الفصل 9

جمعت بنات
قعدت داليا بعد ماتعبت من الرقص وقالت :وه تدرون يابنات وش ودي؟؟
اماني: وش ودس ياقلبي؟
داليا وتشبك يدينها:ودي احب
سمر:وليه ماتحبين يااختي الحب حق مشروع
داليا:هو حلو الحب بس لاعاداتنا ولا تقاليدنا تسمح لنا نعترف فيه قهر
سمر:دالي عيوني تغير الزمن وماصارت هالعادات والتقاليد على قولك مثل اول
اريج ومو عاجبها كلام سمر :سمر يعني انتي لو تتعرفين على واحد عادي لو اهلك يدرون؟؟
سمر:طبعا لأ,لأنهم من ذاك الجيل لكن عادي لو اقول لصديقاتي مثلا
اماني وتوجه كلامها لسمر :انا معس ان الحب حلو ,بس صدقيني ماله طعم اذا كان بالظلام
سمر:صح مو انا ماراح احب إلا الشخص اللي راح يتقدم لي
داليا: وش دراك من بعد ماتكلمينه وتعيشين قصة الحب اللي تقولين عنها بهل طريقه انه بيجي ويتقدم لك؟؟
سمر: صدقيني انا اكثر وعي من اني اخلي واحد يلعب علي
"على دخول فوزيه: مرحبا صبايا
داليا: هلا والله وغلا حياك
فوزيه: ها وش كنتوا تتكلمون فيه ابي اعرف التفاصيل انا سامعه يتقدم لك مايتقدم لك وش السالفه,انخطبت وحده فيكم؟
داليا:ههه ياريت من بؤك لباب السماء
اماني:هههههههه ملقوفه تموتين على السواليف,سلمي اول
فوزيه:ههه طبع فيني وش اسوي,اقول لكم بنات تدرون وش صار مع استاذه الجوهره ال..
اماني:يع ذيك عجوز قريح؟
فوزيه: إي هي مو زوجها مات من زمان
سمر:ايه
فوزيه وتقعد من الحماس مافصخت عباتها: ابد كنت بالمشغل قبل يومين الا واشوفها تتزين,عاد تدرون لازم اروح واسلم ..و سواليف انا وهي ويوم سئلتها وش المناسبه عندكم اليوم؟...تدرون وش قالت لي؟؟
اريج:وايه قالت لش؟؟
فوزيه: اول شي حمرت ثاني شي رمشت لي رمشتين بعيونها ثم قالت وهي متشققه (زواجي الليله )هههههههاي
سمر: اقول بلا استهبال فوز لا تأرنبيين علينا
فوزيه: والله العظيم انها تزوجت
داليا برقه: يااختي عادي ,جد انها كبيره بس الله معطيها قوه تقدر تحط وتجيب وتقوم بزوجها
فوزيه: وشي؟؟
والله اللي بعمرها تفكر تزوج عيالها اولى ,خير ياطير عجوز قريح.. ولو تسمعون تشرطها بالتسريحه تقولون بنت العشرين,وله المكياج الله واكبر كأنها الصبوحه
داليا:ههههههههههههههه الله يرجك يافوز
فوزيه: يااختي إنا يالبنوتات ماتزوجنا وهالعجوز تتزوج مره ثانيه
اريج: عز الله من عينش الحرمه بكره طلاقها
اماني: ههههه وانتي الصادقه يمديه جاها شلل رباعي وبالمستشفى تودع
سمر:ههه هههههههههههههههاي
فوزيه وتقوم تظبط برقعها:وجع يعني انا عيني قويه الشرهه علي جايه لجمعتكم مالت عليكم
داليا: على وين؟
