضاعه فهمتي ليه
2 : سعود ليه ساكت
1 سعود : مافي شي اقوله
2: طيب جيب لها شي تاكله واكلها
سعود : طيب

* طلعو الثلاثه وتركو روان مصدومه *


& ببيت سيف &


* كان الكل مجتمع على الفطور بس كل واحد تفكيره بمكان ثاني . سيف يفكر كيف يكلم اهل . مها تفكر بجرائة نايف . شادن تفكر بمرض نواف . والام والابو يفكرون باللي شاغل بال عيالهم *

سيف : يبه ابي اكلمكم بموضوع
ابو سيف ترك الملعقه وناظر لولده بتركيز : اسمعك
سيف : يبه انا ابي اتزوج
ام سيف : من بكره ادور لك على وحده تناسبك
سيف : لا يمه مو كذا
ام سيف : وشو
سيف : يعني في وحده في بالي ابيها وشاريها
ابو سيف : من هي ومن بنته
سيف : بنت ابو نايف جمانه
ام سيف بصدمه : جماااانه ماغيرها
مها : واااااو زين ما اخترت
شادن : وربي تعرف تنقي
ام سيف بعصبيه : اسكتي انتي وياها
ابو سيف : والنعم والله بس متاكد من اخنيارك
ام سيف : انت الثاني وش تقول عاجبتك اللي بيختارها
ابو سيف : ايه عاجبتني ويكفي ان ولدي هو اللي اختارها
سيف : يمه اذا تحبيني صددق وتبين تسعديني زوجيني جمانه ما ابي غيرها زوجه
ام سيف بدت تهدى : يصير خير
ابو سيف : روح ي ولدي لشغلك وما يصير خاطرك الا طيب
سيف ببتسامه قام يبوس راس امه وابوه : شكرا . يلا مع السلامه

& عند الوليد &


* الوليد خاف وراح لرنا وقالها السالفه وصارو يدورون *

رنا : وليد انا بروح ادور بغرف الضيوف وانت شوف غرفتها القديمه
الوليد تذكر : اي صح ما حاء ببالي يلا بروح لشوف

* افترق الوليد ورنا وراحو يدورون ، اما حلا كانت نايمه من التعب وقبل ماتنام كانت مزكمه وجسمها يوجعها اضطرت تاخذ حبوب زكام ومسكن ومنوم ونامت نومه عميق وكان المكيف بارد والجو بارد ، الوليد دخل الغرفه وشافها نايمه على السرير راح لها يبي يهوشها على الخضه اللي سببتها له بس انصدم من شكلها ، كانت حلا متكوره على نفسها وترتجف من البرد وينزل من انفها دم لدرجه انه كساء المخده بالدم *

الوليد يرفع حلا : حلا حلا اصحي
حلا : ...........
الوليد بخوف اعطاها كفوف خفيفه : ي بنت اصحي
حلا بتضجر منه : .... همممممممم.....
الوليد طلع جواله واتصل على رنا : رنا تعالي وجيبي معك مويه حاره في غرفة حلا القديمه


& عند روان &
* جاء سعود ومع اكل لروان جلس جنبها وجاء بياكلها بس روان لفت وجهها *
سعود بجمود : كل
روان : ما ابي
سعود : تبين تهربين
روان ناظرت له : طبعا
سعود : اسمعي هم جابوك هنا عشان يكسرون راس اخوك انا اتصلت على الشرطه وراح تهربين من هنا قبل ما يجون هم
روان بخوف : اشلون مستحيل
سعود قرب وفك الربط : ليش مستحيل . الحين كلي إلين ادبر سياره نهرب فيها
روان : طيب


& عند العرسان &

* رتبو اغراضهم وراحو يسلمون على اهلهم وسافرو . بالطياره *

عزام مسك يد بيسان : اسف حبيبتي على اول ليله
بيسان ابتسمت : عادي عشان بعدين نحكي لاولادنا انها ليله مميزه
عزام : ههههههههههههه مره مميزه
بيسان : يلا اربط الحزام
عزام يربط : طيب

& عند حلا &

* صحت حلا وودها الوليد المستشفى بس كانت تحاول تبين انها قويه . اما الوليد بهذيك اللحظه عرف وليد انها يحب حلا ومايقدر يعيش بدونها *
الوليد بخوف ؛ هاه دكتور وش صاير معها
الدكتور : حالتها .


