بارت 20
رجعت خلود لبيتها وقفت عند الباب تحاول تجمع مافيها من قوه عشان تدخل..كانت تقول بنفسها انها ماراح تلاقي شي يدل على وجود حرمه ثانيه بحياته, ماراح تشوف غرض نسائي غريب ,ولاراح تشم ريحة ماتخصها..
حست برجلها ترجف ..ودها ماتنصدم ولا تعاني ولا تنطعن من زوجها..
اول مادخل جارح راح ياخذ له دش وخلاها بحيرتها ..
وهي دخلت تتفحص البيت بنظرها ,,كانت تشوف البيت على غير العاده مرتب شي ما..
كانت لو غابت اسبوع ترجع تلاقي ملابسه واصله للشارع..
فتحت المجلس اللي قالت لها نسرين انه كان مقفول..
كانت ريحة الشيشه اللي موجوده بالزاويا فايحه منه..ابتسمت وشافت ان ريحة الشيشه تسوى كثير عندها ولا انها تشم ريحة عطر نسائي..
دخلت على غرفتها..غرفة نومها اللي اول مادخلتها قلبها قبض,شمة ريحه العوده فيها ,والسرير اللي واضح انه نايم عليه وكان ينام عليه..بس ياترى كان فيه احد معه وله هو لحاله اللي كان عليه, قربت اكثر واكثر من السرير مدت يدها عشان تاخذ المخده وتشمها ,ولكن..
غيرت رائيها ..
ماتبي تكتشف ماتبي تشوف دليل خيانته,ماتبي تظطر تنصدم بالواقع..
بدت تنظف باليوم الاول والثاني والثالث ولكن بداخل قلبها فيه نقطه سودا وفيه حزن وفيه شك وفيه الم ماتقدر تنظفه وترتاح ولاتقدر تواجهه وترتاح,,
خلت الأمور مثل ماهي وكتمة بقلبها غصتها باللذات.. ان احساسها يقول ان في احد بحياته.
::::::::::::::
بيت اصاله
ام سلمان:خلاص تسلمين ياام محمد
اصاله:خذي لك بعد واحد
ام سلمان:والله ياوخيتي القيلون لاعبٍ فيني لعب,خلاص الله يجزاس الجنه
اصاله:وياك ان شاء الله
ام سلمان :اللحين سواقس مابيقدر يجيب سلمان بكره من الماطار
اصاله:المشكله السياره قالوا يبي لها يومين تصليح,بس لاتشيلين هم,بخلي محمد يروح يجيبه لو انه مو بالماطار بالصين.
ام سلمان:الله يجزاس خير , ادري اني بكلف عليكم
اصاله:افا عليك لاتقولين كذا
ام سلمان: إلا ماقلتي لي.. وشلون محمد بعد طلاقه؟
اصاله:اسكتي بس ولدي ذا انجن رسمي
ام سلمان:هــــــــو!! وليه ياكافي؟؟
اصاله:يحب فاتن وللآن متعلق بها , ومع ذلك له كم يوم وهو يزن على راسي يبي يعرس.
ام سلمان:وبعدين؟
اصاله: ابد اقنعني اليوم بعد المغرب أروح واشوف عروسته واقابل اهلها
ام سلمان: بيني وبينس افضل انه يبي يعرس ويعيش حياته... ومع زوجته الجديده بينسى فاتن .
اصاله:تشوفين كذا؟؟
ام سلمان:اي والله .. اذا معزم سايريه وزوجيه على سنة الله ورسوله,ليه التأخير والتردد !؟
اصاله:ياخوفي انه مايقدر ينساها ويفشلنا مع العالم
ام سلمان:لاتخافين وانا اختس ,زوجيه وشوفي ذريته,, ويابنت الحلال هذا كله جنون الشباب ,تشوفين اذا مانساها بعد ماتخطبين له مباشره
اصاله:...
ام سلمان:ماعليس منه بينسى وبيفرح بزواجه ولا كأن فيه شي اصلا
اصاله:ان شاء الله هذا اللي اتمناه
ام سلمان:وترى للآن مسألة الحرمه قائمه, اذا تبين اكلمها تجي تقرا على ولدس ادق عليها اللحين
اصاله:ههه لا ياعمري خلني من خرافاتك انتي والساحره اللي تعرفينها.. وتراك بتجين معي
ام سلمان:اجي معس وليه لأ,متى بتروحين لهم ؟
اصاله: بعد المغرب وش فيك فقدتي الذاكره؟
ام سلمان: هههه .. اقول
اصاله: سمي
ام سلمان:قولس عندها اخت اخذها لسلمان ولدي؟؟
اصاله:الله يقطع ابليسك يعني ماانتي جايه معي لله ها؟؟
ام سلمان:هههههه
::::::::::::::::
المستشفى
بعد ماقرر د/اسعد ان داليا تساعد د/ احمد, تغير وقت شغلها وصار من الساعه 4 الى الساعه 9 الليل وهالشي كانت كارهته داليا لأنها ماراح تقدر تقابل صديقاتها ولا تغير جو كعادتها ,مع ذلك راحت الشغل بروحها الحلوه وابتسامتها المعهوده اللي ماتفارقها...
