( ياهل الود ضيّعت الدليل

**بنت ابوي** · 19-10-2005, 03:58 AM

وهل تقبلين بزوج مدخن ؟!!!!
اقول تلايطي ولايكثر فيه احد قبل يأخذك غير المووووت !!
يعني من جدكم تشرطون هو بوه رجال علشان نقول نبي يدخن والا مايدخن
العوض ولاالقطيعه ولايكثر واحمدوا ربكم و اول واحد يطق الباب قولي موافقه وماجاك علي

المشهد اللي قبل المشهدين اللي بعده ...

السوالف اخذتني ونسيت اعلمك عن قصة حياتي وبالاخص عن خطبتي وعرسي
ياطويلين العمر انا كنت فتاة لاحول لي ولاقوة اخذت الشهادة ( رابع ابتدائي وتسمينها شهادة )
وتفرغت لشغل البيت والكنس والطبخ وتربية عيال اخواني عشت الامومه من صغر وكل هذا في سبيل انهم يقولون البنت كبرت وماباقي الا خير على العرس

مرت السنون ولاحولك احد وكل ماطق الباب رفعت شليلي ومايردني الا فتحت الباب اويدز على امل اشوف عريس الغفله ولا احس بنفسي الا وخوي يرجدني برجله ويقول قومي فشلتينا ما بقى رجل الا كشرتي بوجهه images9
واسدلت ثوبي على سيقاني المشعره وعدت واحلامي تطير ادراج الرياح وفيني طبع زين او شين لامكان للياس في مخيليتي ومامر ليله الا وانا معرسه على وزير او سفير (الله يقلع احلام اليقضه)

والسنين تركض والايام تروح وماعاد تجي ( بالله مر عليكم ايام تروح همن تجي ) والبزارين كبرو وصرت اتفشل من نفسي اذا سألو وقالوا عمتي وين عيالك وارد عليهم ووجهي يزرق ويصفر واقول اكلهم الذيب
واللي ضيق صدري وقهرني مره من المرات يجي ولد اخوي ويقول لقيت الذيب اللي اكل عيالك في كتاب المطالعه

بديت انطوي وكرهت غرفتي وصرت ارقد في السطح بل اني سويت نفسي منحاشه من اهلي ولميت قشي اللي موب من كثره في كيس زباله ورقيت السطح وحلفت ما عاد انزل وعيال اخوي يجيبون لي الاكل ( شعير وماء ) نعنبو مثلهم يحسبوني حمامه والا دجاجه وان اللقط في الحب واقول استاهل لوني لاحقه على المملكه واالا الفيصليه كان اعرست
بس صدقت فاله الشوشه لاقالت ما تضيق الا عند الله فرج جاء الفرج مع فرج ( ايه هذا اسمه )

كنت منعنشه وجالسه على حنفية المويه ( عايشه دور طير ) واغرد قرع الباب وللامانه اربع قرعات
وعيال اخوي السبع طعش يتسابقون على الباب وكل واحد يقول انا افتحه قبل وان اسدل عيوني واقول يازين البراءة ماعمري فكرت افتح الباب وانا بعمرهم ( همك العرس ) وافتحو الباب وانفتحت طاقة الحظ معه ...........

المشهد اللي بعد الأول ..

وصلنا عند طق الباب وأنا اغرد فوق الحنفيه والبزارين يتسابقون من يفتح الباب قبل
من تتوقعون اللي يطق الباب ورا ما نكمل بكره ( اقول انطمي وخلصي لا يشوتونك )

المهم الباب قرع اربع قرعات مبرحات وبزارينا افتحوا له وسأل وين خزان المويه وأنا ارقبّ حركاته من بعيد
وطالع في يدينه اللي يحلفون انها ادق من المسواك وكل هذا ماكان يعنيني وتوجه للخزان وبزارينا مازالو يتحلقون حوله واللي مدخل يده في مخباه واللي يجر نعاله والرجال صابر والصبر من الله طلّع في الغطا وراح يركض ورجع وهو يتل ليّ المويه طلع المسيكين اخوي متصل عليه يعبي لنا مويه خبركم حنا في جنوب الرياض يوم به ماء ويوم مابه وصادف هاك اليوم ترويش جماعي للي في البيت مادري وش مهببين
والمسيكين يكشف الغطا يبي يحط الليّ ودحومي ولد اخوي يعض الورده اللي في شرقيته تكعبل المسكين وطاح بالخزان انا شفت والا ماشفت حسيت اني قرندايزر ولازم اساعده نطيت من الحنفيه وركض ومن العجله ما نزلت الدرج تزحلقت على الدرابزين وما مداني الا انا قدام الخزان وانط بما اعطيت من قوه وما ذكرت اني ما عرف اسبح الا يوم وصلت الماء ( مسويه ذيبه على عماها )
اخر شي اذكره الدرابزين من الحماس نسيت اللي بعده صحيت واهلي يصفقوني ( نعنبو مثلهم جتهم من الله )
ويتكلمون عند راسي اللي يقول ماتت واللي يقول لا ما بعد ماتت فتحت عيوني ( مفتحه مسكره كله واحد)
ولقيت اهلي حولي ومعهم واحد معصقل ينفخ علي ويسمي حسيت بحنان اول مره احسه وطقيتها بتسوه
وأنا اجر خصله من شعري بحطها على وجهي علشان يطلع شكلي رومانسي وحلو ما مداني الا اهلي ساحبيني تقول يسحبون كيس رز
ويظهرون الرجال ويتشكرونه وانا لعنو جدفي ومردغوني وانتهت هجره لسطح وقالوا ما خربك الا الدلع اربع وعشرين ساعه بالسطح ( ستار بكس موب سطح ) وحاولت اتقلم مع الوضع الجديد وخاصه اني تعودت على الشعير وصاروا يدرجولي الجرعه لين تركته ورجعت امارس هوايتي القديمه في تربية عيال اخواني