*********************************
انتهى البارت التاسع عشر

اتمنى ان البارت عجبكم بس هذا عشان يحمسكم للبارت النهائي انا ما كتبت البارت النهائي لاني بكتبه على حسب توقعاتكم اتمنى انكم تكتبون لي ماتتمنونه لابطالكم في البارت الاخير .

[موكاتشينو]

الباررررت 20 * الاخييييييررررررر*







{المستشفى }



الدكتور : حالتها طبيعيه الحمدلله
الوليد بفرحه بينت من ضحكته : جد اللهم لك الحمد
الدكتور يبي يحرق اعصابه : بس فيه شي ثاني
الوليد اختفت ابتسامته : شنو تكلم ي عبدالعزيز خوفتني
د. عبدالعزيز : يعني مفروض من اليوم ما تتحرك كثير وتنتبه لاكلها لمدة طويله ولا
الوليد برجفه : ولاء ايش
د.عبدالعزيز بضحكه : بيتضرر الجنين وتخسر اول اولادك
الوليد يحاول يستوعب : كيف ما فهمت
د.عبدالعزيز يستعبط : ولود .. دودي .. حبيبي .. قلبي .. النبض
الوليد بعصبيه : عزييييز تكلم زين
د.عبدالعزيز : ي خبل زوجتك حامل
الوليد كان احد كب مويه بارده عليه : شنووو
د.عبدالعزيز : اقولك زوجتك حامل .. على العموم تولد بسلامه ويكبر على يد امه ويتغنج بعز ابوه
الوليد لسى مصدوم : الله يسلمك .. اقدر ادخل اشوفها
د.عبدالعزيز : طبعا تقدر .. يلا عن اذنك
الوليد بصدمه : اذنك معك


{روان}

* جاء سعود وهي كانت خايفه اخذها وطلعو من المكان ولمى ركبو السياره وجو بيحركونها والا وفيه احط يطلق على الكفرات وتفجرت سعود طلع مسدسه وصار يطلق عليه وبثواني اجتمعت العصابه *

1 : برافو تبي تهربها
2: لهدرجه نستك من تكون ووش بيصير فيك
سعود بضحكه شدت انتباهم : لا متذكر زين لا تخافو
1: سعود رد عقلك برلسك واترك لنا البنت اذا ما تقدر تأذيها
سعود بضحكه ويشوف ساعته : نو نو .. تبون نصيحتي لكم دقيقتي ي تروحون او الشرطه بتجي تحطكم بسجن واحد عشان تتوانسون مع بعض
2 : مستحيل ماتقدر تضر نفسك لانك اذا متذكر متورط معنا من البدايه
سعود : لانك غلطان .. انا ما عمري رافقتكم المكان
1 : بس كنت انت العقل المدبر
سعود : كمان انت غلطان العقل المدبر هو اللوء عبدالمجيد الفارس اللي بعد ثواني بيجيكم
2 جاء بيضرب سعود الا والشرطه وصلت : حقييير
سعود : مو احقر منك
1 طلع مسدس واشر فيه على سعود وابتسم : كذا ولا كذا داخل السجن ابرد حرتي قبل لا ادخل
سعود مشى لعنده وسحب يده الين جاء المسدس على راس سعود : كانك رجال سوها وان كنت مستغني عن روحك وتبي تيتم عيالك سوها وان كان تبيهم يعرفون حقيقتك ويشتمونك طوال عمرهم سوها
1: لا تتحدى تعرفني مجنون اسويها
سعود وهو يضحك : هههههههههههه اتحدااااك
..... : طاااااااااااااااااااااااااااااااااخ
روان : سعووووووووووووووووووود




{بيت ابو سيف }


*مها كانت تسوي حلا و شادن جالسه على الطاوله تصورها سناب وتضحك عليها لدرجه ان مها فكرتها انجنت من قوة الضحك *