داليا:مرحبا دكتور
د/احمد بعد ماناضر ساعته: ليه مكلفه على نفسك وجايه؟؟ كان تأخرتي كمان ساعه.
ناضرت داليا ساعتها:ماتأخرت دكتور الساعه اللحين 4 وخمس دقائق
د/احمد: طيب معناها .. مو من حقك تتأخري خمس دقائق
داليا بإتسامه:اوكي ,شي ثاني
د/احمد:روحي نادي لي المريضه امل يوسف
داليا:اوكي..
"وراحت داليا ومزاجها بدا يتعكر من هالأحمد,, وبعد مانادتها ودخلت المريضه,,
د/احمد بإبتسامه:تفضلي..ايش عندك
المريضه:والله يادكتور حلقي يوجعني مااقدر ابلع منه
د/احمد وبهدوء: ومن متى
المريضه:قبل اربع ايام بس اليوم وووو ......
" كانت تناظره داليا بإستغراب وتعجب ,باللذات يوم تشوفه يبتسم مع مريضته,ويتكلم بكل ادب واحترام!!!
واستغربت انه يقلب بسرعه عجيبه مع غيرها ,وبعد ماخلص الحاله الاولى..
د/احمد:ياانتي نادي لي المريضه موضي محمد,وجيبي لي كوب قهوه
ناضرته داليا بقهرواليد بالخصر:انا اسمي داليا,وثاني شي ممكن تطلب اللي تبيه بذوق لو سمحت؟
"د/احمد ناضر لداليا ولأول مره تطيح عينه بعينها ,وحس انها تذكره بروحه بقلبه بحبه , تعوذ من ابليس وقطع صمته صوت داليا اللي ارتبكت من نظرته :اا كيف تحب تشرب قهوتك ؟
د/احمد وهو يجمع تركيزه:اا من غير مبيض
داليا:اوكي
"وهنا انا ايش اقول لكم عن احمد بعد مافقد انين ..
لاهو اللي قادر يعيش حياته مثل اول ,ولا هو اللي قادر يعيش مع خسارته.
قرر انه يغير مدينته ,ويكمل شغله بمكان ثاني,,وهذا اللي سواه الهروب ..
ومع انه هرب اخذ معه ذكرياته واخذ معه حبه وفقدانه وتعاسته.
صار انسان متسلط ومتبلد, إلا على مرضاه.. كان الدكتور الاكثر كفائه واكثر تعاسه.
اما داليا راحت تجيب له القهوه وتذكرت انها مشتاقه لفاتن, فقامت تحاول تقلد فاتن بعربجتها ومشيتها بكل جرءاه مهي مكترثه باللي حولها,وجلست تِضحك على نفسها وتضّحك العالم اللي حولها.. وبعد ماجهزت الكوب حبت تحط له ذرة ملح وتعكر مزاج احمد مثل ماعكر مزاجها
::::::::::::::::::::
اما بيت جارح
ماراح ازعلوا ولا راح ازعجوا ,انا احبوا وراح اتكلم معاه بإحترام ,ولا راح اضايقوا,وحتحمل كلاموا حتى لو كان قاسي..
"كذا كانت تقول بنفسها خلود قبل لاتدخل المجلس على جارح وهو مندمج بالتلفزيون" .. فجلست جنبه وقالت
- جارح
جارح وهو منسجم بالأخبار:همم
خلود:ممكن اكلمك شويا
جارح:وش تبين اسمعك
خلود:لأ حبيبي ابغاك تركز معايا شويه
وطى جارح التلفزيون وقال بملل: نعم ..وش تبين؟
خلود قالت بتردد: امم اا انت كنت تحب وحده من حريمك اول؟
جارح:نعم!! اللحين هذه هي السالفه؟؟
خلود:لأ بس ابغى اعرف تمهيد لكلامي يعني
جارح بملل اكثر: لا.. يعني عادي
خلود:طيب انو ااا
جارح:تكلمي خلصينا
خلودبإنكسار :انت ليه حاطط حاجز بيني وبينك
ناظرها جارح بإستحقار وسكت
كملت خلود: يعني حبيبي انا اشوف انوا ضهرك صار احسن مع ذلك تطلب تنام بالمجلس بعيد عني
جارح وثار بعد جملتها وقال بعصبيه:يعني انا مثلا قاعد امثل عليك انتِ ووجهك؟؟
خلود خافت منه وقالت بخوف:لا وربي مو قصدي,بس انا كان نفسي نعيش زي العالم ونجيب لنا ولد وله بنت
جارح وقف وقال بصوت عالي :ليه انتي ووجهك شايفه انك مثل باقي حريم العالم!!!
خلود ودمعتها على خدها : انا اا
جارح: وبعدين من قال لك اني ابي بزاريين منك ها؟؟!!