فوزيه:خلاص ماابي اقعد معكم سديتوا نفسي بروح
داليا: يله عاد بلا سخافه والله انتي حلا القعده, ماعليك منهم بس
فوزيه:لا لا بروح ,لو انك من غير هالشله البايخه كان قعدت,,اصلا انتي مافي منك اثنين ,,"وطلعت"
"وماتوا عليها ضحك لأن مشيتها وهي معصبه عوجـيبه تشبه مشية فاتن"
:::::::::::::::::::::::::

بيت جارح
جارح:ياخلود وين القهوه؟؟
خلود:يله اهيه
جارح:اخلصي صبي
خلود: تفضل
جارح وهو ياخذ الفنجان: وشو,,وش عندك ؟؟ كإن عندك كلام
خلود:لا ولا حاجه,بس بغيت اعرف ايش قلك الدكتور على ضهرك؟
جارح وهو ياكل التمر:وش فيه ظهري؟
خلود وهي تجلس :مو يوجعك؟
جارح:اه إلا إلا ,قال انه بيسون لي جلسات وبيحددون لي موعد
خلود:اها
جارح:على فكره انا مسافر بكره
خلود:وحتخليني لحالي
جارح:ايه وش فيها لاقعدتي لحالك انتي قاعده بالشارع؟؟
خلود:لأ بس انا اخاف,طيب اسمع ايش رائيك توديني بيت خالي اجلس عندهم اللين ماتجي
جارح:لا وليه تثقلين على العالم ماعندك بيت
خلود:هما دائما بيعزموني وبيتمنوا ازورهم
جارح:قلت لك لأ
خلود:طيب كم حتجلس هناك؟
جارح:تقريبا اسبوع
خلود:طيب خليني اروح معاك انت وعدتني بشهر عسل ولا وديتني حتى الشرقيه!!
جارح:انتي وبعدين معك بزر انتي بزر,خلاص لاقلت لك شي افهميه من اول مره ولا تخليني اغلط عليك
خلود: لاتعليق
جارح:قومي حركي جهزي شنطتي,إخلصي
خلود: طيب
:::::::::::::::
بدر
توه رجع من الجريده بعد ماسلمهم مقال سماه
" الحب اللذي يجلب الشقاء "
دخل غرفته ورمى نفسه على سريره ,, وناظر بسرحان وكانه يشوف السماء وهو يتذكر الكلمات اللي كتبها على مكتبه وهو راجع من شغله سلمها لمدير التحرير..وتمتم بــ
الحب اللذي يجلب الشقاء
من المؤلم ان نكتب لمن لن يقرأ ,وان نُحس بمن لن يحس
وان نغرق بطرح الاسئله على انفسنا ..
هل نصارحهم.. ام نجعله السر الكبير بيننا وبينهم..
هل يجب حقا ان نخاف الرفض..ام نتجرأ ونخوض الطريق الأصعب للراحه!!
مؤلمٌ ان نبني احلاما لشخصين وتبدا بعيشها كشخص واحد ..
والأكثر ايلاماً.. ان تحب شخصا للجنون ولاتستطيع اخباره..
والأشد من ذلك.. ان تحب شخصا بجنون ولن يهتم بإخباره بذلك.
ان تحب شخصا من طرف واحد هذا هو بنظري الحب الذي يجلب الشقاء.
قد يخلق الحب اليتيم .. قد يحرم الراحه سقيم..
فتكتفي بأن تنظر له من بعيد ,وتعطي الاحلام حقا لتعيش معه كما تريد.

::::::::::::::::::::::::

جده
بيت خميس
سميره وهي تلعب بشعر خميس:حبيبي ماحتروح تزور اختك؟
خميس وبعد ماكشر:خَوت يخوتها انا نفسي اقطعها مو ازورها.
