بيت هزاع
فطيم

من ساعه وأنا أسمع صوت التلفون يرن ومحد يشل يا ربي رحت للتلفون وشفت في الكاشف رقم هزاع

رديت
فطيم : ألو
هزاع : هذا بيتي متأكدين ، تحريت داق بيت حد ثاني ، وينكم متوا شو ، وانتي الشيخة نتريا منو ترد علينا ، داقين لمنو بتخبرج
عويت بوزي يا كثر ما يتحرطم
فطيم: نعم شو تبا
هزاع : الليله بسافر كنت بي اسلم عليكم بس ماشي وقت
فطيم : مسرع ما حجزت ، مب مشكله ، هذوه الدرب
هزاع : أكيد أنتي مب مشكله عندج ، داق أبغي اكلم سالم عطيني اياه
فطيم : سالم وين يعرف يتكلم ، كلمتين ويا الله يالله
هزاع : زين حطي التلفون على أذنه عسب أسمه لو حرف ولا نصخه
فطيم : راقد
هزاع :زييييييييييييييييييين خلاص هونت ، المهم تبين شي
فطيم : لاء
سمعت حس أنوثي عنده ، هاي أكيد حرمته اليديده
وسمعته يقول : لاء حبيبي لا تحطين لي هالجاكيت ما ابغيه ، دندون حطي الي تبينه
هزاع : المهم فطيم خلاص أنا بسافر أوكي
فطيم : زين ، درب السلامه
سمعته يقول بصوت واطي : فطيم
تنهدت بنفاذ صبر : نعم
هزاع : سمعتيها شو تقول
فطيم : لاء ، سمعتك أنت
هزاع : ما تبين اقولج شو قالتلي
فطيم : لاء
هزاع : براحتج قلت يمكن حاسه بفضول ، بس
أنتي ممسوحه هالكلمه من قاموسج المهم مع السلامه
فطيم: مع السلامه
صكيت عنه تعالوا نسيت اساله وين بيسافر ومتى بيرد ، والله يرد متى ما يبا اعور راسيه ليش ، رحت لغرفتي عسب اغير ثيابي بروح عند ربيعتي اليوم ؟؟؟؟؟؟

بيت مبارك
5:30 عصرا
مبارك

يا دافي الصوت غطيني باهدابك
ودي رموشك تظللني وتحميني
اسكن فؤادي وافتح للهوى بابك
اروي خفوقي و تربع في شراييني
شفت حصة تقوم وهي مستانسه
مبارك : زين حصيص مستانسه هالقد بس عسب بوديج بيت ابوج تبين فرقاي شو
حصة : ههههههههه لاء بس جد ، أنت أي مكان ما بتكون فيه وياي ساعه لين ما ترضى توديني
مبارك : زين روحي تلبسي سريع أنا بترياج في السيارة
راحت ورحت أنا للسيارة شغلتها ويلست فيها اتريا ، حصيص ونه قتلها بسرعه بتنقعني ساعه أعرفها حصيص
امممممممممممممممم
سمعت صوت تلفوني يرن شليته وشفت رقم آمنه شو تبا هاي
صكيت التلفون في ويها بس ما وحالي الا وانا اسمع ياني مسج
فجيته
