الفصل 15
اخذت لها شور سريع وراحت تصحي جارح..
خلود بنعومتها : جارح حبيبي..اذن العشاء مابتقوم تاكل حاجه ,انت حتى غدا ماتغديت..
جارح:...
خلود:حبيبي ..جارح
جارح كان بدنيا ثانيه بعيد عن اللي يدور حوله ,بعيد عن العالم الحقيقي,في عالم خاص بالاحلام ..
كائن يشبه الديناصور باللون الاسود كل ماحاول جارح يهرب منه لقاه قدامه ..
وكل ماحاول يتكلم ويصرخ ,نفخ عليه من ناره ..
وده يصحى وده يقوم لكن مو قادر , بدا يعرق وبدا يتعب ,الا ويشوف دخان ابيض ريحته تشبه المسك طلعت خلود منه وتنادي عليه عشان تحميه ...بدا يفوق وبدا يهرب من عالم احلامه
خلود:جارح
فتح جارح عيونه بطريقه مخيفه,وناظر لخلود اللي قدامه من غير أي شعور..بنظرات خلت خلود ترتجف وترجع على ورا لين طلعت من الغرفه
قام جارح على الحمام ,اخذ له دش بارد ,وكل ماغمض عيونه شاف احداث حِلمه ,قام يحاول يفتح عيونه قد مايقدر مايتمنى حتى انه يرمش ,يحس الدنيا ضايقه به وان اللي يحس به مفروض مايحس به انسان بكبر جارح ...
اما خلود كانت ترتجف خوف من جارح اللي جا ببالها انها مزعجته ومصحيته بازعاجها ,,اول ماشافته قامت تقول بارتباك: اسفه وربي ماتوقعت اني كنت ازعجك
ناظرها جارح بإستغراب وقعد على الطاوله بهدوء وبدا ياكل
جلست خلود وبدت ترتاح: اصب لك عصير
جارح:....
سكتت بعدها خلود,وخلت الملعقه اللي بيدها وقامت تناظر لجارح اللي ياكل وهو سرحان , تحس انه بس يبي يملى معدته من غير ما يحس بالاكل او لذته او حتى نوعه ,تحسه ولأول مره شارد وذهنه مشغول
جارح: خير وش فيك تناظريني كذا
خلود:ولاحاجه سئلتك تبغاني اصب لك عصير؟
جارح:ايه صبي
صبت له خلود ويوم جت تعطيه الكاس حست برجفه خفيفه بيده ,عرفت بعدها ن جارح فيه شي مو طبيعي
:::::::::::::::::::::::::
وصلت فاتن البيت وهي متفائله ان الحياة راح تكون افضل.. رجعت وبداخلها كلام كثير وتصفية لحساب بينها وبين محمد..
رجعت وهي ناويه تنهي كل الخلافات ..
أصاله:اهلين حبيبتي
فاتن:كيفك اصوله,,وكيف شغلك
أصاله:ماعليه مثل العاده بنات نتعود عليهم يطلعون ,وغيرهم يسجلون وعلى هالموال
فاتن:الله يعطيك العافيه يارب
أصاله وهي متفاجئه:فتون
فاتن:هلا
اصاله:انتي حاطه مكياج!!! ومستشوره بعد !!!!!
فاتن:هههههعع ايه وش رائيك!!
اصاله: تاخذين العقل ياقلبي ,بس جد غيــر
فاتن:احم احم
أصاله:هههههههه
فاتن:الا وين محمد؟؟؟ فوق؟
أصاله:ماادري وش اللي جرى له طلع من البيت متضايق؟انتي ماقلتي له انك طالعه؟
فاتن:ها..إلا قلت له,,,اممم يعني كان معصب؟
أصاله:لدرجة انه مارد علي يوم سئلته وين بيروح
فاتن:اها
أصاله:ماقلتي لي كيف اموركم؟؟
فاتن:اممممم ان شاء الله الفتره الجايه راح تكون احسن
أصاله:ان شاء الله ,والله مافي شي يسعدني اكثر من اني اشوفكم سعيدين
فاتن:انتي بس ادعي لنا
أصاله:والله اني ادعي لكم ليل نهار
فاتن:اوخص ليل نهار !! يعني ماتتعبين؟؟
أصاله:ههه لا مااتعب اللين اشوفكم مثل الخلق
فاتن:افا يااصول يعني اللحين حنا مثل وشو
أصاله:اللحين وبصراحه كأنكم توم وجيري
فاتن:ههههههههههع هههههههع هع "وتذكرت داليا وهي تقولها اضحكي بنعومه"
وقالت: اصوله اسمعي هالضحكه وش رائيك فيها هههههههع
أصاله:ههههههههه بسم الله عليك يابنتي انجنيتي؟؟
فاتن:لا بس البنات يقولن لي اغير ضحكتي طيب اسمعي هذه ..
ههه ههه ههه
اصاله: خلني اقوم انام اصرف لي من جنونك على اخر الليل
فاتن: تونا الساعه 11
اصاله:حبيبتي بكره عندي دوام
فاتن: إي صح وانا محاضرتي الساعه 7 بقوم انا بعد انام,ووله لأ خلني انتضر استاذ محمد
"وطلعت تشوف نفسها بالمرايا وتستهبل وتلعب وكل الجنون طلعته بالمرايا"
:::::::::::::::
اما بمستشفى إيطاليا
احمد يحس كل شي فيه توقف.. تفكيره ودقات قلبه واحساسه..
