يقول من عدا براس المنيفه
ولقا براسه للمعنين ميقاف
وحولت من راسه ونفسي معيفه
وفي راس مرقاب العنا هيض القاف
وفكرت بالدنيا بمره وكيفه
رسمه على اسمه ماتداوم بالانصاف
توريك نوب كيدها والنكيفه
والحنظليل ومرها يرعف ارعاف
ويطويك دولاب الدهر في لفيفه
يما على ماقيل ينشاف ماعاف
وترمي عليك من الامور الكليفه
ويزهد بحاله كل خير وعراف
ويسانعت دنياك شبة بليفه
وقام السعد لك بس يدعى بنواف
اغنم من الدنيا الامور الشريفه
لو داومت يوم توريك الانكاف
وعيش المعزه لو تكون بصريفه
اخير من قصر المذله والاتلاف
وازبن على حصن الرجال الشريفه
اللي بحزاة اللوازيم تنشاف
وبعض العرب مثل رواعيد صيفه
يرعد ولكن لامطر به ولا رياف
لو زان نبته مايكمل لصيفه
والناس تخبر من قديم لها أسلاف
وبنت الردى لاتجعله لك وليفه
لو كان زينه يافتى يخلف اخلاف
يجي ولدها مفتل تقل حيفه
لاشك من داخل جبان وخواف
خذ من عظام القوم يجي الخليفه
صميدع عند المهمات وقاف
وناس تقدر بس لاجل الوظيفه
ترفع جناب الهيس ناس لها اهداف
والصدق قام الكذب يضرب بسيفه
وغدا الكذوب اليوم من ضمن الاشراف
والذيب قلد في عداه وهريفه
وابا الحصين يغير والذيب ميلاف
ويالله
ويالله يامبري العيون الكفيفه
يامنزل سورة محمد والاحقاف
تفك بوب للاجاويد جيفه
وتفتح لهم باب على طول وقاف
اهل الوفاء واللي يرحب بضيفه
واللي على صدم المعادين منهاف
4/12/1418
وســــــــــــــلامتكم
مواقع النشر (المفضلة)