سميره:ما عليه حبيبي اختك لسه صغيره واكيد الشيطان لعب براسها
خميس:إلا هي شيطان بنفسها
سميره:الله يهديها هي بس لو ماتسمع كلام احد
خميس ويعدل قعدته ويناظر لسميره :ايش قصدك؟
سميره:قصدي ياحبيبي انوا مافي غيروا اكيد هوا اللي لعب عليها وقالها تنتحر,عشان ماتتزوج غيروا
خميس:من هوا؟
سميره:اللي تحبوا وتكلموا,اصلا اختك هبله من وين حتجيها الافكار دي؟
خميس:معقوله للحين على علاقه بداك الخسيس؟؟
سميره بحزن: وربي مااعرف,بس اكيد ياحبيبي
خميس:والله بس خليها تطلع من المستشفى لو اخوك متمسك فيها لأزوجها من غير حتى ماتجهز الدبش
سميره وتبي الفكه :طبعا حبيبي اخويا متمسك فيها
خميس:خلاص خليهم بس يعطوها اذن تطلع
سميره وتمسك بيد خميس وتناظر له بعطف :ياقلبي الله يعينك على بلاوي اخواتك ,قلبي معاك ياعمري
خميس:الله يسامح ابويا اللي خلالي علل على قلبي
سميره:معليش حبيبي كلوا بأجروا
خميس:ماابغى اجر يجي من وراهم, ابغى كل وحده تنقلع عند زوجها وانفك منهم
سميره بتصنع:استفغر الله لاتقول كدا حبيبي ترى ازعل منك دول اخواتك مهما يكون
خميس:الله ياخدهم وارتاح
سميره:حبيبي لا تزعل نفسك خلاص لاتفكر فيهم ايش رائيك بكاسة ليمون تروق اعصابك
خميس:لاحول ولاقوه الا بالله
سميره: ها اجيب لك ليمون ؟؟
خميس:أي حاجه بس اهم شي بارد ,سيرتهم تفور لي دمي
سميره:يسلم لي دمك وقلبك حالا
:::::::::::::::::::::

بالمستشفى
غرفة انين

انين:وينك ليه تأخرت
هو:اعذريني,المهم هذه اللحظه
انين:اوعدني ماتخذلني وتضل جنبي..
هو:تبين اقول لك ليه انــــا تأخــ...
انين: اشــــــــــــــش اسكت وخلك معي..اسمع لصوت البحر ودقات قلبي وانا معاك
هو: اشـــــــــــش اسكتي..واسمعي لتنفسي تعرفي وتفهمي مقدار تأثيرك علي
انين: اقولك شي..
هو: تقولي وله تسكتي مو مهم دامك معي
انين: الا انا بقول شي..لكن ابي كلك معي
هو: وش رائيك اقول الجواب من غير مااسمع أي شي
انين: خلاص عرفت اللي ابي عيونك قالت لي الحكي
"انين..انين..انين..انين
قامت انين من النوم ولقت ان السستر تنادي عليها لها فتره وهي متمسكه بحلمها لأنها لحظات ماتشوف انها ممكن تعيشها غير بس... بحلمها
السستر: دكتور في ايجي
انين: طيب خليه يدخل
السستر: ادخل توكتور
د/احمد وهو يناظر وجهها الأصفر:انتي بخير
انين وللحين تحس بأن الحلم حقيقي وقريب منها :ايوا ايوا
د/احمد:ماشاء الله اشوف اليوم الغرفه مليانه ورود
انين وتوها تنتبه وتشوف حولها الباقات:ورود
د/احمد:لاتقولي توك تشوفي هالمزرعه
انين بإستغراب: توني اشوفها يمكن جتني وانا نايمه
د/احمد وهو يقرا ملفها :طيب حبيت بس اعرف اليوم حسيتي بدوخه او الم
انين:لا الحمد لله انا كويسه ومني عارفه انتوا ليش ماطلعتوني للحين
د/احمد: ابشرك خلاص دام الحاله صارت ممتازه بكرا ان شاء الله بالكتير وانتي طالعه
على دخلة اختها:السلام عليكم,اش اش اش ايش دا كلوا انتي لك صاحبات من ورايا,مرحبا دكتور
د/احمد:اهلا ,يله عن اذنكم
انين:حبيبتي متعبه نفسك الناس يجيبوا هديه مره وحده وانتي كل مازرتيني جبتي شي
تهاني:كم انونه عندي,وبيني وبينك حاسه بتأنيب الضمير اني ماقدرت ارافقك بس انتي عارفه زوجي وعيالي مالهم غيري
انين:حبيبتي ابدا لا تشيلي هم
تهاني وتبتسم : من مين كل دا الورد
انين:ماادري ,شوفي بالباقات اكيد في كرت وله حاجه!!