مافيه شي يفكر فيه او يخطر بباله غير منظر واحد ..
وهو الجو الممطر وانين تضحك وتجري, وتطير خصل شعرها المبلوله بخفه وكيف تجرءت سياره مسرعه بخطف عمره ..وكل ماخلص هالمنظر من مخيلته تخيله مره ثانيه وثالثه..
يمشي يمين ويسار مثل الشخص الفاقد عقله مو قادر يفكر بشي ولا راضيه الصوره تروح عن باله كل شي فيه متشتت ..
بهالوقت ..طّلعوا انين من غرفة العمليات,,ودخلوها مباشره على العنايه المركزه ..
ينتضر وينتضر وينتضر ...
تطمنه الدكاتره عليها لين شاف الدكتور المسؤول, مشى احمد تجاهه ورجله ترتجف "وطبعا الحوار كان باللغه الانجليزيه"
قال: دكتور كيف حالتها
ابتسم له الدكتور وقال: تطمن احنا بذلنا كل مجهودنا بالعمليه ,ولكن مااقدر اقول لك عن مدى نجاحها الا بعد مرور 24 ساعه
وبهاللحظه باللذات كان فيه حركه مو طبيعيه ..وجت سستر تركض للدكتور المشرف وتقول له : الحاله توقف نبضها
حاول يتمالك نفسه الدكتور, وراح معها وخلى احمد بحالة شلل في مكانه,مو عارف اذا المقصود انين او غيرها؟؟
وبعد ربع ساعه بالتمام..طلبوا من احمد يدخل لمكتب الدكتور ولكن احمد الين اللحين على وقفته ولا هو راضي يسمع لأحد فأضطروا انهم يرسلون له دكتوره كرستين تتفاهم معه..
وجت جنبه تأكد له احساس ملك قلبه ..
""بيفقدها وفعلا هو فاقدها اجل وشلون لو انه بيعيش بعالم غير عالمها""
وقالت الدكتوره: انا اعتذر سوينا كل اللي نقدر عليه ولكن كل هذا ماجاب نتيجه , احنا سوينا اللي علينا ولكن فيه تفاصيل اذا تحب تسمعها ليت تجي معي للمكتب ..
"ربتت على كتفه تبي تهدي ملامحه ,ومد يدينه لرقبتها ووصلها للجدار..صرخ فيها وقرب منها, ودموعه اللي متجمعه بعينه لقت على خده سبيل,,,
وبأعلى صوته يقول لها :لاتكذبين
"الي كانوا متواجدين بغرفة الإنتظار حاولوا يفكون الدكتوره من يده ,ولاقدروا ولا هو فكها إلا يوم شاف السرير المتحرك وحامل جثة حبيبته ..
راح لها يركض ودموعه مو قادر يتملكها ..
مسك يدينها البارده وحضنها وبدا يصرخ عليها,, هو مو فاهم وش يقول ولا هي حاسه باللي يدور ولكن اللي صار وقاله من غير مايقول...
عطيني فرصه استوعب .. خبر موتك اذ يجيني..
خذي قلبي.. وخذي عمري .. وخلك بين إيديني
تخليني احب حالي وتروح روحك تخليني..
تكفه لاتخليني واذا انتي ناويه فيني؟؟
خذي روحي..ياروحي ابي عالمك يكفيني..
:::::::::::::::::::::::::::::
صباح الرياض
قامت فاتن من النوم على صوت المنبه .. تذكرت انها كانت تبي محمد يجي وتتفاهم معه ولكن النوم غلبها .. قامت من الفراش بتكاسل وشافت وجهها بالمرايا وضحكت وفتحت عينها زين وضحكت بشكل اكبر..
الكحل وساح والروج اخذ راحته برا الشفاة شكلها فعلا يضحك..
راحت على الحمام بسرعه خافت ان احد يدخل ويشوفها بهالمنظر,,وبعد ماجهزت اغراضها راحت على غرفة محمد ولا لقته ,,استغربت لكن ضنت انه قام قبلها وراح شغله..وطلعت على الكليه,وهي بالسياره دقت على داليا
فاتن:والله فاتك يادالي
داليا:ها بشري,اكيد محمد ماصدق
فاتن:ههههههههههه والله انك مسكينه انا لو اقول لك وش صار تضحكين
داليا:ايه قولي ,خليني اروّق قبل الدوام
"وحكت لها طبعا كل شي"
::::::::
جده
قامت سميره من ازعاج جوالها ويوم شافت ان الرقم من اخوها على طول ردت:اهلين بالعريس
قال احمد وهو مو قادر يتكلم:سميره......
سميره:ايش بك يااحمد خوفتني ايش صار!!!
قال احمد وبشق الانفس: حبيبتي ماتت
ضبطت سميره جلستها وطار النوم اللي كان فيها وقالت بصوت عالي:احمد انت ايش قاعد تقول؟؟
احمد وللآن مو مصدق طلّع من قلبه كلمة :اه
سميره:الو احمد الو
ودقت عليه كثير ولا رد عليها ..وسميره لأول مره تحس انها متأثره بشي يخص انين,,
كانت ناويه تدمر سعادتها باي طريقه,مع ذلك ماكانت تتمنى لها الموت ,ماكانت تتمنى تسمع اخوها بهالضعف,وماكان ودها تسمع هالخبر بهاالطريقه وماكانت تضن بيوم ان بخبر وفاة انين راح تكون حزينه.
