رقمتها وطلعت اميره
السلام عليكم
---------------------
كيفكم المصرقين و المصرقعات الاحياء منهم والاموات
مايحتاج نسوي مقدمه
اطمروا هذا السطر وانتبهوا على ركبكم البيضاء
---------------------------------------------------------------------------
هذا الموضوع برعاية حليب السعوديه
حليب السعوديه اذا كنت طفشانا.. اشرب حليب السعوديه اذا كنت تعاني من الحموضه ..
والهدف هو ارضاء المقيمين واهم شيء راحة الركاب والمسافرين
طبعا مثل ماقالوا المكتوب من عنوانه .
. يعني وانت تقرا الموضووع للوهله الاولى وش ضنك يعني اشرح لك كيف تعدفطيرة التفاح اكيد ترقيم يعني مغازل يعني سربته يعني قلة حيا..<<<< بايعها في هذا الموضوع
هذا ياطويل العمر وطول الله اذانيكم علشان تسمعون زين خلال خلال العطلات الجاية سافرت كثير (بعلمكم اني سافرت)
ماخليت باب ماطقيته ماخليت سوق مافريته ماخليت كوفي شوب ماارزحت عنده وكل هذا تحت عنوان((لازم اترك الانترنت وادمانه)).. بس الظاهر كلية الملك عبدالعزيز للعلوم والتقنيه مدخله مع خدمة النت هروين مخدر بس ماعلينا خلال الفتره الوجيزه هذه حدثت بلاوي .. انفجار في بريطانيا.. حتى حسني مبارك الله يستر عليه ماسلم قشوا احسن منطقه سياحيه << شرم الشيخ ... تدرون ليش لأني كنت حاجز على مصر وسبحان الله نفس الاسبوع صارت بلاوي يعني مثل ما قلت لكم الحظ عجه والجماعه قراطيس.. فقلنا يا ولد خل السياحه تكون داخليه
توجهت يوم الاربعاء بحفظ الله ورعايته من منزلنا الكائن بالشرقيه الا الرياض علشان منها نروح جده .. اخذت لي كم مخالفه على السريع هذي سرعه جنونيه وهذي عدم حمل رخصه. وهذي استماره منتهي ويلله شيل من الاوراق الصفر.. ولكن فيه واحد من العيال مخربها يمسح القسايم مدري كيف بس تراه يقرب لجندي اول في المطافي
المهم مره من المرارير سافرت جده انا مع ثلاثة من اصدقائي <<< اكيد معهم عبدالرحمن طبعا
بعد عناء .. وصلنا جده واستأجرنا شقه قلنا لازم نريح شوي لأن الليله معزومين في المطعم الايراني .. واحد من العيال عازمني((اكيد واحدمن العيال )) المهم بعد جهد جهيد اقنعت صديقتي اللي عزمتني اني اجيب اصدقائي اللزقات معي .. وانبسطوا ماشاء الله عليهم تقول اول مره واحد يعزمهم..
نمنا لين المغرب ..وعلى الحلاق وانواع التشطيب والسمكره.. تخبرون عاد الشباب السعودي لاجاء بيكشخ حط الحره كلها في هالخشه .((صنفره حلاقه عكس.. فرد شعر تقليم اضافر ))
رحنا لصديقتنا ا في المطعم استقبال حار هو وثلاث من اصدقاءه.. بالنسبه لي انا مبسوط واضحك.. اصدقائي اللي معي ساكتين فيها ولا واحد تتكلم بكلمه وحده ..