تهاني:الا دا واحد,حابه تقريه وله انا اقراه؟
انين:عادي اقريه انتي
تهانيحمد لله على سلامتك يالورده)
انين:مو مكتوب من مين؟
تهاني:لا,طيب من جابها؟؟
انين:ماادري انا كنت نايمه
تهاني:اها, المهم كيفك اليوم؟
انين:الحمد لله مره كويسه ,والدكتور قال حيكتب لي خروج
تهاني:طيب الحمد لله
انين وتغمض عيونها:يله ان شاء الله اطلع تراني طفشت من المستشفى,إلا ماقالك خميس على ايش ناوي؟
تهاني:لأ بس ان شاء الله اللي صار لك صحاه وخلاه يفكر بقلبوا ومايزوجك بالقوه.
انين:حسبي الله ونعم الوكيل كيف يبغاني اتزوج واحد عندوا حرمتين وعيال كمان!!!
تهاني:دحين لاتفكري بهالموضوع ,ان شاء الله حكلموا تاني ومايصير الا كل خير
انين:اتمنى تكلميه ياتهاني,كفايه خلود رماها لواحد مايخاف ربوا
تهاني:ان شاء الله حكلموا,لاتشيلي هم.
::::::::::::::::

ماليزيا
محمد:فتون ممكن اسئلك واتدخل بخصوصياتك شوي
فاتن:إسئل اذا قدرت اجاوبك اوكي اما لو سؤالك بايخ ماراح اجاوبه .
محمد:هههههههه بايخ ها؟؟ طيب انا ابي اعرف بس بصراحه
فاتن: وشو؟
محمد وهو يناظر بعيونها:حبيتي قبل؟؟
فاتن رافعه حاجب وحاجب:..
محمد وهو يظبط قعدته:وش فيك تناظريني كذا سؤال عادي؟ايه ايه ,لا لا
فاتن:يعني ماراح تفتن علي؟
محمد:افا عليك,مااسويها انا
فاتن:لا اخاف تمسك علي هالشي
محمد:وعد ماراح يطلع الكلام لأحد , وتراك زدتي فضولي تكلمي
فاتن:طيب انت ليه تبي تعرف؟
محمد:اعتبريني ملقوف ياادميه تكلمي
فاتن:بقول بس مو اللحين
محمد:الله يصبر قلبك يامحمد,اجل متى؟؟
فاتن بعربجه :لاقمت وصلحت لي كوب كافي ابي اروق للجواب
محمد:ياايوفاتن يله بلا استهبال
فاتن:ههههه,شف انا انسانه تقليديه عندي الحب له شكل واحد وهوبعد الزواج و ماكنت حابه اتزوج لا اللحين ولا السنه اللي بعدها ولا اللي بعدها ,صراحه كنت مأجله الزواج والحب الى اجل غير معروف
محمد بدون تصديق :بنت وماتبي تتزوج!! هذه جديده علي
فاتن:ليه بالعكس ماراح اقول لك كثيرات اللي تفكيرهم مثل تفكيري لكن ,فيه اللي مثلي واكثر مني بعد
محمد:وليه يعني ماتبين الزواج والارتباط والحب,فيه احد مايبي هالمعاني
فاتن:ايه انا على الاقل مو بالوقت هذا
محمد:ليه
فاتن:بكل بساطه..اخاف
محمد:ومن ايش تخافين
فاتن: صدقني ماله داعي تعرف
محمد: يله فاتن تكلمي
فاتن ووجهها تحول للجديه: صدقني ماراح تحب تسمع جوابي
محمد وبكل تركيز: يهمني اسمع جوابك
فاتن وبعد ماسكتت شوي قالت :كنت خايفه ماينجح زواجي,وخايفه ارتبط وبعدها افقد السعاده اللي احسها وانا بنت,كنت خايفه اطيح بيد واحد مايقدرني مايحبني مايعاملني مثل ابوي او اخوي او احسن
محمد تمنى انه ماسئل:...