((مبارك أنت وعدتني ، والريال يكون عند كلمته ))
تصدقون أول ما قريت اخر كلمه الريال عند كلمته رن تلفوني كنها مؤقته متى بيوصلني المسج وبوصل اخرته رديت عليها
مبارك : نعم
آمنه : هلا بهالصوت
رفعت حياتي مستغرب : شو
آمنه : هلا بك شحالك
عويت بوزي : زين شحالج أنتي
آمنه : طيبه طاب حالك
مبارك : اطمنتي عليه ، يلا صكري
آمنه : زين قلنا اعتبرني اختك يعني ارمس ما تبا تعرف عني شي
مبارك : لاء صراحة ما ابغي
آمنه : اسميه امنه ،عمريه 24 سنه متخرجه من تخصص موارد بشريه ،
مبارك : ما يهمني
آمنه : زين حنطاويه ، عيوني سود ، وشعريه اسود بعد ، وطويله بس لا تخاف اقصر منك
مبارك : لاء والله
آمنه : بلا هيه والله
ابتسمت بالخفيف : آمنه شو تبين
آمنه : ابغي ارمسك
مبارك : وتراج رمستيني ، يلا صكري حرمتي بتي الحين
آمنه بغيض : تخاف منها
رفعت واحد من حياتي : هيه أخاف منها ، شو يعورج انتي
آمنه : ادري تغايضني ، الي مثلك ما يعرف يخاف
فتحت عيني باستغراب : الي مثلي
آمنه : الي عندهم هالشخصيه الجتاله ، أنت تذكرني تعرف بشو
مبارك : بشو
آمنه : تذكرني بالنخله
فجيت عيني باستنكار : شوووووووووووووووووووو
آمنه : شموخك شراتها مرتفع عن كل شي
مبارك : ههههههههههههههههه
تبون الصراحه عيبتني رمستها مب لانها مب بنت لانها مدح لي ،انتفخت، يعني أنا مطيح البنات جيه ، وهالشي الي صغرها في عيني وشفت أني شي كبير اسوي الي ابغيه فيها بس لمجرد أنها تحبني
آمنه : ان شاء الله دوم هالضحكة
مبارك : سمعي انا بصكر
وصكرت التلفون في ويها ، ما حسيتوا هالاحساس عسب جيه مب مقدرين
احساس ان انسان يموت فيك يعشقك ، يمكن غرور يمكن محبه نفس بزياده ما اعرف شو من احساس ركبني بس شفقت عليها ، احاسيسي كلها تجاه حصة ، حصة الوفيه ، ومب يالس اخونها الحين بس لين ما ابعد آمنه واخليها تشليني من بالها ؟؟
انفج الباب ودشت حصة
ابتسمت لها
حصة :تاخرت عليك
مبارك : وايد
ابتسمت : يلا سرينا
مديت ايدي ومسكت ايدها قربها وبستها
تميت ماسك ايدها وقلت لها بحنان :أحبج حصيص
ابتسمت لي ابتسامه حنونه و حركت السيارة بوديها بيت ابوها ، هالانسانه كيف تعنيلي يا ربي ، ان شاء الله افتك من آمنه باسرع وقت ؟؟؟؟؟

