على كثر اتصالات الخلايق في صباح العيد
انا والله ما كنت آتحرّى غير جوّالك
تحريت إتصالك إنت يالغالي وبالتحديد
لآن العيد ما اظنه يجي وما جيت في بالك
تصوّر كيف مرّ العيد من تنكيد في تنكيد
وانا ما غير اهوجس بك وانادي وآتحرّالك
وجوّالي غدا مثلي تنهّد واكثر التنهيد
يقول: ابطى عليك وقلت: اكيد العلة ارسالك
وقمت اكذب على نفسي واقول بصيغة التأكيد
اكيد الحين بتكلم وانا ادري ما طرينالك
على ما يبدو اني كنت عن بالك بعيد ابعيد
حرام ارجوك صدقـــني انا ما استاهل افعـــالــك
ولكن لا تعوّدني على الفرقا ونار البيد
وانا عايش على خــبـرك نــعـيــــم وجــنــة وْصــالــك
جفاك اليوم قيّدني تعال وفكّ هذا القيد
وكلّمني وعايدني وقلّي إنــت وش حــــالـــك
ياليت العذر (فاتورة) عليك بحاجة التسديد
أخاف العذر هـي قولة: نسـيـته رقــم جــوالــك
.. وسلامتكم
تحدوه البشر
مواقع النشر (المفضلة)