خلود والصدمه على وجهها:يعني ماتبغانا نجيب عيال
جارح وبقسوه :لأطبعا انا ماابي شي يربطني فيك ابدا
خلود والحروف تطلع منها بخوف:يعني ماتبغاني
جارح وهو يطلع من المجلس :وش اللي ماابغاك وابغاك !! حريم فاضيه
خلود وهي تلحقه وتمسك ذراعه:جارح وربي اسفه ,انا ماابغى اضايقك لكن ابغى اعرف انت ايش تبغى مني وانا مستعده اسويه
جارح وبقلب بارد :كل اللي ابيه انك تحطين لسانك بفمك ولاتزعجيني ولا تكثر قرقرتك ,ودام اني ماقصرت عليك بشي وكل شي تبينه يجيك تنطمين ولا عاد اسمع حسك بالبيت
"خلود نزلت راسها والخوف منعها تنطق بحرف زياده,طلع جارح وانفجرت ببكاها اللي شهدت عليه كل تفاصيل البيت"
::::::::::::::::::::
نرجع للمستشفى
داليا بإبتسامتها : تفضل القهوه
د/احمد:خليها على الطاوله وجيبي لي هالأوراق
داليا:طيب
د/احمد شرب من القهوه وناضر لداليا :ليه طعمها كدا!! غريب
داليا بإستهبال :وش فيها!! ممكن لأنك ماتبي فيها الكفي ميت؟
د/احمد مسك القلم بيده ورجع بقعدته على الكرسي وقال بحزم:ذوقيها وشوفي..
داليا: ها .. لالا وع انا اقرف ومااحب اشرب من ورا احد
د/احمد:وانا مصمم انك تذوقيها
وقدام اصراره ونظرته المتسلطه ماكان قدامها الا تذوق وقالت:امم زينه بس ناقصها مبيض
د/احمد:صحيح مبين على وجهك انها طعمه, اجل كملي اشربيها لأنها ماعجبتني,صحه وعافيه
داليا:تؤتؤ
د/أحمد:ايش بك تفضليها
داليا وهي تفك من يدها الكوب بخفه : اوبـــــس,خساره انكب
د/احمد بإستخفاف :ذكيه ماشاء الله ,تفضلي مسحيها.
داليا ببرود: ماهي شغلتي ,بروح انادي جولي تمسحه
د/احمد:براحتك ,واحمدي ربك انوا مافي مرضى تنتضر, وله كان اجبرتك تمسحيه بنفسك
طلعت داليا من عنده وتغيرت ملامح الهدوء لمدت بوز:ياجولي جولي
جولي:يس دلول
داليا:تعالي شكلي بتعامل معك كثير ياجولي ,تعالي لمكتب دكتور زفت
جولي:هههه والله هزا دكتور انتي خليك في اسبوع مجنون كتير
داليا:تؤتؤمن جد شكل هذا اللي بيصير
جولي:ههه هههههههههههههه
::::::::::::::::
بيت اهل فاتن
بدر:السلام عليكم
امه:وعليك السلام هلا والله تعال اقعد معنا
بدر:اللحين بجي ,بس ابي اطلع اكلم فتون بموضوع
الام:فتون برا ماشفتها وانت داخل
بدر:لأ ماشفتها شكلها من ورا الحوش..
امه :ممكن
"وراح لقاها مسرّحه فمشى بخطوات خفيفه عشان ماتحس به "
بدر:بـــــــــــــــــــو
فاتن:تؤتؤ بدر وبعدين معك فجعتني
بدر:بسم الله على فتونة قلبي والله
ابتسمت له فاتن: خير وش هالفرحه اللي بوجهك
بدر:عندي لك مفاجئه
فاتن:اها وش هي؟
بدر:شوفي"وطلع تذاكر سفر"
فاتن:وين رايح؟
بدر:مو تبين تشوفين تميس ومهند باخذك معي بهالسفره
فاتن:هه لميس مو تميس
بدر:المهم ذيك اللي بذاك المسلسل اللي مابغى ينتهي
فاتن:وش اللي جاب السفره ببالك؟
بدر:عندي شُغل هناك وقلت لازم اخذك تغيرين جو , كم فتون عندي انا؟
فاتن:يسلم قلبك,والله انها جت بوقتها
بدر:خلاص اجل جهزي اغراضك ,وبكره ان شاء الله نركب طيارتنا
فاتن:اوكي
بدر:يله انا بروح اتقهوى مع امي وابوي واقولهم مره وحده عن سفرتنا
فاتن:اوكي
:::::::::::::
بعد المغرب
و ببيت العروس
اصاله:يشهد الله اني ارتحت لك ياام فيصل
ام فيصل:الله يسلمك ,هذا قلبك الطيب و اصلك النادر
ام سلمان:اقول ياام فيصل وين العروس وانا اختس نبي نشوفها
ام فيصل بكل طيبتها :ههه يله اللحين اخليها تدخل ,ترى بنتي خجوله وتستحي
ام سلمان:ايه ماشاء الله ..الله يحفضها
"وقامت ام فيصل نادت بنتها وهج ودخلتها عندهم , ومن اول مادخلت وهج تتصنع الحيى وتناضر الارض"
ام سلمان: ماشاء الله تبارك الله
اصاله:ما شاء الله
ام سلمان وهي تسلم عليها: هلا ببنيتنا الغاليه
اما اصاله تسلم عليها وهي تحاول تتذكر وين شافتها: هلا ببنيتي
وهج بحياء: هلا بك
ام سلمان: لا ماشاء الله يا ام فيصل بنيتس تدخل القلب
ام فيصل: الله يسلم قلبك ياام سلمان
ام سلمان:وش اسمك ياعمري
اصاله وهي تتذكر : انتي سمر صح؟؟
سمربخجل :ايه ..