مها : شادن تستهبلين انهبلتي
شادن ميته ضحك : ههههههههههههه لا بس مدري من وين جتك السناعه بذا الوقت
مها : الحمدلله والشكر روحي جيبي لي نعناع من المزرعه
شادن : خلي وحده من ذولا *تاشر على الخدم * تجيب لك لا ابيك انتي يمكن تعقلين

* شادن راحت وهي تركض وميته ضحك عليها *



{المستشفى }


* دخل الوليد وشاف حلا مقطعه نفسها من البكي *

الوليد بخوف : حلا شفيك
حلا ببكى يقطع القلب : مافيني شي
الوليد : الا فيك شي تكلمي بسرعه
حلا ودموعه تنزل بسرعه : ما ابي احمل ما ابي اجيب منك ولد ما ابيك طلقني خلاص
الوليد مصدوم من كلامها : حلا وش ذا الكلام طلاق ومدري شنو
حلا ببكى اقوى : لا تمثل علي اعرف انك تبي تطلقني بس الحين ما تقدر لاني حامل مااااابيه ماااااابيه بنزله
الوليد بعصبيه : من قالك ذا الكلام بعدين كيف تنزلينه وهو روح مو لعبه
حلا : انت قلت
الوليد : متى قلت
حلا وهي تبكي : قلته سمعنك بأذني وانت تقول بطلقني اذا مجد طلبت كذا وبعدين انا عندي كرامه
الوليد راح لها وباس يدينها وضمها : ربي كتب لنا عمر جديد مع ولدنا ربي كتب لي احبك اكثر من روحي هبله انتي اطلقك انا صح كنت ناوي بس من بعد اليوم مستحيل افرط فيك ثانيه وحده
حلا : ومجد
الوليد : مجد طلبت الطلاق وكانت مصره اني ما اطلقك بعدين ي مجنونه لو تشوفين حالي قبل شوي كان بيوقف قلبي عليك
حلا بحب مسحة دموعها زي الطفله : صدق
الوليد انهبل على برائتها : اكيد عمري كذبت علبك
حلا تهز راسها بلا : ولامره
الوليد : الله يخليك لي ي روحي وتقومين بسلامه وتجيبين لنا خلود
حلا بحب : امين


{روان }

* طلق على سعود النار كانت بقلبه الطلقه وعلى طوال الشرطه مسكتهم بدون مقاومه لان كل شخص فيهم كان مصدوم *

اللوء عبدالمجيد : سعود انت بخير
سعود يتعصر الم : بخير بخير
اللوء : ليه سويت كذا
سعود : لو ما سويت كذا كان الحين فيه ضحايا كثير منكم
اللوء : وتروح ترمي نفسك عليهم الله يهديك
سعود الالم يزيد ويناظر لروان اللي واقفه جنبه تصيح : عبدالمجيد اسألك باللي خلقك تنتبه عليها وتوصلها لبيتها بدون محد يدري او يشك زي ما اتفقنا
روان زاد صياحها : بيموووت
اللوء : اهدي اختي ان شاء الله ما بيصير عليه شي

* جت الاسعاف وشالت سعود والشرطه خذو روان ولمى صارت قريبه وقفو تكسي وركبت وصارو يمشون وراها عشان محد يحس طبعا اللوء اخذ رقم روان عشان يتطمن ان مامشاكل *


{ بيت ابو سيف }


* شادن وهي راجعه للبيت ومبتسمه سمعت صوت راحت لبوابه حصلت نواف طايح على الارض ونايف يهزه يحاول يصحيه وفجاءه صار يصرخ نايف بشكل جنوني ويقول انه مات شادن بهذيك اللحظه مشت ما تدري لوين تروح صارت تمشي بسرعه تحاول تتهرب من الواقع طبت بالمسبح وصارت تسبح وتغوص وتكتم نفسها ولمى يجي طاري نواف تطلع تاخذ نفس وترجع فجاءه كانها تذكرت شي راحت بسرعه للسونه وطفت النور ونامت مكانها *


مها : ترنيم شفتي شادن
ترنيم : يس انا شوف هيا اسبح
مها بعصبيه : هالبطه الغبيه اقوله جيبي نعناع تروح تسفهني وتسبح