اما خميس يوم عرف وفاتها تأثر,ويوم تذكر صورتها ماقدر يشوف غير صورة ضربه لها واهانته بشكل متكرر,,تمنى لو انها سامحته او على الأقل انه اعتذر منها ,,لكن وش ينفع اللحين كل شي انتهى ,,دق خميس على اخواته ... ووصلهم الخبر
::::::::::::::
الرياض ..بيت جارح
قامت خلود تضرب بنفسها تبي تصدق وتبي تستوعب ان الأخت اللي عاشت معها بكل لحضاتها واللي شالت عنها واللي قاست معها بكل مراحل حياتها توفت..وحست بهاللحظه ان مالها سند وان الشي الحلو اللي بحياتها انتهى,,
وانتضرت اللين جا جارح واول ماشافته راحت ضمته وزاد بكاها
جارح :وش فيك وش صاير؟؟
خلود:انين ياجارح انين ماتت
جارح:...
خلود:الله يخليك وديني عندها
جارح:انا لله وانا اليه لراجعون
خلود:الله يخليك ياجارح ابغى اشوفها
جارح:وشلون تشوفينها ,هي مو بايطاليا!!
تذكرت خلود هالشي:طيب ابغى اروح عند اهلي
جارح:ياخلود توك راجعه من جده
خلود وبصراخ :ابغى احضر عزاها هذه اختي
وخرها جارح عنه وقال: يابنت الناس كلنا بنموت اهدي وتعوذي من ابليس وادعي لها بالرحمه
خلود:ابغى اسافر
جارح:مو اللحين اميمتي راح تجي بكره من الشرقيه ولازم تكونين بإستقبالها
ناضرته خلود بعدم تصديق:اقول لك اختي ماتت وابغى احضر عزاها انت قاعد تسمعني
جارح:وانا ماراح اعيد اللي قلته ,لاقمتي بالواجب مع امي ورجعَت للشرقيه ,ساعتها حجزت لك وسفرتك
"زادت خلود من بكاها قهر على اختها اللي توفت بهالعمر,,ومن الحض اللي جمعها بانسان قاسي مثل جارح, تركها بعز حاجتها ودخل مجلسه وقام يدخن بجنون"
:::::::::::::::::::
بعد العصر راح محمد لبيتهم بعد ماقضى ليله بالسياره ماصدق يجي الصباح عشان ينسى ويتناسى بداومه..
وقبل لا يدخل البيت جت له هالرساله ..من الرقم 000
(يالحبيب لا تقول ان زوجتك المصون فتون جوالها اربع وعشرين ساعه مشغول لله في لله,,ههه وانا اخوك الحريم هالايام هم اللي مالهم امان)
انجن جنونه محمد ودخل البيت وهو مو شايف شي قدامه دخل على فاتن الغرفه من غير ماتحس بوجوده ووقف يوم سمعها تقول
- والله واحشــــــــــــــــــــــــني
- هههههعههههههههعع لا ياشيخ ومن متى!!
- يله عاد متى بتجي
- هع هع مايليق عليك الدلع يله قول
- يوه وش تقول انت؟؟ من هاللي ياخذ مكانك والله ماانخلق
"محمد بس سمع لهالجمله مسك بتيشيرت فاتن وهو يقول: من هذا ها؟؟ واخذ التلفون من يدها وقال وهو يصرخ: من متى تعرفها انت!!
ورد عليه:سلامات يالنسيب وش تحس فيه
ترك محمد فاتن وهي مذهوله ولا تكلمت ولا كلمه مصدومه من موقفه او ممكن للان مااستوعبت اللي يصير,,
محمد:ااا هلا ابـــبـ..بدر
بدر:اللحين تمزح قبل شوي ولا من جدك؟
محمد:هه لا وش دعوه ,,ااا علمتني فاتن الشقاوه
بدر:اها وايش اخباركم,تقول لي فتون انك مجننها..ترى ها ..كله كوم وفتون بكوم لحالها
محمد:لا افا عليك بس انت تعرف دلع البنات
بدر:هههههههههههه دلع البنات والله انت محظوظ لأن عمري ماشفت فتون إلا تتضارب او تشوف كوره ,عمري ماشفتها تتدلع هههههه
محمد ومو قادر يكمل المكالمه :هه,اا يله بدر نشوفك قريب
بدر:بإذن الله, بالله عطني فتون
محمد:فتون!!امم طلعت من هنا شكلها راحت تجيب شي
بدر:يله مو مشكله ادق عليها بعد شوي
محمد:يصير خير
بدر:يله فمان الله
محمد:مع السلامه
قفل محمد وهو يحس بإن الشيطان لعب عليه وان الرساله اللي جت له خلته فاقد لعقله..
قام يدور على فاتن بالغرفه ولا لقاها ويوم مر من غرفته شافها مقفله وعرف انها بداخلها ,وقعد يدق عليها ولاترد عليه
وقف فتره وهو يفكر وش ممكن يقول لها ,وكيف راح يبرر فعلته لها ..دق عليها مره ثانيه وهو مقهور ويقول :فتون ..فتون افتحي الباب اسمعيني ..