ام سلمان:ماشاء الله يابنيتي بينجن عليس هالمحمد ,صح ياام محمد
اصاله بصدمه:ها أي اي
ام فيصل:الله يحييكم والله
ام سلمان تناظر لأصاله مستغربه سكونها: الله يجزاس خير ياام فيصل
ام فيصل: والله منورين بيتي,وزيارتكم هذه على العين والراس
"اما اصاله منصدمه من فرحة سمر اللي مبينه عليها وساكته"
ام سلمان وتحس فيه شي :اقول يا ام فيصل متى تصير الشوفه تدرين الولد والده متوفي واعمامه كلهم برا ,فبعد ماتصير الشوفه نطلبهم يجون صح ياام محمد
اصاله:...
ام سلمان وهي تغز بيدها اصاله: صح
اصاله:ااا إي صح
ام فيصل:والله انتم ناس تنحط على الجرح يبرى واللي تشوفونه هو اللي بيصير ان شاء الله
ام سلمان:على بركة الله اذن حددوا اليوم وعطونا خبر,وحنا جاهزين
ام فيصل: على وين تو ماشربتوا الشاي
اصاله: لأ ماعليه مره ثانيه لان محمد هو اللي جابنا وينتضرنا من اول بره
ام فيصل:مثل ماتحبون
ام سلمان:يله فمان الله
ام فيصل:مع السلامه
""وبالسياره""
ام سلمان: هــو وش فيس ياام محمد ساكته كأنس العرؤوس
اصاله:ابد مافي شي ,بس تذكرت شي وضايقني
محمد:لاتقولين يمه ان العروس ماعجبتك ؟
ام سلمان:وشي!!... لا والله انها مثل القمر شعرها اسود مثل الليل وعيونها وساع وحلوه, والسنون مرتصه مثل اللولو
اصاله بتوتر :خلاص ياام سلمان ,بتشعِرين بها
محمد:وش فيك يمه اذا ماارتحتي لهم قولي لي؟؟
اصاله:...
محمد:يايمه؟؟
اصاله:لا انا ارتحت لأمها
محمد:والبنت؟؟
ام سلمان:ماعليك من امك وانا امك , خذ مني توكل ورح شفها واملك بسرعه
محمد:ههه يصير خير,اقول ياخاله
ام سلمان:سم
محمد:اا
ام سلمان: ههههه اسئل لاتستح قول قول؟؟
محمد: لا مو حياء بس ااا هي يعني البنت اا..تشبه فاتن
اصاله وكأنها ماصدقت تثور عليه : انت وش فيك انجنيت؟
محمد:ليه يمه هو سؤال اا عادي
ام سلمان:وش ذا السؤال ياولدي؟؟يعني انت تبي بنات العالم تشبهها مثلا
محمد: لا .. بس ابيكم تقولون لي اذا فيها من فتون شكلها طريقتهاا اا
ام سلمان:لاحول ولا قوه الا بالله
اصاله:اقول خل عنك هالسالفه اللي مو بوقتها ورح دكتور نفسي اصرف لك
محمد:يمه الله يسامحك وش شايفتني مجنون
اصاله: إي مجنون رسمي بعد
ام سلمان:قولوا لا اله الا الله ياجماعه ,وانت ياولدي تعوذ من ابيلس وخلاص انسى سالفة فاتن
محمد: ياخاله وشلون انسى ؟! اذا كانت فاتن زوجتي
اصاله بعصبيه:كانت.. كانت زوجتك اللحين لو جاها نصيبها ممكن تعرس مثل أي بنت
محمد بعصبيه وهو يزيد سرعته : وشي!!!! تعرس!! ليه على كيفها !! والله لاقتله واقتلها هي بعد
اصاله:شفتي ياام سلمان ذا مو جنون وهبال بالله عليك؟
ام سلمان:وش ذا اللي تقوله ياولدي الله يصلحك
محمد وبعناد:ايه وانا صادق فاتن لي ,واذا كانت مو لي فهي مو لأحد غيري
ام سلمان:والله ياولدي اشوف ان امك معها حق,مفروض تأجل فكرة الزواج شوي
محمد:وليه ااجل انا رجل ابي اتزوج,وراح اتزوج
ام سلمان:اقول يامحمد, الحمد لله اني وصلت بيتي والله يعين امك عليك مع السلامه
اصاله:في امان الله ,اقول ياام سلمان
ام سلمان:سمي
اصاله:ابيك بكره تجين معي المعهد اسولف معك بموضوع كذا
ام سلمان:لاياحبيبتي ,بيجي ولدي ابي اطبخ له وانتضر جيته,دقي علي وبس
اصاله: خلاص اجل ادق عليك
ام سلمان:ان شاء الله,يله فمان الله
اصاله:معك الرحمن
::::::::::::::::
المستشفى
د/أحمد:ها باقي احد برا
داليا:لا خلاص اصلا انتهى الدوام "ووقفت داليا مكانها وهي تبي تسأل ولا تدري كيف"
د/أحمد:ايش بك واقفه ليه مارُحتي؟
داليا:ها اللحين بروح ,بس .. دكتور ممكن سؤال
د/أحمد وهو يوقع ورقه: لأ
كتمت غيضها داليا وهي تناظر فيه وهو سافهها
د/احمد: ها ايش بك ليه ما رحتي ,انتي ماحتبطلي سرحان فيا؟؟
داليا وهي مقهوره: ههه سرحان فيك "وطلعت وهي ودها تعطيه كف"
د/أحمد:لحضه ياانتي
رجعت داليا: للمره المليون ..انا داليا,نعم
د/أحمد:فين رايحه قبل لاتاخدي الملفات توديها
داليا:امم نسيت
د/أحمد:اسمعي بكرا ماابغى تأخير ,وتجيبي القهوه وانتي جايه المكتب ونادي جولي من بدري تنضفوا اوكي؟؟
داليا وتناظره بحقد:...