فاتن:ادري انك تلوم نفسك ,وتحس انك جزء من مخاوفي,لكن انا اللحين مااني ندمانه اني ارتبطت فيك واننا بننفصل قريب
محمد ومن غير مايحس سأل :تحبيني؟
فاتن:ههههههههههههههههههههههههههههههههههههههههههه
ههههههههههههههههههههههههههههه
ههههههههههههههههههههههههه
الله يرجك الي يشوفك وانت تقولها يقول انك فعلا مصدق الدور وعايشه هههههههههههههههههههههههههههههههههه,ياحليلك يامحمد
محمد جلس يضحك على نفسه هههه
فاتن: ....
محمد:جد فتون ماانتي ندمانه؟
فاتن:زواجي منك جد مالقيت فيه الارتباط والحياه الزوجيه الحقيقيه,لكن على الأقل خلى عندي استعداد اني اتزوج فعلا ,خلى عندي امل ان ممكن يجيني واحد يحبني ويعتبرني الاولى بحياته,عطاني صوره مختلفه عن اللي براسي للإرتباط
محمد:فاتن انا فعلا احترمك اكثر مماتتوقعين.
فاتن وتبي تنهي الموضوع :تحترمني ومو هاينه عليك نفسك تسوي لي كاسة كافي
محمد:هع ,ولا عندي استعداد اسويه قومي الله لايهينك وسوي لي معك
فاتن وهي رايحه المطبخ :بقوم وبسوي لي واحلم اني حتى اخليك تشمه وعلى فكره صوت جوالك جوا يدق بس والله مااجيب لك اياه
محمد وهو يقوم :ههههه,انا بجيبه الله وكبر بتمنيين علي يعني...
الو,,يامرحبا
ماجد:هلا والله وشلونك
محمد:الحمد لله,وشفيك,وشفيه صوتك
ماجد:اكيد انك دريت ليه ماجيت العزى؟
محمد:عزى من؟
ماجد:معقول مادريت بوفاة سالم؟
محمد:كيف
ماجد:الله يرحمه توفى امس
محمد:انت من جدك تتكلم وله تستهبل
ماجد:لاحول ولا قوه الا بالله احد يمزح بمسألة موت يامحمد!!
"قفل محمد الخط ودق على سالم الصديق اللي مافارقه من هم صغار حتى يوم سافر محمد وسالم بالرياض كانوا يوميا يشوفون بعضهم بالنت ,,كل مادق مااحد يرد اللين رد عليه اخو سالم الكبير واكد له خبر وفاته بعدها محمد حس الدنيا ضايقة به وانه يبي يروح المطار الان ويبي يكون بالرياض على امل يشوف جثته اللي بالاساس هي اللحين تحت التراب ::::::::::::

بيت داليا
"حاولت انها تمنع نفسها وانها ماتسوي هالشي لكن تذكرت كلام سمر..
(الزمن تغيروقمنا نشوف حنا ياهالجيل الأمور بشكل ابسط ,صار الحب على المكشوف واذا مااعترفنا به يضيع وصعب يجي غيره)
ماقدرت تنسى كلامها وتغلب عليها عنادها وجرئتها ودقت على بدر..اول دقه مارد عليها,ثاني دقه..مارد ولا الرابعه ولا الخامسه ورد بالأخيره
بدر:نعم
داليا:مرحبا
بدر:اهلا من معي؟
داليا:الظاهر حتى رقمي مسحته
بدر:من انتي ؟
"داليا سكتت تفكر مفروض تقفل او تكمل"
بدر:الو
داليا:حبيت اسئلك بس سؤال؟
بدر:من انتي اصلا ,اذا ماقلتي ترى بقفل انا مااني فاضي.
