بارت 24





بالقصر وبعد الزفه اللي اربكت الجميع..




اصاله دقت على محمد: حبيبي
محمد:هلا يمه
اصاله:يله خذ زوجتك وروحوا على الفندق
محمد وهو يناظر ساعته : مو قلتوا الزفه يبيلها وقت !! عموما يله انا رايح للسياره
اصاله:اقول محمد
محمد:هلا
اصاله:ارئف ببنت الناس وحافض عليها وانا امك
محمد:يصير خير يالغاليه يله
قفلت اصاله ودخلت على سمر الغرفه: قومي يابنيتي وحاولي تنسين اللي صار
سمر وهي تصيح:كيف وليه يصير كذا؟؟ليه ياخاله ليه
اصاله:تبين نصيحتي
سمر:....
اصاله:دامك تحبين محمد ,ومحمد يبيك وجاك وطلبك بالحلال ,انسي كل شي وفكري بحياتك معه وبس, وخلي كل شي صار ورا ضهرك
سمر بإنكسار :معقول ذاك صوت محمد,معقول انه كان يتكلم علي!! معقول ذاك صوت فاتن؟!!!
اصاله:....
سمر:دامه مايبيني ليه جا وطلبني؟؟ليه
اصاله:لا انتي ولا انا متأكدات من صحة ذاك التسجيل, باللذات ان مسؤولة المسجل مالقيناها!!! فلا تخربين ليلتك بإيدينك
سمر: خلاص خربت ليلتي,ماشفتي الناس ونظراتهم لي؟؟ماشفتي؟؟
اصاله:وانا امك الناس لو صار شي او ماصار,, راح يطلعون كلام وعيب بالليله,لاتفكرين بكلام الناس
سمر:....
اصاله:توني مكلمه محمد وكان طاير من الفرحه
سمر:...
اصاله وتبي تخفف عنها:وعاد تدرين ..من يوم شافك اصلا وهو متحمس لهالزواج,وسعيد بانه ارتبط فيك
سمر وهي تمسح دموعها:جد؟؟
اصاله:ههه ايه جد واكيد بعد,قومي وانا امك امسحي دموعك وضبطي مكياجك وروحي لرجلك اللي يمديه ينتظرك على نار
سمر:....
اصاله: قومي وانا امك
قامت سمر وهي تحاول تنسى وتسمع لنصيحة اصاله,,وتعتبر انه مافي شي صار ..
قامت وحاولت تصدق انه تسجيل مُغرض ولايعني شي..
قامت وهي تحاول تنسى اللي صار قدام الناس ...
وتحاول تفكر بالانسان اللي حبته بكل مافيها ...
راحت مع محمد الفندق بهدوء ولاجابت سيره عن اللي صار..ولاكأن فيه شي صار
اليوم الأول كان صعب..
والثاني بدت تنسى من فرحتها بحبيبها
اما اليوم الثالث فهي فعلا نست ..وكل اللي يهمها حبيبها اللي قدامها
وصار لها وصارت له؟



:::::::::::::::::::



بثالث يوم تدق فوزيه على فاتن..






فاتن وهي مالها خلق: هلا بالعروس
فوزيه:فتون الله واكبر عليك كل ذا يصير ولاتقولين لصديقتك
فاتن:وش صار؟؟وش فيه
فوزيه:سوي انك هبله ولا انتي فاهمه شي.
فاتن وهي تحك راسها :فوز وش السالفه؟؟
فوزيه:اللحين تدرين ان محمد بيتزوج سمر ولاتقولين لي بلعتها,لكن اللي سويتيه فيها وما تقولين لي ... هذه كبيره
فاتن:ها!! اا انا وش سويت
فوزيه:يوه على الهبل اللي مايليق عليك,بس تدرين بنت ابوك كفوها وتستاهل,اصلا انا لو مكانك يافتون كان حرقتها وحرقته مو بس خرّبت زفتها
""فاتن هنا شرد ذهنها و تذكرت..
يوم طلبت من بدر يوديها على قصر الافراح اللي بتقوم فيه ليلة سمر..
وتتذكر شعورها بالانسكار والخيانه والقهر والغضب..
وتتذكر يوم فصخت طقمها وطلّعت من بوكها المبلغ اللي عطته المسؤله عن الزفه عشان ترضى انها تاخذ منها جوالها اللي فيه التسجيل وتشغله بنص الزفه"
فوزيه: هي وين رحتي؟؟؟
فاتن: ها ااا انا معك
فوزيه:طيب وش راح تسويين بعد ,قولي لي وانا اساعدك افا عليك
فاتن:وش بسوي ,ماراح اسوي ولا شي اصلا خلاص لاسمر ولامحمد يهمني
فوزيه:اما خلاص بتسكتين
فاتن:اه يافوز ابي افهم في عروس بالدنيا تدق على صديقاتها تسولف ثالث يوم زواجها؟؟؟
فوزيه:ههههههههههه ايه انا ماصدقت ان الحبيب طلع ..واللحين بدق على الحضرميه اللي جوالها مشغول ماادري تكلم من؟؟
فاتن: لهالدرجه ماتبين شي يفوتك
فوزيه:أي افا عليك,اصلا انا توني مااخذت الاخبار الكامله
فاتن بابتسامه:والله انك عجيبه
فوزيه:اوكي اكلمك بعدين وبقول لك عن شعور سمر يوم خربت زفتها ههههههه
فاتن: اوك احطي
فوزيه:ههه طيب باي