د/احمد: ولاتنسي أي شي وأفضل تاكلي زبيب عشان تقوّي ذاكرتك
"كتمت غيضها داليا وطلعت وهي ثواني ..ودخلت مره ثانيه تقول له
- دكتور ممكن اعرف متى راح تجي مساعدتك؟
قال وهو خارج : وقت ماتجي تجي
"كانت شوي وتصيح بس انقذها جوالها وبالأصح اتصال فاتن عليها بهاللحظه : سلام
داليا:اهلين قلبو,كيفك
فاتن:تمام وانتي وينك وش اخبارك
داليا:اسكتي يافتون ياهو واحد وع وع وع
فاتن:هع هذا الدكتور؟
داليا:ايه جنني , تصدقين ..كأن امي داعيه علي
فاتن:اف اف لهالدرجه
داليا:واكثر ,اسكتي بس..اللي يشوف شكله مايقول ان اخلاقه كذا,والمشكله انه مع غيري بمنتهى الادب والاخلاق
فاتن:هع شكله كارهك ,ياقلبي المحبه من الله هععع
داليا:من زينه وع وع وع عليه
فاتن:هع طيب اسمعي ,انا مسافره بكره
داليا:اوما , وين
فاتن: بروح مع بدر تركيا
داليا: ياهووووو من قدوا؟
فاتن:ههه اجل "من قدوا"
داليا:وش اسوي عداني هالجداوي يلعن ابليسه على كلامه يدوخ يافتونه يدوخ
فاتن:ههه,ليه يعني وش فيه كلامه؟
داليا: يهبل "ايوا.ياانتي,ايش بك,فينوا" هههههههههههههههه
فاتن:هع ياحليلك يادالي
داليا وهي تفكر: تدرين وش ودي فتون..
فاتن:ايش؟؟
داليا:ودي اسمعك تضحكين من قلبك مثل اول
فاتن:...
داليا: قلبوا وين رحتي؟؟
فاتن:اه يادالي اتمنى اقدر
داليا:ان شاء الله السفره هذه تغير نفسيتك للأحسن
فاتن:نقول ان شاء الله
داليا:اف على هالدكتور لو انه ماطلع لي مثل الجني.. كان مداني زرتك وودعتك ياقلبو,بس الوقت متأخر
فاتن:ههه معذوره والله ,الله يعينك عليه
داليا:لو انك مسافره مكه كان قلت لك ادعي لي هههههههاي
فاتن:هع,طيب انا لازم اقفل بحضر شنطة بدر
داليا:اوكي عنوني وانا باخذ هالملفات اللي كان بيموت هالعكر لو اخذها معه ووداها للإستقبال
فاتن:ههه اوكي
دالي:باي
" ويوم تلتفت وراها تبي تروح تلاقي د/احمد اللي كان وراها ينتضر تخلص مكالمتها ويقدر ياخذ جكيته اللي نساه ,,وبس شافته انقلب بياض وجهها لحمار وهي تحاول تتذكر وش قالت لفتون عليه"
د/احمد وهو يلبس الجكت:انتي فعلا امك داعيه عليكِ "وطلع"
"اما داليا ماقدرت ترد او تبرر فكل اللي سوته .. فطست ضحك من الإحراج وعليه"
::::::::::::
الساعه 8 الصباح
فتحت خلود عيونها وقعدت بكسل على السرير ودخل عليها جارح ..
جارح: خير ان شاء الله فيه حرمه محترمه تنام للساعه 8 الصباح؟؟
خلود وهي متعكره من جرحها لها امس: انا صاحيه,وربي صاحيه
جارح:وش صاحيه وانتي على السرير قومي نضفي بيتك اطبخي اغسلي
خلود بتملل:اللحين انت ايش تبغى ياجارح,ليه مارحت دوامك
جارح:لاااا اطرديني من بيتي احسن
خلود: لاحول ولا قوه الابالله
جارح:مو عاجبك كلامي ياسيده خلود
خلود: ياجارح تراني مصدعه ولا لي نفس للمشاكل
جارح:اصلا انتي بحد ذاتك مشكله
خلود: ياجارح ايش تبغى مني ماتبغاني خلاص طلقني وخليني اروح عند اهلي
جارح:اطلقك!! والله لو تموتين ماطلقتك
خلود: اجل ايش تبغى!!