فتون ادري اني غلطان بس والله كان في سبب
فتون تكفه افتحي الباب خل نتفاهم
"ودق الباب الى ان فقد الامل انها تفتح له او حتى تكلمه,وطلع من البيت
اما فاتن الى الآن وهي بذهولها ..وكانت تقول بنفسها ..
ليه سوى كذا..ليه يشك فيني..
انا عمري ماتصرفت بشكل مريب وعمري ماتماديت مع أي غريب ..ليه يشك فيني!!!
كيف قدر يمد ايده وليه سكت له!!!
ليه ياقلبي ضعفت وضعْفت شخصيتي معك!!
ليه!! حبيته ..
لأ انا ماحبيته انا تعودت عليه,,
لأ انا كذابه لأني حبيته وحبيته كثير مو شوي ,فرضيت الاهانه منه
ليه اللحين يوم قلبي حبك وروحي تعودت عليك ... ليه تشك فيني وتخرب كل شي يامحمد ..ليه!
::::::::::::::::
شك بدر ان فيه شي مو طبيعي وحاول يدق على فاتن لكن ماردت لأن الجوال اصلاً خلاه محمد بغرفتهم ..
وهالشي خلاه يشك اكثر ولكن ماحب يِقلق اهله فدق على..
داليا اللي اول ماشافت رقمه طارت من الفرحه وقالت بهدوء:هلا
بدر اول ماسمع صوتها حس بالراحه :سلام
داليا:وعليك السلام
بدر:اجل مامسحتي رقمي؟
داليا:وليه لازم اني امسحه
بدر:انا قلت اول كنتي تكرهيني واكيد مسحتيه,لكن دامه للان عندك فهذا مؤشر لخير
داليا:على فكره انت مره مغرور
تدارك نفسه بدر وتذكر انه ماينفع يكلمها بهالشكل دامهم على البر وينطق بالكلام اللي وده يقوله وقال:اعتذر اني دقيت لكن انا تخوفت على فتون وكان ودي تطمنيني عنها
قالت داليا بخوف:ليه وش صار!!
بدر:ابد بس ماترد علي وفيه شي مو مضبوط ممكن تزورينها وتطمنيني
داليا:ايه اكيد انا انتهى دوامي وراح ازورها اللحين
بدر:جزاك الله خير
داليا:وياك..يله باي
بدر:هلا.
::::::::::::::::::::
محمد من وقتها وهو يدور بالسياره ويحس الدنيا ضايقه به,اللين دق عليه زميله خالد اللي منتظر مكاملته على ناار..
خالد:ها محمد وش لونك
محمد:ابد الوضع واقف على ردك؟
خالد:والله كان ودي اخدمك لكن الرقم اللي عطيتني اياه ,من الارقام اللي من غير اسم
محمد بخيبة امل :لا تقول
خالد:ايه والله للأسف مو مسجل بإسم,هذا من ارقام الحج تعرف انت.
قال محمد بضيق:ماقصرت يا ابو خلود ,الله يجزاك خير
خالد:وياك حبيبي يله خلنا نشوفك بالاستراحه,وله ماننفع من غير سالم الله يرحمه
وكأن محمد ناقصه ضيق:لا افا عليك ,ان شاء الله قريب بجي لكم
خالد:يصير خير يله مع السلامه
محمد:مع السلامه
كان وده محمد يعرف من صاحب الرقم 000 لكن محاولته فشلت,وكل ماحاول يتعوذ من ابليس ومايشك بفاتن,يتذكر ان هالرجال يعرف اسمها ويعرف عن حركاتها اللي مستحيل يعرفه شخص بعيد عنها,,
زادت سرعة محمد وكأنه يحط حرته بالسياره,وكأن هالشي ماراح يخليه يفكر.
::::::::::::::::::::
اما داليا اللي راحت لبيت فاتن اول مادخلت لها ..ضمتها فاتن ..
داليا بإستغراب:وش فيك قلبي ؟؟وليه لابسه عباتك؟؟
فاتن وماتبي دموعها ترضخ: ابي اروح بيت اهلي
داليا:اوكي تعالي اوصلك معي السواق تبع شغلي برا
فاتن :...
وفعلا راحت معها ..وحكت لها فاتن عن كل شي..
داليا:طيب وش اللي خلاه يشك بهالطريقه؟
فاتن بعصبيه :ماادري يادالي صار عصبي بشكل لايطاق وبعد يشك فيني لا كذا وكفايه
داليا:انا من اللي قلتي لي اياه متأكده ان محمد يحبك مره ومستحيل انه يشك فيك,صدقيني الموضوع ومافيه شويه غيره زياده عن اللزوم
فاتن:داليا هالشي مايعطيه الحق يمد يده
كانت فاتن متوتره لأقصى درجه وحست بهالشي داليا ,فخلتها شوي ثم قالت وتبي تخفف عنها :فتونه محمد شد تيشيرتك وانتي سكتي!!!
فاتن بعربجه:اسكتي يادالي ,والله اني مقهوره هو يغلط علي وانا اتنح.