قفلت فاتن وتمنت انها ماردت ولاتذكرت اللي صار ...مع ذلك حاولت تكذب وتبين لنفسها انها قويه وانها تخطت مرحلة الحزن..
وقامت تقعد مع اهلها ولكن..
جسد بلا روح..
جسد بلا مشاعر..
جسد بلا استيعاب..

:::::::::::::::::



ببيت جارح






راحت خلود للمجلس تنادي جارح للغداء ووقفت يوم سمعت صوته..
هادي..
ناعم ..
ذايب..
صوت عاشق ..
صوت ماقد سمعت جارح يتكلم فيه..
لِين وضعف..ماقد توقعت ان جارح ممكن يتصف فيه..
سمعته وهو يقول...


- ليه ياقلبي بس؟؟
- لو بيديني اللحين ماكان جيتك يعني؟؟
- ومن قال ؟؟
- بالعكس ,لكن وش اسوي عندي هالمصيبه هنا ,ولااني قادر اتحرك مثل اول
- ليه؟؟
- اكيد
- يعني اكيد
- خلاص يابعدهم
-انا بسفرها بعد شهر ونشوف
- ههههههه افا!!! من متى انا اكذب عليك؟؟


رجعت خلود خطواتها الثقيله لورا..وهي تحس انفاسها تثقل عليها ,وماحست غير بدموعها المالحه ماخذه مجراها على خدودها ..
رجعت وخذت معها انكسارها ..وكرامتها ..
ودخلت غرفتها وقفلت الباب عليها وهي تفكر بأنين وانه جا الوقت اللي تمتلك فيه مثل جراءتها وتنهي حياتها بيدها وتلحقها..

:::::::::::::::

وهنا بعد ..كان فيه اتصال من فوزيه لــ





اريج: ههههههه اللحين بتخلصين من هالاستهبال وتقولين لي وله لأ
فوزيه:وش تبيني اقول لك؟؟
اريج:ابـــــــــــــــاي على اللطع ...قولي لي وش صار وش سويتوا؟؟
فوزيه:ههه استحي
اريج:اف ياالله عليك يافوز مايليق عليك هالحركات تكلمي وش صار؟؟
فوزيه:طيب وش تبيني اقول لك ,اسئلي وانا اجاوب
اريج:قولي لي من البدايه يوم دخلتوا على الفندق وش سوا ,وش قال
فوزيه وهي تظبط قعدتها :اه يااروجه وش اقول وش اخلي..اسمعي ياطويلة العمر ...اول مادخلنا الفندق وانا قلبي احس نبظات الفرح فيه تحولت لخوف قام و