جارح:ابيك مثل الحريم اللي يقومون ببيتهم وازواجهم
خلود وبدون شعور : ليه انت قايم بدورك كزوج؟؟
جارح:وش تقصدين ها؟
خلود بخوف واستدراك : اا مااقصد حاجه
جارح:لا تقصدين انا مني رجال ها ,هذا العشم بدل ماتقولين زوجي ضهره يوجعه الله يعينه ويقومه بالسلامه ,قاعده حضرتك تطلبين بحقك
خلود: وربي مااقصد,هي كلمه وطلعت
جارح:لاتقصدين اصلا انتي قليلة حيى ولاتربيتي
قامت خلود وهي مصدعه وتكت على التسريحه:الله يسامحك
جارح:ان شاء الله يسامحني انا ماقلت شي غلط ,انتي قليلة حيى ويبي لك تربيه
رمت خلود من القهر اغراضها على الارض:لو سمحت احترمني شويا
جارح:وشلون تبيني احترم انسانه مهي محترمه ها؟؟
خلود:جارح خلاص دامك ماتبغاني ,خليني اروح لأهلي
جارح:اذلفي اصلا اللحين بأطلع احجز لك
خلود:...
جارح:سمعتي؟؟
خلود بإنكسار: زي ماتحب
"وبعد ماخلق مشكله طلع كعادته مخلي قلبها الكسير"
::::::::::::::::::::
الماطار
وبعد ماشحن بدر شنطهم جا لفاتن وهو مبسوط..
بدر: ياسلام اللحين يافتونتي اخذك وامشيك وتشوفين الدلــ
فاتن:بدر
ومكمل بدر:وبوريك القصر اللي صوْرت به تميس ,واخذك البحر ..
وش رائيك تبينا نخيم ولا لأ
فاتن وتعلي صوتها:بدر..اوقف
بدر:ليه وش فيه هناك الكراسي بنقعد ننتضر
فاتن:لا انا ماراح اقدر امشي انقطع شبشبي
بدر:هههههه لاحول ولا قوه الا بالله اللحين وقتك يافتون
فاتن:وش اسوي
بدر:ابد لاتسويين شي غيري هالمشيه والبسي مثل البنات ذيك اللي لها وش اسمه كعب..
فاتن:اقول لا تتفلسف علي ها
بدر:طيب يله نروح نشوف ممكن يبيعون بمكان
فاتن:لا ما بقدر امشي رح انت وانا بأنتظرك هنا
بدر:خلاص اوقفي .. هنا ولاتتحركين
"ويوم راح بدر شافه اللي له قلب ينبض بإسمها..
وبداخله شوق يملى كبر قلبها..
شافه محمد اللي كان ينتضر سلمان,وكان يتأمل فاتن من بعيد,اخذته رجله لعندها من غير مايحس او يبي..
وقرب لفاتن و قال : فتون
انصدمت فاتن من شوفته ولا قدرت ترد,لكنها صدت عنه وتمنت يروح عنها
محمد وهو يقرب لها اكثر:حبي والله اشتقت لك
رجعت فاتن على ورى وهي مشتاقه له اكثر,ولكن وش تقول وقلبه ملاه الشك او اكثر
محمد:ليه ماتردين على اتصالاتي,ليه يافتون
فاتن وبصوت يرتجف:محمد عيب عليك اللي انت قاعد تسويه
محمد:اه يااني مشتاق لصوتك ,فتون وش رائيك نروح
"فاتن مابين الخوف وبين الشوق وبين الجرح,ساكته وتسمع جنونه"
كمل محمد: فتون خلينا نبعد عن الناس ونروح من هنا, نروح من الرياض كلها ها .. نروح؟؟وش قلتي؟؟
فاتن وهي تتذكر بدر:محمد انت وش فيك صاحي!!! الله يخليك رح من هنا لايجي بدر ويشوفك
محمد:مايهم يشوفنا, او لأ انتي زوجتي خليه يشوفنا وخلينا نروح من هنا ..تعالي فتون معي
"وسحب يدها ويبيها تمشي معه ماكان بعقله ولاكان يهمه احد ولا كان قاعد يفكر اصلاً..
الناس تجمعت بعد ماسمعوا فاتن وهي تصرخ عليه,, وبدر يوم شاف الناس مجتمعه جا مسرع يشوف اللي صار, ويوم شاف محمد هجم عليه وبدا الضرب من الطرفين..
محمد كان شايفه السبب بطلاقه وبدر يشوف انه سبب لحزن فاتن وانكسارها,, كل واحد حب يطلع غله وياخذ حقه من الثاني ,وكل واحد يبي يأذي الثاني اكثر..
اللين جو حراس الامن وفكوا بينهم واخذوهم للإدراه..
وبعد ماعرفوا الموضوع اعتذروا لبدر وخلوه يلحق طيارتهم.
اما فاتن قعدت بالارض تبكي بإنهيار وجسمها كله يرجف,خافت على بدر وخافت على محمد اكثر,جا لها بدر يحاول يوقفها ماقدرت توقف ساعدها تتكا عليه وركبوا طيارتهم,وهو مو داري وش يقول لها ,كان وده يصرخ عليها وبنفس الوقت رأف بشكلها ..
ماكان يدري هي متفقه معه او انها صدفه جمعتهم,قرر انه يثق بأخته مثل العاده, ويسكت وينسى الموضوع ..