داليا:هههههههههههههههههههههه,صراحه انا حاسه قد ايش هالقهر انتي عمرك ههههههههههه عمرك ماخليتي حقك هههههههه
ابتسمت فاتن وقالت بهدوء:احبه يادالي
داليا:ها ايش .. وش قلتي؟؟
فاتن:احبه يادالي,لكن جرحني من البدايه ويوم سامحت ,جرحني مره ثانيه
داليا:حبيبتي فتون صدقيني هي ثواني وبيدق عليك ويعتذر اللين ترضين ,انتي حبيبته وتشوفين
فاتن:بديت اخاف من طبع محمد ,كل ماقربت منه خفت منه اكثر,انا خايفه انه يجرحني الجرح اللي مايُغتفر,محمد غريب ولا احد يدري وش يدور بباله ابدا
داليا:حاولي تعرفين شخصيته اكثر عشان تقدرين تتعاملين معه ,حبيبتي فتون ..طبييعي اللي يصير لأنكم بأول زواجكم, للان ماتعرفون بعض زين
فاتن:.....
داليا:لا تفكرين كثير ,وخليها على الله ..ودقي على بدر تراه قلقان عليك
فاتن:بدر
داليا:ايه هو اللي خلاني امر عليك
فاتن:لا اجل دق عليك
داليا:ايه دق عشان يتطمن عليك,وانا المسكينه فرحت واحسب انه بيدق يتطمن ويسلم علي
فاتن: لا ريحي بطنك بدر مو راعي هالحركات
داليا:ايه داريه معقد مثل اخته
فاتن: هع
داليا:وش قلنا على هالضحكه
فاتن:اقوول حِلي عن سما اهلي ,تراني طفشانه منه وانتي تقولين ضبطي ضحكتك له
داليا:ههه لا ياعمري غيري ضحكتك عشان نفسك وعشان انوثتك,مو بس عشان محمد
فاتن:اقووووووووووول اقلبي وجهك بس
داليا:اه منك ياذا البنت بطلي عربجه ذبحتيني ,الحمد لله وصلنا يله روحي بيتكم روحي
ابتسمت لها فاتن: يله احطي
داليا:بأحط بس اهم شي اشوف هالإبتسامه دووم
فاتن:ههه "وقالت بصوت عالي بالشارع"يــــــــــــــــــــارب احفض صديقة قلبي
داليا:هههههههه الله يرجك فضحتينا ,يله باي
دخلت فاتن بيت اهلها والإبتسامه اللي خلتها داليا على شفاتها تبخرت ,دخلت وهي متضايقه من تصرف محمد وعصبيته وشكه ,لكن كل هذا ماكان له اهميه من يوم درت من اهلها بوفاة انين,كل هذا صار ولا شي بجنب اللي فقدته ,,
راحت على طول لبيت خلود هي وامها واختهم عائشه, كانوا يبون يصبرون خلود ويوقفون معها بمحنتها ..
اول يوم لمعرفتهم للخبر كان صعب على الجميع,ولا وقفت دموع وحده منهم ..
ولا الكلمات قدرت تصبر الوجع والانين..
وثاني وثالث يوم مامروا الا بعد مااستنزفوا دموع واهات وصرخات وشوق وحنين.
:::::::::
بهدوء الليل والشوق للحبيب,وعلى صوت فيروز والنوم اللي يجفى العيون ..هناك محمد ..
على سريره لا راضي يجيه النوم ولا راضيه الأفكار الشيطانيه تروح عن باله,,,
مل ويبي يسوي شي يضيع الوقت اللين وقت دوامه مالقى شي ينسيه إلي شاغله باله ,ولا لقى شي يبرد ناره يوم يضن ان فاتن تخونه غير اتصال تردد انه يسويه ولكن ..اخذ الجوال ودق عليها..
البنت:هلا
محمد:هلابك اختي ,كيف الحال
البنت:تمام
محمد:انا اعتذر اني داق عليك وبعد بهالوقت المتأخر
البنت:لا عاتي ,بس ان شاء الله خير
محمد:صراحه قتلني الملل وحسيت انه فيني الفضول اعرف وش صار على موضوعك انتي وابوك
البنت:ههه لا فيك الخير صراحه ,بس لا تشغل بالك الحمد لله مجهودنا انا وفهد جاب نتيجه
محمد:اشوه اجل يله مبروك على رجعتهم
البنت:الله يبارك فيك
محمد:...
البنت:يا..الا انت وش اسمك
محمد:انا محمد ,وانتي
البنت:انا وهج
محمد:ههه اجل وهج هم
وهج: اممم احب الناس تدلعني وهج
محمد:ممكن سؤال ولو انه مالي حق فيه
وهج:عاتي اسئل
محمد:انتي وش اللي مسهرك لهالوقت
وهج وتشوف ساعتها انها 3 الفجر:ابدا قاعده افكر بحياتي
محمد:اها
وهج:يعني اليوم مثلا كنت مع صديقاتي وناقشنا موضوع الخطوط الحمرا
محمد:وشلون يعني
وهج:يعني سماحي لمكالمتك هذه غيري يعتبرها خط احمر وممنوعه ,لكن انا اشوف انه شي عاتي دام مواضيعنا عاديه ولا فيها تعدي للاخلاق, انت وش رائيك؟
محمد:انا.."وبعد مافكر شوي " انا خطي الأحمر هو الحب,الغلط اللي ارتكبته وماراح اعيده .
وهج:الحب خط احمر تؤتؤ ,انت غريب او انك متزوج صح
محمد:ههه وكيف عرفتي
وهج:اممم ممكن تقول انها المعادله الطبيعيه لاي حياه بين زوجين ومن غير تفاهم...وتقدر تقول انه عندي معرفه لعلم النفس لابأس بها,وتقدر تقول اني انسانه مو هينه
محمد:اها اجل دام كل هذا عندك وش تتوقعين مشكلتي الاساسيه
وهج:بصراحه مشكلتك الفراغ..لكن الفراغ العاطفي هو اللي تحسه,,وهذا عندي خط احمر
محمد:انتي فعلا مو هينه,بس وشلون مشكلتي خط احمر عندك!!!