ماجد:فوزيه
فتحت عينها فوزيه وتلتفت وهي تشوف ماجد وراها: ااا ماجد ,متى جيت
ماجد:ممكن اكلمك شوي
اريج:هههههههههههههههه
فوزيه بصوت واطي: الله ياخذك ..
اريج:هههههههههههههههه
فوزيه:اا خلاص اروجه اكلمك بوقت ثاني
اريج:ههههههههههه خلاص ههه اوكي
فوزيه:الله ياخذك
اريج:هههههههههههههههههههههه
فوزيه:باي
اريج:باي
ماجد بصوته الهادي: تعالي اقعدي جنبي
قربت له فوزيه وجلست:نعم
ماجد:كنتي تكلمين صديقتك؟
فوزيه:احم..ايه
ماجد: وش كنتي بتوصفين لها؟؟
فوزيه وبدت تحمر :ها ؟؟ انا اا ماكنت بوصف شي
ماجد وهو يناظر لعيونها: فوزيه ابي اقول لك شي..
فوزيه:....
ماجد:اذا تبين علاقتنا قويه دائم ,ومشاعرنا صافيه لبعض.. لازم اللي بيننا يضل بيني انا وانتي
فوزيه:احم انا ماكنت بقول شي
ماجد:فوزيه..
فوزيه:..
ماجد:ماله داعي الكذب,انا ماراح الومك لكن ابي اوضح لك ..فإسمعيني
فوزيه:نعم
ماجد:اللي يصير بيننا كزوجين يخصنا انا وانتي ,أي شخص ثاني ماراح يهمه ولاراح يخصه من الاساس,والمفروض تكونين بير لسري مو العكس
فوزيه:....
ماجد:حبيبتي..اوعديني
فوزيه:ها
ماجد:اوعديني ان اسرارنا مااحد يدري بها,وعطيني الامان انك تكونين مخبأ لخصوصياتي
"فوزيه وهي تفكر بانها ماتقدر"
ماجد:ههه وش فيك؟؟ لهالدرجه صعب عليك هالشي!!!
فوزيه:لا مو كذا
ماجد:اجل؟
فوزيه وهي تتخيل نفسها تقول للبنات "مااقدر اقول لكم": ان..يعني..امم
ناظرها ماجد بإستغراب:...
فوزيه وهي خايفه ياخذ عنها فكره:امم خلاص اوكي
ماجد بشك:اكيد؟
فوزيه:ها..اممم ايه ان شاء الله
ماجد بابتسامه وهو يبي يحرجها:اوكي ممكن اللحين توصفين لي اللي كنتي بتقولين لها اياه
فوزيه حمرت وتحس انها مدخنه من الاحراج:...
ماجد:ههههههههههههه فديت اللي يستحون انا
قامت فوز من عنده وهي بقمة احراجها.




::::::::::::::::::::



اما هنا العرسان الثانيين
..بالفندق
عند سمر ومحمد تحديدا...






كانت سمر طايره من الفرح برغم كل اللي صار..
كل تفكيرها كان انها ارتبطت بمحمد وان فاتن انتهت من حياتهم ..
تفكر بانه تحقق كل اللي خططت له وتعبت بتنفيذه..
محمد وصار لها ..فاتن وصارت من الماض..
وهي هنا تمتع عينها باللي حبته وضحت بصداقاتها وضميرها وقلبها عشانه ....


كان محمد مسرح يوم قالت بهدوء
سمر:حبيبي
محمد وهو ينتبه لها:هلا بأحلى عروس
سمر:وش فيك؟
محمد:ابد مافيني شي ,امم وش هالزين كله .. وش هالحلى
سمر:...
محمد وهو يقرب الكيس اللي شراه: شوفي قلبي جبت لك هديه
ابتسمت سمربخجل:ثانكس
محمد:لأ اللحين افتحيها
سمر:اللحين
محمد:ايه
سمر بفرح :اوكي
محمد وهو يضمها :ها وش رائيك؟؟
سمر:...
محمد: وش فيك حبي!! شميه
" شمت سمر العطر اللي مو غريب عليها..و تذكرت ان هالريحه هي عطرها ..
ايه عطر فاتن
محمد:وش رائيك فيه؟

"ناضرت سمر محمد وشافت فرحته وناظرت للعطر وحست بالقهر...
لكن ماكانت تقدر تبين انها تعرف ان هالعطر عطر فاتن"

محمد : حبي يله رشيه عليك ودي اشمه من زمان عن هالريحه

"ناظرت سمر لعيونه وتأكدت بانه يشوفها فاتن,ويتخيلها فاتن,وانه تزوج فاتن ماتزوجها هي"