:::::::::::::::::::
اما بالمعهد
دقت اصاله على ام سلمان
اصاله:ها جهزتي غرفة ولدك؟؟
ام سلمان:ايه اكيد وبخرتها ,هذا الغالي
اصاله:ههه الله يخليه لك يارب
ام سلمان:الللهم امين
اصاله:عموما انا كنت بكلمك على البنت اللي شفناها
ام سلمان:وش فيها والله انها قمر
اصاله:ماعليك بالشكل ياام سلمان,هذه البنت تدرين من هي؟؟
ام سلمان : لا والله انا مااعرفها ياوخيتي
اصاله: هذه البنت صديقة فاتن,ومو أي صديقه لأ غاليه عندها بالحيل
ام سلمان:سبحان الله,جد الدنيا صغيره وانا اختس
اصاله تفكر :...
ام سلمان: وش فيس؟؟
اصاله:هو قال لي انه كان يكلمها,يعني معقوله ماتدري انه زوج صديقتها؟؟!!
ام سلمان:اعوذ بالله من تفكيرس يا ام محمد ,اكيد ماتدري وبعدين تعالي هنا وشلون ولدس يكلمها؟؟
اصاله:والله ماادري عنه
ام سلمان: اجل هالبنت سمعتها زينه؟؟ مالقى غيرها من بنات خلق الله اللي سمعتهم مثل الذهب
اصاله:وش تبيني اسوي فيه ياام سلمان ؟؟ يعني انتي ماشفتي حالته اللي ماتسر
ام سلمان:اي والله انه فارط
اصاله:ماادري انا احترت وش رائيك اقول لمحمد وله مااقوله,وله وش السواة
ام سلمان:والله إن حالة ولدس حاله , بس شوفي البنت شايفتس امس وتبتسم وعادي عندها,ليه تخربين عليهم !!! ودامه هو راضي بها ويعرفها خليهم يتزوجون وبس
اصاله:يعني مااقوله
ام سلمان:وش تفرق وانا اختس,كله واحد
اصاله:الله المستعان
ام سلمان: هالأيام هذه كل شي تغير ومابقى شي على حاله
اصاله:على قولك
::::::::::::
مكالمه من خلود لأخوها
خلود وهي تصيح بإنكسار: خميس بكره ابغاك تستنناني في الماطار
خميس:نعم!! انتي حتجي جده!!
خلود:ايوا جارح مايبغاني
خميس:وليه ان شاء الله ايش سويتي من داهيه؟؟
خلود:حرام عليك وربي ماسويت ولاحاجه ,هوا اللي دائما يعاملني بشده ويتصرف معايا كأني خدامتوا
خميس:طيب وايش فيها يعني كل حرمه بتخدم زوجها ايش الجديد
خلود:ياخميس اقول لك مايبغاني قلي حوديك عند اهلك
خميس:اعتذري منوا وانتهينا
خلود:اعتذر على ايش ,وربي هوا مايبغى حتى يسمعني
خميس:يعني الرجال حيتبلى عليكِ ,انا دحين حدق عليه واشوف ايش الموضوع
خلود:طيب استناك ترد علي
خميس:يله سلام
ودق على جارح اللي مارد الا بعد مادق مره ثانيه..
جارح:هلا خميس
خميس: السلام عليكم, كيف الحال ان شاء الله تمام
جارح:لا والله مع اختك الله يصلحها مافيه راحه
خميس:ليه عسى ماشر إيش اللي صار؟
جارح:يااخي اختك لاتهتم بنفسها , ولا تنضف البيت,وكل هذا مايسوى شي جنب اللي سوته اليوم
خميس : وايش سوت كمانا ,بقى حاجه؟!!
جارح: ياحبيبي اليوم الصباح وصلت فيها انها كانت ترمي علي الاشياء اللي على تسريحتها
خميس:معقوله كل دا تسويه خلود
جارح:وش اقولك بس الله يصلحها انا صراحه تعبت معها,يااخي شف لك حل مع اختك
خميس:لاحول ولاقوه الا بالله,عموما انا حكلمها ومايصير ان شاء الله الا كل خير
جارح:يصير خير
خميس:اهم شي انت لاتزعل وكبر مُخك ترى كل الحريم عقولهم صغيره
جارح:والله صدقت بهذه
خميس:اجل انا اكلمها دحين واوريك فيها
جارح:يصير خير
خميس:يله مع السلامه
جارح:في امان الله
::::::::::::::::::::
المستشفى
جات داليا بكل نشاطها وحيويتها الساعه اربع الا عشر للمستشفى
وبخطوات سريعه تحضر القهوه بعد ماارسلت جولي تنضف المكتب وتحاول تسرع اكثر للمكتب الا ويقابلها د/أحمد وماتمالكت سرعتها وينكب جزء من القهوه عليه ..