شما

وهان الهوى وذبلت زهوره
أقولها ودمعي هدولي
بنساك يامن شفت جوره
أبعد ولو زالت شجوني


يلست عند تلفون البيت وحطيت حذاله مبايلي ويلست اطالعهم
شما : يلا حد منكم يرن سريع
اووووووووف شو ميلسنه هالقد في البيت يلا متى بيسير ، لحظة مب باجر الصبح دوامه ، يعني ما بيكون موجود
، شو يصبرني لين باجر أنا يا ربي ، شو هالحاله ، اممممممممم
سمعت رنه تلفون البيت ما شفت الرقم رديت على طول
شما : هلا
: مرحبا الساع هلا بالعروس
شما : سم يسمك قول آمين شو تبا داق
خالد : شو ابغي داق ابغي عبدالرحمن ، بس صراحه ما توقعت خلي التلفون يرن متخبله تسمعين صوتي لهدرجه
شما : شووووووووو
خالد : هههههههههههههههههه
لحظة؟؟؟ خلا أكون أوكيه وياه الحين الكره بملعبه ؟؟
شما : خالد أنت في البيت ، اذا في البيت عطني عواش
خالد : لاء مب في البيت ، عند سيارتي ، بطلع الحين دقيلها على مبايلها ، المهم مب متصل اسمع صوتج العذب وين عبدالرحمن
عرفت الي ابغي اعرفه ، الحين خلا يولي
شما : وأنا شو يعرفني ، زووووووول
وصكيت في ويهه ما يهمني خلا يولي المهم اسوي الي ابغيه ، اليوم مافي غير اليوم ، هالحظة
شليت بعمري وشليت شيلتي ونزلت تحت بسرعه ، هيه هاي هي اللحظة الحاسمه
ابتسمت براحه وسرت على طول بيت عمي
شفت مرت عمي وعمي يالسين تحت بما أن بيت عمي غرفه عمي وحرمته تحت لأن ما يروم عمي يصعد على الدري ، فبجيه باخذ راحتي ،أول مرة أعرف الفايده من أن غرفتهم تحت
سلمت عليهم على السريع حتى استغربوا سلامي ، بالعاده ايلس أسولف ، بس ماشي وقت ، ورحت بسرعه غرفه عواش فجيتها بدفاشه : عوااااااااااااااااش
نقزت في مكانها وطالعتني : شميم دقي الباب روعتني
شما :أنتي فاضيه ( قتلها وأنا اشدها من ايدها ) يلا قومي سريع
قامت وياي : بلاج وين
شما : شو وين ، غرفه خالد
وقفت مكانها مرة وحدة : شوووووووووووووو ، شو نسوي غرفته
صديت لها وين ايلس افهم هالغبيه الحين : شو شو نسوي ، ابغي افتش غرفته ادور شي
عواش: شميم شو تبين بخالد انتي
شما : حساب جديم بصفيه
وقفت وقالتلي بخوف : شميم أنا ما يخصني لا ادخليني هذيه غرفه خالد روحي روحج أنا ما يخصني مول
شما :شو من ربيعه أنتي بتخبرج
عواش : شما تعرفين أنا ما استجري افتش غرفه خالد ، أنتي جان وايد قويه هذوه الدرب ، ما يخصنيه
راحت يلست على الشبريه ، وفجأة انرسم الرعب على ويها : اوييييييه ، شميم دخيلج لا تفتشين اذا عرف شو بيسوي بج انتي مب ناقصه ابعدي عن خالد احسن لج ولي انا بعد
فجيت عيني : أنتي شو تخرفين ، ما تعرفين بالمصايب تراج
عواتش : أي مصايب
شما :ايهي ، أنتي سالفتج سالفه ، مب مخلصه أنا وياج شكلي اليوم بروح روحي
شفتها لحقتني ومسكتني : زين شميم لحظة لحظة
صديت لها وانا اربع ايدي : ما بتين وياي شو تبين بعد
عواش : اكيد ما بي بس اتري بشوفلج المكان ،أخاف راشد في غرفته
شما :راشد محد
فجت عينها : بعد مخططه وشايفه مسرح الجريمه
هديتها ورحت غرفه خالد مول مب وقتها الحين شفتها يلست في الصاله الي فوق ادريبها عواش خوافه ما بتدخل تفتش الغرفه مب مشكله
أول ما دخلت شفت على طاولته صوره له ، مالت على هالشيفه ، ما تستاهل هالويه ،
هزيت راسي لو ما اخاف يعرف أني دخلت الغرفه ، بقصها له ، ولا ليش اخاف خلا يعرف تراني بهدده بالي بلاقيه في غرفته
قصيت الصوره وفريتها على الارض ، مب الزباله خلا يشوفها ويستانس بعمره هالخبيث
رحت أول شي صوب مكتبه فجيت الادراج ويلست ادور اووووووف مافي شي كلها اوراق عمل
شو يعني ما بلاقي شي ادينه به شو السالفه ، ييتي يت على الفاضي
رحت صوب الكبت وفتحته وشفت صندوق عود تحت أول ما فجيته شفت عطور واوراق وصور
بس للأسف كانت صور خالد كلها ويا شباب تنهدت بضيج
وشفت كتاب في الصندوق ، بعد مثقف ويقرى
ييت احط الكتاب مرة ثانيه في الصندوق بس طاح منه صور
ابتسمت وانا اشوف صور خالد ويا وحدة والصراحة زادت ابتسامتي لما شفت عشر صور وكل صورة البنت الي فيها تختلف عن الثانيه
في اجنبيات وفي عربيات وفي خليجيات مب مهم المهم حريم شليت الصور بسرعه و رديت الاغراض في الصندوق ودخلت الصندوق
بس أول ما وقفت بطلع شفت خالد واقف وهو مربع ايده ويطالعني وهو معقد حياته ؟؟؟