محمد:وشفيك حبي ليه ساكته
سمر بضيق:حبيبي انا مااحب احط عطر قوي مثل كذا الا بالزواجات
محمد:ماعليه بس رشه وحده مو اكثر
سمر اضطرت تبتسم: بس ريحته قويه
محمد:حبي عشان خاطري
"اضطرت سمر بعدها انها تحط منه"
محمد وهو يقرب منها ويستنشق من ريحة محبوبته:اه يااني احب ريحته
سمر: وطيب انا ... تحبني؟
محمد وهو مغمض عينه وهو ضامها ويفكر بفاتن:ايه احبك احبك احبك
سمر: حبيبي اطلب منك طلب
محمد:انا عيوني لك
سمر: لاعاد تناديني غير سوسو
محمد وهو يفتح عينه على واقعه :ها ..
سمر: بليز حبي لاتناديني غير سوسو, سمر بس لاتناديني بغير اسمي
محمد:....
سمر:ابيك تخصني باسم ماقد ناديت احد فيه قبلي
محمد:اوكي احلى سوسو شي ثاني؟؟
سمر: سلامتك ياقلب سوسو
محمد:اه
سمر:ليه ياحبي الآه
محمد وهو يقربها لها اكثر ويشم من العطر اكثر :ابيك
سمر:حبيبي انا لك
محمد:ابيك
سمر وهي تحس بشي مو طبيعي: محمد
محمد:همم
سمر: انا احبك حمودي واموت فيك ..ولا اقدر اعيش بدنيا غير اللي انت فيها
محمد:اه
سمر:حمودي انا ماابيك تحب غيري ,ولاابيك تجرحني..انا والله العظيم احبك حب جنوني ومو طبيعي



ومن بعدها لازم نطلع ونقفل الباب على العروسين .

:::::::::::::::::




اما هنا بالقلب المعلق
وببيت اهل فاتن





فاتن بصراع بداخلها..
كل ماقالت مايهم..تذكرت سمر..
ضحكتها ..
اسرارها..
اخوتها..
وتحس بطعم الخيانه المر..
وكل ماقالت لازم تِقوى.... تخونها القوه و تتذكر محمد ..
تتذكر انه صار لصديقتها ..
كلامه الحلو صار لها..
نظرته اللي تحبها صارت لها..
كلامه الممتع يوجهه لها ..
تحس النار تشب بصدرها ولاتدري وشلون تنسى ..
الباب يدق ويدق ويدق..
لين دخل بدر وولع النور..



بدر: سلامات ياابو الشباب وش عندك نايم لبعد العصر؟!!
فاتن: اا لا مااني نايمه
بدر: شوفي وجهك وشلون مفقع نوم ههههههههههه قومي يله من على هالسرير تقول مريضه
ابتسمت له فاتن :ووش تبي؟؟
بدر :اليوم اجازه وقلت قم ياولد ود اختك حبيبتك السوق.. تقضى وتتدلع وتغير جو
فاتن: لا أي سوق ,مالي مزاج ابدا
بدر: اما!! من جدك ,سوق هذا سوق... ماتبين تروحين!!!
فاتن:....
بدر:يله انا مصر امشيك اليوم..قومي
فاتن: اموت واعرف وش عندك مصر انك تطلعني من البيت
بدر:هذا جزى اخ يحب اخته, ويبيها تسوي الاشياء اللي تحبها,وتغير جو الكئابه اللي رجع لها
فاتن:لاااااا علي انا
بدر:إحسني النيه يافتون
فاتن:انا اعرف مقدار كرهك للسوق باللذات ..وش عندك يابدير؟؟
بدر:ولا شي بس اا نبي نطلع نتمشى
فاتن: وش السالفه وش موضوعك؟؟
بدر:انا لا ولا شي وش عندي
"فاتن وهي تناظره بنص عين"
بدر:ههههههههههه طيب نتمشى واقول لك.
فاتن بضيق:امري لله نروح السوق ونشوف وش عندك يابدر
بدر:ههه بتعرفين.. بس ابيك تروقيــــــن قبل ..يله
فاتن: طيب على بعد المغرب
بدر:اللحين بيأذن المغرب ياحلو ,,معبال تقوم وتفرفش وتنعنش وتكشكش
فاتن: هع وش اكشكش
بدر:تسوين كدشك ذا اللي والله ماادري وشلون تمشطينه
"فاتن ناظرت لبدر بحب وابتسمت ,وقرب لها بدر وشالها دخلها على الحمام وطلع."