* مها راحت للمسبح ما حصلت احد التفتت للسونه شافت النور طافي وصارت تدور لها وهي تدور سمعت صوت اسعاف عن باب البيت خافت ان شادن غرفة وصار لها شي راحت بسرعه تشوف حصلت نايف طايح على الارض ويبكي زي المجنون فجاءه طاحت عينها على نواف اللي صارو يغطونه بالشرشف الابيض وفجاءه في ثواني اختفو الكل ونايف على وضعه *

مها راحت له : نايف
نايف رفع راسه وحصلها : مااات ماات ي مها تؤمي مات معاد بشوفه خلاص هو قرر يتركني اعيش لوحدي ليييه يكذب علي ويوعدني نعيش مع بعض وهو بيروح ليه يحلف لي انه بيجيب ولد ويسميه باسمي ليه يقولي انه بيرقص بزواجنا ليه ليه يقول كلام ماهو قده * وصار يبكي بكاء يقطع القلب ومها بكت معه *

سيف دحل وشاف مها بدون حجاب عصب : مهاااا وجع ليه انتي برا مع رجال بدون حجاب

مها التفت عليه وعيونها مليانه دموع : سيف

* سيف زقف بمكانه لمى شاف نايف منهار واخته تبكي عرف ان فيه مصيبه *

سيف ركض لهم : وش فيكم
مها استوعبت انها بلا حجاب وتخبت وراه : يووه انا بدون ححجاب
سيف بعصبيه : صح النوم حسابك بعدين بس شفيكم
مها ناظرت نايف اللي مو قادر يتكلم ومخبي وجهه بالشناغ ويبكي : نواف عطاك عمر
سيف بصدمه : لا حول ولا قوة الا بالله ادأن لله وأن إليه لراجعون متى ذا الكلام
مها : من شوي
سيف راح نايف : قم معي نشوف
* نايف ناظر له بحرقه كان بيرد بس في رقم بس يتصل ما وقف صار له من بداء يتكلم مع مها *

سيف : رد
نايف : مالي خلق احد
سيف اخذ الجوال اللي مو راضي يسكت : الو
..... : السلام عليكم اخ نايف
سيف : وعليكم السلام مع صاحبه سيف امر اخوي
....... : اتصل عليكم من المستشفى احب اخبركم ان المريض اللي طلع من عندكم بقدرة قادر رجع للحياه وهم الحين بالطريق يحاولو يسيطرو على وضعه الين يوصل
سيف ما قدر يتكلم : ......
........ : الو
سيف : جاينكم الحيين باي


نايف ببكى : ما ابي اروح لمكان برجع البيت اخبر اهلي
سيف بفرحه توه يستوعب : امسح دموعك انت رجال مو بزر وبعدين وش تخبرهم فيه
نايف حط ايده على راسه : المشكله مدري كيف افتح لهم الموضوع
سيف : ماله داعي تخبرهم
نايف عصب : جنيت انت وش تقول
سيف : اللي كان يتصل قبل شوي المستشفى يقولون ان نواف رجع قلبه يدق وهم الحين ما وصلو المستشفى بس بالطريق بيوصلون وبيحاولون يحافظون على حياته
* نايف قام زي المجنون وسيف صار يركض وراه اما مها كانها منسيه محد درى عنها *



{ببيت ابو الوليد }


* طلعت حلا من المستشفى وراحت البيت وجمعهم غلوليد وخبرهم بالمولود الجديد والكل كان بيطير من الفرح *

ام الوليد : اجل بقوم اسوي لكم احلى اكله شعبيه
حلا : لا ي خاله تسلمين بس مشتهيه مرق
رنا : نعععم مرق الله يقرفك
حلا حست انها بتبكي : كيفي
الوليد : رنا انكتمي
حلا : خاله فيه شي ثاني عادي اطلبه
ام الوليد بفرح : تدللي
حلا : ابي اسوي حنا العجايز زمان
الوليد بصدمه : ليه
حلا بفرح : عشان اذا جيت اكل احس فيه ريحة حنا * صارت تبكي * امي امينه كانت دايم تسوي حنا وتاكلني
الوليد يضمها : ابشري ي روحي مالك الا اللي تبينه



