سالفتي مع جدي عام 1900م
انا بخش بالسالفه بدون أي مقدمات ولا بروفات ولا أي شي بس أبي شوية تركيز وانتباه معاي لانه يبي يجي بالاختبار اووووووكي .وافصلو الخطوط وقفلو البيبان واربطو الاحزمه وشكرا معكم الكبتن مناحي بن مطلق
احم بسم الله ......
سيداتي سادتي مخدتي ووسادتي<اخلص اولااااه
السالفه ومافيها
قصه بدايتها جفا والخاتمه مامن جديد هع
لا هذي مقطع من اغنيه شاكيرا بشريطها الجديد اللي اسمه أبصملك على العشره .
المهم ياحلوين .
السالفه هذي من زماااااااان يوم انتم صغار في عام 1901 م .
سالفه بين شخصين حبيبين ومع الوقت صاروا عدوين ، انا وجدي طبعاً هو توفى في عام اممممممم 2005 م .
قالت لي عمتي يامواصل رح انت وجدك للشرقيه ودو التمر عند خوالك وعمامك طبعاً خوالي بحايل وعمامي بالرياض بس أول ماكنت فيه منطقه اسمها الرياض أو حايل ماكان فيه الا الشرقيه وام الجلاجل وراس ابو قميص ، تعرفون اول ماكان فيه فلوس فاللي يبغى يشتري قميص يروح لراس ابو قميص وفيه بعد راس معسل كل الانواع فله من جد فاتكم عصر أول مو الحين .
قلت لعمتي أبشري ولا يهمك انتي بس تامرين أمر قالت ايه يابعدي لان جدك ماحد بيروح معاه من اخوانك كلهم مسافرين لابو قميص ، كان يوم الخميس .
جا الجمعه صليت الجمعه في المسجد (( أجل في السوق )) ورجعت بيت عمتي انتظر جدي يطلع من المسجد لكن الرجال فلها استانس تكفى بالمسجد مابقى الا المفطح .
انا انتظرت وبصراحه مليت قلت خلني انام واذا جا يروح جدي اكيد يبي يصحيني ونمت وماقمت الا الساعه 4 العصر .
نزلت المجلس ياعتي وين جدي قالت راح الشرقيه وزعلان عليك ، (( طبعاً انا كنت بخنشليله سابقاً حايل حالياً )) والحقه بالطريق والحقه والحمد لله لقيته واكبس له بالنهار ، نهار أول غير نهار الوقت الحالي أول الشمس تحررررررررق حرق غير طبيعي وغير ادبي واداري ، واجي من عنده بالسياره وافتح الطاقه ياجدي وش فيك رحت وخليتني يقول انقلع يالخسيس انت منت رجل انقلع ، ياجدي امسك اعصابك ووقف نتفاهم ، والحمد لله وقف بعد عناء طويل ، قلت له خلنا نرجع نخلي سيارتك بالبيت ونروح بسيارتي عاد كلنا طقم دداسن تقول طقم فناجيل قهوه نالمهم قالي جدي تبي تروح معاي تعال بسيارتي مانت رايح هذا الطريق وبالطقاق اللي يطقك .
لبقت السياره على الطريق ، وركبت معاه ، اللي قااااااهرني انه يمشي 80 يعني سرعته 80 ويعني متى نوصل الشرقيه ، المسافه 1000 كيلو وعلى سرعتنا هذي نبي نوصل الساعه 9 الصباح خخخخخ .
المهم والسياره ترترترترتر يالله تمشي وجدي مستانس فيها ، وانا بيني وبينكم ودي ادخن بس خايف من جدي ، جا بعد ساعه بصراحه ماقدرت اتحمل ، قلت جدي قال نعم خير يالخسيس قلت هاه لا كنت بقول سالفه وطارت خلاص طارت ، جا بعد 10 دقايق قلت جدي قالي وش تبي يالخسيس قلت لا طارت خلاص طارت وخلاص ماهيب راجعه ، جا بعد 10 دقايق قلت بالعــــــــــــــــــــــــــــــــــربي أبي أدخن ، قال خذ راحتك ، قلت والله انك فله جدي تبي سيجاره وحده يوم بغى يشوتني بوز مع براطمه قلت لا امزح معاك جدي لا تصير على الريحه كل ماقلت لك شي صدقت ، قالي اقول يالله اخلص اشرب دخانك وخلصنا .
انا طبعاً يوم دخنت قدامه والوضع فري واطلع شريط محمد سليم وهو يغني wherever rwhenever عود . واشغل الشريط يوم طالع لي جدي وهو مععععععععععصب وربي نظراته ذكرتني بفلم الكرتون النينجا اللي ولد واخوه وجدهم بس موريهم شغلهم .