:::::::::::::::::::::::::




المستشفى




دخلت الحرمه اللي نادتها داليا وهي بعمر الخمسين للدكتور تشكي له حالتها وكانت معها بنتها الفاتنه بعمر 14 سنه..كاشفه وجهها وحاطه مكياج خفييف وعبايتها لافته بشكل كبير كانت تكلم بالجوال وتقول: ههه ليه البنات ماراح يجون؟؟
- اخاف نمل بالحالنا
- طيب من بيكون فيه؟؟
- واو خلاص اجل مري علي
- ههه طيب
- اسمعي الاستراحه قريبه وله بعيده ؟؟
- هه خلاص اجل بنفلها
- اوك ..باي

كل هذا وداليا ماشالت عينها عن البنت وقربت لها وهي تقول..
- مرحبا
البنت: اهلين.. "ووجهة نظرها للدكتور" هادكتور كيف ماما؟؟
د/احمد: تعرضت لجو بارد ,,بس بسيطه ان شاء الله
داليا: انتي وش اسمك؟
البنت:انا مها,وانتي؟
داليا:انا داليا
البنت:تشرفنا ,انتي سعوديه؟!!
داليا:ايه ..اقول مها
مها:هلا
داليا:صديقتك هذه اللي كنتي تكلمينها قبل شوي؟؟
ناظرتها مها باستغراب:ايه ليه
داليا:ابد بس سمعت انك بتطلعين معها لإستراحه لحالكم ,وحبيت اقول لك شي
مها:!!!!!
داليا: ابي اقول لك ان الثقه هالايام لازم نحتفض بها شوي, وانه مااحد يستاهل نعطيه الامان او نثق بأفعاله
مها:سوري بس انتي وش دخلك؟؟
داليا: انا انسانه جربت الخيانه وكان ودي اقول لك ان طعمها مر وقاسي
مها بإستخفاف:خلصتي؟؟
سكتت داليا وهزة راسها
مها: طيب حلو,يله ماما نروح الصيدليه
امها:اصبري شوي الله يصلحك.
مها:اقول دكتور
د/احمد اللي يعطي امها الوصفه:نعم؟
مها: هذه اللي معينها عندك مشرفه اجتماعيه ؟؟او ممرضه؟
د/احمد: كيف؟؟
مها: قول لها لاتدخل بشي مايخصها وتقوم بشغلها وبس
داليا اللي تضايقت منها: قلبي اللي قلته لك لمصلحتك, وانتي لك الخيار تسمعينه او لأ
مها:ههه سوري بس ..هذه اسمها لقافه
د/احمد اللي مو فاهم شي: داليا ممكن تنادي لي على المريض سالم محمد
داليا:اوكي
مها وهي عند الباب بدلع : باي دكتور
د/احمد اللي كاره وقاحتها مع داليا:.....
مها:ههههههههههه طبيعي تزعل
"حرك راسه احمد بالاستنكار وسكت على غبائها وكتب ملاحظاته بالملف..وهو يسمع لصوت ضحكها من السيب."



::::::::::::::::



نروح للسوق وجنونه..
وبمحل بيع الساعات تحديداَ





فاتن:طيب بكم هذه؟
البائع:دي عليها عروض حضرتك سعرها الاصلي 5000 وبعد الخصم ب3050,تحبي تقربيها
بدر:لا بعد لبسها لها وش رائيك
فاتن:يوه يابدر اهجد ولا تقعد تسوي لنا افلامك
"ناظر البائع لبدر بإستغراب"
بدر: لايعني عادي اللي يقوله ياالاخت
فاتن: بدر اف
بدر:ماتشوفينه وشلون ,امشي امشي مافيه شرى من هالمحل
طلعت فاتن قبل لايسوي لها فضييحه قدام الناس: انت متى تبطل هالحركات؟؟
بدر:يعني ماتشوفيه اشلون شوي ويلبسك اياها
فاتن:والله انه ماسوى شي.. ومحترم ويتكلم بكل احترام بس انت فيك عفريت غِيره
بدر وهو يهدي نفسه:شوفي محل يبيع فيه غير الهنود ماتدخلين سمعتي
فاتن:اصلا مستحيل ادخل ولا مكان خلاص ,انا طول عمري مااحب اصلا انزل معك السوق
بدر:احسن
فاتن:تدري شلون رجعني البيت
بدر وهو يتذكر:لا وش ارجعك البيت
فاتن:خلاص مليت
بدر:اوما مليتي يالنصابه,ادري زعلتي بس مفروض انك تعودتي خلاص
فاتن:مااحد يتعود على الفشله قدام الناس يابدر
بدر:ههههع خلاص ماعليه ,يله نروح نتعشى باي مطعم تبينه
فاتن وبإستهزاء:وش رائيك نروح بعد مطعم هندي؟
بدر:ههههه اذا تبين ايه ماافيه مشكله اكلهم لذيذ على فكره
فاتن:تعرفني مااحب الحار
بدر:خلاص اللي تبينه
فاتن:يااخي في شي غريب "اللي تبينه,اوكي,حاضر ,"لا لا هذا مو انت فيه شي
بدر:صراحه فيه موضوع وابي اكلمك فيه لي يومين بس كنت اشوفك ماانتي رايقه,وش فيك؟
فاتن:اا لا انا مافيني شي ,قل موضوعك وش عندك تبي سلف؟
بدر:هع
فاتن:او ممكن تبيني اشوف لك بنت الحلال؟
بدر:لا عاد هذه كثري منها
فاتن:اجل
بدر:بعد مانتعشى ونشرب لنا كفي نروق ,و اقول لك