"ماهانت عليها نفسها انها تكمل وبكت من القهر وقفلت السماعه,ولاعاد دق بعدها او هي دقت وبعد ماهدت ارسلت له"
(انت كذاب لأنك اذا كنت تحبني مثل ماتقول مو معقول ان مداك تشيلني من قلبك وتروح تدور لك وحده تخطبها)
وانتظرت بعدها رد منه ولا جاها أي شي,حلفت انها ماراح تذل نفسها اكثر وانها بتنساه مثل مانساها.
::::::::::::::::

ثاني يوم
نعلن اعزائنا المسافين وصول رحلتنا الى مدينه الرياض..
"من امس محمد على اعصابه ماكلم فاتن او حتى يرد عليها يوم تسئله.. احتارت فاتن ليه عيونه مليانه دموع لكن ماشافت دمعه نازله ..
تأكدت ان بقلبه كلام وموجوع وبداخل قلبه كاتمه.. مع ذلك ماكان يرد عليها ,, ركبوا بالسياره اللي كانت تنظرهم وطول الطريق السكوت
هو الكلام والحزن سيد الموقف ,وتفاجئت فاتن ان يوم وصلوا بيتهم نزلها ونزل السواق وكمل طريقه ماكانت تدري انه بيروح العزى,ولاحتى تدري بموت سالم.
دخلت فاتن بشوق تسلم على اصاله..
اصاله:ياهلا وغلا بأحلى عروس والله
فاتن:هلا بك كيفك ياعسل وش اخبارك
اصاله:مشتاقه لكم موت,الا وين محمد كل ذا يدخل الشنط
فاتن:والله يااصوله شكل محمد تحول لكائن صامت
اصاله:هههه بسم الله على ولدي اكيد منك
فاتن بعربجه :هع وش اللي مني يحمد ربه تزوجته
اصاله:ههه عسى انبسطتوا؟
فاتن:كثـــــــــــــير مابقى مكان مارحناه,دجيت بولدك دج
اصاله:والله اني قلت بترجعين هاديه عاقله مستحيه,الا والله شكلك خليتي ولدي مثلك
فاتن:انا حرام عليك انا كلي هداوه وانوثه
اصاله:ايه مره,خلني بس بدق على ولدي اخاف سويتي فيه شي وجايه تصرفي
فاتن:ههههه طيب وانا بخلي السواق يوديني بالسياره الثانيه ازور اهلي
اصاله:معك الرحمن بس لاتتأخرين تراني مشتاقه للقعده معك
"وهنا حابه اذكر لكم بأن اصاله من عائله معروفه جدا ولها مكانتها الاجتماعيه والماديه الممتازه ,واكثر شي يحافظون عليه بعائلتهم ,,السمعه"
فاتن:اوكي سلام
اصاله:مع السلامه.
:::::::::::::

المستشفى
انين:مشكوره دكتوره انك عطيتيني من وقتك وسمعتي للشي اللي مااحد كان عندوا استعداد يسمعوا
الدكتوره:المهم انك ارتحتي ولازم تعرفي ان هذه وضيفتي وانك لازم تجي وتكملي عندي الجلسات ,زي ماقلت لك الدكتوره النفسيه زيها زي أي دكتوره تانيه
انين:اكيد ,وعلى فكره انا من الناس اللي كان تفكيري ان الدكتوره النفسيه للمريضين والمجانين,ولكن يوم جربت الموضوع بنفسي عرفت اني غلط
وان مثل يوم جسمنا يألمنا نجري على الدكتور ,مفروض نفسيتنا يوم تتعب نروح لدكتور
الدكتوره:طيب الحمد لله قدرت اوصل فكره جيده عن الطب النفسي ,يله اشوفك بالعياده ان شاء الله
انين:اذا رضى خميس راح اكمل جلساتي
الدكتوره:راح يرضى ان شاء الله,يله حبيبتي مع السلامه
"جهزت انين نفسها عشان تخرج وبيجيها خميس ياخذها لقت السستر داخله ومعها لها صحن شوكلت ,استغربت لكن اخذته وقرت على الكرت..
