لحظة .. لحظة وين رايح ؟
--------------------------------------------------------------------------------
لحظة .. لحظة وين رايح ؟ دقايق اسمعن
الغلا اللي لـك بقلبـي لـزوم ٍ تدركـه
عطني من وقتك وعقبه بكيفـك وادعـن
لاتسـرّع فـي قـرارك وقلبـي تتركـه
قول مافي خاطرك حـاول انـك تقنعـن
قبـل لاقلبـك دروب التجافـي يسلكـه
صمتك اللي في صميم المواجع روّعـن
الزعـل مابـه فوايـد ولافيـه ابركـه
لاتحيرنـي بكثـر الوعـود وتـزرعـن
لاتبـرر غايتـك فـي وسيلـه مهلكـه
يعني ناوي بهالسهوله تـروح وتخدعـن
رح ترى خطـة تغليـك صعـبٍ تحبكـه
تدري اني لو جفيتـك وقلبـي طاوعـن
والله انـه غيبتـك سببـت لـي دربكـه
الغلا والشوق والحـب لاجلـك يدفعـن
فيك ياللـي كـل معنـى جميـلٍ تملكـه
لاتلاقينـا زهـور المحـبـه فـرّعـن
كل ماهب الهـوى مـن ورودك حرّكـه
لاغفا جفن القمـر والسحايـب قشّعـن
نجمع افياش الليالـي ونـورك نشبكـه
لاتكاشف نور عينـك ورمشـك طالعـن
يانسيم الصبـح كلـك بعينـي شكشكـه
لهفتي والشوق وسـط الحنايـا ربّعـن
في بساتين الغلا ليـن صـارت مملكـه
بالوصل لملـم شتاتـي فراقـك مزّعـن
ياطشـاش النـور ليلـي تزايـد احلكـه
من سبب فرقاك خيل الهواجـس رثّعـن
في خيالي تالي الليـل ساحـه معركـه
كـل ماوجهـت حلـم الليالـي يتبعـن
عجزت الأيـام والوقـت عيـا يشبكـه
في هجير البعـد همـي بدمـي وزّعـن
مخفي الحسرة واشوف الملامح مضحكه
طحت من كثر االتعب ليت وصلك يرفعـن
ضيقةٍ مدري وش اللي بصدري ضككـه
المدامـع فـي عيـون المولـع نقّعـن
لاتذكرتـك طيـوف المحـبـه تفـركـه
اذكـرك بالخيـر حتـى لوإنـك بايعـن
ليت قلبك بالعطـا والمواصـل تشركـه
عذرك الواهي على حد ظلمـك واضعـن
التناقض واضحٍ فيـك صـدق وفبركـه
لوزماني في قسـاوة ظروفـي فزّعـن
لي مبادي ماتعـرف الخطـا والشربكـه
لوتشكّل بـي بـرود الحنـان ونوّعـن
لاتصدق بعض الأحيـان طبعـي تكتكـه
لوبغيت انساك كـل المشاعـر تمنعـن
الظنون اللي على البـال محـدٍ شككـه
الله اللـي بالوفـا والتسامـح طبّـعـن
ماتأثـرت بصفـات الغـدر والصعلكـه
شاعرٍ راياته البيـض مبطـي شرّعـن
له ثوابـت ماتنسّيـه روعـة منسكـه
مالقيت الا الصبر عقب هجـرك ينفعـن
حاجز الأوهام شوقـي لشوفـك فككـه
الأمل باقي وهـذا اللـي فينـي شجعـن
مانثنى عزمي لو إن السواعـد منهكـه
ارتجي متى على خيـر وقتـي يجمعـن
مع مواعيدك لـو انـه حقيقـه مربكـه
لــصــقـــر الــســلـــوة
مواقع النشر (المفضلة)