:::::::::::::::::::::::



بيت اصاله







اصاله: محمد!!!
محمد:ههه ايه محمد يمه مو عفريت "وحب راسها"
اصاله:ههه بسم الله عليك ياقلبي لكن غريبه ووين زوجتك بالفندق؟؟
محمد:ايه نامت وانا ماقدرت اغفى لأن الكلام اللي ابي اقوله مو راضي يروح عن بالي
اصاله:أي كلام حبيبي؟؟
محمد:اه يمه اه
اصاله:سلامة قلبك من الاه وش فيك ياقلب امك؟؟
محمد: يمه لي 3 ايام مو قاد افكر غير باتصال فاتن
اصاله: لاحول ولاقوه الا الله
محمد: يمه انا احبها وابيها هي,والله ماابي غيرها
اصاله:خلاص هالكلام اللحين ماعاد ينفع ,كل شي انتهى وانا امك..انت اعرست وفاتن مطلقها وبالثلاث
محمد:يمه وش مطلقها بالثلاث !! اصلا الشيخ قال بانه ماينفع اطلقها ثلاث طلقات
اصاله: وشو؟؟
محمد:ايه الشيخ قال لي طلق وحده,وانا اقدر ارجعها بس بعقد جديد
اصاله:يعني!! والمطلوب؟؟؟
محمد:ابيك تكلمينها لأنها غيرت رقمها ,وابيك تقولين لها اني ابيها
اصاله:....
محمد:يمه انا اكلمك
اصاله:مو كلامك كلام مو صاحي, انا ماادري انت مهبول وله انجنيت ؟؟؟ في احد بالدنيا معرس له ثلاث ايام ويفكر بالزواج مره ثانيه؟؟؟
محمد:يايمه انا قلبي متعلق بفاتن ,ولاانا قادر اعيش بدونها
اصاله قلبت وجهها:...
محمد كمل: يمه في احساس انا مااني قادر اصيطر عليه,وفيه شي يخصها هي مايخص غيرها
اصاله:استغفر الله العلي العظيم
محمد:يمه تكفه كلميها
اصاله وهي تناظر لولدها اللي يوجعها قلبها عليه: ياحبيبي فاتن مستحيل ترجع لك
محمد:ليه يمه ليه؟؟ليه تقولين كذا؟؟
اصاله وهي تتذكر ان سمر صديقتها:اا
محمد:ايش؟؟
اصاله: لأن اا فاتن قالت لي
محمد:يمه في شي صح؟؟
اصاله:لا ابد مافيه الا العافيه,رح وانا امك لزوجتك ,لاتخليها لحالها الوقت متأخر
محمد:يمه,ليه ماانتي راضيه تريحين قلبي؟؟؟
اصاله:...
محمد:طيب عطيني رقمها الجديد اكيد انها معطيتك اياه
اصاله:محمد ولاتفكر تدق على البنت او تكلمها
محمد:طيب وش الحل ؟؟
اصاله: الحل انك تعيش حياتك بعيد عن فاتن,وتفكر بزوجتك وبس
محمد:هذا اخر كلام عندك
اصاله:....


"عرف محمد ان امه ماراح تساعده وفكر يكلمها بس بوقت ثاني ,عشان تفهم اصراره وحبه لها "


:::::::::::::::::::::::







يتبع.......