{ بييت ابو سيف }


* مها صارت تدور لشادن ما حصلتها راحت لعند المسبح زجلست فكر وين اخته فجاءه صارت تسمع انين دورت لمصدر الصوت وشافت ظل احد




*مها فقدت شادن وصارت تدور لها جلست طرف المسبح وصارت تلعب بالمويه فجاءه سمعت صوت انين بالسونه خافت كثير بس تذكرت شادن وراحت على طول فتحت الباب وانصدمت من شكل اختها ~ شادن كانت مبلله وترتجف وتبكي *

مها : وش فيك ليه شكلك كذا
شادن ضمت اختها بقوه : وربي حبيته ليه راح وتركني ليه يوم صرت احبه ومتعلقه فيه يتركن
مها مصدومه : مين تحبين
شادن زاد بكاها : .........
مها بخوف : تكلم
شادن بس تضمها وتبكي : .......
مها بعدتها من حظنها :ي بنت تكلمي
شادن ببكى : نوووواف
مها ارتاحت : من قالك انه مات
شادن : انا سمعت نايف يقوله
مها تضم اختها وتهديها : بس بعد ما رحتي المستشفى اتصلو وقالو انه رجع له النبض
شادن تركتها بسرعه : تكذبييييين
مها : وهذا شي يكذب الواحد فيه

* شادن ضحكت بقوة وصارت تركض للمسبح وهووووب طبت فيه ومها طبت وراها *

♡☆♡☆♡☆♡☆♡☆♡☆♡☆♡☆♡☆

●•●•● بعد شهر ●•●•●



الوليد : بس اكل خلاص وش ذا الوحم الللي بس تاكلين وتحبسيني معك
حلا تسوي نفسها زعلانه : والله هذا طلبات ولدك يبي ياكل ويبيك جنبه
الوليد : اوك بس انا عندي شغل
حلا : عادي خلصه من النت
الوليد يبوسها ويستعبط : تركتي لي خيار ثاني

{ روان}

* صارت عاشقه بس هي زي العصفور اللي كان محبوس بقفصه وفجاء طيروه ما بتعرف تروح لمين او كيف تلقى حبيبها بس*

{جمانه & سيف }
* سيف خطب جمانه وبعد تردد كبير وافقة ولبسو الدبل وسافرو لنيوزلاندا يكمل دراسته *


{بيسان & وعزام }
* مددو شهر العسل وراحو انكلترا .. قررو يستمتعو بشبابهم وما يجيبو عيال الا بعد سنه *


{نايف & مها }
* نايف خطب مها و غارو كثير من جمانه وسيف وكان نفسهم يلبسو الدبل بسرعه وياخذها ويهرب وصار موظف في شركه كبيره *

{نواف & شادن }
* نواف شفى من المرض بس لسى يتعالج وهو موظف مع نايف بنفس الشركه خطب هو ونايف بنفس اليوم وشادن دخلت طب عام عشان اذا صار لحبيبها شي تقدر تنقذه *



♡☆♡☆♡☆♡☆♡☆♡☆♡☆♡☆♡☆♡☆♡


وبكذا.. انهيت روايتي الاولى.. يالي استمتعت فيها معكم.. ع امل ان
يكون لنا لقاءاخر ... واحب اشكركم ع وقفتكم وتشجيعكم لي .. واشكر المنتدى اللي استقبل مولودتي بقلب رحب
حبيت انهي
الروايه لكم.. بشي تحبونه ما بغيت تكون نهايت اي واحد منهم تضيق الخلق ..
واتمنى تكون الروايه نالت اعجابكم ع صبركم وانتظركم لها...واشكر
كل من شجعني ووقف معي وصبر ع تاخيري..ودي لكم
لا احلل من ينقل روايتي من دون ذكر اسمي او ينسبها له
حبيباتي حبيت اخبركم اني بعد فتره قصيره جدا بنزل روايتي الجديده توأم مشردات بشوارع تركيا وان شاء الله بنزلها بهذا الممتدى الاكثر من رائع

الكاتبة: لمياء محمد