لكن فيه تغير في حياتي اني بديت احب ولكم تعرفون ان الحب موب غريب علي لكن الحين صرت احب واحد في ارض الواقع اول احب عدنان ولا سنشيرو وفارس الفتى الشجاع واندريه العملاق
حبي الجديد كان منقذي من الموت اللي ضحيت بروحي علشانه وطلع هو اللي طاب في الخزان يبي يشوف المواصير وش فيها وانا احسبه طاح وهان علي اموت معه ولا يموت قدامي

عشت حياة ميب طبيعيه ( اكيد انتي موب طبيعيه ) لا من جد حياة مختلفه صرت اروح للملحق مكان اخوي وخوياه وجر على الربابه واتهيض لا جا طاري الحب وجلست على هالحال وفي احد تهيضاتي دق التلفون ورفعته بعد ماطاح التلفون وطاحت السماعه وانفصل السلك ورجعت وشبكته وقطعت الامل يكون اللي اتصل عنده امل ولكن طلع بثر شرواي
قلت الووووووووووو بصوت اجش ( مدربينها اخوانها ) :2ar: قفل الخط بوجهي قلت احسن اتصل مره ثانيه
ورديت باقل جشاشه من الاولى قال الو من معاي قلت انتي اللي متصل يا حمار من تبي مات ضحك وانا ضحكت ضحكه ينقصه الغنج وتجاجشت نفسي وقلت اخلص وش تبي قال خليني احزر من الصوت والاسلوب انتي الجامحة هنا ضحكت ضحكه فيها بعض الغنج ( خلاص عرف اني بنت لازم اتدلع )

رجع وقال الجامحة ما عرفتيني قلت تصدق ما كذبت يوم قلت انك حمار وشلون اعرفك وانا ما شوفك
قال الصوت ما اوحى لك بشي قلت ابد اللي اوح لي فيه قلته لك ( قصدها حمار ) ضحك وحسيت رجولته بتطلع من التلفون
( يعني رجال موب رجله ههههه ) الجامحة نععععععععععم أنا رجل الاعمال اللي جيت لبيتكم ياربيييييييييه اي رجل اعمال تذكري ياقلبي.. جعل قلبك للفقع احترم نفسك
قال خلاص خلاص تذكرين راعي صهريج المويه قلت الحين الوايت صار صهريج ولا وراعي الوايت رجل اعمال!! الله ياخذك ما كذبت يوم قلت انك
قطع كلامي وقال ترى من الصبح تحطميني وانا ساكت ولا علشان احبك تذليني ........

المشهد اللي بعد المشهد اللي بعد المشهد الأول ..

الحلقه الثالثه البطله في الحلقه اللي قبلها لابسه قميص اسود وفي الحلقه هذي لابسه قميص بني
خطا اخراجي بحت والبطل يتمسكن ويقول علشان تحبيني تذليني رديت عليه قلت موب معنى انقذ حياتك من الموت تحبني( مقتنعه انها هي اللي انقذته) ترا فيه فرق وخل العلاقه بينا رسميه

سالني وقال جموحتي وش رايك في الزواج عن طريق التلفون رديت مايصلح ازين شيء الواحد يعرس على مرته وياخذها لبيت لحاله ( تحسب يبتلون معرسين على التلفون ) قال الللللللللللللللله عليك انتي بنت عاقله كبر راسي وجلست اتميلح واشرح له الفت الشعر كعكه ( ابو التميلح اللي تعرفين ) وتعمقت في السوالف الين وصلت كيف تفرق بين البيض الخربان والصالح واستاذنت منه شوي ورحت جبت بيضتين وطاسه فيها ماء وجلست اشرح كيف البيض الخربان مايغطس وهو يسمع على التلفون وساله فهمت ويقول لا واعيد التجربه جلسنا ساعتين وانا اشرح وهو يقول عيدي الين دخل علي اخوي ومسك البيض وفقشه على راسي وشوتني من المجلس انا وطاستي