تنصدمت قولوا تجمدت قولوا مت ، كل هالكلمات انرسمت على ويهي لحظتها ،أخ منج يا عويش زين نوهي ادري انها لو شافته وانا داخل غرفته ، بتموت مكانها من الخوف ، بس بعد مب تموتين على طول يعني تشهدي على الاقل خليني احس ، اعرف ، مب يطب جيه
شفته صكر الباب وقفله وحط المفتاح في مخباه فجيت عيني أطالعه ايييييييييه وين يبا هذا
شما : خالد فج الباب
راح ويلس على الشبريه وطالعني بطرف عينه : لاء صرخي ، ابغي ابويه وامايه تحت يسمعون صريخج ، وأنج في حجرتي
كنت خايفه مصدومه بروده عجيبه تسري بجسمي قلت بصوت اقرب للهمس
شما : خالد لا تيب لك ولي المشاكل بطل الباب
خالد :أنا ابغي ايب المشاكل ابغي يقولون انج كنتي بحجرتي وأنا وياج
شما :شوووووووووووو، تخبلت أنت
خالد : جيه أحسن بيزوجونا اسرع
شما : خالد عن الخبال
خالد : شو يايه ادورين ، عيبوج الصور االي عندج ، لا تخافين ما بشلهم حلال عليج
فجيت عيني يعني شافني
بلعت ريجي ومديت ايدي : دوك ما باهم بس خلني أطلع
خالد : شو دخول الحمام زي خروجه
شما : شو تبا
خالد : ابغي يسمعون صريخج عسب ابويه أي ويشوفج في غرفتي
طالعته باحتقار صدق نذل هذا ولد عم بالله عليكم رحت صوب الباب وأنا اشوفه يبتسم
اول ما مسكت قبضه الباب ، لحظة لو سويت الي يبغيه شو بيقولون واحد من الاثنين يا أن انا وياه على علاقه ، يا إنه مينون وشافني في غرفته وما قدر يتحكم بعمره وحاول يعتدي .. ما قدرت أكمل الفكره حسيت راسي افتر ،
صراحة الاثنين اخس من بعض خلا اتفاهم وياه احسن ، يا ربي أنا معتبره عمري ريال وما ازيغ وما اصيح هذا يبا يخرب عليه كل تخطيطاتي واستيالي وكل شي ، ما بجذب عليكم خفت منه من نظراته ما كانت نظراته عاديه كانت شيطانه كلها تحدي وغرور
قام من الشبريه وراح صوب مكتبته
خالد : يلسي يلسي ،
رحت ويلست على الشبريه وأنا اطالعه بخوف
شفته يبتسم لي بمتعه كنه ياهل ويالس يلعب لعبه ووايد عايبتنه هاللعبه
طلع كيمرا من درجه ، الظاهر في صور في الكيمرا يبغي يراويني اياها بس الي فكرت فيه ما كان في في محله
شل الكيمرا وتم يصور ، طالعته مستغربه ، لحظة شو يالس يصور ، فجيت عيني هذا جنه يالس يصور...... يصورنــــــــــــــــــــــــــــــــــــــــــي
شما :ايييييييييييييييييييييييه ، شو تسوي
خالد : شميم وايد حلوة أنتي في الصور ، طالعيني شوي اشوف
فجيت عيني اطالعه مصدومه بس هو ما كان مصدوم كان يصور يمكن ما حسبت ست ، ولا سبع ولا ثمان صور صورني
خالد : تصدقين عاد أي حد يشوف الصور يعرف أنها في حجرتي وأنج يالسه في حجرتي ، وهالكيمرا الكل يعرف أنها كيمرتي
طالعته أحاول استوعب الموضوع لين الحين مصدومه ومن كثر الصدمه ما عندي رده فعل ، شوفوا النذل يهددني شفتوا جيه يا ناس أنا عن نفسي ما شفت
حسيت بخوف برجفه وطالعته مصدومه وحسيت بدمعه بتنزل من عيني قريب
يا وقف حذالي ما كنت مستوعبه لين الحين الي يالس يصير ، بأنه هددني وأني يالسه في غرفته الحين ، وقافل الباب ومب راضي يفتح يبا ازاعج عسب يشكون فينا ، وصورني في غرفته ، كل هالاشياء كانت تدور في بالي ، لحظة يبا يهددني بالصور عنده الصور ما اقدر انكر أنها صوري واني في غرفته شوفوا النذل
وقفت اطالعه مستغربه
ابتسم وطبع بوسه على خدي فجيت عيني وحسيت أني بموت أو بطيح في مكاني مب لانه باسني والله عادي عندي هالبوسه الا بوسه ، تعرفون ليش بغيت اطيح مكاني لان توقيت الي يتني فيها البوسه نفس التوقيت الي دق فيها على زر الكيمرا ؟؟؟ يعني الصورة الاخيره كانت وهو يبوسني ؟؟؟




يا للأسف شوهت صورة
رسمتها لك في عيوني ~~
كنت النظر ضيه ونوره
غالي وقدرك ما يهوني ~~