(كنت سعيد لأني قدرت اشوفك .. وراح اكون اسعد لو توافقين اشوفك باقي العمر زوجه وحبيبه لي)
زادت تعجب من هذا المجهول اللي مهتم فيها جاب لها الدكتوره النفسيه,وقفل محضر الشرطه من غير مايستجوبوها,وكل يوم كان يرسل باقة او اكثر من الورود وعليها جمل ماقد سمعت بمثلها لها,حست ان جسمها رجف ويوم سمعت صوت خميس قطعت الكرت ورمته بسرعه..
خميس: ايش بك كأنك شايفه عفريت؟؟
انين:ها لا ولا شي يله انا جاهزه
خميس:امشي يله,على فكره احنا دحين حنروح السوق تاخدي لك ملابس عدله عشان الرجال حابب يشوفك بعد الملكه
انين:أي ملكه؟؟
خميس:بكرا حنعقد لك قرانك,وبعد كم يوم حنسوي لك حفله وتروحي على بيت زوجك على طول
انين فتحت عينها ثم بلعت ريقها وقالت :بكرا؟؟
خميس: ايش بك دخلتي سمعك سليم وحتخرجي صقهاء؟؟
انين:الله يخليك ياخميس لاتزوجني الرجال دا
خميس:وليه ان شاء الله انا مااشوف فيه عيب ابدا والرجال مايعيبوا انو متزوج قبلك ,وبعدين مفروض تحمدي ربك انوا جاك واحد زي اخو سميره
"سكتت انين لأنها داريه ان الكلام معه ماراح يجيب نتيجه غير ضربها..مافتحت فمها ولا بكلمه كل اللي سوته انها تتحسب عليه بداخلها لين وصلوا بيته"
::::::::::::::::

بيت اهل فاتن
"رجعت الحياه للبيت ..كانت عندهم عائشه وبدر اللي طاير فرحه والسواليف ماانقطعت والضحك زاد والقلوب ارتاحت بعد الشوق والغياب
عائشه:بس فتون كأنك سمنانه
فاتن:يااختي وش عندنا غير الأكل ,واف اكل ياعيوش يمي يمي
بدر:المهم يله شدي حيلك ابي اروح اخطب
فاتن:ياسبحان مغير الأحوال حاضرين "فاتن وهي تعدد بيدينها تكمل" بكره ابي ازور خلود وه فديت عيونها,ولسه بقابل صديقاتي,ويـــــــــــوه ابحضر للكليه ولســــ..
بدر:اعوذ بالله منك انتي للحين مابطلتي هالقرقره وبعدين يالحبيبه انا مو اهم من كل اللي قلتيه؟؟
فاتن:افا عليك بدور قلبي امزوح هع
ام فاتن:تخيلي يافاتن خلود مازارتنا ولا مره زوجها ذا مو صاحي
فاتن: قالت لي انه اقشر وبروح لها لأنه مسافر ومو بالبيت وله كان ماراحت
"نست فاتن انها تزوجت وان عندها شي اسمه زوج وانه لازم تسئل عليه او على الاقل تدق عليه,احلوت القعده وماحست الا يوم دقت اصاله عليها
اصاله:السلام عليكم
فاتن: اهلين اصوله والله اشتقت لك.