وهج:لأن يامحمد اتصالك علي معناها تبي تعويض وانا بصراحه ممكن اتكلم معك عن الحياة او الثقافه او حتى السياسه ,,لكن الكلام عن الحب ماراح يكون الا لشخص واحد
محمد:على فكره انتي فاهمتني غلط ,انا مادقيت عليك الا لاني ابي انسى وابيه يوقف تفكيري عن اللي شاغلني
وهج:احتمال
محمد:لكن اعذري لقافتي ادري ان مالي حق اسئلك لكن انتي فعلا شخصيه مثيره جدا
وهج:اقدر اعتبر هالشي اطراء شكرا
محمد:يعني اسئل
وهج:ههه اسئل وبالنهايه انا لي الحق اجاوبك او لا
محمد:من هو سعيد الحظ اللي مخليه له الكلام عن الحب
وهج:هههههههه,,اكيد زوج المستقبل
محمد:اها انا احترم فيك هالشي
وهج:طيب تسمح لي انا اسئلك
محمد:طبعا اكيد
وهج:انت تحبها
محمد:اه..انا مااحب غيرها
وهج:وااااااو ودامك تحملها كل هالمحبه ليه ماتحاول تصلح اموركم بالحب
محمد:ماينفع
وهج:انا صراحه مااعرف اللي يدور بينكم ومااقدر انصحك على اساس مبهم ,لكن اذا تحب تقولي ممكن تلاقي عندي رائي سديد
محمد:عندك استعداد تسمعيني
وهج:اكيد اذا حابب تقول انا راح اسمعك
"سمح محمد لنفسه يقول اموره الشخصيه ,,, ويقول لها عن اللي صار وبالتفصيل..
وبعد ماقفل منها فكر بتناقضه وشلون الغضب بيعميه لان فاتن تخونه وكيف هو الان يسمح لنفسه يكلم هالبنت ,,
ولقى المبرر بعد لنفسه, بانها مكن تكون تخونه وممكن انها تستاهل انه يكلم غيرها , واقنع نفسه انه رجل ويقدر يتحكم بعواطفه وان حب فاتن ماراح يخليه يقدر يحط وحده مكانها..
بيني وبينكم محمد حس بنشاط فظيع وطول الطريق لعمله وهو يفكر بأن هالبنت بشخصيه قويه تأثر اكثر مما تتأثر ,ذكيه تعرف وش تقول وتعرف كيف تحتفظ باللي يمسها ,,كلها مبررات او ممكن عشان مايحس بتانيب الظمير .
:::::::::::::::::::::::::
اتصال من اصاله
بالعصر
اصاله:ها حبيبتي كيفكم اليوم
فاتن:لا الحمد لله ,وتوني متطمنه على خلود اليوم افضل
اصاله:يله الله يصبر قلوبكم
فاتن:امين
اصاله:اقول فتون ,متى ناويه ترجعين وانا امك؟
فاتن:اصوله قلت لك انا ماراح ارجع لمحمد خلاص
اصاله:ياحبيبتي صدقيني هو اللي خلاني ادق واعتذر لك...
وتراه عرف غلطه وندمان,وبعدين يالمجنونه محمد يمووت عليك
فاتن:لا يااصوله اللي يحب مايجرح ويشك
اصاله:هو عرف غلطه ولو تشوفين حالته يكسر خاطرك,والله حتى النوم مايقدر ينام مثل الخلق
فاتن: ايه مره واضح لدرجة انه حتى سماعه مارفعها علي يعتذر عن اللي سواه
اصاله:يافتونه ياقلبي لاتكبرين الموضوع انتي لازم ترجعين قبل لا اخوك يرجع وانتي تعرفين ساعتها الموضوع بيكبر ويصير اللي مانتمناه
فاتن:لأ.. رجوع ماراح ارجع
اصاله:ادري ان مفروض محمد يكلمك لكن قال لي انه منحرج منك وراح يتصل عليك بعد ماانا امهد له الموضوع
فاتن:....
اصاله:ههه طيب لاتردين علي بس اهم شي حبيبتي فكري بالموضوع,
بدر وانتي تعرفين قد ايش يحبك وهو عصبيته اكثر من محمد وتدرين وش راح يصير لو طاحوا ببعض
فاتن:ماادري بشوف
اصاله:طيب حبيبتي انا بروح الحين واضرب لك محمد اللين يبرد قلبك
فاتن:...
اصاله:يله مع السلامه
فاتن:هلا.
قفلت السماعه فاتن وهي تحس بقلبها مجروح مارفع عليها سماعه ,,كيف يحبها ويخلي الشك يكرهه فيها ,كيف يحبها وهان عليه فراقها,,كيف يحبها ومافكر يعتذر لو بكلمه لها...
وبعدها بدت تلوم نفسها ..كيف لو انها طاعته,كيف لو انها خلت قلبها على هواه حبته ووضحت له وحافضت على بيتها..