يوم دخلت الشريط جوا المسجل الا جدي يطلع الشريط ويرميه مع الطاقه ويقولي هذا اللي ناقص بعد أغاني ، مامداني اجلس خمس دقايق الا مطلع لي مزعل فرحان شريطه الجديد اللي يقول فيه شكنكري شكنكروا ، واطلع الشريط أنا من المسجل وافتح الطاقه وارميه على بال أبي افتك ويوقف جدي ويسد الطريق وينزل وياخذ الشريط ويطالع لي ويقول غدرتبي ياذيبان .وشغل بعدين شريط اشعار الله لا يوريكم قصايد مدري وش تبي صعبه اخذ الشريط وارميه مره ثانيه وربي لا يرميني ان رميت الشريط ، عاد جدي يغار على أي شي تبعه .
المهم
وصلنا الشرقيه الساعه 9 الصباح عطينا عمامي وخوالي التمر وافطرنا عندهم يوم قال خالي لجدي والله ان تنامون عندنا مانتم ماخذين شقه قال جدي ايه ماحنا ماخذين شقه ولا حنا ساكنين عندكم قال خالي ليه بتسكن بفندق ؟ قال جدي لا قال بشاليه قال جدي لا قال اجل وين ؟ قال جدي نبي نرجع ، يوم بغيت ادوخ واطالع لجدي وكأني طفشان انا داااااااااااايخ تراني وماقدر اتحمل قال مو مشكله نم بالسياره ولا دبر لك صرفه ، واقول لخالي أًصر عليه وصار خالي أصر يصر اصرار على جدي انه يجلس وجدي ألح يلح الحاحاً انه يمشي ، بالنهايه لاحياة لمن تنادي ماحد قدر يقنع جدي ، وصلنا للشرقيه طبعاً الساعه 9 افطرنا وطلعنا منها الساعه 8 الا ربع الصبح المهم (( مشي مشي)) .
جدي تعب بالطريق وقالي بالله أبيك تسوق قلت ولا يهمك واسوق وصلنا الرياض وطلعنا على طريق القصيم وحنا طالعين قال جدي ماودك ننام وكانت الساعه 9 الليل قالت والله براسك قالي انا بنام بالحوض وانت نم جوا السياره قلت لا ياجدي وش دعوه انا ذيب انت اللي خلك جوا وانا بنام بالحوض هاه يمين يسار المهم نمت انا بالحوض وهو جوا ، طبعاً انا على بالي ذكي أخذت المفتاح وحطيته بجيبي (( مخباي )) عشان تعرفون قطاعين طريق كثار .
جت الساعه 6 الصباح صحيت كان ودي اروح الخلا (( البدو يسمونه الخلا وحنا نسميه التواليت )) بس تواليت مو فل كامل وساده مافيه مويه ولا بانيو ولا شي انجز شغلك بأسرع وقت ، يوم صحيت ماحسيت بأي شي وانا بالحوض ، يوم جيت بنزل خلاص على وشك اني انزل من الحوض وحطيت رجلي على الصدام استعدادً للهبوط الا الخطوط حقت الطريق والتريلات والسيارات يرجعون على ورا ، ياولد وش السالفه الا السياره حقتنا تمشي واشوف جيبي الا فيه المفتاح !واغربالي وين جدي جونا قطاعين الطريق والتفت من يمين الطاقه الا واحد ماله لحيه وجدي له لحيه لونها برتقالي ، قلت مالي الا اطلع من فوق التنده واطل عليه (( اخوفه من الطاقه اللي قدام )) يوم طلعت فوق التنده وطليت الا هذا جدي واطالع له وانا فيني بكى ، ويطالع لي ويقول بكل برود صح النوم ، قلت الله لا يصحيك بالخير لا بارك الله فيك ولا في اللي يروح معاك مره ثانيه بغيت اموت بسبتك من وين لك المفتاح انا مغيبه بجيبي قال انا حاط سبير بدرج السياره ولقيته وشغلت السياره ، قلت بقلبي وانا على بال اني ذكي ومسوي فاهم هع يالله لك الحمد والشكر .
خلاص تعبت ولا ودي اكمل لان السالفه مالها نهايه ، بدايه بدون نهايه ولكم ان تتخيلون من عام 1901 م الى 2005 م يعني قرن كامل لها والى الحين السالفه يعني يبي لي مجلدات عشان اكتب السالفه .
على العموم اسفين على اني طولت عليكم وعسى انها تكون اعجبتكم السوووووووووووولافه هع .
مواقع النشر (المفضلة)