اصاله:لا ياشيخه ,اللحين انتي وينك كل هذا؟؟
"وكأن رجعت الذاكره لفاتن وانها مفروض رجعت لأن الساعه 12 الليل"
اصاله:شكلك للان ماتعودتي على الارتباط
فاتن:لا والله هع لكن يله الللحين جايه
اصاله:يله حبيبتي ومره وحده تشوفين محمد
فاتن:ليه وش فيه؟
اصاله:ليه ماقال لك ان صديقه سالم توفى الله يرحمه
فاتن:يوه سالم اللي يأذن بالمسجد
اصاله:ايه هو صديق محمد الصدوق
فاتن:ياالله.. الله يرحمه بس محمد ماقال لي وماتوقعت اللي فيه هذا سببه, يله اللحين جايه
اصاله:يله حبيبتي لا تتأخرين,ارسل لك السواق؟؟
فاتن:لا لا بخلي بدر يجيبني
::::::::::::::::::::::
جده
بيت خميس
"انين بعد ماقفلت عليها الباب راحت فضت كل شنطتها اللين ماوصلت لأخر شي محفضتها اللي خبتها, طلعتها وطلعت من داخلها كرت مكتوب فيه
(ورد لأرق ورده للان مالقت من يقدرها ,لكن وعد اني..
اخبيك من الزمن,,واسقيك من الفرح ,,واعرضك لحرارة قلبي واغذيك حب ووفى,,اوعدك...اقدرك)
بكت وهي تدري انه مجرد كلام من انسان مجهول كان يرسلها الورد وماتجرء انه يكتب اسمه وشلون قاعد يوعد بأشياء تحتاج للقوه مسحت دموعها وهي تتمتم..
بعد ساعات بأنتهي قبل البدايه..وردتك تنسقي طول عمرها قسوه ومر وزياده عليها ذل وإهانه..وحرام لاقالت كفايه وربي كفايه...
::::::::::::::::

بيت اصاله
فاتن:سلام
اصاله:اهلين حبيبتي,ها كيف اهلك
فاتن:تمام ويسلمون عليك,وينه محمد؟
أصاله:من اول ماجا وهو بغرفته ,ولا رضى يتكلم معي ..عورني قلبي عليه ونزلت
فااتن:طيب انا بطلع عنده تامريني بشي
اصاله:لا حبيبتي تصبحين على خير
فاتن:وانتي من اهله
"دخلت فاتن لغرفة محمد ولقته موطي الإضاءه ومنسدح قربت تشوفه اذا صاحي لقته فاتح عيونه وسارح وعيونه تلمع مجمعه دموع"
فااتن:محمد
محمد:...
فااتن:اعتذر اني طولت ماكنت ادري بسبب ضيقتك
محمد:....
فااتن:مابكذب عليك ولا بواسيك لأن صراحه شخص مثل اللي حكيت لي عنه يستحق ان الشخص يحزن على غيابه...
لكن بالنهايه هو اللحين عند اللي خالقه,وان شاء الله ايمانه اللي مات عليه وطاعته ..بتكون سبب لسعادته اللحين
محمد:...
فاتن:ادري ماودك تتكلم,لكن ابيك تدري اني حتى انا حزينه معك
وان شاء الله بكره بروح انا واصوله نعزي اهله
محمد:....
فاتن يوم شافت مافي امل يرد عليها قالت: يله تصبح على خير
"وقعدت فاتن تفكر وين ممكن تنام لأن بغرفتها مافيه حتى كنبه ممكن تنام عليها ..ويوم ناظرت محمد عرفت ان مافي قدامها غير حلين ,,,ياتنام جنبه او انها تفرش وتنام بالارض..ولقت الثاني اسهل عليها ..
وفرشت لها المسكينه على الأرض ودقتها نومه ومن التعب قامت تشخر بعدهههاي"
:::::::::::::::::::

من اللي مهتم بانين ؟؟ ووشلون بتمر الساعات ويجي الصبح عليها؟؟وهل ممكن هالمره تسكت وتملك على شخص اكبر منها بكثير ومتزوج ولا عنده عيال بعد؟؟؟؟
هل ممكن تأثر الظروف اللي يمر بها محمد على فاتن؟؟؟
وش راح تسوي داليا بموضوع قلبها اللي دق متأخر؟؟؟
اكيد تهمني توقعاتكم... وااكد لكم البارت الجاي راح
يكون ســــــــــــاحر
دمتم كما تحبون
فتو