:::::::::::::::::::
اما محمد رجع من الدوام وعلى غرفته منسدح بفراشه وعيونه على صورة فاتن,كل ماشافها حس ان قلبه عايش بحبها يعشقها ولكن مصدق انها خاينته ومكالماته لوهج مخليته يشوف الموضوع بشكل اسوء.."راح اقول لكم كيف"
اصاله:ايه هذا هو اقعد بغرفتك واتأمل هالصوره والبنت مظلومه ببيت اهلها
محمد:كلمتيها..قلتي لها ترجع
اصاله:انا قلت لها انك ندمان وتبي تعتذر لها وانك غلطان بعد .
محمد:لكن انا ماقلت لك هالشي ,ليه تقولين لها اني غلطان يمه؟
اصاله:محمد انت صاحي ؟؟
اللحين على هالرسائل التافهه اللي حتى ماتدري من هو اللي مرسلها بتخرب حياتك وتضلم بنت الناس!!!
محمد:....
اصاله:لا يامحمد الا فاتن انا ماراح اسمح لك بالتمادي عليها,انا هالبنت اعرفها زين واعرف اخلاقها عمري ماشفت عليها شي ,بالعكس فاتن انسانه محترمه والكل يشهد انها بنت ناس وعفيفه.
محمد"بأفكار وهج":اجل ليه خايفه!! ليه للان ماتبيني حتى اجي جنبها
اصاله مسكت راسها وقالت:حسبي الله على ابليسك انت قاعد تشكك بشرف البنت اتقي الله يامحمد
محمد:ايه يمه اكيد في إنّ بالموضوع وان فيها بلا وهالرسايل تأكد لي هالشي
اصاله:حسبي الله انت وش فيك مقلوب كذا من وين لك هالافكار الشيطانيه وش اللي قسى قلبك يامحمد وش اللي قساه؟ ؟
ياولد انت ان كانك قافل فمك وماقلت للبنت عن سواد وجهك كان اللحين البنت عايشه معك وحاطتك فوق راسها ,لا وبعد كان يمديها حامل منك
قال بإستهزاء:ايه صح,يمـــه انتي حبك لفاتن مو مخليك تشوفين حولك,خذي اقري ولد الكـــ.,.. وش راسل لي امس خذي اقري
خذت اصاله جواله ومكتوب
(الا بسئلك يالمعرس,, كيف ليلتك الأولى؟؟ ان شاء الله كان كل شي تمام!!!)
محمد:ها وش رائيك, وشلون وصل الخبر للملعون هذا ؟؟قولي لي!!!
اصاله:الله واكبر على كل ضالم مفتري,انت حتى ماتدري من هالتافه اللي يرسل لك ,عشان تضلم البنت بعرضها وشرفها ,يامحمد انت ترمي المحصنات ياويلك من اللي خلقك وكره الضلم, لاتضلم ولا ترمي وانت ماعندك دليل واحد ,انا لو كنت شايفه على هالبنت شي واحد ماكان فكرت اني ازوجها لك ,ولاكان اجبرت البنت على انها ترتبط بشخص مريض مثلك
"وطلعت امه وهي معصبه,ثم رجعت وقالت له ..والله والله لو ماتتعوذ من ابليس وتعتذر لفاتن وتجيبها وتوضح لها كل اللي صار والله ماارضى عليك يامحمد لاخر يوم بعمري,وطلعت ورزعة الباب"
:::::::::::::::::
بيت جارح
ام جارح:اقول ياابنيتي وش رائيك نروح ناخذ عمره وتحتسبين اجرها لاختك
خلود:ياليت ياخاله
ام جارح:انت وش رائيك ياجارح
جارح:ها انا لا لا يمه انا عندي اشغال مااقدر اسافر,لكن اذا تحبين حجزت لك انتي وخلود روحوا
ام جارح بحزم :جارح انت من جدك!!! والمحرم
جارح:إي صح خلي اخوي سلطان يروح معكم
ام جارح:سبحان الله ,يعني اللحين حليتها,طيب سلطان مو محرم لزوجتك
جارح:يمه الله يجزاك خير مالها لزوم هالسفره
امه:وشلون يعني !!!هذا اقل شي تقدمه لزوجتك هالمسكينه بهالوقت
درى جارح انه مجبر لرضا امه:خلاص بشوف الوقت المناسب ونسافر
ام جارح:انا راجعه الشرقيه بعد 3 ايام متى بيمديني اذا انت راح تفكر
جارح:يمه بحتاج وقت اضبط اموري
ام جارح وهي تبتسم لخلود:خلاص اجل رح انت وبنتي خلود ,وانا بروح مع سلطان الاسبوع الجاي
تدري خلود ان جارح قدام امه طيب وحبوب وانه ماراح يوديها اذا سافرت امه وقالت بترجي:لا الله يخليك ياخاله محتاجه لك جنبي ,الله يخليك تعالي معانا
ناضرها جارح بحقد:اا ايه صادقه لازم تجين معنا يمه
ام جارح: خلاص اجل كلمهم وشف متى تقدر تاخذ اجازه اليوم او بكره
جارح:استغفر الله العظيم "وجا بيقوم"
ام جارح:وين بتروح من غير ماتحب راسي وتضم زوجتك
"قالت خلود بداخلها عمره ماشافني باحترام تبغيه يودعني!!!"
قرب جارح وحب راس امه وراح لخلود ضمها وقال بصوت واطي بإذنها"باوريك شغلك لارجعت"
طلع وقامت خلود من غير ماتتكلم دخلت غرفتها ,, راحت لألبوم صورها ودورت على صورة انين ..