داليا بإبتسامه وفشله:مساء الخير
د/احمد: مبين انوا مساء الخير
داليا وهي مستانسه بداخلها:اسفه ماكنت اقصد,هنا جولي صح ياجولي ,ترى جولي شاطره حتى بهالمواقف
جولي:هههه,عطيني معطف انا غسل بسرررررعه وبعدين جيب
د/احمد:لاحول ولاقوه الابالله" وقعد على مكتبه وشاف اول ملف وقال,تفضلي ست دينا نادي لي سميره محمد
داليا:اوكي,بس انا اسمي داليا (ناظرها نظرة"وش تفرق" فطلعت داليا ونادت على سميره ودخلت هي واياها عنده)
اول ماقعدت سميره فكت نقابها وقالت: اوه يادكتور
د/احمد:تفضلي من ايش تشكي
سميره اللي تتكلم بسرعه:يوه انا مااني قادره اتنفس ولا اشم حتى يوم اكل شي مااحس بطعمه ,تصدق يادكتور انــ
د/احمد وهو يقعد مقابلها عشان يكشف عليها:اها طيب يادينا قربي لي النور
داليا وتفوّتها:اوكي
وتكمل سميره:صراحه يادكتور انا تعبت من هالحال حتى من يأسي بعض الاحيان اجيب البصل اشمه اقول ممكن يفكــ..
د/احمد:طيب ممكن هدوء عشان اقدر اكشف عليك
وتكمل سميره بلامبالاه:طيب بس اول اشرح لك , انا رحت لدكتور قبل شهرين عطاني ...
"وجلست تقرقر وداليا ماقدرت تشوف وجه احمد وهو متضايق والحرمه تكمل الشرح فضحكت وصوتها على
د/احمد بصوت عالي سكتت بعده سميره:ديــــــــــــــنـــا قلت هدوء
"وبعد ماكشف عليها: اتطمني هي حساسيه مع الأدويه اللي بتاخذيها راح تكوني افضل
سميره:اما كل ذا وبس حساسيه
د/احمد بتجاهل:وهذه الوصفه تقدري تروحي دحين تاخذيها من الصيدليه ومراجعتك بعد اربع ايام
سميره بغير اقتناع: والله ماادري عنك, نشــــــوف
داليا بإبتسامه:ها انادي اللي بعدها
::::::::::::::::::
وطبعا بهالوقت دق خميس على خلود..
خميس بعصبيه :انتي ايش اللي مسويتوا في الرجال ها!!
خلود:وربي ماسويت حاجه
خميس:كيف يقول لي انك ماتهتمي بنفسك ولا تنضفي ها !! ايش هوا ليه متزوجك عشان يجيب لك خدم وحشم؟؟
خلود:صدقني يكدب عليك وربي من اول ماافتح عيني اللين انام وانا انضف زي المجنونه مع انوا الدنيا نضيفه
خميس:انتي تستهبلي عليَّ وله على نفسك ,وبعدين كيف اليوم ترمي الاشياء عليه ها؟؟ ايش بك انجنيتي!!
خلود:انا!!!
خميس:لأ انا
خلود:وربي مارميتها عليه رميتها على الارض
خميس:انا ابغى افهم انتي ناويه تتطلّقي وتجلسي بحلقي وله ايه؟؟
خلود:...
خميس:شوفي حركاتك دي إن مابطلتيها لأجي الرياض بس عشان اادبك واوريك كيف تحترمي زوجك وتقدريه فاهمه
زادت خلود ببكاها
خميس:هوا دا اجلسي صيحي ومثلي البراءه,وربي ياخلود ان ماصرتي حرمه واحترمتي نفسك لأغلط عليكِ سامعه
خلود بإنكسار:طيب
خميس:واللي يقول لك عليه سويه واهتمي فيه وبنفسك سامعه وله لأ؟
خلود:طيب
خميس:خليني اشوفوا يشتكي منك وربي ياويلك
خلود: طيب
خميس: هيا انقلعي "وقفل بوجهها الخط"
خلود:....
قفلت السماعه وزادت دموعها صرخات.
::::::::::::::::
المستشفى
وبعد ماانتهى دوام داليا دقت على فوزيه
داليا:فوووز كيف الحال
فوزيه:بخير عساك بخير
داليا: الحمد لله قلبي, بغيت اسئلك
فوزيه:هلا
داليا:مو قبل فتره تسئلين على طبيب انف واذن وحنجره
فوزيه:الا
داليا:انا عندي لك دكتور عجـــــــيب
فوزيه:لا ماابي دكتور ابي دكتوره
داليا:حبيبتي فوز هذا ممتاز
فوزيه:اكيد؟؟
داليا:ايه اكيد افا عليك
فوزيه:خلاص اجل انا كنت بجي ادخل للبشره تعرفين ملكتي قربت وابي اهتم بها
داليا:خلاص انتي بس تعالي وانا بدوْر بك المستشفى كلها
فوزيه:هه خلاص يصير خير
داليا: اجل انتظرك لاتتأخرين
فوزيه:لا لا خلاص بإذن الله اربعه اكون بالمستشفى
داليا:طيب حلو عشان تدخلين اول وحده
فوزيه:اوخص بتتوصين فيني
داليا: ههه ايه اكيد كم فوز عندي
فوزيه : اوكي
داليا:يله حبيبتي باي
فوزيه:باي
:::::::::::::::::::::
- كيف ممكن يكون ضمير سمر؟؟وهل ممكن يتم كل شي مثل ماخططت؟؟
- كيف راح تكون سفرة فاتن وبدر؟
- ممكن فيه قلوب تدق بالبارت الجاي؟؟
- وبالبارت الجاي راح نبدا نغير جو ونعرف معلومات عن تركيا..
كونوا بالقرب
دمتم كما تحبون
فتومه
مواقع النشر (المفضلة)