استمرت العلاقه وزاد حبه لي وانا صرت كل يوم احفظ طبخه جديده واعلمه فيها الين تطور الموضوع وصرت اشرح له كيف اعرف ان حفاظة البزر تحتاج التغيير وفائده حاسة الشم في مثل هالامور الين جا اليوم اللي طلب مني اساله عن نفسه فكرت وش اسأله مممممممممم قلت طيب من اللي جاب لك الوايت وكيف قدرت تخليه صهريج !! وهو يعلمني كيف بدا يكون نفسه وكيف اول شي شرى الكفرات الين عباه مويه واول بيت صب عندهم مويه وبعد ماطلع كتب ذكريات راعي الوتر ( راعي المويه يا جهله )

وبعدين صار يقولي وش نفسك يصير بينا قلت نفسي اطيح ثانيه في الخزان وتطلعني
قال هذا طموحك ما فيه شي يصير بين الحبايب تتمنين يصير معي قلت الا قال هااااااااااااااااااااااااه وشو
قلت ودي انك انت تطيح وانا اطلعك قفلت معه وقال مع السلامه
قلت ايه ازين خلني اروح اشم ولد اخوي قصدي اغير له

دارت الايام ومره يقول بطني يعورني ومره ضرسي ومره خدي ومره فمي وانا كل مره اقول روح الدكتور واذا ما تقدر اخلي اخوي يجيبلك ورقه لمستشفى الامن وهو يقول انتي ما تفهمين قلت لا افهم المريض يروح الدكتور قال طيب انتي قولي بطني يعورني قلت لا بطني ما يوجعني ولاشي قال قولي بس قلت اقول الفال الشين يجي مع الطاري جلس شهر يقنعني اقول بطني يوجعني ما قتنعت الين اوجعني بطني صدق والسبب العوامل الطبيعيه الشهريه قلت اي والله بطني يوجعني قال اموووووووووووووووووووووووه على بطنك على شان يطيب..
قلت هذي وشي!! قال بوسه قبعت فيه وسفلت فيه وقلت اخرتها ياقليل الحيا تقول لي كلام وصخ وقفلت بوجهه وقاطعته اسبوعين ومره الصبح داخله المطبخ ابي اسوي لي فطور فتحت الثلاجه وشفت البيض وتذكرت ايامنا وسواليفنا ( امحق ذكرى ) وتهيضت وقلت اروح الملحق اجر على الربابه كود يخف الولع وجلست اجر وتهيضت والدموع اربع اربع وولفت اغنيه كان مطلعها ..

يا بيض سلملي على وليفي
...... وقله تراني من فراقه اعاني
حبيبي راعي العقل الخفيفي
..... من فرقته يا بيض اكتب اغاني

وكانت هذي اول قصيده غزل اقولها ( خخخخخخخخخخ الله يلعن الغزل اللي تعرفين اجل كيف الهجاء ) :22ar:

وبينما الدموع تغطي خديّ المشهبين الا التلفون يدق ومثل المره اللي طافت طاحت السماعه والتلفون والسلك انقطع وبعد ماصلحت سمعته يشاهق ويقول سامحيني والله ما اعودها وما عاد اقول كلام وصخ
قلت احلف انك تتوب قل قسم

وانا ما عاد اقوى على فراقك خلاص اليوم العصر امي بتجي تخطبك انا هنا شهقت وطاح التلفون من يدي وما قمت الا على تبويس اييييييييييييييييه تبويس امي على غير عادتها تبوسني وتحاول تصحيني اثر العصر جا وبعده المغرب واهلي يوم راحت الحرمه قعدو يدوروني يبون يبشروني ان فيه احد فكر يخطبني وكتشفت التبويس موب لله اثر امي ناويه تسلف المهر مني بس ذيبه تخبروني قلت لفرج مابي مهر لعانه في امي ( بلا من حمارتك )

وفرج ماهو اسمه انا سميته فرج لانه فرج علي كربة العنوس وصرت من عداد المدامات ( يحلفون معرسه علشان السواق والشغاله يقولون لها مدام مثل حريم اخوانها ) وطلب المسكين شوفه شرعيه قبع اخوي فيه وقال مايكفي شوفة الخزان ترا حنا ساكتين من باب الستر والا انت وياها مشكوك فيكم ( يحسبونا متواعدين في الخزان ) :22ar:

وجت ليله العمر وانا اكاد اجن من الفرحه وقسمت اغراضي على عيال اخواني اللي عطيته ريموت قديم محتفظه فيه واللي معطيته دربيل لعبه كنت استخدمه للقزات البعيده واللي عطيتها بكلاتي الصفر كانت املاكي كثيره ولكن هذي اقيمها وفي هالليله كملت فرحتي وخاصه اني سويت تجربة البيض بالصوت والصورة ووصلنا لبيتنا وانا اخطط كيف اقضى اكثر وقت في هالبيت ( العالم تفكر في السفر ) بلا ما جاني بالساهل وصار خزان اهلي مزار لي انا وعيالي وكل ما شفته تعبرت وتحمدت وشكرت وقضت القصه..
( لاتعودينها ) تيب