طبعا هالبنت ذي مرقمها في احدى الاسواق وتكلمني بالساعات وصراحه شكيت في امرها
ولما حضرنا للعشاء
حاجزه صالة افراح مب طاوله.. لدرجة ان العيال قاموا يصوروون الطاوله بيكشخون بها عند اخوياهم وشافتنا وقعدت تضحك .. اجل احد يصور كوب شاي علىطاوله؟
معلينا .. وصلت قافلة العشا اللي الله لايوريكم,, صراحه حسيت اني طول الاربع وعشرين سنه اللي راحت مااكلت شي .. العب على نفسي.. انواع الاكلات الشرقيه وا لايرانيه واللي مدري وش وانواع السلطات والحلويات الباريسيه((ليه عطر هي))
انا قليبي قام يطقطق من هالبنت حسيت انها على سنع مب مثلي اخر الشهر تلاقوني اتسلف من راعي البقاله اللي جنبنا
وهي دائما تسالني ليش ماتدق علي .. واقولها تخبرين شغل وعمل وحر وصيف وتخبرين . وتصدقني ماتدري ان مابقى ادق عليها خوفا من الفاتوره
بعد العشا مادرينا الا دخلوا علينا ثلاث زيتونات .. ياميره يأميره. قالت صديقتي نعم.. قالت الزيتونه الاولى ابو عبدالمجيد يقول انه بيطلع لندن الليله وبيجي بكره.. قالت الزيتونه الثانيه ..والاميره نوره دقت علي قالت ماني جايه الا بعد اسبوعين لانها في كندا ,,
الثالثه الظاهر حقت طلبات بس جايه معهن هديه مجانيه
يوم سمعت كلمة اميره.. طالعت في صديقي عبدالرحمن قلت والله الوهقه يلا مشينا .. جينا بنطلع ..مسكت الاميره يدي .. قلبي قرقع وحسيت بشعور ماهوب صاحي رجلي اليمنى نامت من زود الخجل
قالت ياخوي القمر اجلس معليك . .انا احبك..
يوم قالت احبك.. قلت اميره ويحق لها .. اما انها تحب منتف مثلي والله ماعندها ذووق
وينط واحد من العيال في اذني قال امحق حب هذا والله الذوق العدم مالقت الا انت
قالت سمو الاميره والله ماتروحون.. صراحه حسيت انها مثلنا ماتختلف عننا .انا اول احسب الامراء لهم حاجاتهم الخاصه وطريقة كلامهم حتى بعض الاحيان اقول ماهم اوادم مثلنا اكيد لهم حاجه تختلف عنا<<تفكير براءه
جلسنا معها صراحه انها حبوبه واخلاق .. ومن دلاختي مرقمها بالجوال العام اللي باسمي,, قالت لي قلي عاد وشو اسمك الحقيقي. لأني قايلها لؤي .. قلت صراحه اسسسمي خالد قعدت تضحك قالت خالد والا نواف ....!!
<<الله يعز الحكومه عرفت اسمي ..
تلخطبت قلت ايه صح وامي اسمها فلانه بعد
وللحين انا اكلمها والله اني متوهق ان تركتها لعنت خامسي وجابتني باي طريقه وان استمريت معها توهقت زياده ومدري شسوي احيانا اقول اني اتركها عليها واهاجر يمكن ماتعرفني.. واحيانا اقول اروح للاحوال المدنيه واغير اسمي يمكن ماتعرفني واحيانا اقول افلها معها واميره وانا امير مافيها شي,,
والله يستر لاتقرا موضوعي ذا بروح وطي ..حتى اذا كلمتها قبل كنت امون عليها (( . الله ياخذ نص وجهك.. اهبي اهبي.. وخري بس .. تلايطي))والحين لساني تعودعلى الله يرجك يلاميره والله انك ذوق ياطويلة العمر .. ولاتخلو مكالمه من عبارة ((الله يعز الحكومه)) بعلمها اني احب الوطن
قالت لي مره ابيك تسافر معي لرومانيا قلت انا ما معي جواز ((صرفها ))
شفتوا اني مهم واصرف اميرات <<من قدك ياشششششششششششششششششيخ
ومثل ماقلت
ترى كل السوالف اللي فوق كلها نسج الخيال والهدف الرئيسي هو رسم البسمه على شفاتكم
رد مع اقتباس
مواقع النشر (المفضلة)