شافت الصور ودموعها ماوقفت ,اللي كانت تشكي لها راحت,,اللي ممكن تاخذها بحظنها راحت..السند واللي تفهمها وتقدم لها وتحبها من غير شروط راحت ,, زادت شهقات خلود ووصل صوت بكاها الهستيري لأم جارح اللي جت تركض عليها وتضمها وتقول: اهدي ياقلبي وترحمي عليها
"زادت شهقات خلود اكثر وهالشي خلى ام جارح تبكي معها وتظمها اكثر"
:::::::::::::::::::::
اما فتون رايحه جايه ومعها جوالها قالت لها اصاله انه بيدق لكن مادق,,
ودخلت اختها عائشه وشافتها..
عائشه:ههههههه وش فيك سلامات؟؟
فاتن:اشـــــــــــش تراها موصله معي
عائشه:طيب يله العشا جاهز
فاتن:لا مالي نفس,تعشوا انتوا
عائشه:اقول ابوي من جا من السفر ماقعدتي معه 10 دقائق على بعضها,يله اقعدي معنا حتى لو ماتاكلين
فاتن: اف عيووش اسكتي
"وما امداها طلعت عائشه الا دخلت امها وهي مسرعه"
امها:اقوول فتون انتي لالك نفس تاكلين ولا تقعدين معنا يمه اكيد انك حامل
ناضرتها فاتن بغباء:لا
امها:وش اللي لا.. اكيد يمه ,قولي لي ماتحسين بلوعه كبد
فاتن: يمه قلت لك لا ,وبعدين انا اكيده اني مو حامل
امها: وش اللي يأكد لك هالشي ان شاء الله؟
فاتن:ااا ايه اممم سويت تحليل قريب وماكان فيه شي ,يمه انا بنام تصبحين على خير
امها: تنامين اللحين!!!
فاتن: ايه اللحين
"طلعت امها مستغربه منها وقفلت عليها الباب اما فاتن ضمت مخدتها ونزلت دموعها اللي ماتنزل بسهوله حاسه انه فيه شي مو طبيعي ,,حاسه بظيق..
تبي تدق على محمد ..فيه شي يخليها تبي تدق عليه لكن ماتدري وش هو؟؟؟
::::::::::::::::
جده
دخل خميس بيته وهو متوتر وضايق وكان يكلم جوال..
خميس:انا ماادري من وين طلع لنا هالادمي!!!
- لا طبعا عمري ماشفتوا بالسوق,واصلا هوا معروف لكن بغير سوقنا
- انت لازم تتصرف ياوليد ,لو ضاعت هالمناقصه عارف كم راح نخسر؟؟
- خلاص شوف الوضع عندك كيف ,وشوف ايش حتقدر تسوي,وعطيني خبر
- مع السلامه.
سميره: خير حبيبي ايش فيه؟
خميس:الله يستر على اللي جاي,ايام العزى ماسئلت عن الشغل,,ويوم رحت اليوم .. شفت ان مصايب الدنيا منتظرتني
سميره:ليه يعني ايش اللي صار
خميس:يعني انا يوم اكلمك عن الشغل حتفهمي!!
سميره:يوه حبيبي ايش بك معصب عليَّ
خميس: سميره انا على اعصابي خليني ,ولا تزيدي همي
سميره:ياحبيبي ماابغى اضايقك ,بس ماارتاح وانا اشوفك متضايق..اهدى شويه
خميس:لاحول ولا قوه لا الله
سميره:يوه خليها على ربك,,,حروح اجيب لك عصير يبرد على قلبك
خميس:....
::::::::::::::::
اما محمد..كان كعادته بسيارته ويدور بالشوارع بسرعته المعتاده..
واللي خلاه على اعصابه اكثر هالأغنيه لنبيل شعيل,اللي كانت بالراديو ومعلي عليها الصوت ..
قول احبك مثلاً..عمري حياتي مثلا
قول اي كلمه حلوه..اهديني ورده مثلا..
غنوه قصيده مثلا..حقق لي هالمنوه..واحييني بالكلمه الحلوه
فاجئني وكلمني يلا..بين لي انك ملهوف
لون لي هالدنيا بحبك ..عديني حدود الشوق
وان غبت باي لحظه عنك..ناديني قربني منك
قول انك مشتاق لشوفي..ريحني ونسيني خوفي
واحييني بالكلمه الحلوه
طفا الراديو لانه ضاق اكثر..وزاد بسرعته المجنونه, إلا يجيه إتصال مهم من ..
::::::::::::::::
- من اللي دق على محمد؟؟ ووش هالمكالمه اللي راح تقلب موازيين كثيره بالأحداث؟؟
- وين تتوقعون ممكن توصل علاقة محمد بوهج؟؟
- وجود ام جارح هل ممكن يكون السبب لتغيير قسوة جارح؟؟؟
- تتوقعون في ماضِ لفاتن قام يلاحقها ويبان اللحين؟؟
واكثر مع مفاجئه قويه بالبارت الجاي..
دمتم كما تحبون
فتو
رد: رواية ضمني وخبني بين اضلعك كاملة بدون ردود 2015 من احداث واقعية
رد مع اقتباس
25-10-2014, 08:53 AM 
رد: روايه ضمني وخبني بين اضلعك / للكاتبه : فتو. 
مواقع النشر (المفضلة)